Lesona 17 Anomea mo le Sauniuniga o le Vasega

O le Auai i le Ekalesia a le Alii

O se vaega manaomia o le auaunaga a Iesu Keriso ia sa Nifae ma sa Lamana o le faatulagaina lea o Lana Ekalesia. Na saunoa le Faaola, e tatau ona faaigoa le Ekalesia i Lona igoa ma ia atiina ae i Lana talalelei (tagai i le 3 Nifae 27:7–9). Ao e sauniuni mo le vasega, mafaufau loloto i faamanuiaga e tuuina mai e le Alii ia i latou o e auai i Lana Ekalesia. Ao e mafaufau i na faamanuiaga, mafaufau i mea e mafai ona e faia e fesoasoani ai ia avea le Ekalesia o se nofoaga e taliaina fiafia ai mo fanau uma a le Atua.

Vaega 1

O a ni faamanuiaga e nao le Ekalesia lava a le Alii e mafai ona ou maua ai?

I le taimi o le asiasiga a le Faaola ia sa Nifae i le malumalu i Nuumau, sa Ia tuuina atu i Ona soo e toasefululua le pule o le perisitua ma faataga i latou e papatiso, tuu atu le meaalofa o le Agaga Paia, ma taitai Lana Ekalesia (tagai 3 Nifae 11:18–22; 12:1; 18:5, 37). Sa aoao foi e le Faaola ia sa Nifae e faapea, ina ia ulu atu i le malo o le Atua, e ao ona tatou salamo, talitonu ia te Ia, ma maua sauniga o le faaolataga ma le faaeaga ia e nao Lana Ekalesia lava ua ofoina mai ai, e pei o le papatisoga ma le faamauga (tagai 3 Nifae 11:32–41).

O le talanoaina ai o le faamoemoega o le Ekalesia a Iesu Keriso i aso anamua ma aso nei, na aoao mai ai Elder D. Todd Christofferson o le Korama a Aposetolo e Toasefululua:

O loo tumau pea le faamoemoega na i ai anamua: o lona uiga, o le talai atu o le tala fou o le talalelei a Iesu Keriso ma faatautaia ia sauniga o le faaolataga—i se isi faaupuga, ia aumaia tagata ia Keriso. (“E Manaomia i Se A Le Ekalesia,” Liahona, Nov. 2015, 108)

Mafaufau Loloto i Sauniuniga mo le Vasega

O a ni auala ua fesoasoani ai le auai i le Ekalesia ia te oe e te sau ai ia Iesu Keriso?

Vaega 2

E mafai faapefea ona fesoasoani le ai ma inu i le faamanatuga ia te a’u i a’u taumafaiga ia avea atili e pei o Iesu Keriso?

A o faaiuina e Iesu Keriso le aso muamua o Lana auaunaga i le nuu o Nuumau, sa Ia tuuina atu le faamanatuga i Ona soo e toasefululua ma tagata. Sa Ia toe faia lenei sauniga i le aso na sosoo ai ina ua mavae le tuuina atu faavavega o le falaoa ma le uaina. (Tagai 3 Nifae 18:1–9; 20:3–8.)

Suesue mo Sauniuniga mo le Vasega

Suesue le 3 Nifae 18:3–12 ma le 3 Nifae 20:8–9, ma mafaufau i le mea na aoao mai e Iesu e uiga i faamoemoega paia o le faamanatuga.

Na faamalamalama mai e Eder David A. Bednar o le Korama a Aposetolo e Toasefululua, le ala e mafai ai ona tatou maua i lenei sauniga le Agaga Paia e fai ma o tatou soa tumau:

O le sauniga o le faamanatuga o se valaaulia paia ma fai soo ia salamo faamaoni ma ia faafouina faaleagaga. … Ae a o tatou saunia ma le mafaufau loloto i ai ma auai i lenei sauniga paia faatasi ma se loto momomo ma le agaga salamo, ona maua lea o le folafolaga o le a mafai ona tatou maua pea le Agaga o le Alii e faatasi ma i tatou. Ma e ala i le mana faapaiaina o le Agaga Paia e fai ma a tatou soa tumau, e mafai ai ona tatou faatumauina pea se faamagaloga o a tatou agasala. (“Faatumauina Pea le Faamagaloina o a Outou Agasala,” Liahona, Me 2016, 61–62)

Na aoao mai Elder Christofferson, o le aai ma feinu i le faamanatuga e mafai foi ona fesoasoani tatou te taulai ai i le avea atili e faapei o le Faaola:

Ua faatusa le falaoa ma le vai i le tino ma le toto o Ia o le Areto o le Ola ma le Vai Ola [tagai Ioane 4:10], e faamanatu mai ai lava ma le loto nutimomoia ia i tatou le tau na Ia totogiina e togiolaina ai i tatou. …

… I se tulaga faafaatusa, o loo i ai se faauigaga sili atu o le aai i Lona tino ma feinu i Lona toto, ma o lena faauigaga o le teuloto o tomai ma uiga o Keriso, aveesea o le natura faaletagata ma avea ma Au Paia “e ala i le togiola a Keriso le Alii” [Mosaea 3:19]. A o tatou aai ma feinu i le falaoa ma le vai o le faamanatuga i vaiaso taitasi, o le a lelei lo tatou mafaufau pe o le a le atoatoa e tatau ai ona tatou faaaofia ai Ona uiga ma le mamanu o Lona soifua e aunoa ma se agasala i o tatou lava tagata. …

O le ‘aai i le tino o le Faaola ma feinu i Lona toto o lona uiga o le tuuese mai o tatou olaga soo se mea e le ogatusa ma se uiga faaKeriso ma avea Ona uiga faaleatua mo i tatou lava. (“O Le Areto Ola Na Alu Ifo Mai le Lagi” Liahona, Nov. 2017, 37, 39)

Tusifaamaumau Ou Lagona Uunaia

Na aoao mai Elder Dallin H. Oaks o le Au Peresitene Sili, “O le sauniga o le faamanatuga e avea ai le sauniga o le faamanatuga ma sauniga e aupito sili ona paia ma taua i le Ekalesia” (“Sauniga Faamanatuga ma le Faamanatuga,” Liahona, Nov. 2008, 17). Mafaufau e tusi i lalo ni nai faatinoga e mafai ona e faia ia avea ai le faamanatuga ma le sauniga faamanatuga o le vaega aupito sili ona paia o lau tapuaiga i le aso Sapati.

Vaega 3

O a ni mea e mafai ona ou faia e fesoasoani ai i tagata uma ia lagona e i ai se avanoa mo i latou i le Ekalesia a Iesu Keriso?

Ina ua uma ona faatautaia le faamanatuga ia sa Nifae ma sa Lamana, sa aoao atu e Iesu le taua o le avea o sauniga lotu ia taliaina lelei ai ma faaaofia ai tagata.

Suesue mo Sauniuniga mo le Vasega

Suesue le 3 Nifae 18:22–25, ma mafaufau e faailoga upu po o fuaitau o loo maua ai aoaoga a le Alii e uiga i ē e tatau ona tatou faaaofia i Lana Ekalesia.

Matamata le vitio “Lifting Others” (2:49), pe faitau lona tusiga lenei. I le vitio, o loo faasoa mai ai e Sister Carol F. McConkie, o le sa avea ma se fesoasoani i le Au Peresitene Aoao o Tamaitai Talavou, mea e mafai ona tatou faia ia mautinoa ai e lagona e tagata uma le taliaina i le Ekalesia a le Alii.

Na faasoa mai ai e Sister Carol F. McConkie, o le sa avea ma se fesoasoani i le Au Peresitene Aoao o Tamaitai Talavou, mea e mafai ona tatou faia ia mautinoa ai e lagona e tagata uma le taliaina i le Ekalesia a le Alii:

Ou te iloa ni tagata e o mai i le lotu i Aso Sa uma ina ia mafai ona musuia ma faagaeetia, ma ē e savavali ese ma lagona le faamasinoina ma le le alofaina, le manaomiaina. …

Ua manaomia le loloto o lo tatou nofouta e uiga i le faamoemoega o le sau i le lotu i le Aso Sa, ma ia mautinoa o tagata uma e o mai e lagona e alofaina, e manaomia, e taliaina, ma siitia.

Ua tofu tagata uma ma tauiviga lilo tatou te le o iloa, ma e taua tele lo tatou nofouta o tagata uma o siomia i tatou e alofaina e le Atua ma e manaomia ona tatou vaai atu ia i latou e ala i fofoga faapei o Keriso. E le tatau ona tatou faatagaina le faamasino atu e faomalo i le ala tatou te fegalegaleai ai ma tagata. …

E le ta’ufaatauvaaina e le talalelei a Iesu Keriso ia tagata. O tagata e ta’ufaatauvaaina tagata, ma e tatau ona tatou faaleleia lena mea. E ao ona tatou mataala ma alolofa ia i latou ma tuu atu ia i latou le avanoa e tuputupu a’e ai ma ia fuga mai ma avea ma ni tagata aupito sili o i latou lava. E i ai a latou taleni ma tomai ma uiga patino o loo manaomia i le malo o le Atua. Ma afai o le a tatou fauina le malo o le Atua i le lalolagi, tatou te manaomia tagata uma e o mai. (“Lifting Others” [vitio], ChurchofJesusChrist.org)

Mafaufau Loloto i Sauniuniga mo le Vasega

O le a se mea e mafai ona ou faia ia faateleina ai le agaga faauo ma le faaaofia e fesoasoani ai i fanau a le Atua ia latou lagona e i ai so latou avanoa i le Ekalesia a le Alii?

Manao Pea i Nisi Mea? (Tuu i le faitalia)

O a ni mea e mafai ona ou faia ia maua ai se aafiaga e sili atu le faaleagaga pe a ou ’ai ma inu i le faamanatuga?

I le vitio “Always Remember Him” (5:27), o loo talanoaina ai e Elder Jeffrey R. Holland o le Korama a Aposetolo e Toasefululua mea e mafai ona tatou faia ia faia ai le faamanatuga o se aafiaga e sili ona paia ma patino (mai le lauga “This Do in Remembrance of Me,” Ensign, Nov. 1995, 67–69). Na aoao mai foi Elder Holland e uiga i le taua paia o le faamanatuga i le lauga “Faauta o le Tamai Mamoe a le Atua” (Liahona, Me 2019, 44–46).

I le lauga “Faauta i le Tamai Mamoe a le Atua” (Liahona, Me 2019, 44–46), na talanoaina ai e Elder Jeffrey R. Holland o le Korama a Aposetolo e Toasefululua mea e mafai ona tatou faia ia avea ai le faamanatuga ma taulaiga o la tatou tapuaiga faalevaiaso.

Manatua Pea o Ia

O le faamanatuga o se sauniga lea e tagofia ai e tagata o le Ekalesia le falaoa ma le vai e faamanatu ai le ositaulaga a Iesu Keriso. E ala i lenei sauniga, e faafou ai e tagata o le Ekalesia ia feagaiga na latou osia ma le Atua i le taimi na papati

O le a se mea e mafai ona ou faia pe a ou le lagonaina le taliaina i le lotu pe afai foi ou te iloa se tagata e le lagona le taliaina lelei?

I le vitio “To Love Them All” (3:22), o loo tuuina mai ai e Elder Patrick Kearon o le Au Peresitene o Fitugafulu se fautuaga mo le mea e mafai ona tatou faia pe a tatou lagona le faaesea i le lotu.

O le tusiga “We Can Do Better: Welcoming Others into the Fold” (Ensign, Set. 2017, 38–43) o loo tuuina mai ai ni nai manatu mo auala e mafai ona e fesoasoani ai i tagata ia lagona lo latou auai i le ekalesia.

O le a le mea ua aoao mai e le Tusi a Mamona e uiga i ituaiga tagata ma aganuu?

Ina ia aoao atili e uiga i le savali faalotogatasi a le Tusi a Mamona i ituaiga tagata ma aganuu, faitau 2 Nifae 26:23–28, 33; Alema 5:33–34; Alema 19:36; ma le 4 Nifae 1:2, 15–17. E mafai foi ona e faitau i le tusiga “He Denieth None That Come unto Him” (Oke. 13, 2014, history.ChurchofJesusChrist.org) saunia e Brother Ahmad S. Corbitt, Fesoasoani Muamua i le Au Peresitene Aoao o Alii Talavou, pe matamata le vitio “Till We All Come in the Unity of the Faith” (2:22).

Aisea e taua ai le faaaoga o le igoa sa’o o le Ekalesia a le Alii?

Ina ia aoao atili e uiga i le taua o le faaaoga o le igoa sao o le Ekalesia a le Alii, suesue i le 3 Nifae 27:1–10 ma faitau le saunoaga a Peresitene Russell M. Nelson “O Le Igoa Sa’o o le Ekalesia” (Liahona, Nov. 2018, 87–90).