Peresideni Spencer W. Kimball (1895–1985).

Ua paari o Spencer W. Kimball i Arizona i roto i te oraraa faaapu, ua haapii i te rave i te ohipa puai i to’na apîraa. E mootua o Spencer na te aposetolo Heber C. Kimball (1801–68) e e tamaiti na te hoê peresideni tĭtĭ, ua roaa atoa ia’na te hoê iteraa papû puai e te faaroo hohonu no te evanelia.

I te tau e tamariirii noa â oia, e mea pinepine o Spencer i te ta‘uma i ni‘a i te pereoo maa animara, no te haaperehu i te reira, a taora mai ai to’na mau tuaana i te maa animara i ni‘a. Noa’tu e ohipa ve‘ave‘a, te repo, te putaputa, ua rave oia—e tae roa’tu i te taime e ta‘i mai te oe no te faaara i te hamataraa o te Paraimere, i te mea e, i taua tau ra, te faaterehia ra te reira i roto i te hepetoma. E mea maitai roa ta’na faito haereraa i te Paraimere, e eita oia e hinaaro ia ma‘iri. E mana‘o ê to to’na mau tuaana, e ua haamata ratou i te taora vitiviti i te foin i ni‘a i te pereoo. Ia ite ana‘e ratou e, ua apapa te foin, ua reva ïa o Spencer fatata i te tae i te Paraimere.

Ua tavini o Spencer W. Kimball ei misionare, ei episekopo, e ei peresideni tĭtĭ hou a piihia ai oia ei aposetolo i te matahiti 1943. E taata tuiroo oia no ni‘a i te parau no te ohipa, noa’tu te tahi mau ma‘i to’na mai te ma‘i mafatu e te cancer o te arapoa. Ua faaitoito oia i te mau melo o te Ekalesia ia faaroroa i te taahiraa avae, e ta’na parau rahi maori râ, « a rave ». No te fifi o to’na ea, ua feruri te tahi pae e, e riro te tau faatereraa a Spencer W. Kimball ei peresideni no te Ekalesia ei tau faatereraa poto roa. Tera râ, ua faatere oia i te Ekalesia 12 matahiti te maoro, i te reira tau i tata‘i piti ai te rahiraa hiero, i maraa ai e 50 i ni‘a i te hanere te rahiraa o te mau misionare, e i horo‘ahia ai te autahu‘araa i te mau melo tane ti‘amâ atoa.

Na to’na faaroo aueue ore i roto i te evanelia e to’na puai i roto i te ohipa i arata‘i ia Spencer W. Kimball mai te hoê omuaraa ha‘iha‘i roa i te fenua faaapu no Arizona e tae atu i roto i te mau apooraa faatere o te Ekalesia. I roto i ta’na faatereraa ei peresideni no te Ekalesia i itehia ai te tupuraa rahi o te ohipa paturaa hiero e te ohipa misionare. Aui : I piha‘i iho i ta’na vahine o Camilla (1894–1987).