E mea ti‘a ia‘u ia haere i te hiero
Noa’tu te ati purumu i tupu, te tereraa na ni‘a i te bus e rave rahi pô e te ao, te mau tereraa roa na ni‘a i te pahi, e te moni rahi o te mau tere, aita te reira i tape‘a i teie taea‘e Beresilia ia haere i te hiero.
Ua ti‘a taue a‘e ra o José Gonçalves da Silva i ni‘a no te tuo a te taata i to’na i‘oa. E mea po‘iri, e aita oia i ite e, tei hea oia.
« Ua taoto vau a tere noa ai te bus », te na reira ra o José no ni‘a i te ati purumu i tupu i te po‘ipo‘i roa i te ava‘e tenuare 2008. « Aita te taata i ite ia‘u no te mea tei muri roa vau i te bus i raro a‘e i te mau tauhaa. I te pae hopea ua itehia vau e te tahi mau taea‘e i to ratou ohiraa i te mau faarii ahu ».
I te taime a hape ai te faahoro a te taata faahoro bus i ni‘a i te hoê purumu oaoa roa e te ino i roto i te uru raau no Venezuela i roto i te ua, tei te afaraa ïa o José e te tahi atu mau feia mo‘a i te mau mahana hopea nei i to ratou tere e toru mahana, mai Manaus, Beresilia e tae atu i te hiero no Caracas Venezuela. E ere i te pepe rahi roa to José, area te tahi mau taea‘e e te mau tuahine ra, ua titauhia ïa ratou ia tape‘ahia i roto i te fare ma‘i.
« Ua tae te taime e faaea ai to oe tere i te hiero », te parau ïa a te tahi mau melo o te utuafare ia José, e 80 matahiti to’na a tupu ai taua ati purumu ra. Tera râ, ma te haaparuparu ore i te mana‘o, na ô a‘e ra oia e : « E mea ti‘a ia‘u ia haere i te hiero. E mai te mea e, e ti‘ahia i te Fatu, e ho‘i â vau ».
Ua haamata oioi oia i te haaputu faahou i te moni no te maharaa ïa o to’na tere i Caracas, tei tupu i te omuaraa o te matahiti 2009. No te taea‘e Gonçalves da Silva, e mea ohie te ratereraa e 40 hora na ni‘a i te bus ia faaauhia i to’na na tere e toru na mua’tu no te haere i te hiero no São Paulo Beresilia. I roto i te mau matahiti e rave rahi, o te hiero no São Paulo te hiero fatata roa a‘e i te pae apatoa o te oire no Manaus, e piti milioni huiraatira, i te pae apatoerau o Amazone. E i te matahiti 2005, ua riro mai o Manaus ei tuhaa no te mataeinaa o te hiero no Caracas i Venezuela.
I tera mau matahiti a ratere ai matou i São Paulo, « e ta‘uma matou i ni‘a i te hoê pahi i ô nei i Manaus, e e tere matou e maha mahana e tapae ai i Pôrto Velho », te oire pû no Rondônia, te parau ïa a José. « I muri iho e tere matou i São Paulo na ni‘a i te bus e maha mahana te maoro. E ere ta‘u vahine i te melo no te Ekalesia, e i to‘u haereraa i te hiero no te taime matamua i te matahiti 1985, o vau ana‘e i te haereraa. Ua ao te pô to‘u tia‘iraa i te vahi tape‘araa bus i Pôrto Velho no te mea ua taere au i te taeraa mai e aita e bus faahou. I te po‘ipoi a‘e ua tere atu vau i São Paulo. E mea au roa to‘u tere, tera râ ua rohirohi rii au i to‘u taeraa mai ».
E ua tavini oia i roto i te hiero e toru mahana taatoa hou a ho‘i faahou ai i te fare i roto i te hoê tere roa e va‘u mahana te maoro. E matahiti taatoa e titauhia ia’na no te haaputu i te moni mai roto mai i ta’na moni faatuhaa no te aufau i te mau haamau‘araa no te tere i te hiero.
« Ua riro mau taua tere ra ei tusia, tera râ, e tere faufaa mau », te na reira ra te taea‘e Gonçalves da Silva, tei faaoti e rave rahi oro‘a no to’na fetii. « Ua tupu te oaoa rahi i roto ia‘u i te mahana a bapetizohia ai au ei mono no to‘u metua tane, e te tahi taata ê atu tei bapetizohia no to‘u metua vahine, e a mono ai au i to‘u metua tane i te taime a taatihia ai to‘u na metua. E taime faahiahia mau. Ua pohe pauroa to‘u mau taea‘e e to‘u mau tuahine i teie nei, tera râ, ua oti to ratou mau oro‘a i te ravehia e au i roto i to‘u mau tere i te hiero ».
Te ti‘aturi nei o José e, na te tusia o te tere roa no te haere i te hiero e tauturu i te feia mo‘a i te mau mahana hopea nei i Manaus ia oaoa i te mahana a haamaitaihia ai te hoê hiero i reira. « Te tia‘i rû nei au i taua mahana ra », ta’na ïa parau.
Hoê ana‘e amaa na‘ina‘i i Manaus e e 20 melo i te taime a tomo mai ai o José i roto i te Ekalesia i te matahiti 1980. Mai taua taime ra, ua ite oia i te hoturaa o te Ekalesia fatata roa’tu i te 50,000 melo e ora nei i roto e va‘u tĭtĭ.
« Ia faaroohia te faaararaa i te matahiti 2007 tei faaite mai e, e patuhia te hoê hiero i Manaus », te na reira ra o José, « ua ta‘i au i te oaoa rahi, e ua ani au i te Fatu ia vaiiho mai â oia ia‘u e tae roa’tu i te taime e ite ai au i te tapuraa repo », tei tupu hoê matahiti i muri iho. I teie nei, te pure nei oia ia ora noa oia e tae roa’tu i te taime e ite ai oia i te otiraa o te hiero e ia ite i ta’na vahine ia bapetizohia, ia ti‘a ia raua ia taatihia.
« Aita tatou i ite ahea tatou e pohe ai, tera râ, ia ineine noa tatou e ia oaoa ia tae mai taua taime ra », te parau ïa a te taea‘e Gonçalves da Silva. « Te tia‘i rû nei au i te taime e ho‘i atu ai au i mua i te aro o to‘u Metua i te Ao ra e i to‘u Faaora, o Iesu Mesia. Ua riro te haereraa i te hiero ei tauturu ia‘u ia ineine no taua mahana ra ».
Pae auiui : Hoho‘a no te hiero no Caracas Venezuela © IRI ; i ni‘a i te pae aui e i te pae atau : hoho‘a na Michael R. Morris
Te hiero no Caracas Venezuela.
I ni‘a nei : Te anavai no Rio Negro, i reira o José Gonçalves da Silva i haamata ai i to’na tere e va‘u mahana te maoro e tae atu ai i te hiero no São Paulo Berezilia.
I raro nei : Te taea‘e Gonçalves da Silva i ni‘a i te bus no te tere e 40 hora e tae atu ai i te hiero no Caracas Venezuela Temple. Te parau ra oia e, e mau‘araa maitai te tusia e titauhia no te tavini i roto i te fare o te Fatu.