Nahea vau i te iteraa
Te tauahi a te metua tane
E hitu to‘u matahiti a pohe ai to‘u metua tane Ua tupu te feaa i roto ia‘u e ua fatata roa te reira i te tapu i to‘u ti‘aturiraa i to‘u Metua i te Ao ra.
Ua fatata roa to‘u utuafare i te ho‘i, tera râ, te vai noa ra to‘u hinaaro ia haere e faahee na ni‘a i te iri huira. Ua tauahi maira to‘u metua tane ia‘u e ua ani maira e, e hinaaro anei au a faaea mai, e nehenehe ïa ta’na e afa‘i ia‘u e faahee na ni‘a i te iri huira.
« Aita ! » ta‘u ïa pahonoraa ma te riri.
Ua parau maira oia e, « e nehenehe ta oe e ti‘aturi ia‘u ».
Ua hinaaro te tahi pae e ho‘i, no reira ua haere matou i roto i te pereoo. Ahuru minuti i muri mai, ua tupu te hoê ati purumu i ni‘a ia matou. Mai te hoê semeio, ua ora mai au, to‘u râ metua tane ua pohe ïa. Tera « aita ! » te ohipa hopea ïa ta‘u i parau ia’na, e o oia te taata hopea ta‘u e hinaaro e tauahi e rave rahi matahiti te maoro.
I roto i na matahiti hoê 11 i muri mai, ua haere noa to‘u oraraa i te ino roa. Aita vau i ti‘aturi faahou ia‘u iho e ua haamata vau i te ti‘aturi ore atoa i te mau taata atoa. No te rahi te oaoa ore o to‘u oraraa, i te hoê mahana, 18 to‘u matahiti, ua tupu te pe‘ape‘a rahi i roto ia‘u e ua ti‘aoro vau i te Atua ia faaite mai Oia ia‘u i te rave‘a e roaa ai te oraraa oaoa.
Hoê hepetoma i muri mai, ua farerei maira e piti misionare ia‘u. Ua faaite maira raua ia‘u i te hoê buka e ua parau maira ia‘u ia pure no te farii i te iteraa e, e parau mau anei te reira. Mea na‘ina‘i roa ta raua e ani mai nei, i to‘u hi‘oraa, area te pe‘ape‘a no te poheraa o to‘u metua tane, e mea hohonu ïa, e ua feruri au e, teie farereiraa to‘u i te mau misionare, e mea tupu noa mai ïa, e ere râ te pahonoraa no ô mai i te Atua ra tei here ia‘u.
Noa’tu râ, ua tai‘o vau i te Buka a Moromona e ua pure au no te farii i te hoê pahonoraa—noa’tu e, aita te aau i tae roa. Tera râ, ua titauhia ia‘u ia ti‘aturi i te Atua, ia farii Ia’na e i Ta’na pahonoraa. E mea ohie a‘e ia farii i te mau faainoraa i te Ekalesia. E ua ite atoa a‘e ra vau e, e rave rahi o te mau taata tu‘iroo tei haapiihia ia‘u i te fare haapiiraa, e ere i te mea tano roa. Ahiri pai e mai te reira atoa o Iosepha Semita ?
I te pae hopea râ, ua bapetizohia vau e ua haamauhia. Ua ite a‘e ra vau e, e hinaaro vau i te tahi arata‘iraa i roto i to‘u oraraa, e ua au vau i te Ekalesia e i te mau melo. Te ite nei râ vau i teie nei e, ua tomo mai au i roto ma te ore e iteraa papû mau, oia ho‘i, te iteraa papû e âhu i roto i te aau. Te ti‘aturiraa i tupu mai i roto ia‘u no roto mai ïa i to‘u iteraa e, te mau faainoraa a te feia faahapa i te Ekalesia e ere ïa i te mea hohonu roa te vairaa. Ma te aau feaa noa â, ua tae i te taime ua feruri au e, mai te mea e tape‘a noa vau i taua ti‘aturiraa, e ere ïa i te mea tano. To‘u iteraa i te Ekalesia ua haamata ïa na roto i to‘u ti‘aturi ore e to‘u oaoa ore, e teie â vau i roto i taua huru ra.
No reira ua rave au i te hoê faaotiraa rahi : E pure au, tera râ, i teie taime, e pure au mai ta Moroni i faaue mai, ma te « faaroo i te Mesia », « te mana‘o papû », e « te aau hinaaro mau » (Moroni 10:4). I te mahana ta‘u i faataa, ua haapae au i te maa e ua pure no te ani i te arata‘iraa. Ua pau taua mahana ra ia‘u i te feruri hohonu i te mau mea atoa i tupu.
I taua pô ra ua tuturi au i piha‘i iho i to‘u ro‘i. Ma te taupe i to‘u upoo i raro, ua ani au i to‘u Metua i te Ao ra e parau mau anei te Buka a Moromona. Ua haamata to‘u feruriraa i te haamana‘o i to‘u mau feaa atoa. Ua tapiri au i to‘u na mata, ua tufetu maitai i to‘u na rima, e ua ani faahou vau ma te aau hinaaro mau, te mana‘o papû, ma te faaroo i to tatou Faaora.
Mai te huru i taua taime ra e, ua mau te ao nei. Ua ite a‘e ra vau i te mahanahana e te haatihia i te maramarama. 11 matahiti te maoro to‘u imiraa i teie mea, e i teie nei te tauahi-faahou-hia nei au e te hoê metua tane—hoê Metua i te Ao ra I teie nei, ua itehia ia‘u te hoê taata no te ti‘aturi. « E », ta‘u ïa parau, ma te roimata i ni‘a i te mata, « te ti‘aturi nei au ia Oe »
Faahoho‘araa na Doug Fakkel