Kull Ġens, Tribù, u Lsien
Aħna nistgħu nsiru bil-mod tagħna parti mit-twettiq tal- profeziji u l-wegħdiet tal-Mulej— parti mill-evanġelu li qed ibierek lid-dinja.
Għeżież ħuti, reċentement jien iffunzjonajt f’issiġillar tat-tempju, imwettaq skont il-linjigwida tal-COVID-19. Flimkien mal-għarusa u l-għarus, li t-tnejn servew missjoni b’mod fidil, kien hemm il-ġenituri tagħhom u ħuthom kollha. Dan ma kienx faċli. L-għarusa hija d-disa’ waħda minn għaxart itfal. Id-disa’ ħutha qagħdu bilqiegħda skont l-età, mil-kbir saż-żgħir, ovvjament b’distanza soċjali bejniethom .
Il-membri tal-familja dejjem ippruvaw ikunu ġara tajba kull fejn kienu jgħixu. Madankollu, kien hemm komunità li ma laqgħethomx sew—għax, omm l-għarusa qalet, li l-familja tagħhom kienu membri tal-Knisja ta’ Ġesù Kristu tal-Qaddisin tal-Aħħar Żmien.
Il-membri tal-familja għamlu minn kollox biex jagħmlu ħbieb l-iskola, biex jikkontribwixxu u jkunu aċċettati, iżda kollu għalxejn. Il-familja talbet u talbet li l-qlub jirtabu.
Lejla waħda, huma ħassew li t-talb tagħhom ġie milqugħ, għalkemm b’mod xejn mistenni. Id-dar tagħhom ħadet in-nar u nqerdet għal kollox. Iżda ġrat xi ħaġa oħra. In-nar rattab qlub il-ġirien tagħhom.
Il-ġirien u l-iskola lokali tagħhom ġabru ħwejjeġ, żraben, u neċessitajiet oħra meħtieġa mill-familja, li kienet tilfet kollox. It-tjubija wasslet biex jifhmu lil xulxin. Ma kienx il-mod kif il-familja ttamat jew stenniet li jinstama’ talbhom. Madankollu, huma jesprimu l-gratitudni tagħhom għal dak li tgħallmu permezz ta’ esperjenzi diffiċli u tweġibiet mhux mistennija għat-talb sinċier tagħhom.
Tassew, għal dawk li għandhom qalb fidila u għajnejn biex jaraw, il-ħniena tenera tal-Mulej turi ruħha qalb l-isfidi tal-ħajja. Sfidi ffaċċjati b’fedeltà u sagrifiċċju verament iġibu l- barkiet tas-smewwiet. F’din il-mortalità, għal xi żmien nafu nitilfu jew nistennew li niksbu xi affarijiet, iżda fl-aħħar insibu x’inhu l-aktar importanti.1 Dik hi l-wegħda tiegħu.2
Il-proklamazzjoni biċentenarja tagħna tal-2020 tibda bil-wegħda profondament inklużiva li “Alla jħobb lil uliedu f’kull ġens tad-dinja.”3 Għal kull wieħed minna f’kull ġens, tribù, ilsien, u poplu,4 Alla jwegħidna, jagħmel patti magħna, u jistedinna biex nieħdu sehem mill-ferħ u t-tjubija abbundanti Tiegħu.
L-imħabba ta’ Alla għan-nies kollha hija affermata tul l-iskrittura kollha.5 Dik l-imħabba tiġbor fiha l-patt Abrahamiku, il-ġabra ta’ wliedu mferrxin,6 u l-pjan tiegħu ta’ ferħ f’ħajjitna.
Fid-dar tal-fidi m’għandux ikun hemm stranġieri jew barranin,7 sinjuri u foqra,8 jew barranin “oħra”. Bħala “ċittadini flimkien mal-qaddisin,”9 aħna mistednin nibdlu lid-dinja għall-aħjar, minn ġewwa ’l barra, persuna persuna, familja familja, inħawi wara nħawi.
Dan jista’ jseħħ meta ngħixu u naqsmu l-evanġelu ma’ ħaddieħor. Fi żminijiet bikrin ta’ din id-dispensazzjoni, il-Profeta Joseph irċieva profezija meraviljuża li l-Missier tas-Smewwiet jixtieq li kulħadd kullimkien jiskopri l-imħabba ta’ Alla u jesperjenza l-qawwa tiegħu biex jikber u jinbidel.
Dik il-profezija ġiet mogħtija hawnhekk, fid-dar taz-zkuk tal-familja Smith f’Palmyra, New York.10
Tlestiet fl-1998, id-dar ta’ Smith hija rikostruwita fuq il-pedament oriġinali tagħha. Il-kamra tas-sodda fit-tieni sular tokkupa l-istess 18 x 30 x 10 piedi spazju fiżiku fejn Moroni, bħala messaġġier glorjuż minn Alla, ġie jżur liż-żagħżugħ Joseph fil-lejla tal-21 ta’ Settembru, 1823.11
Tiftakru dak li rrakkonta l-Profeta Joseph:
“[Moroni] qal … Alla kellu xogħol għalija xi nwettaq; u li ismi se jkun imlissen kemm fit-tajjeb kif ukoll fil-ħażin fost kull ġens, tribù, u lsien. …
“Moroni qal li kien hemm ktieb iddepożitat, … li l-milja tal-Evanġelu etern kien fih.”12
Hawnhekk nagħmlu pawża. Aħna nqimu lil Alla il-Missier Etern u Ibnu, Ġesu Kristu, mhux lill-Profeta Joseph u lanqas lil xi ħadd mortali raġel jew mara.
Madankollu, ikkunsidraw kif il-profeziji li Alla jagħti lil qaddejja tiegħu jiġu fis-seħħ.13 Xi wħud iseħħew qabel, oħrajn aktar tard, iżda kollha jiġu fis-seħħ.14 Hekk kif nagħtu widen tal-ispirtu ta’ profezija tal-Mulej, aħna nistgħu nsiru, bil-mod tagħna, parti mit-twettiq tal- profeziji u wegħdiet tiegħu—parti mill-evanġelu li jbierek lid-dinja.
Fl-1823, Joseph kien żagħżugħ mhux magħruf ta’ 17-il sena li kien jgħix f’raħal ukoll mhux magħruf, f’pajjiż li kien għadu kif ħa l-indipendenza tiegħu. Kieku ma kinex qed jgħid il-verità, kieku kif kif setgħet tgħaddilu minn moħħu li jgħid li kien se jkun strument fil-ħidma ta’ Alla u li se jkun qed jjittraduċi permezz tad-don u l-qawwa ta’ Alla skrittura sagra li ssir magħrufa ma’ kullimkien?
Madankollu, minħabba li huwa veru, jien u intom nistgħu naraw b’għajnejna dik il-profezija tiġi fis-seħħ anke hekk kif aħna mistednin ngħinu biex dan iseħħ.
Ħuti, madwar id-dinja, kull wieħed minna li qed jipparteċipa f’din il- konferenza ġenerali ta’ Ottubru 2020 huwa parti mill-ġnus, tribujiet, u ilsna li saret referenza għalihom.
Illum, membri tal-Knisja ta’ Ġesù Kristu tal-Qaddisin tal-Aħħar Żmien jgħixu f’196 ġens u territorju, bi 3,446 utied tal-Knisja f’90 minnhom.15 Aħna nirrappreżentaw medda sħiħa ġeografika fejn in-numru ta’ membri jvarja ħafna.
Fl-1823, min kien jimmaġina li fis-sena 2020 kien se jkun hemm tliet pajjiżi kull wieħed b’aktar minn miljun membru ta’ din il-Knisja—l-Istati Uniti, il-Messiku, u l-Brażil?
Jew 23 pajjiż, kull wieħed b’aktar minn 100,000 membru tal-Knisja—tlieta fl-Amerika ta’ Fuq, erbatax fl-Amerika Ċentrali u t’Isfel, wieħed fl-Ewropa, erbgħa fl-Asja, u wieħed fl-Afrika? 16
Il-President Russell M. Nelson isejjaħ il-Ktieb ta’ Mormon “miraklu mirakoluż.”17 Ix-xhieda tiegħu jixhdu, “li għandu jkun magħruf lil kull ġens, tribù, ilsien, u poplu.”18 Illum, il-konferenza ġenerali hija disponibbli f’100 lingwa. Il-President Nelson xehed dwar Ġesu Kristu u l-evanġelu rrestawrat tiegħu f’133 ġens, u n-numru qed ikompli jikber.
Minn meta ġew stampati l-ewwel 5,000 tal-ewwel edizzjoni tal-1830 tal-Ktieb ta’ Mormon ’l hawn, madwar 192 miljun kopja tal-Ktieb ta’ Mormon jew ta’ partijiet minnu ġew ippubblikati f’112 lingwa. It-traduzzjonijiet tal-Ktieb ta’ Mormon huma disponibbli wkoll b’mod diġitali. Traduzzjonijiet kurrenti tal-Ktieb ta’ Mormon jinkludu l-biċċa l-kbira mit-23 ligwi tad-dinja mitkellma minn 50 miljun persuna jew aktar, li kollettivament hija l-ilsien nattiv ta’ xi 4.1 biljun ruħ.19
Permezz ta’ ħwejjeġ żgħar u sempliċi - li fihom aħna lkoll mistiedna nipparteċipaw—jiġu fis-seħħ ħwejjeġ kbar.
Per eżempju, waqt konferenza tal-wited f’Monroe, Utah, b’popolazzjoni ta’ 2,200, jien staqsejt kemm kien hemm li servew missjoni. Kważi kulħadd għolla idu. Fis-snin riċenti, minn dak il-wited partikolari, 564 missjunarju servew f’kull wieħed mill-50 stat Amerikan u fi 53 pajjiż—f’kull kontinent ħlief l-Antartika.
Hekk kif qed insemmu l-Antartika, anke f’Ushuaia fl-aktar parti mbiegħda tan-Nofsinhar tal-Arġentina, rajt profezija tiġi fis-seħħ hekk kif il-missjunarji tagħna qasmu l-evanġelu rrestawrat ta’ Ġesù Kristu f’post imsejjaħ “it-tarf tad-dinja.”20
Il-murali ffurmati mill-qoxra tal-erba’ volumi ta’Saints21 juru arazzi globali tal-frott tal-għajxien tal-evanġelu li qed jesperjenzaw il-Qaddisin fidili ma’ kullimkien. L-istorja tal-Knisja tagħna hi ankrata fit-testimonjanza ħajja u l-vjaġġ tal-evanġelu ta’ kull membru, inkluż Mary Whitmer, l-oħt fidila li lilha Moroni wrieha l-pjanċi tal-Ktieb ta’ Mormon.22
F’Jannar 2021 ħierġin it-tliet rivisti ġodda globali tagħna tal-Knisja—Friend, For the Strength of Youth, u l- Liahona—nistiednu lil kulħadd biex jappartjeni u jaqsam esperjenzi u testimonjanzi fil-komunità ta’ fidi dinjija tagħna.23
Ħuti, hekk kif nikbru fil-fidi tagħna fil-Missier tas-Smewwiet u Ġesù Kristu, nirċievu l-barkiet misjuba fl-għixien tal-veritajiet tal-Evanġelu restawrat u patti sagri, u nistudjaw, naħsbu, u naqsmu dwar dak ir-Restawrli għaddej kontinwament, inkunu qed nipparteċipaw fit-twettiq tal- profezija.
Aħna qed nibdlu lilna nfusna u lid-dinja f’mudell evanġeliku li jbierek lill-ħajjiet ma’ kullimkien.
Waħda oħt Afrikana tgħid, “Is-servizz tas-saċerdozju tar-raġel tiegħi jagħmluh aktar paċenzjuż u twajjeb. U jien qed insir mara u omm aħjar.”
Konsulent tan-negozju internazzjonali fl-Amerika Ċentrali li llum irrispettat sew, jgħid li qabel ma skopra l-evanġelu rrestawrat ta’ Alla, kien jgħix bla ebda skop jiġġerra fit-triq. Issa hu u l-familja tiegħu sabu identità, skop, u qawwa.
Tifel żgħir fl-Amerika t’Isfel irabbi t-tiġieġ u jbigħ il-bajd tagħhom biex jgħin jixtri t-twieqi għad-dar li qed tibni l-familja tiegħu. Hu jħallas l-ewwel id-dieċmi tiegħu. Hu litteralment se jara bwieb is-sema jinfetħu.
Ġewwa Four Corners, komunità fil-Lbiċ tal-Istati Uniti, familja nattiva Amerikani tkabbar arbuxell li jagħmel ward fost l-isbaħ li tiffjorixxi fid-deżert, li tissimbolizza l-fidi tal-evanġelu u awto-dipendenza.
Membru tal-Knisja li ħa sehem f’gwerra ċivili mill-aktar kiefra fix-xlokk tal-Asja b’disperazzjoni ddeċieda li l-ħajja ma kellha l-ebda tifsira. Hu sab it-tama f’ħolma li fiha ħabib li kellu fil-klassi kien qed iżomm f’idu kontenitur tas-sagrament u xehed dwar l-ordinanzi tas-salvazzjoni u l-Espjazzjoni ta’ Ġesù Kristu.
Missierna tas-Smewwiet jistedinna kullimkien biex inħossu l-imħabba tiegħu, biex nitgħallmu u nikbru permezz tal-edukazzjoni, tax-xogħol onorabbli, tas-servizz awto-dipendenti, u ta’ mudelli ta’ tjubija u hena li nsibu fil-Knisja rrestawrata tiegħu.
Hekk kif nibdew nafdaw f’Alla, xi drabi billi nitolbuh fl-aktar mumenti mudlama, solitarji, u inċerti tagħna, nitgħallmu li Hu jafna aħjar u jħobbna aktar milli nafu jew inħobbu lilna nfusna.
Għalhekk neħtieġu l-għajnuna ta’ Alla biex noħloqu l-ġustizzja, l-ugwaljanza, it-tjubija, u l-paċi dejjiema fi djarna u fil-komunitajiet tagħna. L-aktar narrattiva, post u appartenenza leali, profondi u awtentiċi niksbuhom meta nħossu l-imħabba feddejja ta’ Alla, infittxu l-grazzja u l-mirakli permezz tal-Espjazzjoni ta’ Ibnu, u nistabbilixxu relazzjonijiet dejjiema permezz ta’ patti sagri.
It-tjubija reliġjuża u l-għerf reliġjuż huma meħtieġa fid-dinja konfuża, storbjuża, u mniġġsa tal-lum. Kif inkella nistgħu nġeddu, nispiraw, u nedifikaw l-ispirtu uman?24
It-tħawwil tas-siġar f’Ħaiti huwa wieħed biss fost mijiet ta’ eżempji ta’ nies li jingħaqdu flimkien biex jagħmlu l-ġid. Il-komunità lokali, inklużi 1,800 membru tal-Knisja tagħna, li taw is-siġar bħala donazzjoni, inġabru flimkien biex iħawlu kważi 25,000 siġra.25 Dan il-proġett ta’ riforestazzjoni fuq medda ta’ snin diġà wassal biex tħawlu ’l fuq minn 121,000 siġra. Hu antiċipat li jitħawlu għexieren ta’ eluf oħra.
Dan l-isforz magħqud jipprovdi d-dell, jikkonserva l-ħamrija, u jnaqqas l-għargħar fil-futur. Isebbaħ il-lokal, jibni l-komunità, jissodisfa l-gosti, u jsostni r-ruħ. Jekk tistaqsi lin-nies ta’ Ħaiti min se jiekol mill-frott ta’ dawn is-siġar, jgħidulek, “Kull min hu bil-ġuħ.”
Madwar 80 fil-mija tal-popolazzjoni tad-dinja hi affiljata ma’ xi reliġjon.26 Komunitajiet reliġjużi jirrispondu faċilment għall-bżonnijiet immedjati wara diżastri naturali, kif ukoll għal bżonnijiet kroniċi għall-ikel, kenn, edukazzjoni, litteriżmu, u taħriġ fl-impjiegi. Madwar id-dinja, il-membri, il-ħbieb, u l-Knisja tagħna jgħinu lill-komunitajiet jissapportjaw lir-refuġjati u jipprovdu ilma, sanità, mobbiltà għal dawk b’diżabilità, u kura tal-għajnejn— persuna persuna, raħal wara raħal, siġra siġra.27 Kullimkien, aħna nfittxu li nkunu ġenituri u ċittadini twajbin, li nikkontribwixxu fil-lokalitajiet u s-soċjetajiet tagħna, inkluż permezz tal-Karitajiet tal-Qaddisin tal-Aħħar Żmien.28
Alla jagħtina l-volontà morali—u l-kontabilità morali. Il-Mulej jiddikjara, “Jien, il-Mulej Alla, neħilsek, għalhekk int ħieles tassew.”29 Meta jiddikjara “ħelsien lill-imjassrin,”30 il- Mulej iwiegħed li l-Espjazzjoni tiegħu u t-triq tal- evanġelu jistgħu jkissru l-ktajjen temporali u spiritwali.31 Bil-ħniena, dan il-ħelsien feddej hu estiż għal dawk li ħallew din il-mortalità.
Xi snin ilu, qassis fl-Amerika Ċentrali qalli li kien qed jistudja “il-magħmudija għall-persuni mejtin” tal-Qaddisin tal-Aħħar Żmien.” “Tidher ħaġa ġusta,” qalli l-qassis, “li Alla joffri lil kull persuna opportunità li titgħammed, irrispettivament meta jew fejn għexet, ħlief għat-tfal iż-żgħar, li ‘huma ħajjin fi Kristu.’32 L-Appostlu Pawlu,” innota l-qassis, “jitkellem dwar il-mejtin li qed jistennew il-magħmudija u l-qawmien mill-imwiet.”33 Ordinanzi tat-tempju bi prokura jwiegħdu lil kull ġens, tribù, u lsien li ħadd m’għandu bżonn “jibqa’ skjav tal-mewt, tal-infern, jew tal-qabar.”34
Hekk kif niskopru lil Alla, xi kultant ċerti tweġibiet mhux mistennija għal talbna jeħilsuna mit-triq, iressquna fil-komunità, ikeċċu d-dlam minn ruħna, u jiggwidawna biex insibu kenn spiritwali u appartenenza fit-tjubija tal- patti u l-imħabba dejjiema tiegħu.
Ħafna drabi ħwejjeġ kbar jibdew bi ħwejjeġ żgħar, iżda l-mirakli ta’ Alla narawhom kuljum. Kemm aħna grati għad-don divin tal-Ispirtu s-Santu, l-Espjazzjoni ta’ Ġesù Kristu, u duttrina, l-ordinanzi, u l-patti żvelati Tiegħu li nsibu fil-Knisja rrestawrata tiegħu imsemmija għalih.
Jalla naċċettaw bil-ferħ l-istedina t’Alla biex nirċievu u ngħinu biex jitwettqu l-barkiet mwiegħda u profetizzati Tiegħu fin-nazzjonijiet, il-familji u l-ilsna kollha, jien nitlob, fl-isem sagru u qaddis ta’ Ġesù Kristu, amen.