۱ اَرفع اور تعجب انگیز کام بنی آدم کے درمیان میں رُونما ہونے والا ہے۔

۲ دیکھو، مَیں خُدا ہُوں؛ میرے کلام پر کان لگاؤ، جو کہ زِندہ اور موثّر ہے، دو دھاری تلوار سے زیادہ تیز، جو بند بند اور گُودے گُودے کو دو لخت کر کے گُزر جاتا ہے؛ پَس میرے کلام پر توجہ دو۔

۳ دیکھ، فصل کٹائی کے لیے پہلے ہی پک گئی ہے؛ پَس، جو کوئی کاٹنے کا خواہاں ہے، وہ پُوری قُوّت سے درانتی چلائے، اور دِن کے ختم ہونے تک کٹائی کرے، تاکہ وہ اپنی جان کی اَبَدی نجات کے لیے خُدا کی بادِشاہی میں جمع کر سکے۔

۴ ہاں، جو کوئی اپنی درانتی چلائے گا اور کاٹے گا، وہ ہی خُدا کی طرف سے بُلایا ہُوا ہے۔

۵ پَس، اگر تُو مُجھ سے مانگے گا تو پائے گا؛ اگر کھٹکھٹائے گا تو تیرے واسطے کھولا جائے گا۔

۶ میری صِیُّون کو سامنے لانے اور قائم کرنے کی کوشش کرو۔ ساری باتوں میں میرے حُکموں کو مانو۔

۷ اور، اگر تُو میرے حُکموں کو مانتا اور آخِر تک برداشت کرتا ہے تو اَبَدی زِندگی پائے گا، جو خُدا کی سب نعمتوں میں سے اعلیٰ و اَرفع نعمت ہے۔

۸ اور اَیسا ہو گا، کہ اگر تُو اِیمان سے میرے نام پر یقین رکھتے ہُوئے باپ سے مانگے گا، تو تُو رُوحُ القُدس پائے گا، جو گویائی بخشے گا، کہ تُو اُن باتوں کا گواہ بن جو تُو دیکھے اور سُنے گا، اور یہ بھی کہ تُو اِس پُشت میں توبہ کی مُنادی کرے گا۔

۹ دیکھ، مَیں یِسُوع مسِیح ہُوں، زِندہ خُدا کا بیٹا، جِس نے آسمانوں اور زمِین کو خلق کِیا، نُور جِس کو تارِیکی میں چھپایا نہیں جا سکتا؛

۱۰ پَس، مَیں ضرور اپنی اِنجِیل کی کامِلیت غیر قَوموں کے وسیلے سے اِسرائیل کے گھرانے تک لاؤں گا۔

۱۱ اور دیکھ، تُو ڈیوڈ ہے، اور تُو مدد کے لیے بُلایا گیا ہے؛ اگر تُو مدد کرتا، اور وفادار رہتا ہے، تو تُو رُوحانی اور دُنیاوی دونوں لحاظ سے با برکت ہو گا، اور تیرا اَجر عظیم ہوگا۔ آمین۔