Mau mana‘o no te Pô Utuafare

I roto i teie papa‘iraa te vai nei te mau parau e te mau ohiparaa o te nehenehe e faaohipahia no te pô utuafare. Teie i muri nei te tahi mau hi‘oraa.

« Ia riro ei Taata Maitai i Teie nei », api. 45: A faaite e rave rahi mau ohipa(ei hi‘oraa, hoê penitara, Buka a Moromona, Liahona, tiaa), e a ani i te mau melo o te utuafare ia faito ia ratou mai te faito maitai roa e tae roa’tu i te faito i raro roa. Aparau e mea nahea to ratou ma‘itiraa i te mau faataaraa. Eaha te mau maitai o te faariro i te oraraa o te hoê taata ei oraraa faufaa ? A faaitoito i te taata tata‘itahi ia rave i te hoê mea taa‘e maitai i roto i te hepetoma i muri nei no te riro mai ei taata maitai a‘e.

« Sabati Poipoi Roa », api 56: A ani i te melo tata‘itahi o te utuafare ia feruri i te hoê taata. A faanahonaho no te rave i te hoê ohipa i teie hepetoma no taua taata ra. A tai‘o Mosia 18:7–10 e a aparau e nahea te tautururaa ia vetahi ê i riro ai ei rave‘a no te haapa‘o i ta tatou fafauraa no te bapetizoraa.

« Ia Ore te Mooraa e Painu », api 58: a tapura i te tahi mau ture a to outou utuafare, e a aparau e nahea te reira i te paruru i to outou utuafare. A tapura atoa i te tahi mau faaueraa a te Metua i te Ao ra, e a aparau e nahea te reira i te paruru ia tatou i te pae tino e i te pae varua.

Te Pô Utuafare Oaoa

E rave rahi matahiti i teie nei, ua ani ta‘u tane i to maua utuafare ia faaineine ia matou no te hoê pô utuafare taa‘e. Ua ani ta maua tamahine e maha matahiti ia himene oia « E tamarii au na te Atua ». Na ta maua tamaiti 10 matahiti i faaoti i te pure. Ua ite matou i te puai e te nehenehe o te mana o te Varua.

Ua faaite maira ta‘u tane i te tahi mau mana‘o no roto mai i te feia faatere o te Ekalesia e ua faaitoito maira ia matou ia vai hoê noa i roto i te evanelia a Iesu Mesia. E ua horo‘a a‘era oia i te hoê haamaitairaa metua i ta maua tamahine iti nainai. Ua farii atoa to‘u mama e o vau i te haamaitairaa, e te hopea ra, o ta maua ïa tamaiti. Na mua a‘e oia a tuu ai i to’na rima i ni‘a i te upoo o ta maua tamaiti, ua faaite mai ta‘u tane i to’na mauruuru i te autahu‘araa e ua faaitoito ia’na ia ti‘amâ i teie nei mana.

fatata hoê matahiti e afa i muri mai, ua na ô maira ta maua tamahine e, « E faatupu faahou ana‘e tatou i te tahi pô utuafare mai ta tatou i rave i te hoê taime ». Ua ite au e, eaha ta’na e parau ra, tera râ ua ani â vau ia’na teihea pô utuafare. Ua pahono maira oia e, « Tera pô utuafare i reira tatou i ta‘i ai i te oaoa rahi ! »

Marlúcia Souza de Jesus Costa, Bahia, Berezilia

Ta outou pô utuafare au-roa-hia

Hapono i te hoê faaiteraa no ni‘a i ta outou pô utuafare au-roa-hia i te [e-mail].