« A faaamu atu i Ta‘u mamoe »
« E pee mai ia‘u nei, e a faaamu atu i ta‘u mau mamoe » (PH&PF 112:14).
« Ua parau atu ra Iesu ia Petero ia faaamu i Ta’na mamoe. Tera te rave‘a e ti‘a ai ia Petero ia faaite ia Iesu e, ua here oia Ia’na ».
« Mama, e nana mamoe anei ta Iesu ? »
« Aita, e aiû. I te tahi taime e parau-atoa-hia o Iesu e, te Tia‘i Mamoe Maitai, e e au e, o tatou Ta’na mau mamoe. Ua haapii Iesu ia Petero e, mai te mea e hinaaro tatou e faaite ia Iesu e, ua here tatou Ia’na, e mea ti‘a ia tatou ia tauturu ia vetahi ê ».
« No reira anei tatou e hopoi ai i te pai na te tuahine Jacobs i muri a‘e i te pô utuafare ? »
« Oia mau. Tera râ, e mea maitai roa mai te mea e, e feruri oe i te hoê mea ta oe e rave no te faaite i te tuahine Jacobs e, ua here oe ia’na ».
Ua feruri a‘e ra o Olivia e, eaha ta’na e rave. Ua haamana‘o a‘e ra oia e, e mea au roa na mama e na mama ruau te mau hoho‘a ta’na i papa‘i.
« Ua ite au ! E nehenehe ta‘u e hamani i te hoê tareta na te tuahine Jacobs ma te papa‘i i te hoê hoho‘a i ni‘a iho ! »
Ua papa‘i a‘e ra o Olivia i te hoê anuanua nehenehe mau. I ni‘a i te pae roto o te tareta ua papa‘i oia e, « Ia maitai oioi oe ! Ua here au ia oe, Olivia ».
A haere ai o Olivia e to’na utuafare i te fare o te tuahine Jacobs, ua ui o mama i te tuahine Jacobs eaha to’na huru. Ua haamata ihora te tuahine Jacobs i te ta‘i.
« Ua ite iho nei au e, e mea ti‘a ia‘u ia haere i te fare ma‘i, e tapuhia vau ananahi. Te mata‘u rii nei au ».
Ua horo‘a’tura o mama i te pai i te tuahine Jacobs ra. E ua horo‘a atoa o Olivia i te tareta ta’na i hamani.
« Mauruuru e Olivia. Na roto i teie tareta nehenehe roa e ta oe ataata maru, ua maitai a‘e au ».
Ua mana‘o a‘e ra o Olivia e, ua tauhi te hoê taata i to’na mafatu. Ua oaoa oia i te mea e, ua ti‘a ia’na ia tauturu ia Iesu ia faaamu i Ta’na mamoe.