E Farii te mau Taata Hoani i te Buka Iti o te Hiero tei Hi‘opo‘ahia

E farii te mau taata hoani no te Liahona e no te Ensign i te buka iti Te mau Hiero a te Ekalesia a Iesu Mesia i te Feia Mo‘a i te mau Mahana Hopea nei ei monoraa i ta ratou ve‘a no atopa 2010.

Teie buka iti, e buka faaapîhia ïa mai roto mai i te hoê buka tei nene‘ihia ua hau i te 50 matahiti i teie nei. I te haamataraa, o te hoê ïa ve‘a a te Ekalesia Improvement Era i te matahiti 1955. E i muri a‘e, ua riro mai ei buka iti tei faaapîhia e va‘u taime. I roto i te faaapîraa i muri nei, te vai ra ïa te mau papa‘iraa e te mau hoho‘a apî, e e haapararehia te reira i roto e 45 reo.

Ua faaitoito tamau noa te mau peropheta no te mau mahana hopea nei, tae roa’tu i te Peresideni Thomas S. Monson, i te mau melo ia farii i to ratou iho oro‘a hiero e ia ho‘i faahou i te hiero no te rave i te oro‘a no to ratou mau tupuna.

Ua faataahia te reira buka iti no te haapii i te mau parau haapiiraa e te mau parau tumu o te ohipa hiero. Te faaitoitohia nei te mau melo o te Ekalesia ia vai teie buka i roto i to ratou utuafare ia ti‘a i te mau metua ia faaohipa i te reira mau buka iti i roto i te pô utuafare e aore ra, i te tahi atu vahi no te haapii i to ratou mau utuafare no ni‘a i te hiero.

E itehia i roto i te reira buka iti te hoê mea i au i te mau huru taata atoa. Teie te mau papa‘iraa apî i roto i teie buka iti i faaapîhia « Te mau haamaitairaa o te Hiero », na Peresideni Thomas S. Monson, e « Faaineine no te mau Haamaitairaa o te Hiero », na Elder Russell M. Nelson no te Pŭpŭ Tino Ahuru Ma Piti Aposetolo. Te vai atoa ra i roto i teie buka iti te hoê papa‘iraa na te feia apî tei parauhia « Faariroraa i te Hiero ei Tuhaa no to Outou Oraraa », e e nehenehe ta te mau tamarii e haapii mai no ni‘a i te mau hiero na roto i te papa‘iraa tei parauhia « To outou E‘a i te Hiero ». E au roa te mau taata tai‘o ia mataitai i te mau hoho‘a o te mau hiero na te ao atoa nei. I roto i te reira buka iti, te vai atoa ra te mau pahonoraa i te mau uiraa matarohia no te tauturu i te mau melo e faaineine ra e haere i te hiero no te taime matamua.

Te faaitoitohia nei te mau melo ia faaite i teie buka iti i te mau melo o to ratou utuafare e i to ratou mau hoa no te tahi atu mau haapa‘oraa. E roaa te tahi atu hoho‘a o teie buka i roto i te mau fare hooraa buka a te Ekalesia e i ni‘a i te itenati LDScatalog.com.

E faaohipa te mau peresideni tĭtĭ, te mau episekopo e te mau orometua no te haapiiraa faaineineraa no te hiero, i teie mau materia ei rave‘a tauturu hau atu i te materia Horo‘ahia mai ni‘a mai te buka haapiiraa a te orometua haapii e te buka iti, Faaineine no te Tomo i roto i te Hiero.

Mai te mea e titauhia, e nehenehe ta te feia faatere o te autahu‘araa ia horo‘a i te hoê buka iti na te mau melo tei haere a‘e na i te hiero no te tauturu ia ratou ia haamana‘o i ta ratou iho mau iteraa no te hiero. E riro atoa ei tauturu i te feia e ho‘i faahou mai nei i roto i te Ekalesia e o te faaineine ra e taati ia ratou i roto i te hiero.

« E riro atoa teie buka iti ei tauturu maitai roa no te mau melo taatoa », te na reira ra o Elder Yoshihiko Kikuchi no te Hitu Ahuru. « E mea faufaa ia haamana‘o i te mau iteraa o te hiero mo‘a, te mau fafauraa e te mau haamaitairaa i taatihia i te reira, e te mau hopoi‘a a te melo tata‘itahi ia rave i te ohipa aamu utuafare no te imi i to ratou mau tupuna e ia rave i te mau oro‘a hiero no ratou na roto i te haereraa i te hiero ».

I te ava‘e atopa, e farii te mau hoani i te buka iti no te hiero i faaapîhia.