Te fariiraa i te varua o te hiero

Cristian Robles, Chili

I to‘u pii-raa-hia ei melo no te apooraa teitei, ua faaite te peresideni tĭtĭ i to’na hinaaro ia rahi atu te mau melo e haere i te hiero i te mahana i faataahia na to matou tĭtĭ. E mea fifi te parau no te utaraa, no reira, te ohipa matamua ta’na i rave, o te faanahoraa ïa i te hoê pereoo uta taata, no te ohi i te mau melo i te mau fare pureraa atoa i roto i te tĭtĭ, e no te faaho‘i ia matou ia hope taua mahana ra.

Tera râ, te vai faahou ra te tahi atu fifi. E rave rahi metua vahine aita e nehenehe ia ratou ia haere i te hiero no te mea aita e taata no te haapa‘o i ta ratou mau tamarii. I to matou paraparauraa ia ani i te feia apî tamahine no te tĭtĭ ia haapa‘o ratou i te mau tamarii, ua feruri a‘e ra vau e, e nehenehe ta matou e pii i te hoê ti‘a faatere haapa‘o tamarii no te tĭtĭ. Ua faaite atu vau i taua mana‘o ra i te peresideni tĭtĭ. Ua parau maira oia e, e pii matou i te mau taata faafariu apî no te tauturu i te ti‘a faatere haapa‘o tamarii ia ti‘a ia ratou ia farii atoa i te varua o te hiero. I te faaohipa-raa-hia teie na mana‘o, ua rahi roa te taata tei haere i te hiero.