Faariroraa i te faaipoiporaa hiero ei ohipa matamua
Ua fanauhia o Vitaly e o Ekaterina (Katya) Shmakov i Omsk, Russia, e i Yekaterinburg, Russia. Ua riro mai raua toopiti ei melo no te Ekalesia a Iesu Mesia i te Feia Mo‘a i te mau Mahana Hopea nei i to raua apîraa, e ua tavini raua toopiti i te hoê misioni—o Vitaly i roto i te misioni no Czech Prague e o Katya i roto i te misioni no Russia Novosibirsk. Te parau ra raua e, ua itehia ia raua te mau rave‘a no te hoê oraraa oaoa, te ti‘aturi e te î ho‘i, e ua riro ta raua misioni ei haapaariraa i to raua mau hinaaro ia faatupu i te utuafare i faatumuhia i ni‘a iho i te evanelia, ma te haamata na ni‘a i te faaipoiporaa hiero. Teie to raua aamu.
Vitaly : Tau ava‘e i muri a‘e i to‘u ho‘iraa mai na ta‘u misioni, ua anihia vau ia riro ei tauturu i roto i te hoê amuiraa feia apî i te fenua iho. Ua titau mai o Steven C. Smith, peresideni no te misioni no Russia Novosibirsk, ia haere au i roto i to’na piha ohiparaa. Ua feruri au i te hoê piiraa apî e aore râ, i te tahi uiuiraa. Tera râ, ua parau mai te peresideni Smith ia‘u no ni‘a i te hoê taata ta’na e hinaaro ra ia farerei au—e tamahine no faaoti noa mai nei i ta’na misioni e ua ho‘i i to’na fenua i te tahi atu tuhaa no Russia, tera râ, e haere mai oia i te oire no te amuiraa.
Aitâ vau i ite a‘e nei ia Katya, tera râ, i to‘u taeraa i te amuiraa, ua farerei au ia’na, e ua aparaparau rii maua no te tahi tau minuti. I te pô, ua ani au ia Katya ia haere maua e ori hoê ori. I te mahana i muri iho ua ani faahou vau ia’na ia haere maua e ori.
Katya : A tupu ai au i te paariraa, aita i rahi te feia apî paari tei mau i te autahu‘araa ta‘u i matau, tera râ, ua ti‘aturi noa vau e, e faaite mai te Fatu ia‘u i te hoê taure‘are‘a maitai no te faaipoipo ia‘u. Aita roa’tu vau i ite e, ahea e aore râ, e nahea maua e farerei ai, tera râ, ua ti‘aturi au i te Fatu e i Ta’na mau fafauraa.
I muri a‘e i ta‘u misioni, ua anihia mai au ia tauturu i te haapa‘oraa i te hoê amuiraa na te feia apî. I to‘u iteraa ia Vitaly i te amuiraa, ua tupu oioi te hinaaro i roto ia‘u ia haamatau ia’na. Ua riro na mahana e toru to maua farereiraa i roto i te amuiraa ei na mahana nehenehe roa e te ore e mo‘e-faahou-hia.
Ua tupu i roto ia‘u te hoê mana‘o puai e, o Vitaly te taata ta‘u e faaipoipo. Aita teie huru iteraa oioi e farereihia e te mau taata atoa i roto i te hoê arapaeraa. No reira, nahea tatou e ite ai e, tei ni‘a tatou i te e‘a mau ? Ua haapii mai au i roto i ta‘u misioni ia ite i te Varua e ia pee i Ta’na arata‘iraa ma te feaa ore. No reira, i to‘u fariiraa i te mau muhumuhuraa ia haere au e haamatau ia Vitaly, ua pee au i te reira.
Ua ite au e, e arata‘i te Varua ia tatou paatoa mai te mea e, e imi tatou Ia’na. Eiaha tatou e faaau i to tatou haere‘a i te haere‘a o vetahi ê—eita te Varua e arata‘i ia tatou paatoa i ni‘a i te hoê â e‘a—mai te mea râ e, e faaroo tatou i te Varua, e nehenehe tatou e ti‘aturi e, ua tano te haere‘a ta tatou e haere ra.
Te upooti‘araa i ni‘a i te mau fifi
Vitaly : I roto i taua na mahana e toru ra, ua ite a‘e ra vau e, ua itehia ia‘u te hoê taata taa ê Ua au ore rii au i te hoperaa te amuiraa, e ia taa ê maua o Katya. Aua‘e râ, te vai ra te tahi amuiraa na te feia apî paari i te ava‘e i muri iho. I taua taime ra ihoa ua haamata vau i te feruri i te reira amuiraa.
Ua riro mau taua amuiraa ra ei amuiraa nehenehe roa mai ta‘u i ti‘aturi. E taime rahi roa to maua o Katya titauraa ia ite maitai i te tahi e te tahi. I te hopea o taua ohipa ra, ua tapa‘o maua i to maua numera niuniu e ua ho‘i i roto i to maua oire.
I roto i te mau hepetoma i muri mai, ua farerei pinepine maua na roto i te niuniu e te tahi mau parau poro‘i. (Te feruri nei au e, aita i ava‘e te maoro, ua ite au nahea ia hapono i te parau poro‘i na roto i ta‘u niuniu hau a‘e i te vitiviti i te rahiraa o te taata e patapata i ni‘a i ta ratou rorouira !)
Ua ora o Katya i Yekaterinburg, 11 hora te maoro na ni‘a i te pereoo auahi mai te vahi e faaeahia ra e au i Omsk, Siberia. Noa’tu râ i te reira, ua hinaaro roa maua ia farerei faahou te tahi i te tahi. Ua haamata a‘e ra maua i te faatupu i te mau tere tamau i te hopea o te hepetoma. Hoê hopea hemetoma na‘u e haere e hi‘o ia’na, e te tahi tau hepetoma i muri iho, na’na e haere mai e farerei ia‘u. Ia haere au e farerei ia Katya, e faaea vau i piha‘i iho i to maua mau hoa i roto i to’na oire, e ia haere mai oia e farerei ia‘u, e faaea oia i piha‘i iho i to maua mau hoa i roto i to‘u oire. E mea pinepine maua i te parahi maoro i piha‘i iho i te reira mau hoa no te Ekalesia i roto i ta maua mau farereiraa.
Katya : Penei a‘e ahuru ma hoê hora, e tere roa tera, tera râ, i Russia, e mea poto roa ïa ! No te atea, aita e ti‘a ia maua ia farerei pinepine mai ta maua e hinaaro. E farerei maua hoê taime i te tahi tau hepetoma, e e farerei maua e toru mahana te maoro hou a ho‘i ai i to maua fenua. E mea pinepine maua i te feruri e, e mea tano ahiri e, e maoro atu â ta maua farereiraa, e e mea fifi roa ia tae i te taime e taa ê ai maua. E no taua mau fifi ra o to maua farereiraa, e poihere maite maua i te mau minuti atoa o to maua farereiraa. A tamau noa ai maua i te farerei i te tahi e te tahi, ua haamata maua i te hi‘o i te hoê taime aita e titau-faahou-hia ia maua ia faataa ê.
E mea au roa ta maua arapaeraa e te rau atoa te huru : ua haere maua e taataahi i te pereoo taataahi e ua haere na ni‘a i te puaahorofenua, ua haere e mata‘ita‘i i te fare vaharau, ua tai‘o i te mau papa‘iraa mo‘a, ua tunu i te maa, ua haere e orihaere na te mau aua faafaaearaa (ua ori roa maua i roto i te hoê o te reira mau aua), e ua haere e tavini i te fare no te mau tamarii metua ore e ua ha‘uti e te mau tamarii.
I te mau taime atoa e farerei maua, ua rave maua i te hoê ohipa apî, e ua arearea roa maua. Ua au roa vau i te mau mana‘o apî o Vitaly i te faaineineraa i ta maua arapaeraa. Ua tauturu te mau faaoaoaraa ta’na i faaineine ia maua ia ite i te tahi e te tahi.
Vitaly : No te mea ho‘i e, e piahi noa â vau, aita e ti‘a ia‘u ia aufau i te tahi mau mea arearea. Ua pau noa ta‘u moni i roto i te mau tere farerei ia Katya e i te aufauraa i te tarahu niuniu. Tera râ, e ere no te mea e, aita ta maua moni i rahi roa, aita atoa ïa ta maua arapaeraa i faahiahia roa e te maitai ho‘i. E nehenehe e parau e, te tahi mau arapaeraa ta maua aita ïa i pau noa a‘e hoê toata.
E mea huru maamaa rii paha teie mana‘o, tera râ, ua hinaaro vau ia ite eaha te huru o Katya i mua i te mau tamarii, no reira, ua haere maua i te hoê fare no te mau tamarii otare. E mai te reira ïa te rahiraa o ta maua mau arapaeraa ; ua tamata mau maua ia haapii papû no ni‘a i te tahi e te tahi.
Te oraraa ia au i te faanahoraa a te Fatu
Vitaly : I Russia, mai te huru i te mau vahi e rave rahi, e peu matarohia e te taata ia faaea fare roa hou a faaipoipo ai. I muri a‘e i to‘u aniraa e faaipoipo ia Katya, ua ani mai te tahi mau hoa to‘u e, nahea e ti‘a ai ia‘u ia faaipoipo ia’na ma te ite ore na mua e, e tano anei maua. Mai te mau taata e rave rahi i na reira atoa i te feruri no ni‘a ia Katya, ua feruri ratou e, hoê noa iho rave‘a e ite ai au e, e tano anei oia ia‘u maori râ, ia faaea fare roa maua no te tahi pu‘e tau te maoro.
Ua parau vau ia ratou e, aita e titauhia ia faaea fare roa i te hoê taata no te iteraa ia’na. Ua tamata atoa vau i te haamaramarama i to‘u mau hoa e, ua pure au e ua farii au i te pahonoraa e, e mea ti‘a ia‘u ia faaipoipo ia Katya. Aita to‘u hoê a‘e mata‘u no to‘u oraraa faaipoipo no te mea, ua pure au no ni‘a i ta‘u faaotiraa. Ua oaoa vau e mai te huru ra e, hoê oraraa apî teie e fâ mai nei i mua ia‘u. Aita roa hoê taata i pato‘i e aore râ, i faaino mai i te ma‘itiraa ta‘u i rave. Ua paturu mai râ ratou ia‘u i roto i ta‘u faaotiraa.
Katya : I te aniraa mai o Vitaly e faaipoipo maua, ua tamata to‘u na metua i te tape‘a ia‘u eiaha e faaipoipo. Ua feruri raua e, e mea oioi roa no maua ia faaipoipo, e e mea ti‘a ia‘u ia ite maitai ia Vitaly hau atu â i ta‘u i ite ra. Ua parau atoa mai to‘u fatu ohipa i te reira parau e ua na ô atoa mai e, « e mea ti‘a ia orua ia faaea fare na mua orua a rave ai i te hoê faaotiraa mai te reira te huru ».
Te pe‘ape‘a nei au ia ite i tera huru feruriraa to te taata no ni‘a i te faaipoiporaa e te utuafare. Aita vau e mana‘o nei e, te ite ra ratou i te oaoa rahi o te tane e te vahine ia oti ana‘e raua i te faaipoipohia e i te taatihia i roto i te hiero. Tera here e te oaoa rahi ta maua o Vitaly i farii i to maua faaipoipo-raa-hia, ua hau roa’tu ïa i te puai na roto i te iteraa e, ua taatihia maua e amuri noa’tu.
Vitaly : Ua faaipoipohia maua o Katya i Omsk i te 25 no fepuare 2006. (I roto i te ture a Russia, e titauhia te faaipoiporaa tivira na mua a‘e i te taatiraa i roto i te hiero, mai te rahiraa o te fenua e na reira nei). Ia po‘ipo‘i a‘e ua haamata maua i to maua tere no te haere i te hiero no Stockholm Sweden. Ua ta‘uma maua i ni‘a i te manureva i Omsk e ua rere i Moscou e toru hora te maoro, e ua faaea i reira e hope atu taua mahana ra. I muri iho ua rave maua i te pereoo auahi i te pô no te haere i Saint Petersburg. Ia tae maua i reira, ua ta‘uma maua i ni‘a i te hoê bus e te tahi atu mau feia mo‘a i te mau mahana hopea nei e ua ratere matou e va‘u hora te maoro a tapae atu ai i Helsinki, Finland. Te tuhaa hopea o to maua tere e mea na ni‘a ïa i te pahi ferry, 11 hora te maoro e tae atu ai i Stockholm.
I te pae hopea ua tae maua i te hiero.
No te tahi pae, e riro paha teie tere roa ei tamataraa, tera râ, ua riro atoa teie tere na roto ia Europa mai te hoê tere rahi orihaere no na taata faaipoipo apî.
Ua riro te mahana o to maua taatiraa, 1 no mati 2006, ei mahana faahiahia—e mahana no te hau e te papû maitai. Ua ite au e, te taata ta‘u e tape‘a ra i te rima o te taata ïa ta‘u e apiti e amuri noa’tu. Ua faatupu teie mana‘o i te oaoa e te mauruuru rahi i roto ia‘u i te Metua i te Ao ra no To’na ti‘aturiraa ia‘u e Ta’na tamahine no to‘u oraraa. Ua fatata roa vau i piha‘i iho Ia’na hau atu i tei te matamua ra.
Te imiraa i te mau huru o te Mesia
Katya : I teie nei, hoê tamahine iti ta maua o Vitaly. E mea nehenehe roa oia. Te hinaaro nei au ia faaipoipo oia i roto i te hiero i te hoê mahana, e te patururaa maitai roa a‘e ta maua e horo‘a ia’na o te riroraa ïa ei na hoa e ei na metua here.
Te ti‘aturi nei au e, e ti‘a ia’na ia imi i te hoê taea‘e ti‘amâ tei mau i te autahu‘araa e te vai ra i roto ia’na e rave rahi mau huru o te Mesia. No to‘u iteraa i taua mau huru ra i roto ia Vitaly, na te reira i tauturu ia‘u ia ite e, e nehenehe ta‘u e faaipoipo ia’na.
Eaha te mea i faatupu i roto ia‘u te hinaaro ia Vitaly ? Oia mau, e taata nehenehe oia e te maramarama, e ua ite oia e nahea ia arapae i te hoê tamahine. E ere râ te reira te tumu rahi. Te vai ra i roto ia’na te mea ta‘u e au ia parau e « te mau mata o te hoê pĭpĭ na te Mesia ». Ua ite au i te hoê maramarama i roto ia’na. E taata parau ti‘a oia i te mauraa i te autahu‘araa.
Vitaly : Oia mau, e mea faahiahia roa ia faaipoipo i te hoê taata tei auhia e outou. Tera râ, mai te mea e, e faatumu noa tatou i ni‘a i te mau huru pae tino, e riro tatou i te hahi i te mau huru faufaa roa a‘e—te huru taata, te huru varua, e te tahi atu mau maitai faufaa roa no te hoê faaipoiporaa e ti‘a i te vairaa.
Ua ite au e, e ere i te mea ohie no te tahi mau feia apî paari ia imi i te hoê hoa faaipoipo i roto i te Ekalesia no te mea, aita i rahi te feia mo‘a i te mau mahana hopea nei i te vahi ta ratou e faaea ra. Mai te reira atoa vau. Tera râ, ua ite au e, noa’tu te mau fifi e vai ra, mai te mea e, e haapa‘o tatou i ta tatou tuhaa e e faaineine tatou ia tatou ia taatihia i roto i te hiero, e nehenehe ta te Metua i te Ao ra e faaite mai i te rave‘a. ◼
Pae aui : Te utuafare Shmakovs i te mahana a taatihia ai raua i te matahiti 2006 ; fatata e 30 hora te maoro o to raua tere no te haere i te hiero no Stockholm Sweden.
Pae atau : I teie mahana, hoê tamahine i roto i te utuafare Shmakovs Te parau ra o Katya e, « te hinaaro nei au ia faaipoipo oia i roto i te hiero i te hoê mahana, e te patururaa maitai roa a‘e ta maua e horo‘a ia’na o te riroraa ïa ei na hoa e ei na metua here ».
Hoho‘a o te utuafare fariihia e te utuafare Shmakovs.