Ua faatura oia i ta‘u aniraa

Juan Carlos Fallas Agüero, San José, Costa Rica

I to‘u bapetizo-raa-hia i te 18 o to‘u matahiti, ua ite au e, e riro te oraraa i te evanelia a Iesu Mesia ei faito oraraa. Ua ite au i te faufaa e te papû i te haapa‘oraa i te mau ture o te evanelia, e na roto i te reira, ua haamaitaihia to‘u oraraa i roto i te mau huru e rave rahi.

Hoê parau tumu o te evanelia tei riro ei mea faufaa roa no‘u o te haamo‘araa ïa i te mahana sabati. Ua ti‘a ia‘u ia faaea i te mau ohipa matarohia e au i te mau mahana atoa e ia faatumu i to‘u mau mana‘o i ni‘a i to‘u Metua i te Ao ra.

Te rave nei au i te ohipa i roto i te fariiraa ratere i Costa Rica. I roto i teie ohipa, e mea titauhia te taata ia rave i te ohipa i te sabati. I to‘u haamataraa i te reira ohipa, ua faaite au e, e melo vau no te Ekalesia. Ua ani au ia haavata ia‘u i te sabati—e ua fariihia mai.

No te taa ê o ta‘u aniraa, ua huru maere rii to‘u mau hoa ohipa e to‘u raatira. Ua uiui mai ratou i te mau uiraa e rave rahi no ni‘a i ta‘u haapa‘oraa. I te roaraa o te tau ua ti‘a ia‘u ia faataa ia ratou i te tahi mau mea e ti‘aturihia nei e te feia mo‘a i te mau mahana hopea nei. I te mau taime e rave rahi, ua faatupu ta‘u mau haamaramaramaraa i te mau haapiiraa o te evanelia i te huru faatura i roto ia ratou.

I te hoê mahana ua haaputuputu to matou raatira i te mau rave ohipa no te tahi faaararaa. « Te hinaaro nei au ia haere mai outou paatoa e rave i te ohipa i teie na hopea hepetoma e piti i muri nei », te na reira ra oia. Ua pe‘ape‘a roa vau. Ua ite a‘e ra vau e, e titauhia ïa ia‘u ia rave i te ohipa i te sabati.

Tera râ, ua parau faahou te raatira e : « No te mau taata atoa teie parau, eiaha râ no Juan Carlos. Ua ite tatou e, aita hoê mea e nehenehe e faahaere mai ia’na e rave i te ohipa i te sabati ».

Ua topa te hau. Ua faatura to‘u raatira i ta‘u aniraa ! No to‘u huru e ta‘u mau ture i faaite i roto i te vahi ohiparaa, ua faatura oia ia‘u. E no reira, ua faatura oia i to‘u mau ti‘aturiraa.

Ua ite au e, mai te mea e, e faariro tatou i te mau ture o te evanelia ei ohipa matamua i roto i to tatou oraraa, e haamaitai te Fatu ia tatou.

« Te hinaaro nei au ia haere mai outou paatoa e rave i te ohipa i teie na hopea hepetoma e piti i muri nei », te na reira ra to‘u raatira. Ua pe‘ape‘a roa vau Ua ite a‘e ra vau e, e titauhia ïa ia‘u ia rave i te ohipa i te sabati.