Parau poro‘i na te Peresideniraa Matamua
E Ohipa Rahi na te God
6 no eperera 1830
Hoê hanere e va‘u ahuru matahiti i ma‘iri ra, ua putuputu o Iosepha Semita, Olive Kaudere, e te tahi atu mau taata no te faanahonaho i te Ekalesia a Iesu Mesia i te Feia Mo‘a i te mau Mahana Hopea nei. Ia au i te mau faati‘araa, ua riro taua putuputuraa ra ei putuputuraa ohie roa e te î i te varua. Ua papa‘i o Iosepha e, i muri a‘e i te oro‘a mo‘a, « ua niniihia mai te Varua Maitai i ni‘a ia matou ma te puai rahi—e ua tohu a‘e ra te tahi, e ua haamauruuru matou i te Fatu, e ua î matou i te oaoa rahi.1
Aita to te ao nei i ite i te mau ohipa i tupu i taua mahana ra ; aita te reira i puta i ni‘a i te api matamua o te ve‘a e aore râ, i roto i te tahi mau faaararaa. Area râ, e oaoa rahi to te mau ra‘i e ua faahanahana i te Atua—i te mea e, i taua mahana ra, ua tae faahou mai te Ekalesia a Iesu Mesia i ni‘a i te fenua nei !
Solomon Chamberlain
Mai taua mahana ra e tae roa mai i teie nei, e rave rahi milioni tamaiti e tamahine faaroo a te Metua i te Ao ra tei pee i te mau muhumuhu a te Varua Maitai e ua tomo i roto i te mau pape mo‘a o te bapetizoraa. O Solomon Chamberlain te hoê o te reira huru taata.
E taata faaroo rahi o Solomon, e e rave rahi hora to’na pureraa, no te ani ia faaorehia ta’na mau hara e no te taparu i te Metua i te Ao ra ia faaite ia’na i te parau mau. I te area o te matahiti 1816, ua fafauhia mai ia Solomon i roto i te hoê orama e, e ora oia e tae roa’tu i te mahana e ite ai oia i te Ekalesia a te Mesia ia faanahonaho-faahou-hia i ni‘a i te fenua nei mai tei te anotau o te mau aposetolo ra.
Tau matahiti i muri mai, te fano ra o Solomon na ni‘a i te pahi i te fenua Canada, ua tape‘a a‘e ra te pahi i te hoê oire na‘ina‘i no Palmyra, i New York. I taua taime ra, ua ite a‘e ra oia i te hoê puai rahi i te tura‘iraa ia’na ia pou i rapae i te pahi. Ma te ite ore i te tumu i faaea mai ai oia i reira, ua haamata a‘e ra oia i te paraparau i te mau taata o te reira oire. Aita i maoro, ua faaroo a‘e ra oia i te parau o te hoê « Bibilia auro ». Te parau ra oia e, na taua na ta‘o e piti ra i tuu i roto ia’na i te « hoê puai mai te uira te huru i te tereraa mai to’na upoo e tae roa’tu i to’na mau manimani avae ».
Na roto i ta’na mau ma‘imiraa, ua tae roa oia i te fare o Semita, i reira oia i te paraparauraa i te feia i reira no ni‘a i te mau parau apî faahiahia o te evanelia i faaho‘i-faahou-hia mai. I muri a‘e e piti mahana i reira e i to’na fariiraa i te hoê iteraa papû no ni‘a i te parau mau, ua ratere faahou oia no te haere i Canada, ma te ta‘ita‘i na muri iho ia’na e 64 api nene‘i-apî-hia o te Buka a Moromona, aita i taamuhia. I te mau vahi atoa ta’na i haere, ua haapii oia i te taata, « tei teitei e tei haehaa, tei tao‘ahia e tei veve,… ia faaineine no te ohipa rahi a te Atua o te fatata maira i te tupu ».2
E ohipa rahi na te Atua
Mai taua mahana ra no eperera 1830, e rave rahi milioni taata tei iteahia ia ratou te parau mau o te evanelia i faaho‘i-faahou-hia mai, e ua tomo i roto i te mau pape mo‘a no te bapetizoraa. Te faaite papû nei au e teie « ohipa rahi na te Atua » tei ni‘a ïa i te fenua nei i teie mahana. Te faaite papû nei au e, te ara nei te Fatu i ni‘a i Ta’na Ekalesia e te arata‘i nei i te reira na roto i Ta’na peropheta, te peresideni Thomas S. Monson. E ere i te hoê haamaitairaa na‘ina‘i ia ora i roto i teie tau hopea nei. E tau hanahana teie, tei tohuhia e te mau peropheta i tahito ra ma te apitihia mai e te mau melahi tia‘i. Te ite mai nei te Fatu i Ta’na Ekalesia. Te ite atoa mai nei Oia i te mau taata mai ia Solomon Chamberlain, tei haapa‘o i te muhumuhu a te Varua Maitai e ua amui atu i to ratou mau taea‘e e te mau tuahine ati a‘e te ao nei, i te tautururaa i te faatupuraa i teie ohipa rahi na te Atua.
Hoho‘a na Matthew Reier tei patahia i ni‘a i te apaparaa a Iosepha Semita: Te Peropheta o te Faaho‘i-faahou-raa mai
Hoho‘a na Matthew Reier ; faahoho‘araa na Maryn Roos
Te vahi na te mau tamarii