Te tareni o Taylor

Heather Hall, Utah, USA

E nehenehe anei ta outou e faaite mai eaha te mau tareni o Taylor o ta‘u e nehenehe e faaite i mua i te piha haapiiraa ? » te uiraa ïa ta te orometua haapii no te Paraimere no te mau tamarii e va‘u matahiti i ui mai ia‘u ? Ua niuniu mai oia no te mea e paraparau te piha haapiiraa a Taylor i te parau no te tareni ta ratou i farii no ô mai i te Metua i te Ao ra ra.

Aita hoê mana‘o a‘e i roto i to‘u upoo. Ua tamata vau e feruri i roto i na matahiti e va‘u i ma‘iri ra, no te imi i te hoê pahonoraa. E maha noa mahana i roohia ai Taylor i te ma‘i mafatu, i tei haafifi roa to’na roro e aita ta’na e nehenehe faahou e faatere i te mau melo o to’na tino. Aita ta’na e nehenehe e hi‘o, e paraparau, e aore râ, e tau‘a parau. Aita to’na roro i hau atu i te huru o te hoê tamarii e ono ava‘e te paari. I roto noa oia i te pereoo turai i te mau mahana atoa a haapa‘o ai matou ia’na e ia tamata i te faaoaoa ia’na.

E oaoa matou ia ite ana‘e oia e nahea ia inu i roto i te hoê hapaina taa ê, e e faahanahana matou ia nehenehe ana‘e ona e ti‘a i ni‘a e ia haere i te tahi tau taahiraa avae. Noa’tu râ to matou oaoa e te faahanahana i ni‘a i te mau mea itehia e te mata, ua oto râ matou i roto ia matou iho ia feruri ana‘e matou e, teie mau ohiparii na‘ina‘i i oti ia Taylor, e mau mea rarahi ïa no’na. Tera râ, aita vau e mana‘o nei e, tera ta to’na orometua Paraimere i hinaaro ia faaroo.

Ua hotahota a‘e ra vau e ua pahono atu ra ma te papû ore, « aita vau e ite ra hoê tareni i roto ia Taylor ».

Na roto i ta’na pahonoraa, ua taui hope roa teie tuahine maitai i to‘u autaatiraa e ta‘u tamaiti.

« A feruri ai au i teie haapiiraa, ua ite a‘e ra vau e, e tareni to te mau tamarii paatoa a te Atua », ta’na ïa i parau. « Te parau nei au e, te tareni o Taylor o te haapiiraa ïa ia vetahi ê ia tavini. Mai te mea e, e farii outou, te hinaaro nei au e paraparau i ta tatou piha haapiiraa e mea nahea to‘u iteraa i te tareni o Taylor i te fare pureraa nei. Ua ite au i te tahi mau tamarii o te Paraimere i te haapiiraa ia tura‘i i to’na pereoo huira, te iritiraa i te opani i mua ia’na, e te haavîraa i to ratou taiâ no te tamaro i to’na taa i te hoê horoi ia hinaarohia. Te feruri nei au e, e tareni rahi roa tera ta’na i haamaitai i to matou oraraa ».

Ua muhumuhu no te farii, e ua aroha matou no te haere. Aita vau i ite e, ua ite anei taua orometua Paraimere ra i te mana‘o hohonu ta taua aparauraa ra i faatupu i ni‘a i to‘u oraraa. Aita te huru o Taylor i taui. Ua tamau noa oia i te titau i te aupururaa rahi. Te tuhaa rahi o to‘u oraraa tei te fare ma‘i ïa, tei piha‘i iho i te mau taote e te mau taote roro. Tera râ, ua taui ta‘u hi‘oraa, e ua haamata vau i te ite i to’na tareni.

Ua ite au i te tauiraa te taata i to ratou huru a aupuru ai ratou ia’na. Ua ite atoa vau e, ua riro oia ei faahaamana‘oraa ia tatou ia haere maru, ia ite i to’na mau hinaaro, e ia rahi atu te aroha, te hi‘o-maite-raa, te faaoroma‘i.

Aita vau i ite i te opuaraa a te Atua a tuu ai oia i teie mau tamataraa i mua ia Taylor, tera râ, te ti‘aturi nei au e, ua horo‘a mai to’na orometua Paraimere ia‘u i te tahi ite iti i te reira. Tei ô nei oia no te faaite i to’na tareni ia tatou. Tei ô nei oia no te horo‘a mai ia tatou i te rave‘a ia haapii i te tavini.

« Ua ite au i te tahi mau tamarii i te haapiiraa ia tura‘i i te pereoo huira o Taylor, ia iriti i te opani no’na, e ia haavî i to ratou taiâ », te parau ïa a te orometua Paraimere a to‘u tamaiti i parau mai ia‘u.