Sabati po‘ipo‘i roa
E ti‘a oioi teie mau feia apî no Fiji i ni‘a ei reira e haere ai i te haereraa atea, tera râ, e mea itoito ratou ia rave i ta ratou ohipa.
E pô mahana maa teie i roto i te paroita no Waila te Tĭtĭ no Nausori Fiji. Ua oti i te ravehia te mau ohipa no te ao, e ua faaineine te mau melo no te Autahu‘araa a Aarona ia ratou no te sabati, e ua haaputuputu ratou i teie nei i te fare o te taea‘e e te tuahine Maiwiriwiri. E taime teie no ratou ia tamaa rii hou a haamata ai ratou i ta ratou haapaeraa maa, ei reira e taoto ai i ni‘a i te peue i te utuafare o Maiwiriwiri.
No teie mau feia apî no te Autahu‘araa a Aarona e mea oioi roa te ao. Na mua roa a ao ai, ua ti‘a ê na ratou, ua oomo i to ratou ahu uouo e to ratou taamu arapoa e to ratou pareu ereere, e ia hora 6H00 i te po‘ipo‘i, ua faaru‘e ratou i te fare o te taea‘e e te tuahine Maiwiriwiri, e mea apipiti—mai te mau misionare. E purumu taa maitai to te pŭpŭ tata‘itahi ia haere ratou, e ia tae mai ratou i te fare pureraa i te hora 10H00, te hora e haamata ai te pureraa autahu‘araa. Ta ratou hopoi‘a o te tape‘araa ïa i te fare o te melo tata‘itahi e ia ani ia ratou ia horo‘a i te moni haapaeraa maa.
E haere teie mau feia apî e pae kilometera i te atea mai te fare o Maiwiriwiri i te tahi hopearaa o te paroita e tae atu i te fare pureraa i te tahi hopea o te paroita. E taime teie e ti‘a ai ia ratou ia rave i ta ratou ohipa e ia ani i te mau melo o te Ekalesia ia tauturu i te ohipa rahi o te aupururaa i te ivi e to ratou mau taea‘e e te mau tuahine na roto i te horo‘araa i te moni haapaeraa maa. Te parau ra te peresideni Alipate Tagidugu no te Tĭtĭ no Nausori Fiji e, na roto i teie ohipa ta te Autahu‘araa a Aarona, ua maraa te horo‘a no te moni haapaeraa maa e 20 i ni‘a i te hanere.
Te vahi faufaa atoa, ua ti‘a i teie feia apî tamaroa ia faaoti i ta ratou ohipa e ia tauturu i te mau melo o te paroita ia haapa‘o i ta ratou mau fafauraa i rave i te bapetizoraa:
« No te mea ua hinaaro outou ia ô i te aua o te Atua, e ia parauhia i to’na ra mau taata, e ua hinaaro outou ia tauturu te tahi i te tahi i te hopoi i ta outou mau hopoi‘a, ia mama te reira ;
« Oia ïa, ua au ia outou ia oto, a oto ai te feia oto ra ; oia ïa, e ia haamahanahanahia ratou i tei au ia haamahanahanahia ra, e ia ti‘a ei ite o te Atua i te mau mahana atoa, e i te mau mea atoa, e i roto i te mau vahi atoa ta outou e parahi ra, e ia tae noa’tu i te poheraa, ia faaorahia outou e te Atua, e ia amuihia i roto i to te ti‘a-faahou-raa matamua, ia noaa te ora mure ore ia outou » (Mosia 18:8–9).
No teie mau tamaroa maitai roa, e ere te hopoi‘a te haereraa e ohi i te mau ô haapaeraa maa, e haamaitairaa râ. Ua oaoa roa ratou ia oomo i to ratou ahu uouo e te taamu arapoa, e ia ti‘a oioi i ni‘a, e ia patoto ma te hinaaro mau i ni‘a i te opani o te mau melo i te hora po‘ipo‘i roa no te ani ia ratou ia opere i te mau haamaitairaa e roaa na roto i te horo‘araa i te moni haapaeraa maa ma te aau tae mau.
A hi‘o noa ai au i teie feia apî tamaroa ia faaineine ia ratou no te haere e rave i ta ratou ohipa ei melo no te autahu‘araa, ua feruri au e, aue ïa haamaitairaa nehenehe no ratou i roto i to ratou oraraa ia ite ratou i te auraa o ta ratou ohipa i te aniraa i te mau melo o te Ekalesia ia haafatata i te Faaora na roto i te horo‘araa i te moni haapaeraa maa. E riro mai ratou ei mau misionare maitai roa, e ei mau tane faaipoipo e ei mau metua tane maitai na roto i te ohipa autahu‘araa ta ratou i rave.
E maramarama maitai ratou i teie irava no ni‘a i te mau taata o te Fatu : « E ma‘iri ihora te Fatu i te i‘oa o to’na ra feia o Ziona, no te mea hoe â to ratou aau e hoê â to ratou mana‘o, e ua parahi ho‘i ratou ma te parau-ti‘a ; e aore e taata veve i rotopu ia ratou » (Mose 7:18).»
Aue ïa haamaitairaa no teie mau taea‘e tei mau i te autahu‘araa ia ite e, ua ani ratou i te mau melo ia haafata i piha‘i iho i te Faaora.
Ua haamata oioi te mahana, tera râ, ma te ataata ua haere teie feia apî tamaroa mai te tahi pae o te paroita e tae atu i te tahi pae, ma te ohi i te mau moni haapaeraa maa a haere noa ai ratou.
Fiji
Niuterani
Auteraria
Te aua : hoho‘a © Dynamic Graphics, Inc ; hoho‘a na Talat Mehmood ;e hoho‘a fenua faaauhia mai roto mai i te hoho‘a Fenua Rave‘a tauturu