Te Evanelia i roto i to‘u oraraa
Te aamu o Nephi, to‘u aamu
Ua oto roa vau i muri a‘e i te niuniu a Jake, tera râ, ua iteahia ia‘u te ti‘aturiraa i roto i te hoho‘a o te hoê peropheta tahito.
Tau matahiti i muri a‘e i te hoperaa ta‘u haapiiraa tua rua, tei roto vau i te hoê pô utuafare e te tahi atu mau feia apî paari faaipoipo-ore-hia no ta‘u paroita. Ua ani manihinihia matou ia haere i roto i te fare o te hoê tauturu i roto i te peresideniraa tĭtĭ, e na ta’na vahine e horo‘a ra i te haapiiraa.
Te tai‘o ra matou i te aamu o Nephi e to’na mau taea‘e i te haere-ana‘e-raa e tii i te mau api veo i ô Labana (a hi‘o 1 Nephi 3–5). Ua paraparau to matou orometua i te parau no te itoito e te onoono ta Nephi i faaite. I muri iho ua hi‘o maira oia i ta matou pŭpŭ iti. Ua puta roa matou i to’na hi‘oraa mai.
« E ohipa teimaha tei horo‘ahia ia Nephi e to’na mau taea‘e », ta’na ïa i faaiteraa. « Ua titauhia e rave rahi tamataraa, aita hoê a‘e mea ohie. Tera râ, e mau‘araa maitai te tautooraa onoono. Na roto i taua mau papa‘iraa mo‘a ra, ua ti‘a ia Nephi ia paruru i to’na utuafare i te ‘pohe e i te faaroo ore’ (1 Nephi 4:13).
Te parau faahou ra oia e, « te vai atoa ra te ‘api veo’ i roto i to outou iho oraraa ». « E titauhia paha outou ia faaite i te mana‘o onoono no te farii i to outou ite. E titauhia paha outou ia faaite i te itoito i roto i ta outou arapaeraa. Noa’tu eaha te huru o te tusia, te haape‘ape‘araa, te otoheraa, te mauiui—noa’tu te mea e titauhia no te paruru i to outou utuafare no ananahi eiaha ia pohe i te faaroo ore—a ho‘i e haere e tii i te api veo ».
Te mana‘o nei au e, e faaauraa nehenehe roa teie. Ua tape‘a vau i te reira i roto i to‘u upoo no te haamana‘o i te hoê taime. I taua taime ra aita vau i feruri e, e rave rahi te haape‘ape‘araa i roto i to‘u oraraa. Ua hope ta‘u haapiiraa, e mea au roa ta‘u ohipa, e te arapae ra vau i te hoê taata faahiahia roa—e hoa maoro no‘u, ua afaro roa te mau mea e rave rahi—a maha ava‘e i teie nei. Aita e oaoa toe to‘u ia au i te mau mea e tupu ra.
E rave rahi ava‘e i muri mai ua maitai roa te mau auraa i rotopu ia‘u e o Jake (ua tauihia te i‘oa). Tera râ, ua taa na metua o Jake te tahi tau matahiti na mua’tu, e ua fifi roa to’na mana‘o no taua faataaraa ra. Ua taiâ oia mai te mea e, e faaipoipo maua, e riro te reira i te hope atoa mai to to’na na metua.
Ua parau vau ia’na e, e nehenehe ta‘u e vaiiho i te tahi taime no’na—e taime rahi mai te mea e titauhia—no te tatara i taua mau mea ra i roto i to’na feruriraa. Ua paraparau maua no ni‘a i te raveraa i te faaotiraa tei haamauhia i ni‘a i te faaroo eiaha râ i te mata‘u. Ua paraparau maua i te parau no te ti‘amâraa, e aita ho‘i e ti‘a ia’na ia feruri e, te e‘a o to’na na metua o te reira atoa ïa to’na e‘a. E ua aparau maua no ni‘a i te taraehara a Iesu Mesia e i te mana o te Faaora ia faaora i to tatou aau.
Mai te mea ra e, ua tauturu taua mau aparauraa na maua ra ia tamaru i to’na mana‘o pe‘ape‘a, e ua tere maite noa to maua autaatiraa. No reira, i to’na niuniuraa mai ia‘u i te hoê avatea mahana maa no te parau mai e, e faaea, ua hitimahuta vau. Ua parau mai oia ia‘u e, aita oia e mana‘o ra e nehenehe ta’na e faaipoipo ia‘u—e aore râ, i te tahi taata ê atu. Aita oia e ti‘aturi faahou i te faaipoiporaa.
Ua pau te hora ia maua i te tuapapa-faahou-raa i te mau mea ta maua i aparau a‘e na, tera râ, aita i ti‘a ia‘u ia taui i to’na mana‘o. Ua muhumuhu maira oia e, « eiaha e inoino mai », e ua tapu i te niuniu. Ua parahi noa vau i ni‘a i to‘u ro‘i ma te maniania ore, e te ta‘i, aita e taa faahou e nahea râ.
Maa taime iti i muri mai ua patoto maira to‘u hoa i te opani. « E haere mai oe i te amuiraa tĭtĭ ? » ta’na ïa uiraa. Aita vau i anaanatae roa ia haere i te hoê vahi e aore râ, ia rave i te hoê mea, tera râ, ua oomo a‘e ra vau i te hoê ahu e ua haere atu ra i roto i to’na pereoo.
Ia maua i tae atu, te taata matamua ta‘u i ite atu o te vahine ïa tei horo‘a i taua haapiiraa ra i roto i te pô utuafare tau ava‘e na mua’tu. Aita maua i parau i te hoê noa a‘e parau, tera râ, ua tito to maua mata, e i roto i to‘u feruriraa, ua faaroo vau i te hoê reo i te piiraa mai ia‘u i te na-ô-raa e, « a ho‘i a haere e tii i te api veo ».
Ua ite au i te auraa no taua muhumuhu ra. E ere no ni‘a iho noa i te hoê peropheta tahito i te ho‘iraa e tii i te hoê papaa parau mo‘a. No ni‘a atoa râ ia‘u. To’na auraa, noa’tu e aita o Jake i ti‘aturi i te parau no te faaipoiporaa, o vau râ, oia ïa. E nehenehe ta‘u e ti‘aturi i te reira, e pure, e haa—eiaha i te feruri mana‘o noa, e rave râ i te ohipa ma te ti‘aturi papû, e faaineine ia‘u i te mau mahana atoa, no te mea teie te faanahonahoraa a te Atua no Ta’na mau tamarii. Aita i parauhia e, e ho‘i faahou vau ia Jake ra e ia faaea i piha‘i iho ia’na e tae roa’tu i te taime « e faaho‘i faahou mai ai au i to’na mana‘o » i ni‘a i te faaipoiporaa, aita atoa i parauhia e, e haamata faahou vau i te arapae i te tahi taata apî i teie nei. Ua ti‘a ia‘u ia tia‘i i te taime e maru ai e e ora roa ai au.
Tera râ, i roto i taua taime ra, eiaha vau e taamino noa i roto i te mana‘o aroha ia‘u iho. E nehenehe ta‘u e pato‘i i te faahemaraa ia faaino ia Jake e aore râ, i te mau tane atoa. E nehenehe ta‘u e imi i te mau hoa o tei ti‘aturi i te parau no te faaipoiporaa e ia hi‘o i mua. E mai ia Nephi, e nehenehe ta‘u e ti‘aturi i te hoê Metua i te Ao ra here o te ore e horo‘a i te faaueraa—e haere anei e tii i te mau papaa parau tahito e aore râ, e faaipoipo anei e faatupu i te utuafare—ma te faaineine ore i te rave‘a e ti‘a ai ia tatou ia rave i te reira.
Tei roto noa â vau i te tuhaa no te —« raveraa » eiaha te tuhaa « ravehia ». Aitâ vau i faaipoipohia’tura, tera râ te oaoa nei au no te mau ite i roaa ia‘u i roto i te arapaeraa—e mau iteraa ïa tei hau atu i te faufaa i te mea e, ua rahi atu to‘u ite i ni‘a i te faufaa ia tape‘a maite i te mau opuaraa ti‘a.
Ua vai atoa te hau e te ti‘aturi i roto ia‘u na roto i to‘u iteraa i te haapiiraa a Elder Richard G. Scott no te Pŭpŭ no te Tino Ahuru Ma Piti Aposetolo no ni‘a i te huru tuutuu ore o Nephi. Teie Ta’na i parau :
« I muri a‘e e piti taime tamataraa ma te manuïa ore, ua tamau noa o Nephi i te ti‘aturi. Ua tomo oia i roto i te oire no te haere i te fare o Labana ma te pahonoraa ore. Te parau ra oia e, ‘ua arata‘ihia vau e te Varua, e aore au i ite na i te mau mea ta‘u e rave ra’, ma te parau papû faahou e, ‘Haere atu ra râ vau.’ (1 Ne. 4:6–7; papa‘iraa faaopa i apitihia’tu).
« Te vai ra te hinaaro i roto ia Nephi no te tamata noa, ma te faaohipa i to’na puai atoa. Ua faaite oia i te faaroo e tauturuhia oia. Ua pato‘i oia i te mana‘o haaparuparu. No te mea râ e ua haa oia, ua ti‘aturi i te Fatu, ua haapa‘o, e ua faaohipa ti‘a i to’na ti‘amâraa, ua farii oia i te arata‘iraa. Ua faauruhia oia mai te tahi taahiraa i muri i te tahi taahiraa e tae roa’tu i te manuïaraa, e ia au i te mau parau a to’na metua vahine, ua ‘horo‘ahia ia’na te mana, e ti‘a ai (ia’na) ia rave i te mau mea ta te Fatu i faaue maira.’ (1 Ne. 5:8; papa‘iraa faaopa i apitihia’tu) ».1
Aita teie parau tumu o te rohi-tamau-raa i faataahia no te ohipa arapae-noa-raa. E tano atoa te reira no te feia e pohe-tamau-hia nei i te ma‘i e aita i papû ia ratou e, e maraa anei ia ratou ia faaruru ma te oaoa i te tahi atu mahana mauiui ; no te hoê atoa na taata faaipoipo o te rohi nei i roto i te mau hopoi‘a o to raua faaipoiporaa ; no te mau metua o te pure nei e rave rahi matahiti no te hoê tamarii tei hahi ê te haerea ; no te hoê tamarii e faaruru nei i te mau aroraa i te fare haapiiraa no to’na mau ti‘aturiraa ; no te mau misionare tei rave i te ohipa e rave rahi mahana e aita i ti‘a ia haapii i te hoê haapiiraa. E nehenehe e parau e, o tatou paatoa teie e faauehia nei ia ho‘i e tii i te mau api veo.
E mai ia Nephi, e nehenehe ta tatou. Ma te itoito, te rohi tamau, e te faaroo, e oti ia tatou te mau mea atoa ta te Fatu i faaue ia tatou.
Faahoho‘araa na Michael Parker