Daglaing Pagkaunawa
Ako si Magnolia. Nagsisimba ako sa isang ward na Espanyol ang wikang ginagamit. Isang araw pumunta si Mia sa klase namin sa Primary. Ingles lang ang alam niyang wika. Gusto kong madama ni Mia na kabilang siya, kaya nagpasiya akong tulungan siya. Ako ang kanyang magiging interpreter!
Pag-agapay
Noong una nahirapan akong umagapay sa pag-interpret para kay Mia. Binagalan ng mga guro ang pagsasalita para mabigyan ako ng sapat na panahon. Masaya kaming lahat na matulungan si Mia.
Maraming Pagkakatulad
Pareho kaming nabinyagan at nakumpirma. Pareho kaming mahilig sa musika, lalo na sa mga awitin sa himno at sa Primary. Pareho naming gusto ang family home evening. At pareho naming gustong basahin ang mga kuwento sa Liahona.
Ibinulong na Tulong
Ako si Mia. Espanyol ang salita ng mga magulang ko, kaya nagsimba kami sa ward na Espanyol ang wikang ginagamit. Hindi ko maunawaan kung ano ang sinasabi ng mga tao. Nakita ni Magnolia na malungkot ako. Lumipat siya sa tabi ko at bumulong sa akin sa wikang Ingles.
Mabuting Magkaibigan
Pagkatapos ng Primary, tinanong ko si Magnolia kung puwede ko siyang maging kaibigan. Pumayag siya. Mula noon, naging kaibigan at interpreter ko na si Magnolia. Tinulungan din niya akong magkaroon ng iba pang mga kaibigan.
Gawin ang Gagawin ni Jesus
Kahit sino ay puwedeng makatulong sa mga tao, tulad ng pagtulong sa akin ni Magnolia. Manalangin. Ipapaalam sa iyo ng Ama sa Langit kung sino ang tutulungan. Parang katulad lang ito ng awiting, “If the Savior Stood Beside Me” (Friend, Okt. 1993, 14). Maaari nating subukang gawin ang ipinagagawa sa atin ni Jesus.