A‘oraa i te feia apî tamahine no ni‘a i te arapaeraa

Na te Peresideniraa Rahi o te Feia Apî Tamahine

E ohipa arearea te arapaeraa! Te arapaeraa, e rave‘a ïa no outou no te faahotu e no te faaite i to outou auhoaraa i te feia apî tamaroa. Ua horo‘a mai o Elder Robert D. Hales no te Pŭpŭ no te Tino Ahuru Ma Piti Aposetolo i te hoê pahonoraa ohie e te au maitai i teie uiraa : « Te hoa e mau taata ïa e imi i te mau rave‘a ia ohie te oraraa i te evanelia a Iesu Mesia ».¹ A arapae i te feia apî tamaroa o te tauturu ia outou ia riro ei taata maitai a‘e. « Faaite i to outou huru maitai roa a‘e » i reira e ti‘a ai ia outou ia faatupu i te huru maitai i roto i te mau taata ta outou e arapae.²

A faariro ia outou mai te huru taata ta outou e hinaaro e arapae

E nehenehe outou e haamata na roto i te faahoturaa i te mau huru o te faariro ia outou ei taata nehenehe e te auhia.

A ataata ! Oia mau, a ataata e a faaite i te oaoa. E riro ta outou ataata ei ma‘i pee o te tauturu ia vetahi ê ia oaoa i piha‘i iho ia outou.
A faaau maitai ia outou i te pae varua. A rave i te mau mea o te arata‘i ia outou i piha‘i iho i te Varua Maitai ia riro mai Oia ei hoa tamau no outou.
A faaau maitai ia outou i te pae tino. A atuatu maitai i to outou tino, eiaha e faaea noa, e a haapa‘o i te mau peu maitai no te amu i te maa. A faanehenehe maitai ia outou.
A faahotu i te mau mea e auhia e outou e ta outou mau tareni. A imi i te mau huru ite atoa e roaa ia outou. E nehenehe ta outou e tai‘o i te mau buka faahiahia, e faaroo i te pehe maitai, e ite i te mau ohipa e tupu ra, e aore râ, e haapii i te tahi atu reo.
A faaite i te peu a te hoê tamahine na te Atua. Eiaha te te‘ote‘o, te iria, te huehue e aore râ, te faahaehae. Te ite nei paha outou i te reira mau huru peu i roto i te mau hoho‘a teata, eita râ te reira e tano no te hoê tamahine tei ite i to’na huru mau ei tamahine na te Atua.
Haamaitai to outou huru i ni‘a ia vetahi ê. Ia maitai outou, a haapa‘o e a feruri i te mau hinaaro a vetahi ê. Haapii e nahea ia paraparau i te taata. A haapii i te mau peu maitai. E tauturu teie mau mea paatoa ia outou ia riro ei taata auhia e vetahi ê ia parahi i piha‘i iho.
A tau‘a i te taata. A faaite i te au i roto ia vetahi ê e i roto i te mau mea ta ratou e au ia rave. A ani i te mau uiraa o te tauturu ia ratou ia vai hau noa e o te tauturu ia outou ia ite maitai atu ia ratou.
A faataa i te mau oti‘a. Eiaha e faati‘a ia vetahi ê ia upooti‘a i ni‘a ia outou. A tape‘a maite i to outou viivii ore.
A ora i te mau faatureraa i roto i te buka iti ra No te Puai o te Feia Apî. Eiaha e ore e faaite i te reira i te mau taata ta outou e arapae ra. Eiaha e faaiti i ta outou mau ture no te hoê noa a‘e taata. Mai te mea e, te hinaaro ra te hoê taata ia na reira outou, aita ïa oia e ti‘a ia faahoahia e outou.
Tauturu ia vetahi ê ia riro ei mau taata maitai roa a‘e. A faariro ia ratou ei mau taata maitai a‘e no to ratou arapaeraa e o outou. Noa’tu e aita e rave rahi mau rave‘a no outou i te arapaeraa, e nehenehe ta outou e ataata e ia imi i te mau hoa apî. A faaite i te huru ti‘aturi. Noa’tu e, ua fifi outou i roto i ta outou arapaeraa, e nehenehe te reira e tauturu ia outou ia tupu i te rahi. E nehenehe te mau taata ta outou e farerei e haafaufaa i to outou oraraa, e e nehenehe outou e haamaitai ia ratou na roto i te horo‘araa ia ratou i te mau maitai e vai ra i roto ia outou iho.

A ma‘iti maitai i te taata ta outou e arapae

Ua riro te arapaeraa ei rave‘a no te haamatau i te feia apî tamaroa no te faaineine i te faaipoiporaa. A haapa‘o maitai o vai ta outou e ma‘iti no te arapae. Ia feruri ana‘e outou e haere na muri iho i te hoê tamaiti, a haapapû e, e mau ture teitei ta’na e e tauturu oia ia outou ia ora i te evanelia a Iesu Mesia. Teie te tahi mau uiraa e nehenehe ta outou e ui ia outou iho :

E huru puai anei to’na e te maitai ho‘i ?
E nehenehe anei e ti‘aturi ia’na?
E taata parau ti‘a anei oia ?
E taata faatura anei e te maitai i ni‘a ia vetahi ê e i ni‘a ia‘u ?
E taata aau horo‘a anei oia ?
E auraro anei oia i to‘u na metua e e faatura anei oia i to’na na metua ?
Te faatura ra anei oia i to’na autahu‘araa ?
E faaitoito anei oia ia‘u ia riro ei taata maitai roa ?
Ua ti‘amâ anei oia no te haere i te hiero ?

A arearea e a faaite i te huru arearea i roto i te mau arapaeraa no te haamatauraa ia vetahi ê. A faanahonaho i te mau faaoaoaraa amui. Te tahi o te mau arapaeraa arearea roa o te tunu-amui-raa ïa i te maa. E aore râ, a feruri i te hoê ohipa taviniraa. E nehenehe outou e hi‘opo‘a, e e matau maitai i te huru o te hoê taata na roto i te raveraa i te tahi mau ohipa eiaha râ i te parahi-noa-raa a mata‘ita‘i noa ai i te hoho‘a teata.

Ua parau to tatou peropheta e, « I roto i te arapaeraa, a faaite i te auraro i te taata ta outou e arapae nei, e a titau ia’na ia faaite atoa i taua faatura ra no outou ». ³ Ua ite matou e, e riro otuou ei faaururaa maitai no te oraraa o te mau tamaroa atoa ta outou e arapae—e te mau hoa atoa o te ite i to outou hi‘oraa maitai.

Mai te mea e, e tamau noa outou i te faahotu i ta outou mau horo‘a e to outou mau tareni, ia rave noa i te mau faaotiraa paari i roto i to outou auhoaraa ia vetahi ê, e ia riro mai ei faaururaa maitai, e riro ïa ta outou mau matahiti arapaeraa ei mau matahiti maitai, ei mea faufaa e te arearea. Teie te taime no te hamau i te mau hi‘oraa teitei na outou, ei taime no te titauraa i te mea maitai a‘e, e ia riro mai ta to outou Metua i te Ao ra e hinaaro nei ia outou ia riro. E tamahine outou na to outou Metua i te Ao ra; Te here nei Oia ia outou, e ua here atoa matou ia outou»