Oras para sa Banal na Kasulatan

Ang Kuwento Tungkol sa Taong Matalino at sa Taong Mangmang

Ni Jean Bingham

Ang awtor ay naninirahan sa Utah, USA.

Sabay-sabay na pag-aralan ang Bagong Tipan sa taong ito!

Isang araw ninais ni Jesus na turuan ang mga tao kung paano manatiling malakas kahit mangyari ang mahihirap na bagay. Nagkuwento Siya sa kanila tungkol sa isang malakas na ulan, isang taong matalino, at isang taong mangmang. Nang bumagsak ang ulan, hindi bumagsak ang bahay ng taong matalino dahil nakatayo iyon sa ibabaw ng bato. Ngunit ang bahay ng taong mangmang ay bumagsak dahil nakatayo iyon sa buhanginan.

Itinuturo ni Jesus kung gaano kahalaga ang sumampalataya sa Kanya at sumunod sa Kanyang mga turo. Kapag nagkaroon tayo ng malakas na patotoo, nagiging sapat ang lakas natin para makatindig, anumang mahihirap na bagay ang mangyari.

Ano ang Talinghaga?

Ang talinghaga ay isang espesyal na uri ng kuwento. Ito ay kuwento tungkol sa mga simpleng bagay, gaya ng isang malakas na ulan o isang perlas, na pamilyar. Nagkuwento ng mga talinghaga si Jesus para ipaunawa sa mga tao ang mga espirituwal na katotohanan. Isang talinghaga ang nasa Mateo 13:44–46. Ano ang itinuturo nito tungkol sa kung gaano kahalaga ang ebanghelyo? Mahahanap ba ninyo ang iba pang mga talinghaga?

Bato o Buhanginan?

Sumulat ng mga aktibidad na gaya ng nasa ibaba sa mga piraso ng papel. Maghalinhinan sa pagpili at pagbasa sa mga ito nang malakas. Talakayin kung bakit maitutulad ang pagsasagawa ng bawat isa sa pagtatayo ng bahay sa ibabaw ng bato o buhanginan. Paano tayo natutulungan ng pakikinig sa mga propeta na masunod ang mga turo ni Jesus at makagawa ng matatalinong pasiya?

• Pagbabasa ng mga banal na kasulatan nang magkasama

• Pagtanggap sa hamon

• Pagsisimba

• Isinisisi ang pagkakamali sa iba

• Paggawa ng iyong homework

• Paggalang sa iba

• Pagsasabi ng katotohanan

• Pagtahimik sa ginagawang pananakot ng iba sa isang tao

• Pakikinig sa pangkalahatang kumperensya

• Pandaraya sa mga aktibidad sa paaralan

• Pagsasali sa isang taong bagong salta

• Paggamit ng masasamang salita

• Pakikipaglaro sa kapatid

• Pagbabahagi sa iba

• Pag-uukol ng maraming oras sa paglalaro sa computer

• Pagkuha ng isang bagay na hindi sa iyo

• Pagdarasal tuwing umaga at gabi

• Pagsasali sa isang taong napag-iwanan

Sining sa Bato

Pumili ng isang makinis na bato. Gamit ang isang marker o pintura, sulatan ito ng “Jesucristo.” Pag-usapan kung bakit napakahalagang itatag ang ating buhay sa Kanyang mga turo. Ilagay ang bato sa lugar na madalas ninyo itong makikita.

Jesucristo

Tip sa Banal na Kasulatan

Matutulungan tayo ng Aklat ni Mormon na maunawaan ang Bagong Tipan. Basahin ang Helaman 5:12. Ano ang natutuhan ninyo tungkol sa kahulugan ng salitang bato sa pagbasa sa talatang iyan? Hanapin ang “Bato” sa Gabay sa mga Banal na Kasulatan para tingnan kung may makikita kayong iba pang mga talata na tutulong sa inyo na mas maunawaan ito.

Pag-uusap ng Pamilya

Basahin ang Mateo 7:24–29 nang sabay-sabay. Maidodrowing din ninyo ang nangyayari sa kuwento. Pagkatapos ay maaari ninyong pag-usapan ang mga tanong na ito: Anong mga bagay sa buhay natin ang katulad ng ulan at hangin? Paano maitutulad ang paggawa ng mga desisyon ayon sa kung ano ang popular sa pagtatayo ng ating bahay sa buhanginan? Paano tayo napoprotektahan sa pagsunod sa mga turo ni Jesus at nagiging kasintibay ng bahay na nakatayo sa ibabaw ng bato? Pag-usapan ang mga paraan na mapapatatag ninyo ang inyong pananampalataya kay Jesucristo.

Awit: “Ang Matalino at ang Hangal” (Aklat ng mga Awit Pambata, 132)

Banal na kasulatan: Mateo 7:24–29