ຄວາມຈິງນິລັນດອນ

ກອງປະຊຸມໃຫຍ່ສາມັນ ເດືອນຕຸລາ 2023

10:40

ຄວາມຈິງນິລັນດອນ

ແອວເດີ ຈອນ ຊີ ພິງກຣີ ຜູ້ລູກ

ແຫ່ງສາວົກເຈັດສິບ

ຄວາມຕ້ອງການຂອງເຮົາທີ່ຈະຮັບຮູ້ຄວາມຈິງກໍບໍ່ເຄີຍສຳຄັນຫລາຍກວ່ານີ້!

ອ້າຍເອື້ອຍນ້ອງທັງຫລາຍ, ຂອບໃຈຫລາຍໆສຳລັບການອຸທິດຕົນຂອງທ່ານຕໍ່ພຣະເຈົ້າອົງເປັນພຣະບິດາ ແລະ ພຣະບຸດຂອງພຣະອົງ, ພຣະເຢຊູຄຣິດ, ແລະ ຂອບໃຈສຳລັບຄວາມຮັກ ແລະ ການຮັບໃຊ້ຕໍ່ກັນແລະກັນ. ທ່ານຊ່າງເປັນຜູ້ຄົນທີ່ໂດດເດັ່ນແທ້ໆ!

ຄຳນຳ

ຫລັງຈາກພັນລະຍາຂອງຂ້າພະເຈົ້າ, ແອນ, ແລະ ຂ້າພະເຈົ້າໄດ້ຮັບການເອີ້ນໃຫ້ຮັບໃຊ້ໃນຖານະຜູ້ນຳເຜີຍແຜ່ເຕັມເວລາ, ຄອບຄົວຂອງພວກເຮົາໄດ້ຕັ້ງໃຈທີ່ຈະຮຽນຮູ້ຊື່ຂອງຜູ້ສອນສາດສະໜາແຕ່ລະຄົນ ກ່ອນໄປຮອດສະໜາມ. ພວກເຮົາໄດ້ຮັບຮູບຖ່າຍ, ໄດ້ເຮັດບັດສອບຄວາມຊົງຈຳ, ແລະ ໄດ້ເລີ່ມຕົ້ນສຶກສາໃບໜ້າ ແລະ ການຈື່ຈຳຊື່.

ເມື່ອພວກເຮົາໄປເຖິງ, ພວກເຮົາໄດ້ຈັດກອງປະຊຸມແນະນຳກັບຜູ້ສອນສາດສະໜາ. ໃນຂະນະທີ່ພວກເຮົາສັງສັນທັກທາຍ, ຂ້າພະເຈົ້າໄດ້ຍິນລູກຊາຍອາຍຸເກົ້າປີຂອງພວກເຮົາເວົ້າວ່າ:

“ດີໃຈທີ່ໄດ້ຮູ້ຈັກເຈົ້າ, ແຊມ!”

“ເຣໂຈ, ເຈົ້າມາຈາກໃສ?”

“ວາວ, ເດວິດ, ເຈົ້າສູງ!”

ດ້ວຍຄວາມຕົກໃຈ, ຂ້າພະເຈົ້າຈຶ່ງໄປຫາລູກຊາຍຂອງພວກເຮົາ ແລະ ກະຊິບວ່າ, “ເຮ້, ຢາລືມເອີ້ນຜູ້ສອນສາດສະໜາວ່າ ແອວເດີ ຫລື ຊິດສະເຕີເດີ.”

ລາວໄດ້ຫລຽວເບິ່ງໜ້າຂ້າພະເຈົ້າດ້ວຍຄວາມງົງງັນ ແລະ ເວົ້າວ່າ, “ພໍ່, ລູກຄິດວ່າພວກເຮົາຕ້ອງຈື່ ຊື່ ເຂົາເຈົ້າ.” ລູກຊາຍຂອງພວກເຮົາຄິດວ່າ ລາວເຮັດສິ່ງທີ່ຖືກຕ້ອງ ໂດຍອາໄສຄວາມເຂົ້າໃຈຂອງລາວ.

ສະນັ້ນ, ແມ່ນຫຍັງຄືຄວາມເຂົ້າໃຈຂອງເຮົາເຖິງຄວາມຈິງໃນໂລກປະຈຸບັນ? ເຮົາຖືກໂຈມຕີຢູ່ສະເໝີດ້ວຍຄວາມຄິດເຫັນແຮງ, ການລາຍງານທີ່ມີອະຄະຕິ, ແລະ ຂໍ້ມູນທີ່ບໍ່ສົມບູນຄົບຖ້ວນ. ໃນຂະນະດຽວກັນ ປະລິມານ ແລະ ແຫລ່ງທີ່ມາຂອງຂໍ້ມູນນີ້ກໍມີຈຳນວນເພີ່ມຫລາຍຂຶ້ນ. ຄວາມຕ້ອງການຂອງເຮົາທີ່ຈະຮັບຮູ້ຄວາມຈິງກໍບໍ່ເຄີຍສຳຄັນຫລາຍກວ່ານີ້!

ຄວາມຈິງແມ່ນສຳຄັນແທ້ໆສຳລັບເຮົາ ເພື່ອຈະສະຖາປະນາ ແລະ ເພີ່ມຄວາມເຂັ້ມແຂງໃຫ້ແກ່ຄວາມສຳພັນຂອງເຮົາກັບພຣະເຈົ້າ, ພົບຄວາມສະຫງົບ ແລະ ຄວາມຊື່ນຊົມ, ແລະ ບັນລຸເຖິງສັກກະຍະພາບແຫ່ງສະຫວັນຂອງເຮົາ. ມື້ນີ້, ໃຫ້ເຮົາມາພິຈາລະນາຄຳຖາມດັ່ງຕໍ່ໄປນີ້:

ແມ່ນຫຍັງຄືຄວາມຈິງ, ແລະ ເປັນຫຍັງມັນຈຶ່ງສຳຄັນ?
ເຮົາຈະພົບຄວາມຈິງໄດ້ແນວໃດ?
ເມື່ອເຮົາພົບຄວາມຈິງແລ້ວ, ເຮົາຈະສາມາດແບ່ງປັນມັນໄດ້ແນວໃດ?

ຄວາມຈິງແມ່ນຊົ່ວນິລັນດອນ

ພຣະຜູ້ເປັນເຈົ້າໄດ້ສິດສອນເຮົາຢູ່ໃນພຣະຄຳພີວ່າ, “ຄວາມຈິງຄືຄວາມຮູ້ເຖິງສິ່ງທີ່ເປັນຢູ່, ແລະ ດັ່ງທີ່ໄດ້ເປັນມາ, ແລະ ດັ່ງທີ່ຈະເປັນ” (ຄຳສອນ ແລະ ພັນທະສັນຍາ 93:24). ມັນ “ບໍ່ໄດ້ຖືກສ້າງ ຫລື ເຮັດຂຶ້ນ” (ຄຳສອນ ແລະ ພັນທະສັນຍາ 93:29) ແລະ “ບໍ່ມີທີ່ສິ້ນສຸດ” (ຄຳສອນ ແລະ ພັນທະສັນຍາ 88:66).¹ ຄວາມຈິງແມ່ນແນ່ແທ້, ຄົງທີ່, ແລະ ບໍ່ປ່ຽນແປງ. ໃນອີກຄຳໜຶ່ງ, ຄວາມຈິງແມ່ນຊົ່ວນິລັນດອນ.²

ຄວາມຈິງຊ່ວຍເຮົາໃຫ້ຫລີກເວັ້ນຈາກການຫລອກລວງ,³ ຫລິງເຫັນຄວາມດີຈາກຄວາມຊົ່ວ,⁴ ຮັບເອົາການປົກປ້ອງ,⁵ ແລະ ພົບການປອບໂຍນ ແລະ ການປິ່ນປົວ.⁶ ຄວາມຈິງຍັງສາມາດນຳພາການກະທຳຂອງເຮົານຳອີກ,⁷ ເຮັດໃຫ້ເຮົາເປັນອິດສະລະ,⁸ ຊຳລະເຮົາ,⁹ ແລະ ນຳເຮົາໄປສູ່ຊີວິດນິລັນດອນ.¹⁰

ພຣະເຈົ້າເປີດເຜີຍຄວາມຈິງນິລັນດອນ

ພຣະເຈົ້າເປີດເຜີຍຄວາມຈິງນິລັນດອນກັບເຮົາ ຜ່ານທາງ ເຄືອຂ່າຍຂອງຄວາມສຳພັນແຫ່ງການເປີດເຜີຍ ທີ່ກ່ຽວພັນກັບພຣະອົງເອງ, ພຣະເຢຊູຄຣິດ, ພຣະວິນຍານບໍລິສຸດ, ສາດສະດາ, ແລະ ເຮົາ. ໃຫ້ເຮົາມາສົນທະນາບົດບາດທີ່ແຕກຕ່າງແຕ່ເຊື່ອມໂຍງກັນ ທີ່ຜູ້ເຂົ້າຮ່ວມແຕ່ລະຄົນມີໃນຂັ້ນຕອນນີ້.

ໜຶ່ງ, ພຣະເຈົ້າ ຄື ແຫລ່ງຂອງຄວາມຈິງນິລັນດອນ.¹¹ ພຣະອົງ ແລະ ພຣະບຸດຂອງພຣະອົງ, ພຣະເຢຊູຄຣິດ,¹² ມີຄວາມເຂົ້າໃຈທີ່ສົມບູນເຖິງຄວາມຈິງ ແລະ ກະທຳໃນຄວາມສອດຄ່ອງກັບຫລັກທຳ ແລະ ກົດທີ່ແທ້ຈິງສະເໝີ.¹³ ພະລັງນີ້ເຮັດໃຫ້ເຮົາສາມາດສ້າງ ແລະ ຄວບຄຸມໂລກ¹⁴ ເຊັ່ນດຽວກັບຄວາມຮັກ, ນຳພາ, ແລະ ລ້ຽງດູເຮົາແຕ່ລະຄົນຢ່າງສົມບູນແບບ.¹⁵ ຍ້ອນວ່າພວກພຣະອົງຮັກ ເຮົາ, ພວກພຣະອົງຈຶ່ງປະສົງໃຫ້ ເຮົາ ເຂົ້າໃຈ ແລະ ນຳໃຊ້ຄວາມຈິງ ເພື່ອວ່າເຮົາຈະສາມາດຊື່ນຊົມກັບພອນທີ່ພວກພຣະອົງຊື່ນຊົມ.¹⁶ ພວກພຣະອົງອາດມອບຄວາມຈິງດ້ວຍພວກພຣະອົງເອງ ຫລື, ໂດຍທົ່ວໄປ, ຜ່ານທາງຜູ້ສົ່ງຂ່າວ ດັ່ງເຊັ່ນພຣະວິນຍານບໍລິສຸດ, ທູດສະຫວັນ, ຫລື ສາດສະດາທີ່ມີຊີວິດຢູ່.

ສອງ, ພຣະວິນຍານບໍລິສຸດເປັນພະຍານເຖິງຄວາມຈິງທຸກປະການ.¹⁷ ພຣະອົງເປີດເຜີຍຄວາມຈິງແກ່ເຮົາໂດຍກົງ ແລະ ເປັນພະຍານເຖິງຄວາມຈິງທີ່ສິດສອນໂດຍຜູ້ອື່ນ. ຄວາມປະທັບໃຈຈາກພຣະວິນຍານ ໂດຍປົກກະຕິຈະມີມາດັ່ງຄວາມຄິດສູ່ຈິດໃຈ ແລະ ຄວາມຮູ້ສຶກສູ່ຫົວໃຈຂອງເຮົາ.¹⁸

ສາມ, ສາດສະດາໄດ້ຮັບຄວາມຈິງຈາກພຣະເຈົ້າ ແລະ ແບ່ງປັນຄວາມຈິງນັ້ນກັບເຮົາ.¹⁹ ເຮົາຮຽນຮູ້ຄວາມຈິງຈາກສາດສະດາໃນອະດີດຢູ່ໃນພຣະຄຳພີ²⁰ ແລະ ຈາກສາດສະດາທີ່ມີຊີວິດຢູ່ ຢູ່ທີ່ກອງປະຊຸມໃຫຍ່ສາມັນ ແລະ ຜ່ານຊ່ອງທາງທີ່ເປັນທາງການອື່ນໆ.

ສຸດທ້າຍ, ທ່ານ ແລະ ຂ້າພະເຈົ້າມີບົດບາດທີ່ສຳຄັນໃນຂະບວນການນີ້. ພຣະເຈົ້າຄາດໝາຍໃຫ້ເຮົາສະແຫວງຫາ, ຮັບຮູ້, ແລະ ກະທຳຕາມຄວາມຈິງ. ຄວາມສາມາດຂອງເຮົາໃນການຮັບ ແລະ ນຳໃຊ້ຄວາມຈິງ ແມ່ນຂຶ້ນຢູ່ກັບຄວາມເຂັ້ມແຂງຂອງຄວາມສຳພັນຂອງເຮົາກັບພຣະບິດາ ແລະ ພຣະບຸດ, ການຕອບຮັບຂອງເຮົາຕໍ່ອິດທິພົນຂອງພຣະວິນຍານບໍລິສຸດ, ແລະ ຄວາມສອດຄ່ອງຂອງເຮົາກັບສາດສະດາຍຸກສຸດທ້າຍ.

ເຮົາຕ້ອງຈື່ຈຳໄວ້ວ່າ ຊາຕານພະຍາຍາມຂັດຂວາງເຮົາຈາກຄວາມຈິງ. ມັນຮູ້ວ່າ ຖ້າຫາກບໍ່ມີຄວາມຈິງ, ເຮົາບໍ່ສາມາດໄດ້ຮັບຊີວິດນິລັນດອນ. ມັນຖັກສານຄວາມຈິງດ້ວຍປັດຊະຍາທາງໂລກ ເພື່ອເຮັດໃຫ້ເຮົາສັບສົນ ແລະ ລົບກວນເຮົາຈາກສິ່ງທີ່ພຣະເຈົ້າສື່ສານ.²¹

ການສະແຫວງຫາ, ການຮັບຮູ້, ແລະ ການນຳໃຊ້ຄວາມຈິງນິລັນດອນ

ຂະນະທີ່ເຮົາສະແຫວງຫາຄວາມຈິງ,²² ຄຳຖາມສອງຂໍ້ດັ່ງຕໍ່ໄປນີ້ສາມາດຊ່ວຍເຮົາໃຫ້ຮັບຮູ້ຖ້າຫາກວ່າມະໂນທັດນັ້ນມາຈາກພຣະເຈົ້າ ຫລື ວ່າມາຈາກແຫລ່ງອື່ນ:

ມະໂນທັດນັ້ນຖືກສິດສອນຢ່າງສະໝ່ຳສະເໝີບໍ ຢູ່ໃນພຣະຄຳພີ ແລະ ໂດຍສາດສະດາທີ່ມີຊີວິດຢູ່?
ມະໂນທັດນັ້ນຖືກຢືນຢັນໂດຍການເປັນພະຍານຂອງພຣະວິນຍານບໍລິສຸດບໍ?

ພຣະເຈົ້າເປີດເຜີຍຄວາມຈິງຂອງຫລັກທຳຜ່ານທາງສາດສະດາ, ແລະ ພຣະວິນຍານບໍລິສຸດຢືນຢັນຄວາມຈິງເຫລົ່ານັ້ນຕໍ່ເຮົາ ແລະ ຊ່ວຍເຮົາໃຫ້ນຳໃຊ້ມັນ.²³ ເຮົາຕ້ອງສະແຫວງຫາ ແລະ ກຽມພ້ອມເພື່ອຮັບຄວາມຮູ້ສຶກທາງວິນຍານເຫລົ່ານີ້ເມື່ອມັນເກີດຂຶ້ນ.²⁴ ເຮົາຈະຍອມຮັບຄວາມເປັນພະຍານຂອງພຣະວິນຍານໄດ້ດີທີ່ສຸດເມື່ອເຮົາຖ່ອມຕົວ,²⁵ ອະທິຖານດ້ວຍຄວາມຈິງໃຈ ແລະ ສຶກສາພຣະຄຳຂອງພຣະເຈົ້າ,²⁶ ແລະ ຮັກສາພຣະບັນຍັດຂອງພຣະອົງ.²⁷

ເມື່ອພຣະວິນຍານບໍລິສຸດຢືນຢັນຄວາມຈິງບາງຢ່າງຕໍ່ເຮົາ, ຄວາມເຂົ້າໃຈຂອງເຮົາຈະເລິກເຊິ່ງຫລາຍຂຶ້ນ ເມື່ອເຮົານຳເອົາຫລັກທຳນັ້ນໄປປະຕິບັດ. ເມື່ອເວລາຜ່ານໄປ, ເມື່ອເຮົາດຳລົງຊີວິດຕາມຫລັກທຳຢ່າງສະໝ່ຳສະເໝີ, ເຮົາຈະໄດ້ຮັບຄວາມຮູ້ອັນແນ່ນອນກ່ຽວກັບຄວາມຈິງນັ້ນ.²⁸

ຍົກຕົວຢ່າງ, ຂ້າພະເຈົ້າໄດ້ເຮັດຜິດ ແລະ ຮູ້ສຶກເສຍໃຈກັບການເລືອກທີ່ບໍ່ດີ. ແຕ່ຜ່ານທາງການອະທິຖານ, ການສຶກສາ, ແລະ ສັດທາໃນພຣະເຢຊູຄຣິດ, ຂ້າພະເຈົ້າໄດ້ຮັບພະຍານເຖິງຫລັກທຳແຫ່ງການກັບໃຈ.²⁹ ຂະນະທີ່ຂ້າພະເຈົ້າສືບຕໍ່ກັບໃຈ, ຄວາມເຂົ້າໃຈຂອງຂ້າພະເຈົ້າເລື່ອງການກັບໃຈກໍຈະເຂັ້ມແຂງຫລາຍຂຶ້ນ. ຂ້າພະເຈົ້າໄດ້ຮູ້ສຶກໃກ້ຊິດພຣະເຈົ້າ ແລະ ພຣະບຸດຂອງພຣະອົງຫລາຍຂຶ້ນ. ບັດນີ້ຂ້າພະເຈົ້າ ຮູ້ ວ່າບາບສາມາດຖືກໃຫ້ອະໄພໄດ້ ຜ່ານທາງພຣະເຢຊູຄຣິດ, ເພາະຂ້າພະເຈົ້າປະສົບພອນຂອງການກັບໃຈແຕ່ລະວັນ.³⁰

ໄວ້ວາງໃຈພຣະເຈົ້າເມື່ອຄວາມຈິງຍັງບໍ່ທັນຖືກເປີດເຜີຍເທື່ອ

ດັ່ງນັ້ນ, ເຮົາຄວນເຮັດຫຍັງແດ່ເມື່ອເຮົາສະແຫວງຫາຄວາມຈິງທີ່ຍັງບໍ່ທັນຖືກເປີດເຜີຍເທື່ອຢ່າງຈິງໃຈ? ຂ້າພະເຈົ້າມີຄວາມເຂົ້າອົກເຂົ້າໃຈສຳລັບເຮົາບາງຄົນ ຜູ້ທີ່ປາດຖະໜາຄຳຕອບທີ່ເບິ່ງຄືວ່າຈະບໍ່ມີມາ.

ຕໍ່ໂຈເຊັບ ສະມິດ, ພຣະຜູ້ເປັນເຈົ້າໄດ້ແນະນຳວ່າ, “ຈົ່ງສະຫງົບງຽບຈົນກວ່າເຮົາຈະເຫັນສົມຄວນທີ່ຈະເຮັດໃຫ້ທຸກສິ່ງທຸກຢ່າງເປັນທີ່ຮູ້ຈັກ … ກ່ຽວກັບເລື່ອງນີ້” (ຄຳສອນ ແລະ ພັນທະສັນຍາ 10:37).

ແລະ ຕໍ່ເອມມາ ສະມິດ, ພຣະອົງໄດ້ອະທິບາຍວ່າ, “ຢ່າຈົ່ມເລີຍກ່ຽວກັບສິ່ງທີ່ເຈົ້າຍັງບໍ່ໄດ້ເຫັນ, ເພາະມັນຖືກປິດບັງຈາກເຈົ້າ ແລະ ຈາກໂລກ, ຊຶ່ງມັນເປັນຄວາມສະຫລຽວສະຫລາດຂອງເຮົາ ໃນເວລາທີ່ຈະມາເຖິງ” (ຄຳສອນ ແລະ ພັນທະສັນຍາ 25:4).

ຂ້າພະເຈົ້າກໍໄດ້ສະແຫວງຫາຄຳຕອບຕໍ່ຄຳຖາມຈາກໃຈຈິງເຊັ່ນກັນ. ຄຳຕອບຈຳນວນຫລາຍໄດ້ມີມາ; ແຕ່ບາງຄຳຕອບບໍ່ໄດ້ມີມາ.³¹ ຂະນະທີ່ເຮົາລໍຖ້າ—ໄວ້ວາງໃຈໃນສະຕິປັນຍາ ແລະ ຄວາມຮັກຂອງພຣະເຈົ້າ, ຮັກສາພຣະບັນຍັດຂອງພຣະອົງ, ແລະ ເພິ່ງອາໄສ ສິ່ງທີ່ເຮົາຮູ້—ພຣະອົງຊ່ວຍເຮົາໃຫ້ພົບຄວາມສະຫງົບ ຈົນກວ່າພຣະອົງຈະເປີດເຜີຍຄວາມຈິງຂອງທຸກສິ່ງທັງປວງ.³²

ການເຂົ້າໃຈຄຳສອນ ແລະ ນະໂຍບາຍ

ເມື່ອເຮົາສະແຫວງຫາຄວາມຈິງ, ມັນຈະຊ່ວຍໄດ້ທີ່ຈະເຂົ້າໃຈຄວາມແຕກຕ່າງລະຫວ່າງຄຳສອນ ແລະ ນະໂຍບາຍ. ຄຳສອນອ້າງເຖິງຄວາມຈິງນິລັນດອນ, ດັ່ງເຊັ່ນລັກສະນະທຳມະຊາດຂອງຝ່າຍພຣະເຈົ້າ, ແຜນແຫ່ງຄວາມລອດ, ການເສຍສະລະຊົດໃຊ້ຂອງພຣະເຢຊູຄຣິດ. ນະໂຍບາຍຄືການນຳໃຊ້ຄຳສອນ ອີງຕາມສະຖານະການປະຈຸບັນ. ນະໂຍບາຍຊ່ວຍເຮົາບໍລິຫານສາດສະໜາຈັກໃນວິທີທາງທີ່ເປັນລະບຽບ.

ໃນຂະນະທີ່ຄຳສອນຈະບໍ່ມີວັນປ່ຽນແປງ, ນະໂຍບາຍຈະຖືກດັດແປງເປັນບາງຄັ້ງບາງຄາວ. ພຣະຜູ້ເປັນເຈົ້າທຳງານຜ່ານທາງສາດສະດາຂອງພຣະອົງ ເພື່ອຮັກສາຄຳສອນຂອງພຣະອົງ ແລະ ປັບປຸງນະໂຍບາຍຂອງສາດສະໜາຈັກ ອີງຕາມຄວາມຕ້ອງການຂອງລູກໆຂອງພຣະອົງ.

ໜ້າເສຍດາຍທີ່, ບາງເທື່ອເຮົາກໍສັບສົນເລື່ອງນະໂຍບາຍກັບຄຳສອນ. ຖ້າຫາກເຮົາບໍ່ເຂົ້າໃຈຄວາມແຕກຕ່າງ, ເຮົາຈະຕົກຢູ່ໃນຄວາມສ່ຽງທີ່ຈະບໍ່ພໍໃຈເມື່ອນະໂຍບາຍປ່ຽນໄປ ແລະ ອາດເລີ່ມສົງໄສສະຕິປັນຍາຂອງພຣະເຈົ້າ ຫລື ບົດບາດໃນການເປີດເຜີຍຂອງສາດສະດາ.³³

ການສິດສອນຄວາມຈິງນິລັນດອນ

ເມື່ອເຮົາໄດ້ຮັບຄວາມຈິງຈາກພຣະເຈົ້າ, ພຣະອົງຊຸກຍູ້ເຮົາໃຫ້ແບ່ງປັນຄວາມຮູ້ນັ້ນກັບຄົນອື່ນ.³⁴ ເຮົາເຮັດສິ່ງນີ້ເມື່ອເຮົາສິດສອນຫ້ອງຮຽນ, ນຳພາເດັກນ້ອຍ, ຫລື ສົນທະນາຄວາມຈິງແຫ່ງພຣະກິດຕິຄຸນກັບໝູ່ເພື່ອນຄົນໜຶ່ງ.

ເປົ້າໝາຍຂອງເຮົາແມ່ນຈະສິດສອນຄວາມຈິງ ໃນວິທີທາງທີ່ເຊື້ອເຊີນອຳນາດແຫ່ງການປ່ຽນໃຈເຫລື້ອມໃສຂອງພຣະວິນຍານບໍລິສຸດ.³⁵ ຂ້າພະເຈົ້າຂໍແບ່ງປັນຄຳເຊື້ອເຊີນທີ່ລຽບງ່າຍບາງຢ່າງຈາກພຣະຜູ້ເປັນເຈົ້າ ແລະ ສາດສະດາຂອງພຣະອົງທີ່ສາມາດຊ່ວຍໄດ້.³⁶

ສຸມໃຈໃສ່ພຣະບິດາເທິງສະຫວັນ, ພຣະເຢຊູຄຣິດ, ແລະ ຄຳສອນພື້ນຖານຂອງພວກພຣະອົງ.³⁷
ຍຶດໝັ້ນຢູ່ໃນພຣະຄຳພີ ແລະ ຄຳສອນຂອງສາດສະດາຍຸກສຸດທ້າຍ.³⁸
ເພິ່ງອາໄສຄຳສອນທີ່ຖືກສະຖາປະນາຜ່ານທາງພະຍານຫລາກຫລາຍທີ່ມີສິດອຳນາດ.³⁹
ຫລີກເວັ້ນຈາກການຄາດເດົາ, ຄວາມຄິດຄວາມເຫັນສ່ວນຕົວ, ຫລື ຄວາມຄິດທາງຝ່າຍໂລກ.⁴⁰
ສິດສອນຈຸດໃດໜຶ່ງຂອງຄຳສອນພາຍໃນບໍລິບົດຂອງຄວາມຈິງຂອງພຣະກິດຕິຄຸນ.⁴¹
ໃຊ້ວິທີການສິດສອນທີ່ເຊື້ອເຊີນອິດທິພົນຂອງພຣະວິນຍານ.⁴²
ສື່ສານຢ່າງແຈ່ມແຈ້ງ ເພື່ອຫລີກເວັ້ນຈາກຄວາມເຂົ້າໃຈຜິດ.⁴³

ການກ່າວຄວາມຈິງດ້ວຍໃຈຮັກ

ວິທີທີ່ເຮົາສິດສອນສຳຄັນຫລາຍແທ້ໆ. ໂປໂລໄດ້ຊຸກຍູ້ໃຫ້ເຮົາກ່າວ “ຄວາມຈິງດ້ວຍໃຈຮັກ” (ເບິ່ງ ເອເຟໂຊ 4:14–15). ຄວາມຈິງມີໂອກາດທີ່ດີທີ່ສຸດທີ່ຈະເປັນພອນໃຫ້ແກ່ຄົນອື່ນ ເມື່ອຖືກຖ່າຍທອດດ້ວຍຄວາມຮັກເໝືອນດັ່ງພຣະຄຣິດ.⁴⁴

ຄວາມຈິງທີ່ຖືກສິດສອນປາດສະຈາກຄວາມຮັກສາມາດກໍ່ໃຫ້ເກີດຄວາມຮູ້ສຶກເຖິງການຕັດສິນ, ທໍ້ຖອຍໃຈ, ແລະ ໂດດດ່ຽວ. ມັນມັກຈະນຳໄປສູ່ຄວາມແຄ້ນໃຈ ແລະ ການແບ່ງແຍກ—ແມ່ນແຕ່ການຂັດແຍ້ງ. ກົງກັນຂ້າມ, ຄວາມຮັກປາດສະຈາກຄວາມຈິງກໍຫວ່າງເປົ່າ ແລະ ຂາດຄຳສັນຍາຂອງການເຕີບໂຕ.

ທັງຄວາມຈິງ ແລະ ຄວາມຮັກແມ່ນຈຳເປັນສຳລັບການພັດທະນາທາງວິນຍານຂອງເຮົາ.⁴⁵ ຄວາມຈິງໃຫ້ຄຳສອນ, ຫລັກທຳ, ແລະ ກົດທີ່ຈຳເປັນຕໍ່ການໄດ້ຮັບຊີວິດນິລັນດອນ, ໃນຂະນະທີ່ຄວາມຮັກກໍ່ໃຫ້ເກີດແຮງຈູງໃຈທີ່ຈຳເປັນ ເພື່ອຈະເປີດໃຈຮັບ ແລະ ປະຕິບັດຕາມສິ່ງທີ່ເປັນຄວາມຈິງ.

ຂ້າພະເຈົ້າກະຕັນຍູຕະຫລອດໄປສຳລັບຜູ້ຄົນທີ່ໄດ້ສິດສອນຂ້າພະເຈົ້າເຖິງຄວາມຈິງນິລັນດອນຢ່າງອົດທົນ ດ້ວຍຄວາມຮັກ.

ສະຫລຸບ

ໃນຂໍ້ສະຫລຸບ, ຂ້າພະເຈົ້າຂໍແບ່ງປັນ ຄວາມຈິງນິລັນດອນ ທີ່ໄດ້ກາຍມາເປັນສະໝໍທີ່ສຳຄັນຕໍ່ຈິດວິນຍານຂອງຂ້າພະເຈົ້າ. ຂ້າພະເຈົ້າມາຮູ້ຈັກຄວາມຈິງເຫລົ່ານີ້ ໂດຍການຕິດຕາມຫລັກທຳທີ່ໄດ້ສົນທະນາໃນມື້ນີ້.

ຂ້າພະເຈົ້າຮູ້ວ່າ ພຣະເຈົ້າເປັນພຣະບິດາທີ່ຮັກຂອງເຮົາ.⁴⁶ ພຣະອົງຮູ້ທຸກຢ່າງ,⁴⁷ ຊົງພະລັງທຸກຢ່າງ,⁴⁸ ແລະ ຮັກຢ່າງສົມບູນແບບ.⁴⁹ ພຣະອົງໄດ້ສ້າງແຜນໃຫ້ເຮົາເພື່ອຮັບຊີວິດນິລັນດອນ ແລະ ກາຍເປັນເໝືອນດັ່ງພຣະອົງ.⁵⁰

ໃນຖານະສ່ວນໜຶ່ງຂອງແຜນນັ້ນ, ພຣະອົງໄດ້ສົ່ງພຣະບຸດຂອງພຣະອົງ, ພຣະເຢຊູຄຣິດ, ມາເພື່ອຊ່ວຍເຮົາ.⁵¹ ພຣະເຢຊູໄດ້ສິດສອນເຮົາໃຫ້ເຮັດຕາມພຣະປະສົງຂອງພຣະບິດາ⁵² ແລະ ໃຫ້ຮັກຊຶ່ງກັນແລະກັນ.⁵³ ພຣະອົງໄດ້ຊົດໃຊ້ບາບຂອງເຮົາ⁵⁴ ແລະ ໄດ້ມອບພຣະຊົນຊີບຂອງພຣະອົງຢູ່ເທິງໄມ້ກາງແຂນ.⁵⁵ ພຣະອົງໄດ້ລຸກຂຶ້ນຈາກຄວາມຕາຍຫລັງຈາກສາມວັນ.⁵⁶ ຜ່ານທາງພຣະຄຣິດ ແລະ ພຣະຄຸນຂອງພຣະອົງ, ເຮົາຈະໄດ້ຟື້ນຄືນຊີວິດ,⁵⁷ ເຮົາສາມາດໄດ້ຮັບການໃຫ້ອະໄພ,⁵⁸ ແລະ ເຮົາສາມາດພົບຄວາມເຂັ້ມແຂງໃນຄວາມທຸກຍາກ.⁵⁹

ລະຫວ່າງການປະຕິບັດສາດສະໜາກິດຂອງພຣະອົງຢູ່ເທິງໂລກ, ພຣະເຢຊູໄດ້ສະຖາປະນາສາດສະໜາຈັກຂອງພຣະອົງ.⁶⁰ ເມື່ອເວລາຜ່ານໄປ, ສາດສະໜາຈັກນັ້ນກໍຖືກປ່ຽນແປງ, ແລະ ຄວາມຈິງກໍໄດ້ສູນຫາຍໄປ.⁶¹ ພຣະເຢຊູຄຣິດໄດ້ຟື້ນຟູສາດສະໜາຈັກຂອງພຣະອົງ ແລະ ຄວາມຈິງຂອງພຣະກິດຕິຄຸນ ຜ່ານທາງສາດສະດາໂຈເຊັບ ສະມິດ.⁶² ແລະ ໃນວັນເວລານີ້, ພຣະຄຣິດສືບຕໍ່ນຳພາສາດສະໜາຈັກຂອງພຣະອົງຜ່ານທາງສາດສະດາ ແລະ ອັກຄະສາວົກທີ່ມີຊີວິດຢູ່.⁶³

ຂ້າພະເຈົ້າຮູ້ວ່າ ເມື່ອເຮົາມາຫາພຣະຄຣິດ, ເຮົາຈະ “ຖືກເຮັດໃຫ້ເປັນຄົນດີພ້ອມໃນພຣະອົງ” ໃນທີ່ສຸດ (ໂມໂຣໄນ 10:32), ໄດ້ຮັບ “ຄວາມສົມບູນແຫ່ງຄວາມຊື່ນຊົມ” (ຄຳສອນ ແລະ ພັນທະສັນຍາ 93:33), ແລະ ຮັບເອົາ “ທຸກສິ່ງທີ່ພຣະບິດາຂອງເຮົາມີ” (ຄຳສອນ ແລະ ພັນທະສັນຍາ 84:38). ຂ້າພະເຈົ້າເປັນພະຍານເຖິງຄວາມຈິງເຫລົ່ານີ້ ໃນພຣະນາມຂອງພຣະເຢຊູຄຣິດ, ອາແມນ.