បេសកកម្មពីរ គ្រួសារពីរបានទទួលពរជ័យ
ជូន មែននូអែល ហ្គូមែស្ស ទីក្រុង រ៉ូសារីយ៉ូ ប្រទេស អាហ្សង់ទីន
រចនារូបភាពដោយ ខារ៉ូលីន វីបប៊ើត
អំឡុងពេលខ្ញុំបម្រើនៅបេសកកម្ម អារីហ្សូណា មេសា ជារឿយៗខ្ញុំបានទទួលអ៊ីម៉ែលពីបងស្រីខ្ញុំនៅប្រទេស អាហ្សង់ទីន ។ ណាថាលៀពុំមែនជាសមាជិកសាសនាចក្រទេ ។ ប៉ុន្មានឆ្នាំមុន ពេលកូនស្រីរបស់គាត់បានស្លាប់ទៅ គ្រួសាររបស់យើងបានព្យាយាមចែកចាយដំណឹងល្អជាមួយគាត់ ប៉ុន្តែគាត់ពុំដែលមានចិត្តរាក់ទាក់ទទួលយកឡើយ ។
ខ្ញុំបានបន្តចែកចាយទីបន្ទាល់របស់ខ្ញុំជាមួយគាត់ពេលខ្ញុំបម្រើបេសកកម្ម ។ នៅក្នុងអ៊ីម៉ែលមួយ ខ្ញុំបានប្រាប់គាត់អំពីស្ត្រីម្នាក់ដែលដៃគូខ្ញុំ និងខ្ញុំបានជួប ។ កូនស្រីរបស់គាត់ក៏បានស្លាប់ផងដែរ ។ យើងបានថ្លែងទីបន្ទាល់អំពីក្រុមគ្រួសារអស់កល្បជានិច្ច ហើយគាត់បានមានអារម្មណ៍សង្ឃឹមអំពីអ្វីដែលយើងបានចែកចាយ ។ ខ្ញុំបានប្រាប់ណាថាលៀថា គាត់អាចទទួលអារម្មណ៍បែបនោះដែរ ។ គាត់បានសរសេរត្រឡប់មកវិញ ដោយប្រាប់ខ្ញុំថា គាត់ចង់ទទួលបានអារម្មណ៍នៃសេចក្តីសង្ឃឹមនោះ ប៉ុន្តែសេចក្តីជំនឿរបស់គាត់ពុំខ្លាំងគ្រប់គ្រាន់ឡើយ ។
ខ្ញុំបានសម្រេចចិត្តផ្ញើសំបុត្រដែលសរសេរដោយដៃទៅ ណាថាលៀ ដោយអញ្ជើញគាត់ឲ្យអធិស្ឋានទូលសូមជំនួយដើម្បីជឿ ។ ខ្ញុំក៏បានទទួលការបំផុសគំនិតឲ្យសរសេរកថាខណ្ឌមួយជាភាសាអង់គ្លេស និងប្រាប់រឿងនោះដល់អ្នកផ្សព្វផ្សាយសាសនា ។ ណាថាលៀចេះនិយាយតែភាសាអេស្ប៉ាញ ដូច្នេះខ្ញុំបានប្រាប់គាត់ឲ្យរកមើលអ្នកផ្សព្វផ្សាយសាសនា ហើយសូមឲ្យពួកគេបកប្រែឲ្យគាត់ស្តាប់ ។ ខ្ញុំស្គាល់អ្នកផ្សព្វផ្សាយសាសនាម្នាក់ដែលចេះភាសាអង់គ្លេស ។
មិនយូរប៉ុន្មានក្រោយមក ខ្ញុំបានទទួលអ៊ីម៉ែលមួយពីណាថាលៀ ។ គាត់បានរកអ្នកផ្សព្វផ្សាយសាសនា ហើយសូមពួកគេឲ្យបកប្រែសំបុត្ររបស់ខ្ញុំ ។ ពួកគេបានអានសំបុត្រនោះដោយស្ងាត់ៗ ហើយញញឹម ។ នៅពេលណាថាលៀ បានសួរថា តើខ្ញុំបានសរសេរអ្វីខ្លះ នោះពួកគេបានតបថា « ចូរពួកយើងនិយាយអំពីពាក្យពេចន៍ក្នុងសំបុត្រនេះ ! » ខ្ញុំបានសរសេរថា ណាថាលៀកំពុងមានការលំបាកដោយការស្លាប់របស់កូនស្រីគាត់ ហើយខ្ញុំបានសូមឲ្យអ្នកផ្សព្វផ្សាយសាសនាបង្រៀនគាត់អំពីផែនការនៃសេចក្ដីសង្គ្រោះ ។
អ្នកផ្សព្វផ្សាយសាសនាបានចែកចាយសារលិខិតខ្លីមួយ ហើយណាថាលៀបានចូលចិត្តអ្វីដែលពួកគេបានបង្រៀន ។ ក្រោយមក ណាថាលៀ បានប្រាប់ពួកគេថា ខ្ញុំកំពុងបម្រើបេសកកម្មនៅ មេសា រដ្ឋ អារីហ្សូណា ស.រ.អា. ។ អែលឌើរម្នាក់ឈ្មោះ ឡាសុន បាននិយាយថា ខ្ញុំមកពីទីក្រុងនោះ ។
មួយឆ្នាំក្រោយមក ខ្ញុំត្រូវបានផ្លាស់ប្តូរតំបន់ទៅកន្លែងដែលគ្រួសាររបស់អែលឌើរឡាសុនរស់នៅ ។ ខ្ញុំបានស្គាល់គ្រួសាររបស់គាត់ ដូចដែលគាត់បានស្គាល់គ្រួសារខ្ញុំដែរ ហើយគ្រួសារទាំងពីរបានទទួលពរ ។ អែលឌើរ ឡាសុន បានអធិស្ឋានឲ្យប្អូនប្រុសរបស់គាត់ដែលកំពុងមានការលំបាកនឹងទីបន្ទាល់របស់គាត់ ។ ខ្ញុំអាចទៅជួបប្អូនប្រុសរបស់គាត់ជំនួសគាត់ ហើយជួយគាត់ពង្រឹងទីបន្ទាល់របស់គាត់ ។ អែលឌើរ ឡាសុន និងដៃគូរបស់គាត់បន្តបង្រៀន ណាថាលៀ ហើយទីបំផុតគាត់បានជ្រមុជទឹក ។ ខ្ញុំដឹងថា ព្រះអម្ចាស់បានបញ្ជូនពួកយើងទៅក្នុងទិសដៅពីរ គឺខ្ញុំទៅរដ្ឋ អារីហ្សូណា ហើយអែលឌើរ ឡាសុន ទៅប្រទេសអាហ្សង់ទីន ដើម្បីយើងទាំងពីរនាក់អាចជួយទ្រង់ពង្រឹងដល់ក្រុមគ្រួសារយើងនៅក្នុងដំណឹងល្អ ។