A tauturu i te faatupuraa i te reira

Na Richard M. Romney

Te mau ve‘a a te Ekalesia

Tera ïa te parau a teie mau tamahine no Inidia i parau, mai te taime a faatupuhia ai te hoê ohipa taviniraa, te oaoa rahi i roto i te amaa taatoa no ni‘a i te pô utuafare.

Ua hinaaro te feia apî tamahine no te amaa piti no Chennai, no te mataeinaa no Chennai India, ia faaitoito i te mau melo o te amaa ia faatupu i te pô utuafare. Aita i maoro ua itehia ia ratou te hoê mana‘o ohie roa e te ohipa ore. Ua hamani ratou i te mau huira pô utuafare : hoê api parau e te hoê huira no te faaite i te mau tuhaa ohipa, mai te pure, te haapiiraa e te faaineineraa i te hoê « monamona ».

E mea ohie roa taua huira api parau ra e ua rau atoa te û. Ua hamani te mau tamahine i te reira i roto i te hoê pô ohiparaa na te Feia Apî Tamahine i te fare pureraa, ua hamanihia na te utuafare tata‘itahi e te hoho‘a o te utuafare i ni‘a iho. Ua oaoa roa e piti na tamahine, o Sushmitha Santhosh Kumar, 15 matahiti, e to’na tuahine o Sujeetha, 14 matahiti, i to raua iteraa e, e farii raua e to raua utuafare i te huira matamua, no te mea, e mau melo faafariu-apî-hia mai ratou i roto i te Ekalesia.

« I muri a‘e i te faaoaoaraa ua haere matou te hoê pŭpŭ i to raua fare e ua faaite atu i te huira i to raua papa », te na reira ra o Daisy Daniel, 16 matahiti. « Mai te mea ra e, ua oaoa to te utuafare taatoa ». Ua paraparau a‘e na te utuafare i te parau no te pô utuafare i ni‘a i te mau misionare rave tamau, e ua riro te huira e faaitoito-faahou-raa ia ratou ia haapa‘o i te mau mea ta ratou i haapii.

Ua hamani te feia apî tamahine e rave rahi huira no te horo‘a i te utuafare tata‘itahi o te mau tamarii Paraimere i roto i te amaa. E ua hamani ratou i te tahi atu mau huira na te mau misionare rave tamau no te opere na te mau taata faafariu-apî-hia mai.

« E rave rahi o matou i roto i te amaa e mau melo apî, e aita matou i matau maitai i te faatupu i te hoê pô utuafare », te parau ïa a Daisy. « Tera râ, ua ite papû vau e, e tauturu te pô utuafare i te mau tamarii e te mau metua ia amuitahi, e te ti‘aturi nei au e, ia ite ana‘e teie mau utuafare i te huira pô utuafare, e feruri ratou e, ‘OK, te here nei to tatou mau melo o te Ekalesia ia tatou, no reira ratou i horo‘a mai ai i teie rave‘a faahaamana‘oraa, no reira e faatere tatou i to tatou pô utuafare.« ‘ Ua tohu oia e eita e maoro e riro te pô utuafare ei ohipa tumu i te mau hepetoma atoa no te mau taata e rave rahi i roto i te amaa.

Mai te tahi ohipa taviniraa maitai haere atu i te tahi

Te mau huira pô utuafare o te hoê noa ïa o te mau ohipa taviniraa e rave rahi tei ravehia e teie mau tamahine. No te tauturu i te hoê tuahine ivi tei vai otahi noa, ua faaunauna te mau tamahine i te hoê panie e ua faaî i te reira i te mau parau rii poto roa papa‘i-rima-hia. « Aita e taata no te haapa‘o ia’na », te parau ïa a Daisy. « No reira ua hinaaro matou e faahaamana‘o ia’na e te mana‘ona‘o nei te mau melo o te amaa ia’na ». Na te mau tamahine iho e hopoi roa i taua panie ra e ua faaite atu ia’na e, e nehenehe ta’na e tai‘o i te hoê parau i te mahana tata‘itahi no te faatupu i te ata i ni‘a i to’na hoho‘a mata.

Na roto i te panie o te mau nota ua tupu mai te tahi atu mana‘o. Ua opua te mau tamahine ia papa‘i i te rata haamauruuru ia ratou iho, te tahi e te tahi.« Te papa‘i nei matou tata‘itahi i te hoê rata nehenehe roa i te tahi e te tahi, « te parau ïa a Monisha Kalai Selvam, 13 matahiti.

E pô utuafare oraraa maoro !

Na roto i teie mau ohipa e te tahi atu, te haapii nei te feia apî tamahine no te amaa piti no Chennai e, e nehenehe te mau ohipa taviniraa ohie roa e haafatata i te taata i te Faaora. E riro te mau melo o te amaa i te haamana‘o maoro i te mau huira pô utuafare no te mea e rave rahi o ratou o tei farii i te reira e te faaohipa nei i te reira. Tera râ, noa’tu e, e rave‘a faahaamana‘oraa noa te mau huira, no te hoê tau, ua ti‘a atoa te reira.

« E nehenehe te mau huru taata atoa e hamani i ta’na iho huira e aore râ, te hoê tapura, e aore râ, e parahi noa i raro e te hoê penitara e te api parau e i reira e papa‘i ai i te mau faanahoraa », te na reira ra o Daisy. « Ua ite au e, e mea faufaa te pô utuafare no te taata hoê, e ua hinaaro matou ia tauturu i te faatupuraa i te reira ».

E tauturu atoa te mau papa‘iraa moa

Ua riro atoa te mau papa‘iraa mo‘a ei tuhaa faufaa roa no te pô utuafare—a ani i te feia apî tamaroa no te amaa piti no Chennai. I to ratou faarooraa i te anaanatae rahi o te taata i roto i ta ratou amaa no te pô utuafare, ua faaoti a‘e ra ratou e imi i te mau papa‘iraa mo‘a o te nehenehe, na roto i te arata‘iraa a te mau metua, e faaohipa i roto i te mau haapiiraa. Teie te tahi o ta ratou i horo‘a mai :

Ua parau o Karthikeyan Venkatesan, 18 matahiti, Alama 32:21, 28 e mau irava maitai roa te reira no te hoê haapiiraa no ni‘a i te faaroo. « Te faaau nei o Alama i te parau a te Atua i te hoê huero, no reira, e mea ohie ia paraparau i ni‘a i te mau huero, e to ratou tupuraa », ta’na ïa parau. « Ua tauturu teie mau irava ia‘u ia faarahi i to‘u faaroo, no reira, e nehenehe ta‘u e faaite i to‘u iteraa papû

Ua rave to’na tuaana 16 matahiti, o Meganathan, i te Alama 36:3, e irava teie e haapii nei i te parau no te ti‘aturi. « Te parau nei Alama e, mai te mea e, e tuu outou i to outou ti‘aturiraa i ni‘a i te Atua, e tauturu Oia ia outou », te parau ïa a Meganathan. « E tuu tatou i to tatou ti‘aturiraa i ni‘a i te Metua i te Ao ra. Aore e mea rahi i te Atua ; e nehenehe Ta’na e tauturu ia outou i roto i te mau huru fifi atoa ».

Ua tai‘o o Daniel Stephen, 15 matahiti, i te 3 Nephi 18:20 e ua parau e, e nehenehe e faaohipa i te reira i roto i te hoê haapiiraa no ni‘a i te pure. « E mea au roa na‘u tera irava no te mea te parau ra oia e, te mau mea atoa ta oe e ani i te metua i te i‘oa o Iesu Mesia, e ua ti‘a ho‘i, e farii oe i te reira. Eiaha e ani i te mau mea ti‘a ore e aore râ, i te mau mea maamaa ; a ani i te mau mea maitai. Mai te mea e, e pee outou i te Varua, e tauturu te reira ia outou ia ite eaha te mea e ani ».Peresideni no te Feia Apî Tamaroa

Te parau ra o Bharath Raj Ramesh Babu, 19 matahiti e, e faaohipa oia i te 1 Nephi 19:9 i roto i te hoê haapiiraa no ni‘a ia Iesu Mesia. « Te parau nei teie irava e, e mana‘o to te ao e, e mea faufaa ore te Mesia, tera râ, e aroha e e faaoroma‘i roa To’na ia ratou. Ua faaite oia i te here i te taata tata‘itahi, noa’tu te ohipa ta ratou i rave i ni‘a Ia’na, na te reira i haapii mai ia‘u ia maitai atu ».

Oia mau, e rave rahi te mau irava e nehenehe e faaohipa i roto i te hoê haapiiraa no te pô utuafare. A paraparau e to outou utuafare. Eaha te mau irava ta outou e faaohipa ?

Hoho‘a na Richard M. Romney

Karthikeyan

Meganathan

Daniel

Bharath Raj