Taime faaanaanataeraa
Ua faaho‘i mai Iesu Mesia i te îraa o te Evanelia na roto ia Iosepha Semita
A feruri na i te hoê hapaina tei î roa i te pape ateate e te mâ. Mai te mea e, e ta‘iri tatou i te hapaina, e pee te tahi pape i rapae, aita ïa te hapaina i î faahou.
I tahito ra tei te fenua nei te îraa o te evanelia. E rave rahi matahiti to te mau peropheta haapiiraa i te evanelia.
A ora ai Iesu Mesia i te fenua nei, ua haamau Oia i Ta’na Ekalesia. Ua haapii Oia i te îraa o te evanelia : te faaroo ia Iesu Mesia, te tatarahapa, te bapetizoraa utuhi, te horo‘a o te Varua Maitai, e te haapa‘o i te mau faaueraa. Ua faaite Iesu i te mau taata atoa e nahea tatou ia ora. Ua riro mai Oia ei Faaora no tatou paatoa. Ua î roa te hapaina o te evanelia.
Tera râ, a tere noa ai te tau, ua mo‘e te tahi mau tuhaa o te evanelia no te mea, ua taui te mau taata iino i te reira e aore râ, aita i haapa‘o i te reira. Aita te îraa faahou o te evanelia i ni‘a i te fenua nei. Ua fafau mai te Metua i te Ao ra i Ta’na mau tamarii e, e horo‘a faahou mai Oia ia ratou i te îraa o te evanelia. Ua pii Oia ia Iosepha Semita ia tauturu Ia’na ia faaho‘i faahou i te îraa o te evanelia.
Te haapii mai nei Ioane 3:16 ia tatou e, ua horo‘a mai te Metua i te Ao ra ia tatou nei i Ta’na Tamaiti e i te evanelia no te mea ua here Oia i Ta’na mau tamarii. Ua pii Oia i te mau peropheta no te haapii i te mau taata atoa i Ta’na evanelia ia ti‘a hoi ia tatou ia ite i e‘a no te ho‘i Ia’na ra.
Ua haamaitaihia tatou i te fariiraa i te îraa o te evanelia i roto i te Ekalesia a Iesu Mesia i te Feia Mo‘a i te mau Mahana Hopea nei. Ua î roa ta tatou mau hapaina i te evanelia, e ua fafau mai te Metua i te Ao ra e, eita roa te evanelia e iriti-ê-faahou-hia i te fenua nei.
Buka aamu papa‘iraa mo‘a no eperera 2010
A tai‘o i te ono o te hiroa faaroo no ni‘a i te faaroo i roto i te Buka Poe Tao‘a Rahi.
A tamau aau i teie hiroa faaroo
A pure no te ani i te Metua i te Ao ra ia tauturu mai ia outou ia ite e, ua faaho‘i mai Iesu Mesia i te îraa o te evanelia na roto ia Iosepha Semita.
A ma‘iti i te hoê o teie mau ohipa, e aore râ, a faanaho i ta outou iho:
-
A tauturu i te tahi atu taata ia tamau i teie hiroa faaroo.
-
A tai‘o e aore râ, a ani i te tahi taata ia tai‘o mai i mua ia outou i te—aamu o Iosepha Semita i roto i te Poe Tao‘a Rahi.
-
A hamani i te huira aamu i ni‘a i te api 67. A tapu i na huira e piti, e a taamu ia raua i te hoê hatua veo. A faaohipa i te huira no te haapii i te îraa o te evanelia a Iesu Mesia i faaho‘i-faahou-hia mai na roto ia Iosepha Semita.
-
Te haapii nei to tatou mau misionare i te mau parau o te evanelia i faaho‘i-faahou-hia mai na te ao atoa nei. A pure no ratou. A pure no te ite e, o vai ta outou e nehenehe e ani ia faaroo i te parau poro‘i a te misionare.
Nahea te mea ta outou i rave e tauturu ai ia outou ia haroaroa i te hiroa faaroo ono ?
A papa‘i i roto i to outou buka aamu e aore râ, a papa‘i i te hoê hoho‘a no ni‘a i te mea ta outou i rave.»
Ua faaho‘i mai Iesu Mesia i te îraa o te Evanelia na roto ia Iosepha Semita
Pae aui : Te Orama Matamua, na Gary L. Kapp, eiaha e hamani i te hoê hoho‘a ; Atau i ni‘a : faahohoaraa © Haapapûraa Ora ; atau raro : Iosepha Semita teie e iriti nei i te Buka a Moromona, na Del Parson, © IRI ; te tahi atu mau faahoho‘araa na Robert T. Barrett