Il-Madmad Tiegħu Hu Ħelu, u t-Toqol Tiegħu Ħafif
Ejjew niftakru li kull persuna fuq din l-art hija wild Alla u Huwa jħobb lil kulħadd.
L-istorja titkellem dwar raġel jismu Jack li kellu kelba tal-kaċċa ferm għal qalbu jisimha Cassie. Jack kien kburi ħafna b’Cassie u spiss kien iħobb jiftaħar kemm kienet kelba kapaċi. Biex juri dan, Jack stieden xi ħbieb biex jaraw lil Cassie waqt l-azzjoni. Wara li waslu fil-klabb tal-kaċċa, Jack ħalla lil Cassie toqgħod tiġri ftit barra waqt li hu daħal ġewwa biex jirreġistra.
Meta wasal il-ħin biex tibda, Jack kien ħerqan biex juri l-ħila tal-għaġeb ta’ Cassie. Madankollu, Cassie bdiet taġixxi b’mod stramb. Hi ma bdiet tobdi l-ebda kmand ta’ Jack kif is-soltu tagħmel minn jeddha. Kulma riedet tagħmel kien li toqgħod maġenbu.
Jack ħassu frustrat u imbarazzat u nkorlat għal Cassie; ma damx ma ssuġġerixxa li jitilqu minn hemm. Cassie lanqas biss riedet taqbeż għall-ġol kaxxa tal-vann, u Jack, li tilef kull sabar, qabadha u xeħitha fil-kaxxa tagħha. Hu ħassu veru maħruq hekk kif dawk li kienu miegħu għaddew it-triq kollha lejn id-dar jiddieħqu bl-imġiba tal-kelba. Jack ma setax jifhem għalfejn Cassie ma bdietx tobdi. Hija kienet mħarrġa tajjeb, u qabel dakinhar ix-xewqa tagħha kienet biss li tikkuntentah u taqdih.
Wara li waslu d-dar, Jack beda jeżamina lil Cassie għal xi ferita, xi żerriegħa jew qurdien, kif spiss kien jagħmel. Hekk kif poġġa jdejh fuq sidirha, ħass qisu likwidu u nduna li idu kienet mimlija demm. Maħkum minn għajb u paniku, seta’ jara li Cassie kellha ġerħa twila u wiesgħa fuq il-lemin ta’ sidirha. Huwa sab oħra fuq sieqha l-leminija ta’ quddiem, kif ukoll fuq l-għadma.
Jack ħa lil Cassie f’dirgħajh u nfaqa’ jibki. Kien qed iħossu kkunsmat mill-għajb għal kif kien iġġudikaha u ttrattaha. Aktar kmieni fil-jum Cassie bdiet taġixxi mhux bħas-soltu għaliex kienet muġugħa. L-imġiba tagħha kienet riżultat tal-uġigħ tagħha, tat-tbatija tagħha, u tal-ġrieħi tagħha. Ma kellha x’taqsam xejn man-nuqqas ta’ xewqa li tobdi lil Jack jew man-nuqqas ta’ mħabba lejh.1
Din l-istorja smajtha snin ilu u baqgħet f’moħħi. Kemm għandna individwi miġruħa fostna? Kemm-il darba niġġudikaw lil ħaddieħor minħabba d-dehra u l-għemejjel esterjuri tagħhom, jew għax ma jagħmlux xi ħaġa, meta, jekk nifhmuhom sew, aħna nirreaġixxu b’kompassjoni u b’xewqa li ngħinuhom minflok ma nkomplu nżidu mal-piż tagħhom bil-ġudizzju tagħna?
Jiena f’ħajti kemm-il darba kont ħatja ta’ dan, iżda bis-sabar il-Mulej għallimni permezz ta’ esperjenzi personali u hekk kif smajt ċerti esperjenzi mill-ħajja ta’ ħafna oħrajn. Tgħallimt napprezza aktar l-eżempju tal-għażiż Salvatur tagħna hekk kif għadda daqstant mill-ħajja tiegħu jimministra lil ħaddieħor b’imħabba.
F’ħajjitha t-tifla ż-żgħira tiegħi esperjenzat fost l-oħrajn ċerti sfidi ta’ saħħa esperjenza minn meta kienet għadha ċkejkna. Kien hemm diversi drabi tul ħajjitha meta ħassitha li ma tistax tkampa aktar mal-ħajja. Aħna nibqgħu għal dejjem grati għall-anġli mortali li kienu hemm f’dawk il-mumenti: ipoġġu bilqiegħda magħha, jismgħuha, jibku magħha, kif ukoll jaqmsu flimkien magħha ċerti rigali uniċi, għarfien spiritwali, u relazzjoni reċiproka ta’ mħabba. F’ċirkustanzi ta’ mħabba bħal dawn, ħafna drabi l-piż jonqos minn kull naħa.
Il-Presbiteru Joseph B.Wirthlin, waqt li kkwota l-1 Korintin, qal, “Li kont nitkellem bl-ilsna tal-bnedmin u tal- anġli bla ma kelli l-karità, kont inkun qisni strument tar-ram iżarżar jew platti jċekċku.”2
Huwa kompla:
“Il-messaġġ ta’ Pawlu għal dan il-grupp ġdid ta’ Qaddisin kien sempliċi u dirett: Xejn minn dak li tagħmel ma jagħmel wisq differenza jekk m’għandekx fik il-karità. Tista’ titkellem bl-ilsna, ikollok id-don tal-profezija, tifhem il-misteri kollha, u tippossedi kull għarfien; anke jekk għandek fidi li ċċaqlaq il-muntanji, mingħajr karità dan kollu ma jiswiek għal xejn.
“‘Il-karità hi l-imħabba pura ta’ Kristu’ [Moroni 7:47]. Is-Salvatur tana eżempju ta’ kif tkun dik l-imħabba.”3
F’Ġwanni naqraw, “Minn dan jagħraf kulħadd li intom dixxipli tiegħi, jiġifieri, jekk ikollkom l-imħabba bejnietkom.”4
Il-mexxejja tagħna tal-Knisja kemm-il darba tkellmu dwar il-karità, l-għaqda, l-imħabba, it-tjubija, il-kompassjoni, il-maħfra, u l-ħniena. Nemmen li s-Salvatur qed jistedinna biex ngħixu b’mod aktar għoli u qaddis5—Il-modtiegħu ta’ mħabba fejn kulħadd jista’ jħossu verament maħbub u meħtieġ.
Aħna mitlubin inħobbu lil ħaddieħor,6 mhux niġġudikawhom.7 Ejjew neħilsu minn dak it-toqol kbir; mhuwiex tagħna biex inġorruh.8 Minflok, nistgħu nieħdu fuqna l-madmad ta’ mħabba u kompassjoni tas-Salvatur.
“Ejjew għandi intom ilkoll li tinsabu mħabbtin u mtaqqlin, u jiena nserraħkom.
“Ħudu fuqkom il-madmad tiegħi u tgħallmu minni; …
“Għax il-madmad tiegħi ħelu, u t-toqol tiegħi ħafif.”9
Is-Salvatur ma jiskużax id-dnub iżda joffrilna mħabbtu u jestendilna l-maħfra meta nindmu. Lill-mara li nqabdet f’adulterju, qalilha, “Anqas jien ma nikkundannak: mur, u tidnibx iżjed.”10 Dawk li huwa mess ħassew imħabbtu, u dik l-imħabba fejqithom u ttrasformathom. L-imħabbatiegħu ispirathom biex juru r-rieda li jibdlu ħajjithom. Li ngħixu kif irid Hu jġibilna l-hena u l-paċi, u Hu jistieden lil ħaddieħor għal dik it-tip ta’ ħajja bi ħlewwa, tjubija, u mħabba.
Il-Presbiteru Gary E. Stevenson qal: “Meta aħna niffaċċjaw ir-riħ u l-maltemp, il-mard u l-korriment tal-ħajja, il-Mulej—ir-Ragħaj tagħna, il-Kurant tagħna—jieħu ħsiebna b’imħabba u tjubija. Huwa jfejjaq qalbna u jirrestawra ruħna.”11 Bħala dixxipli ta’ Ġesù Kristu, m’għandniex nagħmlu l-isess?
Is-Salvatur talabna biex nitgħallmu minnu12 u nagħmlu dak li rajnieh jagħmel.13 Huwa l-personifikazzjoni tal-karità, tal-imħabba pura. Hekk kif inkrementalment nitgħallmu nagħmlu dak li jitlob minna—mhux għax mitlubin nagħmlu dan jew saħansitra minħabba l-barkiet li nistgħu nirċievu iżda purament għax inħobbu lilu u lil Missierna fis-Smewwiet14— imħabbtu taħkimna u tagħmel dak kollu li jitlobna mhux biss possibbli iżda eventwalment aktar faċli u eħfef15 u aktar hieni milli qatt immaġinajna. Dan jirrikjedi l-prattika; jaf jieħu s-snin, kif fil-każ tiegħi, iżda hekk kif sewwasew nuru x-xewqa li l-imħabba tkun il-forza motivanti tagħna, Huwa jkun jista’ jaqbad dik ix-xewqa,16 dik iż-żerriegħa, u eventwalment ibiddilha f’siġra sabiħa, mimlija bl-aktar frott ħelu.17
F’waħda mill-għanjiet favoriti tagħna nkantaw: “Min jien biex niġġudika ’l ħaddieħor, meta nimxi b’daqstant imperfezzjoni? Fil-qalb siekta hemm moħbi niket li l-għajn ma tarax.”18 Min fostna jaf hemm moħbi fih niket li ma jidhirx? Dak li jidher li hu tifel jew adoloxxenti ribelluż, it-tfal ta’ koppji divorzjati, l-omm jew il-missier single, dawk bi sfidi ta’ saħħa fiżika jew mentali, dawk li qed jiddubitaw il-fidi tagħhom, dawk li jesperjenzaw preġudizzju razzjali jew kulturali, dawk li jħossuhom weħidhom, dawk li ilhom jittamaw li jiżżewġu, dawk b’vizzji li ma jixtiqux, u ħafna oħrajn li qed iħabbtu wiċċhom ma’ varjetà sħiħa ta’ esperjenzi diffiċli fil-ħajja—ħafna drabi anke dawk li ħajjithom tidher perfetta minn barra.
Ħadd minna m’għandu ħajja perfetta jew familji perfetti; jien żgur li m’għandix. Meta nagħżlu li nenpatizzaw ma’ oħrajn li wkoll jesperjenzaw sfidi u imperfezzjoni, dan jaf iwassalhom biex iħossuhom li mhumiex weħidhom fit-taqbid tagħhom . Kulħadd hemm bżonn li jħossu li verament jappartjeni u li hu meħtieġ fil-ġisem ta’ Kristu.19 Ix-xewqa l-kbira ta’ Satana hi li jifred lil ulied Alla, u hu rnexxielu sew li jagħmel dan, iżda fl-għaqda hemm qawwa kbira.20 U kemm hemm bżonn li nimxu driegħ f’driegħ f’dan il-vjaġġ diffiċli tagħna f’din il-ħajja!
Il-profeta tagħna, il-President Russell M. Nelson, qal: “Kwalunkwe abbuż jew preġudizzju lejn ħaddieħor minħabba nazzjonalità, razza, orjentazzjoni sesswali, ġeneru tas-sess, kwalifiċi fl-edukazzjoni, kultura, jew xi identifikaturi sinifikanti oħra joffendu lill-Ħallieq tagħna! Trattament ħażin bħal dan iwassalna biex ngħixu f’livell anqas mill-istatura tagħna bħala wliedu tal-patt!”21
Filwaqt li l-President Nelson stedinna lkoll biex nidħlu u nibqgħu fit-triq tal-patt li twassalna lura għand Missierna fis-Smewwiet, huwa pprovda wkoll il-parir li ġej: “Jekk xi ħbieb jew membri tal-familja … jitbiegħdu mill-Knisja, komplu ħobbuhom. Mhux f’idejkom li tiġġudikaw l-għażla ta’ ħaddieħor daqs kemm ma ħaqqkomx tiġu kkritikati għaliex tibqgħu fidili.”22
Ħbieb, ejjew niftakru li kull persuna fuq din l-art hija wild Alla23 u Huwa jħobb lil kulħadd.24 Hemm nies fi triqtkom li ħassejtukom inklinati li tiġġudikawhom? Jekk iva, ftakru li dawn huma opportunitajiet prezzjużi għalina biex nipprattikaw l-imħabba kif iħobb is-Salvatur.25 Hekk kif nimxu wara l-eżempju tiegħu, inkunu nistgħu ningħaqdu fil-madmad tiegħu u ngħinu nrawmu sentiment ta’ mħabba u appartenenza fil-qalb tal-ulied kollha ta’ Missierna.
“Aħna nħobbuh, għax hu ħabbna l-ewwel.”26 Hekk kif inkunu mimlija bl-imħabba tas-Salvatur, il-madmad tiegħu verament jista’ jkun faċli, u t-toqol tiegħu jista’ jinħass ħafif.27 Dwar dan jiena nixhed f’isem Ġesù Kristu, ammen.