Lesona 19 Anomea mo Sauniuniga o le Vasega

Ola Amiotonu i Aso o le Amioleaga

Na aoao mai Peresitene Ezra Taft Benson o le Tusi a Mamona na te “faamalosia soo lotomaualalo o Keriso e tetee i faiga leaga, taupulepulega, ma aoaoga faavae a le tiapolo i o tatou aso” (“The Book of Mormon Is the Word of God,” Ensign, Ian. 1988, 3). I le iunite lenei o le a maua ai le avanoa e aoao ai i auala e faailoa ai e le Tusi a Mamona nei lamatiaga ina ia mafai ona e puipuia lelei ai oe lava. A o e suesue i le lesona lenei, vaavaai mo mataupu faavae e mafai ona fesoasoani e te ola amiotonu ai i aso o le amioleaga.

Vaega 1

E mafai faapefea ona ou tumau faamaoni i le Alii pe a ou feagai ma sauaga ona o le ola ai i le talalelei?

Ina ua nofoia e Helamana, le atalii o Helamana le nofoa faamasino, sa faapea ona oo ai sa Nifae i se vaitaimi o le filemu, ma e faitau sefulu afe tagata na auai i le Ekalesia. I le taimi o le faamanuiaina o le Ekalesia, sa faapea ona faamaualuluga nisi o le au paia ma amata ona sauaina soo lotomaualalo o Iesu Keriso. (Tagai Helamana 3:20–34.)

Suesue mo Sauniuniga mo le Vasega

Faitau le Helamana 3:33–35, ma vaai pe na faapefea ona tali atu soo lotomaualalo o Keriso i sauaga mai isi tagata o le Ekalesia.

Mafaufau Loloto i Sauniuniga mo le Vasega

Mafaufau i se taimi na e oo ai pe molimauina ai ni amioga faatiga po o ni upu faalealofa mai se isi tagata o le Ekalesia. Na faapefea ona e tali atu? O a ni mea e mafai ona e aoao mai i nei Au Paia lotomaualalo e uiga i le ala e feagai ai ma ia ituaiga o sauaga?

Vaega 2

E mafai faapefea ona ou amiotonu pe a siomia a’u e le amioleaga?

Sa feagai le perofeta o Mamona ma lona atalii o Moronae ma se taimi o le tetele o le amioleaga. Ona o agasala ma le le talitonu, na taofia ai vavega ma sa le toe i ai le Agaga Paia i tagata. Sa manumalo le mana o Satani i le nuu atoa. (Tagai Mamona 1:13–19.) I se tusi i lona atalii o Moronae, sa faamatalaina ai e Mamona le tulaga o le nuu ma faaiuina ai e faapea, sa matuai amioleaga lava i latou na faapea ona latou “aunoa ma le tu malamalama” (Moronae 9:11). O fetauaiga, taua, ma le faamasaatoto na lofia ai le laueleele a o faaauau ona fetauai le tasi ma le isi o sa Lamana ma sa Nifae. Mulimuli ane, sa manumalo sa Lamana, ma sa molimauina e Mamona ma Moronae le faatafunaina atoa o sa Nifae (tagai Mamona 2–6; 8:1–3, 7).

Suesue e Sauniuni ai mo le Vasega

Faitau le Mamona 1:1–2, 15 ma le Moronae 9:25–26, ma vaavaai ni mafuaaga na mafai ai e Mamona ma Moronae ona tumau faamaoni e ui lava ina sa siomia i laua e le amioleaga.

O le saunoa ai e uiga i le mana o le taulai atu i le Faaola i totonu o se lalolagi agasala, na aoao mai ai Peresitene Joy D. Jones, o le Peresitene Aoao o le Peraimeri:

Afai e malosi atu le toso a le lalolagi nai lo le tatou faatuatua ma le faalagolago i le Faaola, o lona uiga e manumalo lava la le toso a le lalolagi i taimi uma. …

… E ui e masani lava ina faigofie atu ona faavailolo faaleagaga nai lo le tuuina atu o le taumafaiga faaleagaga ina ia manatuaina ma opomauina lo tatou faasinomaga paia, ae e le mafai ona tatou faia lena uiga lamatia i nei aso e gata ai. Ia tatou “faamaoni ia Keriso; … ma talosia ia sii ae [i tatou] i luga e Keriso, ma talosia ia mau e faavavau i lou mafaufau ona mafatia ma lona maliu, … ma lona alofa mutimutivale ma le tali-tiga, ma le faamoemoe o lona mamalu ma le ola faavavau” [Moronae 9:25]. A o siitia i tatou e le Faaola i faavae maualuga atu, e mafai ona sili atu ona manino la tatou vaai e le gata po o ai i tatou ae o le a tatou latalata atili ia te Ia nai lo le mea tatou te mafaufauina. (“Ole Taua le Mafuatiaina,” Liahona, Nov. 2017, 15)

Na ofoina mai e Elder Neil L. Andersen o le Korama o Aposetolo e Toasefululua le molimau lenei i le ala o le a fesoasoani mai ai le Alii i e faamaoni i le feagai ai ma se lalolagi amioleaga:

O o tatou aso e le o ni aso sa le’i faamoemoeina, ma ua tuuina mai e le Alii mo lo tatou saogalemu faaleagaga. … Ao faateteleina le leaga i le lalolagi, o loo i ai se mana tauia o faaaliga ma meaalofa faaleagaga ua tuuina mai i e amiotonu. E tuu mai e le Alii ia i tatou le mana faaopoopo pe a tatou naunau e tumau i le amiotonu i se lalolagi amioleaga. (“A Classroom of Faith, Hope, and Charity” [o se afiafi faatasi ma se Pulega Aoao, Fep. 28, 2014], lds.org/broadcasts)

Tusifaamaumau Ou Lagona Uunaia

Faailoa mai se tagata po o se vaega o tagata i le Tusi a Mamona o e, e pei o Mamona po o Moronae, na fetaiai ma le amioleaga ae sa tumau faamaoni i le Alii. Ao e mafaufau i le faataitaiga lenei, vaavaai mo se mau e mafai ona tuuina mai ai se malamalamaaga loloto faaopoopo e uiga i lenei tagata (po o le vaega o tagata). Ona tusifaamaumau lea o ou manatu e uiga i fesili nei:

• E faapefea ona e faamatalaina le amioleaga na feagai ma lenei tagata (po o le vaega o tagata)?

• O le a se mea na faia e lenei tagata (po o le vaega o tagata) e mafai ona e faia ia tumau faamaoni ai i le Alii ao e feagai ma le amioleaga ma faaosoosoga o le lalolagi?

Sau saunia i le vasega e faasoa mai lau faataitaiga. Atonu foi e te sauni e faasoa atu se faataitaiga o se tasi e te iloa lelei o le sa fetaiai ma le amioleaga ae sa tumau faamaoni i le Alii.

Manao Pea i Nisi Mea? (Tuu i le faitalia)

O a ni auala e mafai ai ona faamanuiaina a’u e ala i le faamatuu atu o lo’u loto i le Atua?

Faitau ulutala o mataupu mo le Helamana 7–9. Ona faitau lea o le Helamana 10:1–5, ma vaavaai pe na faapefea ona faamanuiaina Nifae, le atalii o Helamana, ona o le usitai i le finagalo o le Alii.

I lana tautalaga “Gauai Atu o Tatou Loto i le Atua” (Liahona, Nov. 2015, 30–32), na aoao mai ai Sister Neill F. Marriott, o le sa avea ma se fesoasoani i le Au Peresitene Aoao o Tamaitai Talavou, le ala e mafai ona tatou faateleina ai lo tatou mana e ola amiotonu ai a o faamatuu atu o tatou loto i le Atua (tagai foi i le Helamana 3:35).

Aisea e taua ai le i ai o le lototele pe a fetaiai ma tulaga e le tusa ai ma aoaoga a Iesu Keriso?

I le vitio “Leave the Party” (6:26), o loo faasoa mai ai e Elder Gary E. Stevenson o le Korama a Aposetolo e Toasefululua se tala i se alii talavou o le sa faaalia le lototele amiotonu i le fetaiai ai ma faaosoosoga.

I lana saunoaga “Ina ia Tatou Maua Pea Lona Agaga e Faatasi ma i Tatou” (Liahona, Me 2006, 28–31), sa lapatai mai ai Elder David A. Bednar o le Korama a Aposetolo e Toasefululua e uiga i mea e mafai ona vavae ese ai i tatou mai le Agaga Paia (time code 4:40–7:24).

O fea e mafai ona ou aoao atili ai e uiga i le ala e maua ai se olaga fiafia i se lalolagi amioleaga?

I lana saunoaga “Auala e Ola Lelei Ai i le Lotolotoi o le Amioleaga” (Liahona, Me 2004, 100–102), na talanoaina ai e Elder Richard G. Scott o le Korama a Aposetolo e Toasefululua le ala e mafai ai i le taulai atu ia Iesu Keriso ona tuuina mai e le Faaola ia te oe “se olaga tamaoaiga ma le fiafia, tusa lava pe o a mea e tutupu i le lalolagi o loo siomia ai oe” (101).