Menema i titirohia

Na David L. Frischknecht

Te aupŭpŭ no te faanahoraa haapiiraa

Te mau aniraa i roto i te hoê buka faatiani tao‘a mai te mea ra e, aita e tano—e mea huru ata rii—tera râ te faahaamana‘o mai nei te reira ia tatou i te hoê fafauraa tei papû maitai e amuri noa’tu.

Te mahana i muri mai i te poheraa o papa, ua haere matou to‘u metua vahine, te mau taea‘e, te tuahine e o vau nei, i te fare vairaa tino pohe no te faaafaro i te parau no te hunaraa. Ta matou ohipa o te ma‘itiraa ïa i te hoê afata e te apoo i reira e vai ai te afata.

A feruri noa ai matou eaha te rave, ua ite atu ra vau i te hoê buka faatiani tauhaa hoo te faatiani ra i te hoê menema. Taa ê atu te tahi mau mea, te parau ra te reira e, e piri taua menema ra ia’na iho, e e nehenehe e vai piri noa e 75 matahiti te maoro. Noa’tu e, e taime hanahana taua taime ra, ua huru ataata rii au i te parau no te piri.

« Na vai e hi‘opo‘a i te tapiri i te 75 matahiti i muri nei ? » Ua maere au. « E mai te mea e, e hi‘opo‘a te hoê taata e ua hape, na vai e rave i te piri ? Eaha mau te haapapûraa », ta‘u ïa uiraa, « ia vai piri noa taua menema ra ? »

I taua taime feruriraa ra, ua arata‘i-ê-hia to‘u mana‘o i ni‘a i te tahi atu menema, te menema tei faaitehia i roto i te Mataio 27. Teie menema, e menema e râ ê te tau e te vahi, na te hoê ofa‘i rahi e tapo‘i i te uputa:

« I teie nei, i te mahana i muri iho, oia ho‘i, te mahana i muri mai i te mahana faaneheneheraa, ua haere maira te mau tahu‘a rarahi e te mau Pharisea ia Pilato ra,

« Na ô maira, e te tavana, te mana‘o nei matou i te parau a taua taata haavare nei i te oraraa ra e, e ti‘a faahou vau i ni‘a ia tae i te rui toru.

« E teie nei, e parau a‘e oe ia tia‘ihia te menema e ia rui toru a‘e, oi tii mai ta’na mau pĭpĭ e eiâ ia’na i te rui, a parau ai i te taata e, ua ti‘a faahou oia mai te pohe mai, e ino rahi atu ra to te reira haavare hopea i tei mutaa iho.

« Ua parau atu ra Pilato ia ratou, e tia‘i ho‘i to outou : a haere a rave itoito i taua menema ra ta outou i hinaaro na.

« Haere atu ra ratou, rave itoito ihora i taua menema ra, tapa‘o atu ra i te ofa‘i, tuu atu ra i te tia‘i » (Mataio 27:62–66).

I te mau faaue atoa tei horo‘ahia i roto i te aamu o te mau arii e te mau tenerara e te mau haava, penei a‘e te faaue a Pilato ia paruru maite i te menema, te faaue faufaa ore roa a‘e.

Eaha te chance ia vai piri noa taua menema ra ? Te ti‘araa mau, aita roa e ti‘a i te mau faehau ia haapa‘o i taua faaue ra i te mea e, aita roa’tu hoê rave‘a no te tape‘a i taua menema ra eiaha ia matara : « E inaha, i rahi iho nei te aueue o te fenua, ua pou mai ho‘i te hoê melahi a te Fatu mai te ra‘i mai, e ua huri ê atu ra i te ofa‘i i te uputa ra » (Mataio 28:2).

E no te mea aita taua menema ra i vai piri noa, no reira, e hope paatoa te mau menema tapiri-ore-hia i te mahuti. Piri.

Te Mato o to Tatou Faaoraraa o to tatou ïa faaoraraa i te pohe e i hade. Oia « te ti‘a-faahou-raa, e te ora » (Ioane 11:25). Na roto Ia’na ra « ia tuu mai ho‘i hade i to’na mau varua i tape‘ahia ra e tia‘i, e ia tuu mai ho‘i te pohe i to’na mau tino i tape‘ahia ra e tia‘i ; e e faaho‘ihia te varua i te tino e te tino i te varua ; e tupu hoi te reira na roto i te mana o te ti‘a-faahou-raa o Tei Mo‘a i Iseraela nei » (2 Nephi 9:12).