Te ahu faaipoiporaa e te faanahonahoraa

Na Jane McBride Choate

« Na te Atua i haamau i te faaipoiporaa » (PH&PF 49:15).

Ua parahi o Lori i ni‘a i te ro‘i o to’na tuahine paari a faaoti ai o Karyn i te faanaho i ta’na pute no te hiero. Te faaipoipohia nei o Karyn i teie mahana.

Ua oaoa roa o Lori ia haere i te oro‘a faaipoiporaa i taua ahiahi ra, tera râ, ua pe‘ape‘a atoa oia. E nehenehe ta to’na taea‘e paari, tei oti ta’na misioni, e haere i roto i te hiero e o Karyn. E nehenehe atoa ta to’na na metua e haere. Area o Lori e to’na na teina taea‘e eita ïa e nehenehe e haere i roto.

« Ua hinaaro roa vau ia haere atoa i roto i te hiero e o oe », te parau ïa a Lori.

Ua hi‘o maira o Karyn na ni‘a a‘e i ta’na pute. « O vau atoa, tera râ, aita oe e fifi i rapae. E te vai ra te mahana e haere ai au i te hiero na muri iho ia oe ia faaipoipo-ana‘e-hia oe ».

Ua maru roa te pe‘ape‘a o Lori, tera râ, ua feruri faahou oia i te tahi atu ohipa. « E mea nahea oe i ite ai e, e faaipoipo oe ia Matt ? » ta’na ïa uiraa.

Ua parahi maira o Karyn i piha‘i iho ia Lori. « E mea maoro i teie nei ua haapii mai au e, e faanahonahoraa ta te Metua i te Ao ra no‘u. I to‘u farereiraa ia Matt, ua ite a‘e ra vau e, e nehenehe ta maua e faatupu amui i taua faanahonahoraa ».

« Ua faaoti anei oe i te reira faanahonahoraa ? » te uiraa ïa a Lori.

Ua ta‘iriiri a‘e ra o Karyn i to’na upoo e aita. « Te hinaaro nei maua o Matt i te mau tamarii, faaoti i ta maua haapiiraa, e rave rahi atu â ».

Ua hi‘o atu ra o Lori i ni‘a i te ahu faaipoiporaa uouo nehenehe e tarere noa ra i ni‘a i te opani vairaa ahu o Karyn. « E mea nehenehe mau to oe ahu », ta’na ïa i parau.

Ua ataata a‘e ra o Karyn. « Tera ïa te tahi tuhaa o te faanahonahoraa », ta’na ïa i parau. « Ua hinaaro noa vau ia faaipoipo i roto i te hiero, e rave ïa vau i te ahu ohie noa ».

Tau hora i muri mai, ua mata‘ita‘i o Lori ia Karyn e ia Matt i te haereraa mai i rapae i te hiero. Ua anaana to raua hoho‘a mata.

Ua horo atu ra o Lori i ni‘a ia Karyn e ua tapii atu ra i to’na na rima i ni‘a ia’na.

E rave rahi hepetoma i muri mai ua farii o Lori i te hoê hoho‘a i roto i te imere. E hoho‘a ïa no Karyn e o Matt te ti‘a ra i mua i te hiero. Ua papa‘i o Karyn i ni‘a roa, « e faanahonahoraa ta te Metua i te Ao ra no oe ».

Ua tuu o Lori i te hoho‘a i ni‘a i to’na afata vairaa tauihaa. Ua fafau oia e, te vai ra te mahana e haere oia i te hiero e e roaa atoa ia’na tera anaana i ni‘a i te mata o to’na tuahine.»