Parau poro‘i na te mau Tuahine Hahaere
Te imiraa e te fariiraa i te heheuraa no te taata iho
A haapii i teie mau papa‘iraa mo‘a e te mau faahitiraa parau e aore râ, mai te mea e hinaarohia, a haapii i te tahi atu parau tumu o te haamaitai i te mau tuahine o ta outou e hahaere ra. A faaite i to outou iteraa papû no te parau haapiiraa. A ani manihini i te feia o ta outou e hahaere ra ia faaite atoa i te mea o ta ratou i farii e i haapii mai.
Nahea vau ia imi i te heheuraa no te taata iho ?
« E faaineine tatou ia tatou no te farii i te heheuraa no te taata iho mai te au i te mau peropheta, na roto i te tai‘oraa i te mau papa‘iraa mo‘a, te haapaeraa i te maa, te pureraa e te faatupuraa i te faaroo. Te faaroo, o te taviri ïa. Haamana‘o na tatou i te faaineineraa o Iosepha no te Orama Matamua :
« ‘Te ere ra râ te hoê o outou i te paari, e ani oia i te Atua. …
« ‘E ani râ oia ma te faaroo, eiaha e feaa.’ »1
Elder Robert D. Hales no te Pŭpŭ no te Tino Ahuru Ma Piti Aposetolo.
« Te pure, ta outou ïa taviri no te haere i te ra‘i ra. Te ponao, tei to outou ïa pae o te paruru.
« E ere râ te reira ana‘e. Te taata e mana‘o nei e, e tae mai te heheuraa ma te ohipa ore, te na ô mai ra te Fatu e :
« ‘Aita ho‘i oe i ite na ; ua mana‘o noa oe e e horo‘a noa vau i te reira ia oe, ma to oe mana‘o ore maori râ ia ani noa mai ia‘u nei.
« ‘Area râ, inaha, te parau atu nei au ia oe e, ia imi maite oe i te reira i roto i to oe aau; e ti‘a ai ei reira oe e ani mai ai ia‘u e ua ti‘a anei, e mai te mea ua ti‘a ra e faatupu ïa vau i te ahu i roto i to oe ouma; no te reira oe e ite ai e ua ti‘a ihoa.’ »2
Peresideni Boyd K. Packer, peresideni no te Pŭpŭ no te Tino Ahuru Ma Piti Aposetolo.
Nahea e ti‘a ai ia‘u ia farii i te heheuraa no te taata iho ?
« I roto i to’na mau huru i matarohia, e tae mai te heheuraa e aore râ, te faaururaa na roto i te mau parau e aore râ, na roto i te mau mana‘o e tuuhia mai i roto i te aau (a hi‘o Enosa 1:10 ; PH&PF 8:2–3), na roto i te haamaramaramaraa vitiviti (a hi‘o PH&PF 6:14–15), na roto i te mau mana‘o maitai e aore râ, te mau mana‘o ino no ni‘a i te mau ohipa i opuahia, e aore râ, na roto i te mau ohipa faauruhia e te varua, mai te mau ohipa aravihi. Mai ta te peresideni Boyd K. Packer,… Peresideni no te Pŭpŭ no te Tino Ahuru Ma Piti Aposetolo, i parau ra, ‘e tae mai te faaururaa hau a‘e na roto i te mana‘o e iti na roto i te reo faaroohia.’ »3
Elder Dallin H. Oaks no te Pŭpŭ no te Tino Ahuru Ma Piti Aposetolo.
« E fare te hiero no te haapiiraa. E rave rahi o te mau haapiiraa e horo‘ahia i roto i te hiero e mau haapiiraa faahoho‘araa noa ïa e o te apohia na roto i te Varua. To’na auraa ra maori râ ua haapiihia tatou mai te ra‘i mai. … E nanea atu â to tatou ite i te auraa o te mau oro‘a e te mau fafauraa mai te mea e, e ho‘i pinepine tatou i te hiero ma te hinaaro mau ia haapii e ia hi‘o i te mau parau mau mure ore i haapiihia i reira. … E mata na tatou i te farii ma te oaoa i te puai varua e i te heheuraa e roaa ia tatou na roto i to tatou haere-tamau-raa i te hiero ».4
Silvia H. Allred, tauturu matamua i roto i te peresideniraa rahi no te Sotaiete Tauturu.
Hoho‘a faahoho‘araa na Juan Pablo Aragón Armas