16-р хичээлийн багшийн материал

Аврагчийн агуу цагаатгагч золиосыг хүлээн авах нь

Есүс Христийн Цагаатгал нь Тэнгэрлэг Эцэгийн авралын төлөвлөгөөний гол цөм мөн. Энэ хичээлийн үеэр суралцагчид Есүс Христ “бүх л хүн төрөлхтний нүглийг цагаатгах” (“Амьд Христ: Төлөөлөгчдийн гэрчлэл, ChurchofJesusChrist.org) төлөөсийг төлсөнд нь талархах сэтгэлээ гүнзгийрүүлэх боломжтой. Тэднээс наманчлалыг илүү Христэд төвлөрсөн, амьдралынхаа баяр баясалтай хэсэг болгохын тулд юу хийж чадах талаараа эргэцүүлэн бодохыг хүсэх болно.

Заах зөвлөмж

Уналтаас болж бидэнд Есүс Христийн Цагаатгал хэрэгтэй болсон.

Заах, суралцах чадвараа сайжруулах

Сүнслэгээр суралцахад тохиромжтой орчныг бүрдүүл. Ерөнхийлөгч Боид К.Пакэр “сүнслэг өдөөлт нь амар амгалан орчинд илүү хурдан ирдэг (“Reverence Invites Revelation,” Ensign, Nov. 1991, 21) хэмээн заасан. Таны суралцах орчин эмх цэгцтэй, цэвэр цэмцгэр, тав тухтай юу? Ямар зүйлс суралцагчдын суралцах үйл явцад саад болж болох вэ? Тэдгээрийг хэрхэн багасгаж болох вэ? Суралцагчид ирэхдээ халуун дулаан мэдрэмж авдаг уу? Ариун дуу хөгжим эсвэл сайн мэдээтэй холбоотой зургууд суралцагчдад суралцахад бэлдэхэд нь хэрхэн туслах вэ?

Та дараах жишээг хуваалцсанаар хичээлээ эхлүүлж болно.

Логан Есүс Христийн Цагаатгалд талархдаг боловч амьдралд нь Аврагч шууд хэрэгтэй гэж боддоггүй. Тэр өөрийгөө зарлигуудыг ерөнхийдөө дагадаг, Сүмд үйлчилдэг, ямар нэгэн ноцтой гэм нүгэл үйлдээгүй сайн хүн учраас Их Эзэний Цагаатгал түүний нөхцөл байдалд тийм ч их хамааралгүй гэж боддог.

• Та Их Эзэний Цагаатгалын талаарх Логаны үзэл бодлыг хэрхэн тайлбарлах вэ? Логан Аврагчийн Цагаатгалын талаар ямар буруу ойлголтуудтай байна вэ?

• Уналтын талаар судлах нь Есүсийн Цагаатгалын талаарх Логаны бодолд хэрхэн нөлөөлж чадах вэ?

Ерөнхийлөгч Эзра Тафт Бэнсоний хэлсэн дараах мэдэгдлийг үзүүлж болно.

Уналтын сургаал болон бүх хүн төрөлхтөнд үзүүлсэн үүний нөлөөг ойлгож, хүлээн авах хүртлээ хэн ч өөрт нь Христ яагаад хэрэгтэйг зохих ёсоор ойлгож мэддэггүй. (A Witness and a Warning: A Modern-Day Prophet Testifies of the Book of Mormon [1988], 33)

Суралцагчдыг ганцаараа эсвэл өөр хэн нэгэнтэй хамтраад Адам, Ева хоёрын Уналтын зарим үр дагаврыг жагсаахыг хүс. (Суралцагчид тусламж хэрэгтэй бол бэлтгэх материалын 1-р хэсгийг эргэн харж болно.) Дараа нь тэднийг сурч мэдсэн зүйлсээ ангитай хуваалцуулахаар урьж болно. Суралцагчид хуваалцаж дууссаны дараа та доорх асуултуудаас нэг эсвэл хэд хэдийг түүн асууж, тэдэнд ойлголтоо гүнзгийрүүлэхэд нь тусалж болно.

• Яагаад бүх хүнд, Логан шиг “сайн”, “дуулгавартай” хүмүүст ч Их Эзэний Цагаатгалын шууд, байнгын хэрэгцээ байдаг вэ? (Тустай гэж үзвэл (2 Нифай 9:7–9-ийг унш. Суралцагчид дараахтай ижил төстэй зарчмыг тодорхойлж болох юм: Зөвхөн Есүс Христийн Цагаатгалаар дамжуулан бид сүнсний болон биеийн үхлийг давж чадна.)

• Биеийн үхэл, сүнсний үхэл нь ямар утгатай вэ? (Шаардлагатай бол бэлтгэх материалын 1-р хэсэг дэх ахлагч Д.Тодд Кристоффэрсоны мэдэгдлийг дахин уншиж болно. Иаков биеийн болон сүнсний үхлийг яагаад “аймшигт мангас” хэмээн дүрсэлсэн гэж та бодож байна вэ? (2 Нифай 9:10).

• Сүнсний болон биеийн үхлийг даван гарч болох цорын ганц зам нь Аврагч гэдгийг мэдэх нь танд Түүний талаар ямар бодол, мэдрэмж төрүүлж байна вэ? (Мозая 3:17-г үзнэ үү).

Бид наманчилж, гэтэлгэгдэж болохын тулд Есүс Христ Гетсеманид болон загалмай дээр зовж шаналсан.

Суралцагчдад тэднийг хичээлд бэлтгэхдээ Марк 14:33–37, Лук 22:43–44, Сургаал ба Гэрээ 19:18-ыг уншиж, өөрт төрсөн бодол, сэтгэгдлээ бичиж тэмдэглэхийг хүссэн гэдгийг сануул. Суралцагчдад эдгээр хэсгийг уншиж нягтлах цаг өг. Тэгээд тэднийг жижиг бүлгүүдэд хуваагаад, дараах тараах материалыг өгнө үү.

Есүс Христ биднийг аврахын төлөө зовж шаналсан

Есүс Христ ба Түүний үүрдийн сайн мэдээ: Багшийн материал—16-р хичээл

Дараах асуултуудыг уншаад, бүлгээрээ ярилцахыг хамгийн их хүсэж буй асуултууд дээр төвлөр.

1. Таны өмнөөс зовж шаналсан Аврагчийн зовлонг төсөөлөн бодоход Түүний талаар ямар бодол, мэдрэмж танд төрсөн бэ? Бидний төлөө зовж шаналахад бэлэн байгаа нь Түүний талаар юу заадаг вэ? (1 Нифай 19:9-г уншина уу.)

2. Аврагч загалмай дээр шаналж байхад Тэнгэрлэг Эцэг яагаад Сүнсээ татаж авсан бэ? (Марк 15:34 болон бэлтгэх материалын 2-р хэсэг дэх ахлагч Жэффри Р.Холландын мэдэгдлийг уншиж болно. Энэ нь ганцаардсан, мартагдсан, хаягдсан мэт санагдах үед маань Их Эзэний загалмай дээр амссан зовлонг санахад бидэнд хэрхэн тусалж чадах вэ?

3. Их Эзэний Цагаатгалын талаарх гэрчлэл маань бидэнд хувийн үнэ цэндээ эргэлзэх үед хэрхэн тусалж болох вэ? (Та Сургаал ба Гэрээ 18:10-11-ийг уншиж болно.) Есүс Христ ба Түүний цагаатгал дээр төвлөрөх нь бидэнд өөрсдийн ирээдүй, боломж бололцоог хэрхэн харахад яаж туслах вэ?

4. Бид наманчлахыг сонгох үедээ өөрсдөдөө болон Аврагчид ямар дохио өгч байдаг вэ? Биднийг наманчлах үед Их Эзэн яагаад баярлаж болох вэ? (Сургаал ба Гэрээ 18:13-ыг үзнэ үү).

5. Хэрэв хэн нэгэн Их Эзэний Цагаатгалын бодит байдлын талаар эргэлзэж байвал үүний талаар гэрчлэл олж авахын тулд тэр юу хийж болох вэ?

© 2023 by Intellectual Reserve, Inc. Бүх эрх хамгаалагдсан.

Есүс Христ биднийг аврахын төлөө зовж шаналсан

Есүс Христ ба Түүний үүрдийн сайн мэдээ: Багшийн материал—16-р хичээл

Суралцагчдынхаа хэрэгцээнд тулгуурлан, тэднээс хичээл дээрх хэлэлцүүлгийн үеэр сэтгэлд нь нөлөөлсөн зүйлийн тухай хуваалцахыг хүсэж болно. Эсвэл та дараах хоёр мэдэгдлийг танилцуулснаар наманчлалын зарчим дээр төвлөрч болно. Суралцагчдыг өөрсдийн наманчлах хэрэгцээг харахад аль нь тэдэнд хамгийн их хамаарч байгааг бодож үзэхийг зөвлө.

1. Наманчлал нь зайлсхийх хэрэгтэй ял шийтгэл юм шиг санагддаг.

2. Наманчлал нь баяр баясалтайгаар хүлээж авах ариун нандин бэлэг шиг санагддаг.

Суралцагчдад наманчлалд хандах хандлагаа тунгаан бодоход нь туслахын тулд бэлтгэх материалын 3-р хэсэгт буй ерөнхийлөгч Рассэлл М.Нэлсоны үгийг чанга унших талаар бодож үз. Дараа нь дараах үнэнийг тодорхойлоход нь суралцагчдад тусалж болно: “Наманчлал итгэлтэй нийлснээр Есүс Христийн Цагаатгалын хүчийг хүлээн авах боломжийг бидэнд нээж өгдөг” (“Бид илүү сайн үйлдэж, илүү сайн байж чадна,” 2019 оны 4-р сарын Ерөнхий чуулган, 77). Дараа нь дараах асуултыг тавь. Үүнд:

• Ямар арга замаар итгэл, наманчлал хоёр Аврагчийн хүчийг хүлээн авах боломжийг бидэнд нээж өгдөг вэ?

• Бид наманчлалыг ариун нандин бэлэг гэж харан, илүү баяр баясалтайгаар хүлээн авахын тулд юу хийж болох вэ?

Суралцагчдыг асуултад хариулсны дараа тэдэнд наманчлалыг амьдралынхаа илүү баяр баясалтай, утга учир бүхий хэсэг болгохын тулд хийж чадах зүйлээ бичиж тэмдэглэх цаг өгч болно.

Цаг гарвал хэдэн суралцагчийг наманчлал тэдэнд Аврагчийн цэвэршүүлэгч хүчийг хүлээн авахад хэрхэн тусалсан талаар хуваалцахыг хүсэж болно. Хуваалцахдаа өмнөх гэм нүглээ илчлэхгүй байхыг сануул.

Дараагийн хичээлээр

Суралцагчдыг 17-р хичээлд бэлдэхэд урамшуулан дэмжихийн тулд дараах зурвасыг илгээх талаар бодоорой. 17-р хичээлд бэлтгэх материалыг судлахдаа Аврагчийн хоосон булшны утга учрын талаар тунгаан бодоорой.