Taviniraa i roto i te Ekalesia
Te faufaa o te hoê orometua haapii
No roto mai i te « E orometua haapii noa », Tambuli, atopa 1990, 3–8.
Tau taime i ma‘iri a‘e nei, te paraparau ra e toru na tamaroa no ni‘a i to ratou metua tane. Te na ô ra te tahi e, « e mea aano a‘e to‘u papa i to oe », i reira, pahono maira te tahi e, « e, tera râ, e mea maramarama a‘e to‘u papa i to oe ». Pato‘i maira te toru o te tamaroa, « e taote to‘u papa ». I muri iho, fariu atu ra oia i ni‘a i te tahi tamaroa, e faaoo atu ra, « to oe papa, e orometua haapii noa oia ».
Te vai ra te hoê orometua haapii tei ni‘a roa a‘e to’na oraraa i to vetahi ê. Aita Oia i ora ia tavinihia Oia, ia tavini râ Oia, eiaha no te farii, no te horo‘a râ, eiaha no te faaora i To’na ora, no te faatusia râ no vetahi ê. Ua faaite mai Oia i te here nehenehe a‘e i te nounou, te veve tei hau a‘e i te faufaa i te tao‘a rahi. Ua haapii Oia ma te mana rahi eiaha râ mai ta te mau papa‘i parau. Te parau nei au no te Orometua Haapii Rahi, oia o Iesu Mesia, te Tamaiti a te Atua, te Faaora e te Taraehara o te taata atoa.
Mai te mea e, e pahono te mau orometua haapii i Ta’na aniraa maru « haere mai e haapii ia‘u », e roaa ia ratou to’na mana hanahana.
I to‘u tamariiraa, ua farii au i te faaururaa a taua huru orometua haapii ra. I roto i ta matou piha Haapiiraa Sabati ua haapii oia ia matou no ni‘a i te hamaniraa o te ao nei, te hi‘araa o Adamu, e te tusia taraehara o Iesu. Ua arata‘i mai oia ia Mose, Iotua, Petero, Thomas, Paulo e te Mesia, i roto i ta’na piha haapiiraa mai te huru ra ei mau manihini hanahana. Noa’tu e aita matou i ite ia ratou, ua haapii râ matou i te here, i te faatura e i te pee ia ratou.
Ia faaroo te tamaiti ra i te mau tahitohitoraa : « E mea aano a‘e to‘u papa i to outou » « E mea maramarama a‘e to‘u papa i to outou », « E taote to‘u papa », e mea tano a‘e ahiri oia i pahono e, « E mea aano a‘e paha to oe papa i to‘u ; e mea maramarama a‘e paha to oe papa i to‘u ; e pairati manureva paha to oe papa, e taata faatere ohipa paha, e aore râ, e taote; to‘u râ, e orometua haapii ïa ».
E mata na tatou tata‘itahi ia fana‘o atoa i taua huru haapopouraa ti‘a ra e te faufaa !
Te A‘oraa i ni‘a i te Mou‘a, na Carl Heinrich Bloch, faaohipahia na roto i te parau faati‘a a te National Historic Museum e vai ra i Frederiksborg i Hillerød, Denmark, eiaha e hamani i te hoho‘a