« ដំណឹងល្អរបស់ព្រះយេស៊ូវគ្រីស្ទ »
សម្រាប់ពួកយើងម្នាក់ៗ ជីវិតនេះគឺជាដំណើរមួយដ៏ពិសេស និងអស្ចារ្យ ។ យើងនឹងឆ្លងកាត់ដំណាក់កាលខុសៗគ្នាក្នុងជីវិតរបស់យើង ដែលវាពោរពេញទៅដោយរឿងថ្មីៗ ការប្រឈមថ្មីៗ និងការបំផុសគំនិតខាងវិញ្ញាណថ្មីៗ ។ គឺដូចជាការជិះរថភ្លើងមួយដោយមានគោលដៅទៅទីក្រុងដ៏សែនឆ្ងាយមួយដែលយើងមិនដែលបានទៅលេងពីមុនមក យើងនឹងមើលទេសភាពថ្មីៗតាមបង្អួច ។ វានឹងមានអគារជាច្រើនក្នុងទីក្រុងទាំងនោះ ទីវាល ស្ពាន ភ្នំ និងឆ្នេរសមុទ្រ ។ ជីវិតរបស់យើងស្រដៀងទៅនឹងទិដ្ឋភាពខុសគ្នានោះដែរ កាលយើងច្បាស់ជាជួបនឹងក្ដីអំណរ ក្ដីសង្ឃឹម ជោគជ័យ ភាពតានតឹង ការថប់បារម្ភ និងការខកចិត្ត ។
ខ្ញុំរីករាយដែលយើងអាចជួបនឹងបទពិសោធន៍នៃជីវិតដ៏សម្បូរបែបនេះ ហើយឆ្លងកាត់ដំណើរដ៏ជោគជ័យមួយត្រឡប់ទៅផ្ទះនៅស្ថានសួគ៌របស់យើងវិញតាមរយៈដំណឹងល្អរបស់ព្រះយេស៊ូវគ្រីស្ទ ។ ដំណឹងល្អរបស់ព្រះយេស៊ូវគ្រីស្ទគឺដូចជាផ្លូវរថភ្លើងដែលនាំរថភ្លើងទៅកាន់គោលដៅរបស់វាដែរ ។ ដូចជារថភ្លើងត្រូវតែនៅលើផ្លូវរបស់វាដើម្បីទៅដល់គោលដៅនោះ យើងក៏ត្រូវគោរពតាមព្រះបញ្ញត្តិទាំងអស់របស់ព្រះអម្ចាស់ ទទួលពិធីបរិសុទ្ធទាំងអស់ ហើយរក្សាសេចក្ដីសន្យាទាំងអស់ដើម្បីត្រឡប់ទៅកាន់ផ្ទះនៅស្ថានសួគ៌របស់យើងផងដែរ ។
យើងគឺជាកូនចៅខាងវិញ្ញាណរបស់ព្រះ ។ យើងមានសក្ដានុពលដែលគ្រងទុកមកដើម្បីអភិវឌ្ឍគុណសម្បត្តិដ៏ទេវភាពរបស់ទ្រង់ ។ តាមរយៈដង្វាយធួនរបស់ព្រះយេស៊ូវគ្រីស្ទ នោះយើងអាចក្លាយដូចជាព្រះវរបិតាសួគ៌របស់យើង ហើយទទួលបានសេចក្ដីអំណរដ៏ពេញលេញ ។ វាមើលទៅសែនឆ្ងាយនឹងទៅដល់ ប៉ុន្ដែវាមានឥទ្ធិពលនៅជិតបង្កើយរហូតដល់យើងសឹងមិនអាចយល់វាបាន ។
កាលមានបន្ទូលពីអស់អ្នកដែលប្រែចិត្ត នោះព្រះអម្ចាស់បានមានបន្ទូលថា « ទោះបើអំពើបាបរបស់ឯងដូចជាពណ៌ក្រហមទែងក៏ដោយ គង់តែនឹងបានសដូចហិមៈ »១ « ហើយយើងជាព្រះអម្ចាស់មិនចាំពីអំពើបាបទាំងនោះទៀតទេ » ។២ មិនថាបញ្ហាអ្វីឡើយ វាអាចដោះស្រាយបានតាមរយៈការប្រែចិត្តដ៏ត្រឹមត្រូវ ។ យើងអាចស្អាតបាតម្ដងទៀតបាន ។
ព្រះអង្គសង្គ្រោះបានមានព្រះបន្ទូលថា « អស់អ្នកដែលនឿយព្រួយ ហើយផ្ទុកធ្ងន់អើយ ចូរមកឯខ្ញុំ ខ្ញុំនឹងឲ្យអ្នករាល់គ្នាឈប់សម្រាក ។ ចូរទទួលនឹមខ្ញុំ ហើយរៀននឹងខ្ញុំចុះ ដ្បិតខ្ញុំស្លូត ហើយមានចិត្តសុភាព នោះអ្នករាល់គ្នានឹងបានសេចក្តីសំរាកដល់ព្រលឹង ។ ពីព្រោះនឹមខ្ញុំងាយទេ ហើយបន្ទុកខ្ញុំក៏ស្រាល » ។៣
អែលឌើរ ដេវីឌ អេ បែដណា បានបង្រៀនថា « ការចុះ និងការរក្សាសេចក្តីសញ្ញាពិសិដ្ឋ គឺជាការទឹមយើងជាមួយនឹងព្រះអម្ចាស់ព្រះយេស៊ូវគ្រីស្ទ … កាលណាយើងទុកចិត្ត ហើយទាញបន្ទុកយើងជាមួយទ្រង់ក្នុងដំណើរនៃជីវិតរមែងស្លាប់នេះ នោះនឹមទ្រង់នឹងងាយ ហើយស្រាលជាប្រាកដ … យើងពុំដែលនៅម្នាក់ឯងឡើយ ។ យើងអាចឆ្ពោះទៅមុខក្នុងជីវិតប្រចាំថ្ងៃយើង ដោយមានជំនួយពីស្ថានសួគ៌ » ។៤
កាលព្រះអម្ចាស់បានប្រកាសថា « ហេតុដូច្នេះហើយ ចូរបន្តដំណើររបស់អ្នក ហើយចូរឲ្យចិត្តអ្នកបានសប្បាយរីករាយចុះ ត្បិតមើលចុះ និងមើលន៏ យើងគង់នៅជាមួយអ្នករហូតដល់ចុងបំផុត » ។៥ ដូច្នេះ ព្រះគុណរបស់ព្រះគ្រីស្ទផ្ដល់ឲ្យយើងមិនត្រឹមតែសេចក្ដីសង្គ្រោះចេញពីទុក្ខសោក អំពើបាប និងសេចក្ដីស្លាប់ប៉ុណ្ណោះទេ ប៉ុន្ដែថែមទាំងផ្ដល់ដល់យើងនូវកម្លាំងដែលយើងត្រូវការដើម្បីយកឈ្នះលើការឈឺចាប់ និងការរងទុក្ខខាងសាច់ឈាមទាំងឡាយផងដែរ ។
ព្រះអម្ចាស់បានមានបន្ទូលថា « ហើយបើសិនជាមនុស្សលោកមករកយើង នោះយើងនឹងបង្ហាញដល់ពួកគេនូវភាពទន់ខ្សោយរបស់ពួកគេ ។ យើងឲ្យភាពទន់ខ្សោយទៅមនុស្ស ដើម្បីឲ្យពួកគេអាចបានរាបសា ហើយគុណរបស់យើងមានគ្រប់គ្រាន់សម្រាប់មនុស្សទាំងអស់ ដែលបន្ទាបខ្លួននៅចំពោះយើង ត្បិតបើសិនជាពួកគេបន្ទាបខ្លួននៅចំពោះយើង ហើយមានសេចក្ដីជំនឿជឿដល់យើង លំដាប់នោះ យើងនឹងធ្វើឲ្យអ្វីដែលទន់ខ្សោយក្លាយទៅជាខ្លាំងពូកែចំពោះពួកគេវិញ » ។៦ ( អេធើរ ១២:២៧ )
ខណៈមរ៉ូណៃអង្វរថា « មែនហើយ ចូរមករកព្រះគ្រីស្ទ ហើយឲ្យបានល្អឥតខ្ចោះនៅក្នុងទ្រង់ … ស្រឡាញ់ព្រះឲ្យអស់ពីសមត្ថភាព អស់ពីគំនិត និងអស់ពីកម្លាំងរបស់អ្នក នោះ … ដោយសារព្រះគុណនៃព្រះ នោះអ្នករាល់គ្នាអាចបានល្អឥតខ្ចោះនៅក្នុងព្រះគ្រីស្ទ » ។៧
ប្រធាន ថូម៉ាស អេស ម៉នសុន បានអញ្ជើញយើងថា « តើយើងត្រៀមខ្លួនសម្រាប់ដំណើរឆ្លងកាត់ជីវិតរបស់យើងហើយឬនៅ ? ផ្លូវនេះពេលខ្លះអាចពិបាក ។ គូសផ្លូវរបស់អ្នកទុក ចូរប្រុងប្រយ័ត្ន ហើយតាំងចិត្តថាត្រូវខំរៀន អធិស្ឋានដោយក្លៀវក្លា និង រស់នៅដោយសុចរិត » ។៨
នៅក្នុងឯកសារ « ព្រះគ្រីស្ទដ៏មានព្រះជន្មរស់ ៖ ទីបន្ទាល់នៃពួកសាវក » គណៈប្រធានទីមួយ និងកូរ៉ុមនៃពួកសាវកដប់ពីរនាក់បានប្រកាសថា « យើងសូមថ្វាយនូវទីបន្ទាល់របស់យើងអំពីសគុណភាពនៃការបូជាដ៏មហិមារបស់ទ្រង់ដែលធួននឹងបាប ។ សូម្បីតែមួយក៏គ្មានសោះ ដែលឥទ្ធិពលដ៏ជ្រាលជ្រៅទៅលើអស់ទាំងមនុស្សដែលបានរស់នៅ ហើយដែលនឹងរស់នៅលើផែនដីនៅអនាគតកាល » ។
ខ្ញុំសូមថ្លែងទីបន្ទាល់របស់ខ្ញុំថា ព្រះមានព្រះជន្មរស់ ។ ទ្រង់ស្រឡាញ់យើង ។ ទ្រង់ស្ដាប់ឮការអធិស្ឋានរបស់យើង នៅពេលណាយើងអររីករាយ ក្រៀមក្រំ តានតឹង ឬថប់បារម្ភ ។ ខ្ញុំសូមថ្លែងទីបន្ទាល់ថា ព្រះយេស៊ូវគ្រីស្ទគឺជាព្រះអង្គសង្គ្រោះនៃពិភពលោកនេះ ។ ទ្រង់គឺជាព្រះប្រោសលោះ ។ ខ្ញុំដឹងថា ដង្វាយធួនរបស់ទ្រង់នឹងជួយយើងឲ្យមានដំណើរដ៏ជោគជ័យមួយត្រឡប់ទៅកាន់ផ្ទះរបស់យើងនៅឯស្ថានសួគ៌វិញ ។ នៅក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ៕