“Jonas, Pwofèt la,” Istwa Ansyen Testaman yo (2021)
“Jonas, Pwofèt la,” Istwa Ansyen Testaman yo
Jonas 1–4
Jonas, Pwofèt la
Aprann mete konfyans nan mizèrikòd Senyè a
Jonas sete yon pwofèt. Senyè a te di li pou l te avèti pèp Niniv la ke vil la t ap detwi si yo pa t repanti.
Men, pèp Niniv la sete enmi Izrayelit yo. Jonas pa t vle preche yo. Konsa li te monte sou yon bato pou l te navige al byen lwen Niniv.
Pandan Jonas te sou bato a, yon gwo tanpèt te leve. Mesye sou bato yo te pè pou lavi yo. Yo te mande Jonas pou l te priye Senyè a pou L te sove yo.
Jonas te konnen sete Senyè a ki te voye tanpèt la paske li t ap kouri al kache pou l pa t fè sa Senyè a te mande l pou l te fè a. Jonas te vle sove moun yo ki te sou bato a. Li te di, si yo voye l jete nan lanmè a, tanpèt la t ap sispann.
Mesye yo pa t vle voye Jonas jete. Yo te eseye navige bato a al sou tè, men tanpèt la te twò fò. Alafen, yo te voye Jonas jete nan lanmè a.
Tanpèt la te sispann. Men, lè sa a yon gwo pwason te vale Jonas.
Jonas te rete andedan vant pwason an pandan twa jou ak twa nuit. Pandan tan sa a, Jonas t ap priye epi l te repanti. Li te vle fè sa ki te byen epi koute Senyè a. Senyè a te tande priyè Jonas epi li te fè pwason an vomi Jonas deyò sou tè sèch.
Senyè a te mande Jonas ankò pou l t al preche pèp Niniv la. Fwa sa a Jonas te obeyi. Li te ale Niniv epi l te di pèp la pou yo te repanti, sinon Senyè a t ap detwi vil yo a. Wa a ak pèp li a te repanti. Senyè a te padone yo epi L pa t detwi Niniv ankò.
Men, Jonas te kontrarye paske pèp la pa t detwi. Li pa t panse yo te merite padon.
Pou L te anseye Jonas yon leson, Senyè a te fè yon pyebwa pouse pou bay Jonas lonbraj anba solèy la. Apresa pyebwa a te mouri, epi sa te fè Jonas mal pou pyebwa a.
Senyè a t ap anseye Jonas yon leson sou pitit Li yo. Jonas te aprann ke li ta dwe tris lè moun pa repanti epi li ta dwe kontan lè yo repanti.