Te Haamaitai nei te mau Arata‘iraa Apî a te Sotaiete Tauturu i te mau Melo
Ua faaara o Julie B. Beck, te peresideni rahi o te Sotaiete Tauturu, i te tahi mau arata‘iraa apî no te mau pureraa a te Sotaiete Tauturu a ono ava‘e i ma‘iri a‘e nei i roto i te rururaa rahi a te Sotaiete Tauturu, e te haamaitai nei te reira i te oraraa o te mau tuahine ati a‘e te ao nei.
Te parau ra te Tuahine Beck e, e mea farii-maitai-hia te reira mau arata‘iraa apî, ma te haapapû e, e nehenehe ta te mau melo na te ao atoa nei e faataa i te mau rururaa ia au i te hinaaro o te taata tata‘itahi, ma te tamaru i te mau titauraa, i roto i te hoê ekalesia ua rau te hiroa tumu e te vahi hoi.
« Ua riro te reira ei ohipa maitai roa no te hoê faanahonahoraa na te ao atoa nei »,te parau ïa a te Tuahine Beck. « Te here nei matou i te mau tuahine, te ti‘aturi nei matou i te mau tuahine, e ua ite matou e, mai te mea e, e faariro ratou i teie ohipa ei ohipa no te faaroo e no te haapa‘o, eita ïa ratou e farerei i te fifi i roto i te reira ohipa ».
Ia riro te a‘oraa a te Tuahine Beck, « Sotaiete Tauturu: E Ohipa Mo‘a » (Liahona, Novema 2009, 110) ei ture mana no ni‘a i te mau putuputuraa, e te mau feia faatere no te Sotaiete Tauturu e uiraa ta ratou no ni‘a i te mau ture, e haere atu ïa ratou e farerei i te feia faatere o te autahu‘araa.
Te mau Tauiraa Rarahi
Ua haapapûhia e, e pee te mau tauturu o te Sotaiete Tauturu i te faanahoraa o te autahu‘araa e e piihia ratou ei tauturu matamua e aore ra, ei tauturu piti. Te piiraa i matarohia na mua a‘e nei, taata faatere no te haafaufaaraa i te nohoraa, te utuafare e te taata iho, e piihia ïa i teie nei e, te taata faanaho i te putuputuraa a te Sotaiete Tauturu. Te tuahine e mau nei i teie ti‘araa, e tamau noa oia i te faanaho i te mau putuputuraa a te Sotaiete Tauturu e faatupuhia i roto i te hepetoma i raro a‘e i te faatereraa a te peresideniraa.
Te mau Arata‘iraa no te Pureraa a te Sotaiete Tauturu
I roto i ta’na a‘oraa, ua parau te Tuahine Beck e, te mau pureraa i parauhia i mua ra e, « te haamaitairaa i te nohoraa, te utuafare e te taata iho » e parauhia ïa te reira i teie nei e, te mau pureraa a te Sotaiete Tauturu.
Ua faataa te Tuahine Beck e mea nahea te peresideni Sotaiete Tauturu ia faatere i te mau putuputuraa atoa a te Sotaiete Tauturu e ia paraparau i te episekopo e aore ra, i te peresideni amaa, o te haamana i te mau faanahoraa atoa.
Na te peresideni Sotaiete Tauturu e faatere i te mau putuputuraa, tera râ, e nehenehe ta’na e ani i te tauturu matamua e aore ra, i te tauturu piti—e aore ra, e maiti i te hoê tuahine i roto i te paroita e aore ra, i roto i te amaa,—ia riro ei tuahine faanaho i te mau putuputuraa. E mea ti‘a i te hoê a‘e melo o te peresideniraa ia amui mai i roto i te mau putuputuraa.
I te rahiraa o te taime, e faatupuhia te mau putuputuraa hoê taime i te ava‘e, e aore ra, hoê a‘e taime i te mau toru ava‘e atoa, i te hoê taime taa‘e atu i te Sabati e aore ra, i te pô monire. Na te episekopo e aore ra, te peresideni amaa e te peresideni Sotaiete Tauturu e faataa i te pinepineraa o te mau putuputuraa, e eiaha e parau i te mau tuahine e, e mea titauhia ia ratou ia tae i te taatoaraa o taua mau putuputuraa ra.
Ia faanaho-ana‘e-hia te mau putuputuraa, e feruri te peresideniraa Sotaiete Tauturu i te parau no te taime e titauhia, te haamau‘araa, te parururaa, e te atearaa o te tere.
Ia riro te reira mau putuputuraa ei rave‘a no te faatupuraa i te « mau hopoi‘a aroha e te au maitai » a te Sotaiete Tauturu, ma te faarahi i te faaroo e i te parau ti‘a o te taata iho, e ma te hi‘o i te mau hinaaro pae varua e te pae tino o te mau taata e o te mau utuafare.
Ia faanaho ana‘e ratou i te mau putuputuraa, e mea ti‘a i te peresideniraa Sotaiete Tauturu ia faatumu na mua roa i ni‘a i te mau mea o te faatupu i te mau opuaraa a te Sotaiete Tauturu; e nehenehe te mau putuputuraa e faatumu i ni‘a i te hoê tumu parau e aore ra, ia tatuhaahia te reira i roto hau atu i te hoê haapiiraa e aore ra, faaoaoaraa. E mea ti‘a i te mau orometua haapii ia riro ei melo no te paroita e aore ra, no te tĭtĭ.
Mai te mea e, e faaohipa-maitai-hia te mau putuputuraa, na te reira e faarahi i te aravihi o te Sotaiete Tauturu ia rave i te ohipa ma te puai i piha‘i iho i te feia faatere o te autahu‘araa i roto i te mau paroita atoa », te parau ïa a te Tuahine Beck.