Lesona 13 Anomea mo le Sauniuniga o le Vasega

O Le Faapotopotoina o Isaraelu i Aso Amulī

Na tautino mai e Peresitene Russell M. Nelson, “Ua faanatinatiina e le Alii Lana galuega e faapotopoto Isaraelu. O lena faapotopotoina o le mea aupito sili lea ona taua o loo tupu i le lalolagi i le taimi nei. E leai se isi mea e faatusalia le tele, e leai se isi mea e faatusalia i le taua, e leai se isi mea e faatusalia i le mamalu” (Russell M. Nelson ma Wendy W. Nelson, “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], faaopoopoga i le New Era ma le Ensign,8, HopeofIsrael.ChurchofJesusChrist.org). I le iunite lenei o le a e maua ai se avanoa e suesue ai i aoaoga iloga o le Tusi a Mamona i le faapotopotoina o Isaraelu, ma mafaufau pe faapefea ona aumaia e lenei galuega taua ia tagata ia Iesu Keriso. A o e suesue, vaavaai mo tiutetauave ma avanoa e mafai ona fai mo oe a o e auai i le faapotopotoina o Isaraelu.

Vaega 1

Aisea e taua ai le avea o se vaega o le aiga o Isaraelu?

Ina ia malamalama i le taua o le auai i le aiga o Isaraelu, e aoga le aoao i le ala na amata ai le aiga o Isaraelu. O se taimi ina ua mavae le 2000 TLM. na faaali atu ai Iesu Keriso ia Aperaamo ma osia se feagaiga e faavavau ma ia. Na tautino atu e le Alii ia Aperaamo ma Sara, o le a tuuina atu i a laua fanau ia faamanuiaga uma o le talalelei. O nei folafolaga ma faamanuiaga ua ta’ua o Feagaiga faa-Aperaamo. (Tagai Abraham 2:6–11; Taiala i Tusitusiga Paia, “Feagaiga FaaAperaamo,” scriptures.ChurchofJesusChrist.org.)

Na toefaafouina e le Alii lenei feagaiga ma le atalii o Aperaamo o Isaako ma le atalii o lona atalii o Iakopo. Na suia e le Alii le igoa o Iakopo ia Isaraelu. E toa 12 atalii o Isaraelu, o lana fanau na ta’ua o le aiga o Isaraelu po o sa Isaraelū. (Tagai Kenese 26:24; 28:10–15; Taiala i Tusitusiga Paia, “Isaraelu,” scriptures.ChurchofJesusChrist.org.)

O le aiga o Isaraelu o le nuu lea o le feagaiga a le Atua. Faatasi ai ma le pule o le perisitua paia, ua i ai ia i latou le tiutetauave e ave ai le talalelei a le Alii i tagata uma i le lalolagi ma ia mafai ona avanoa sauniga ma feagaiga taua ia i latou o e ua maliliu ae le’i maua le talalelei.

Pe a talitonu tagata moni e tupuga mai ia Isaraelu ia Iesu Keriso ma talia le feagaiga faaAperaamo, o le a faapotopotoina i latou i le aiga o Isaraelu ma avea ai o se vaega o le nuu o le feagaiga a le Alii. O i latou e le tupuga moni mai ia Aperaamo, Isaako ma Iakopo e mafai ona vaetamaina i totonu o le aiga o Isaraelu e ala i le faaalia o le faatuatua ia Iesu Keriso ma talia sauniga ma feagaiga o Lana talalelei (tagai i le Taiala i Tusitusiga Paia, “Vaetamaga,” scriptures.ChurchofJesusChrist.org).

O le saunoa atu i tagata o le Ekalesia, na aoao mai ai Peresitene Nelson:

O i tatou … o fanau o le feagaiga. Ua tatou maua ai, e pei foi o i latou o anamua, le perisitua paia ma le talalelei e faavavau. O Aperaamo, Isaako, ma Iakop o o tatou augatuaa. O i tatou o le aiga o Isaraelu. O loo ia i tatou le aia tatau e maua ai le talalelei, faamanuiaga o le perisitua, ma le ola e faavavau. O le a faamanuiaina malo o le lalolagi e ala i a tatou taumafaiga ma e ala i galuega a a tatou fanau. O le fanau moni a Aperaamo ma i latou o e ua faapotopotoina i totonu o lona aiga e ala i le vaetamaga, e maua foi nei faamanuiaga folafolaina—e faalagolago lea i le taliaina o le Alii ma usiusitai i ana poloaiga. (“Children of the Covenant,” Ensign, Me 1995, 33)

Mafaufau Loloto i Sauniuniga mo le Vasega

E faapefea ona e faamalamalamaina i se tasi e le o se tagata o le Ekalesia le aiga o Isaraelu ma le pogai e taua ai?

Vaega 2

Aisea e tatau ai ona ou auai i le faapotopotoina o Isaraelu?

Ina ua suesue e Liae ia papatusi apamemea, sa ia aoao atili ai e uiga i lona gafa ma lona tulaga i le aiga o Isaraelu (tagai i le 1 Nifae 5:14). Ina ia malamalama lona aiga i le taua o le avea ma se vaega o le aiga o Isaraelu, na faatusaina ai e Liae le aiga o Isaraelu i se laau o le olive. Sa ia faamalamalama mai, e pei lava ona mafai ona gagau ese mai se lala o le laau o le olive, o le a faapena foi ona vavae ese mai tagata o Isaraelu ma faataapeapeina i atunuu e mamao. Ma e pei foi ona mafai ona aumai se lala olive mai se tasi o laau ma sulu i ai ma avea ma se vaega o se laau ese, o le a iu foi ina faapotopotoina faatasi mai Isaraelu ua faasalalauina ma avea o se vaega o le nuu o le feagaiga a le Alii. (Tagai i le 1 Nifae 10:12–14.)

O le suluga o se faiga lea e tipi ese mai ai se lala mai se tasi o laau ona sulu lea i se laau e ese mai i se faiga e avea ai le lala ma se vega tumau o le laau.

Suesue e Sauniuni ai mo le Vasega

Faitau le 1 Nifae 10:12–14, ma mafaufau e faailoga upumoni e uiga i le faapotopotoina o Isaraelu. (Faamatalaga: I le Tusi a Mamona, o le upu Nuuese e masani ona faauigaina “o atunuu e le o i ai le talalelei, e ui lava atonu o loo i ai ni toto Isaraelu o loo i ai i tagata” [Taiala i Tusitusiga Paia, “Nuuese,” scriptures.ChurchofJesusChrist.org].)“

E le’i leva ona uma aoaoga a Liae i le faataapeapeina ma le faapotopotoina o Isaraelu, ae tau atu Nifae o fefinauai ona uso o le tasi ma le isi e uiga i mea na aoao atu e lo latou tamā. Sa latou fai atu ia Nifae latou te le malamalama i aoaoga a Liae e uiga “i lala moni o le laau olive, ma e uiga foi i Nuuese” (1 Nifae 15:7).

Suesue e Sauniuni ai mo le Vasega

Faitau i le faamalamalamaga a Nifae i le 1 Nifae 15:12–15, ma mafaufau e faailoga upumoni e fesoasoani e te malamalama lelei ai i le faapotopotoina o Isaraelu.

E uiga i le faapotopotoina o Isaraelu, na saunoa ai foi Peresitene Nelson:

Pe a tatou talanoa i le faapotopotoina, ua na ona tatou fai atu lava o lenei upumoni taua: o tagata uma o fanau a lo tatou Tama Faalelagi, i itu uma o le veli, e tatau ona faalogo i le savali o le talalelei toefuataiina a Iesu Keriso. (“Faamoemoe o Isaraelu,” 8)

O tagata taitoatasi e i itu uma o le veli e aofia ai i latou o e o loo ola ma i latou ua maliliu.

Tusifaamaumau Ou Lagona Uunaia

Faaalu se minute e tusifaamaumau ai pe na faamanuiaina faapefea lou olaga po o olaga o tagata o lou aiga e ala i le faapotopotoina o Isaraelu. Mafaufau i se tagata—i itu uma o le veli—o ē atonu e manaomia ona maua faamanuiaga o le talalelei toefuataiina a Iesu Keriso. Tusifaamaumau le igoa o le tagata lenei ma le mafuaaga e taua ai o ia ia te oe. Mafaufau i mea e mafai ona e faia e fesoasoani ai i lenei tagata ia maua nei faamanuiaga.

Vaega 3

E mafai faapefea ona ou auai i le faapotopotoina o Isaraelu?

Na aoao mai Iakopo, le uso laitiiti o Nifae, e uiga i le faataapeapeina ma le faapotopotoina o Isaraelu e ala i le sii mai o le talafaatusa a Senosa o laau o le olive fanua ma le olive vao. I le talafaatusa, o le Alii o le tovine ua faatusa ia Iesu Keriso, ae o auauna ua faatusa i Ana perofeta ma isi soo o e na valaauina e faapotopoto Isaraelu. O laau olive eseese na totoina i le tovine ua faatusaina i vaega o le fanau o le Atua, e aofia ai tagata o le aiga o Isaraelu. (See Jacob 5.)

Suesue e Sauniuni ai mo le Vasega

Faitau le Iakopo 5:61–62, 70–72, ma vaavaai mo le mea o loo faamoemoe mai le Alii ia i latou o e ua valaauina e faapotopoto Isaraelu.

Na faamalamalama mai e Peresitene Nelson, le faigofie o le fesoasoani e faapotopoto ia Isaraelu:

Soo se taimi e te faia ai soo se mea e fesoasoani ai i soo se tasi—i soo se itu o le veli—ia laa agai i luma i le osia o feagaiga ma le Atua ma maua o latou sauniga e tatau ai o le papatisoga ma le malumalu, ua e fesoasoani lea e faapotopoto Isaraelu. E faigofie lava. (“Faamoemoe o Isaraelu,” 15)

Fai se Fuafuaga

Mafaufau i le tagata—i soo se itu o le veli—na e tusi e uiga i ai i le vaega 2. Fai se fuafuaga faigofie o le mea o le a e faia e fesoasoani ai i le tagata lenei ia laa agai i luma i le osia o feagaiga ma le Atua. Mo se faataitaiga, atonu e te valaaulia se tagata i se gaoioiga a le Ekalesia, pe faasoa atu se mau i se tasi, pe e mafai foi ona e sii mai ma amata faaaoga le FamilySearch Family Tree mobile app. Matau pe fia meafaigaluega o loo i lenei polokalama e mafai ona fesoasoani e te faapotopoto ai Isaraelu po o fea lava o e i ai.

E Te Manao i Nisi Mea? (Tuu i le faitalia)

O fea e mafai ona ou aoao atili ai e uiga i mea ua aoao mai e le Tusi a Mamona e uiga i le faapotopotoina o Isaraelu?

Ina ua uma ona sii mai se valoaga a Isaia e uiga i le faapotopotoina o Isaraelu (tagai i le 1 Nifae 21:17–26), na faamatala mai e Nifae le ala o le a faataunuuina ai le valoaga a Isaia i aso e gata ai (tagai i le 1 Nifae 22:3–5, 8–12). E mafai ona outou faitau atili i le faataapeapeina ma le faapotopotoina o Isaraelu i le Iakopo 5. I le 3 Nifae 20:13, 29–31 tatou te faitau ai foi i upumoni taua na aoao atu e Iesu Keriso ia sa Nifae e uiga i le faapotopotoina o Isaraelu.

O le a le matafaioi a le Tusi a Mamona i le faapotopotoina o Isaraelu?

I le tusiga “O Le Tusi a Mamona, o le Faapotopotoina o Isaraelu, ma le Afio Mai Faalua” (Liahona, Iulai 2014, 26–31), o loo talanoaina ai e Peresitene Nelson le matafaioi taua o le Tusi a Mamona i le faapotopotoina o Isaraelu.

O le a se mea e mafai ona aoao mai e se faamanuiaga faapeteriaka e uiga i lo’u tulaga i le aiga o Isaraelu?

E mafai ona e aoao atili e uiga i le folafolaga o le tupuaga i faamanuiaga faapeteriaka i le tusiga i le Gospel Topics “Patriarchal Blessings” (topics.ChurchofJesusChrist.org).

I le vitio “Declaration of Lineage in Patriarchal Blessings” (1:48), o loo faamalamalama ai e Peresitene James E. Faust o le Au Peresitene Sili, le pogai e avea ai se folafolaga o le tupuaga o se vaega taua o se faamanuiaga faapeteriaka.