បានពរតាមគ្រប់របៀប ដែលអាចមាន
ដោយអែលឌើរ អែតវើត ឌូប
ក្នុងពួកចិតសិបនាក់
អែលឌើរ អ៊ែតវើឌ ឌូប បានកើតនៅក្នុងប្រទេសស្ស៊ីមបាវ៉េ ហើយលោក និងភរិយាលោក ណៅមី មានកូនបួននាក់ ។
របៀបដែលវិវរណៈនេះបានផ្តល់ពរជ័យដល់ខ្ញុំ និងគ្រួសាររបស់ខ្ញុំ ព្រមទាំងសាសនាចក្រនៅក្នុងទ្វីបអាហ្វ្រិក ។
នៅគ្រាដំបូងដែលខ្ញុំបានឮអំពីការដាក់កំហិតទៅលើពួកស្បែកខ្មៅមិនឲ្យកាន់បព្វជិតភាពនោះគឺជាពេលដែលខ្ញុំកំពុងបម្រើបេសកកម្ម ។ ខ្ញុំបានជ្រមុជទឹកនៅឆ្នាំ ១៩៨៤ បន្ទាប់ពីការដាក់កំហិតនោះបានចប់ទៅហើយ ។ ពីរឆ្នាំក្រោយមក ខ្ញុំត្រូវបានហៅឲ្យបម្រើនៅបេសកកម្មយ៉ូហាណែសស្បើក អាហ្វ្រិកខាងត្បូង ។
អំឡុងពេលចាត់តាំងទៅទីក្រុង បូឡាវ៉េយូ ប្រទេស ស្ស៊ីមបាវ៉េ ដៃគូខ្ញុំអែលឌើរ ហ្វ្រានស៊ីស ជេក និងខ្ញុំបានទៅជួបបងស្រីមិនសូវសកម្មម្នាក់ ។ ស្វាមីរបស់គាត់គឺជាសាស្ដ្រាចារ្យខាងសាសនាម្នាក់នៅព្រះវិហារមួយទៀត ។ ស្វាមីរបស់គាត់បានសួរយើងអំពីមូលហេតុដែលបព្វជិតភាពត្រូវបានដកចេញពីពួកបុរសស្បែកខ្មៅពូជពង្សអាហ្វ្រិក ។ គាត់បាននិយាយរឿងជាច្រើនដែលរំខានចិត្តខ្ញុំ — ជារឿងដែលខ្ញុំពុំធ្លាប់បានឮពីមុនមកសោះ ។ ពេលខ្ញុំបានដើរចេញពីបន្ទប់នោះ ខ្ញុំមានអារម្មណ៍ទន់ខ្សោយ និងបាក់ទឹកចិត្តជាខ្លាំង ។
អែលឌើរ ជេក និងខ្ញុំបានជិះកង់របស់យើងត្រឡប់ទៅផ្ទះរបស់យើងវិញដោយពុំនិយាយអ្វីមួយម៉ាត់ឡើយ ។ នៅពេលយើងទៅដល់ផ្ទះវិញ គាត់បានមើលមកខ្ញុំ ហើយនិយាយថា « អែលឌើរ ឌូប តើអែលឌើរមានរឿងអ្វី ? មើលទៅអែលឌើរដូចជាមានអ្វីរំខានចិត្ត » ។
ខ្ញុំបានតបវិញថា « តើអែលឌើរមិនឮអ្វីដែលគាត់បាននិយាយទេឬ ? តើរឿងនេះអាចកើតឡើងដោយរបៀបណា ? »
« អែលឌើរ តើអែលឌើរជឿថា ព្រះយេស៊ូវគ្រីស្ទបានបង្ហាញព្រះកាយដល់ក្មេងប្រុសយ៉ូសែបដែរឬទេ ? »
ខ្ញុំបានតបថា « បាទខ្ញុំជឿ ។ ប៉ុន្តែ តើរឿងនោះទាក់ទងអ្វីនឹងចំណុចនេះ ? »
អែលឌើរ ជេក បានឆ្លើយថា « វាទាក់ទងនឹងអ្វីៗទាំងអស់ ។ យើងជឿលើវិវរណៈ មែនទេ » ?
ខ្ញុំបានគិតអំពីពាក្យសម្តីរបស់គាត់ និងអ្វីដែលសាស្ដា្រចារ្យនោះបាននិយាយ ។ នាយប់នោះ ខ្ញុំបានភ្ញាក់ដឹងខ្លួនឡើងកណ្តាលអាធ្រាត ។ ខ្ញុំបានមានអារម្មណ៍រីករាយ និងសុខសាន្ត ។
ចម្លើយចំពោះគ្រប់សំណួរនៃដំណឹងល្អចងភ្ជាប់ត្រឡប់ទៅរកអ្វីដែលបានកើតឡើងនៅក្នុងឆ្នាំ ១៨២០ ។ ដោយដឹងថា ព្រះវរបិតាសួគ៌ និងព្រះយេស៊ូវគ្រីស្ទ បានបង្ហាញព្រះកាយដល់យ៉ូសែប ស្ម៊ីធ នោះមានន័យថា លោកគឺជាព្យាការី ហើយថានេះគឺជាសាសនាចក្ររបស់ព្រះអម្ចាស់ ។ ប្រសិនបើព្រះវរបិតាសួគ៌ និងព្រះយេស៊ូវគ្រីស្ទបានបង្ហាញព្រះកាយដល់ក្មេងប្រុសយ៉ូសែប នោះគោលការណ៍ និងសំណួរទាំងអស់នៃដំណឹងល្អកើតឡើងតាមរឿងរបស់វា ។ នេះជាសាសនាចក្រមួយនៃវិវរណៈ ហើយព្រះអម្ចាស់បើកសម្តែងដំណើរការមួយចំនួនតាមពេលវេលាជាក់លាក់ដល់ពួកអ្នកបម្រើ ពួកព្យាការីរបស់ទ្រង់ ហើយនោះជាអ្វីដែលនាំភាពសុខសាន្តមកឲ្យខ្ញុំ ។
ខ្ញុំបានចាប់ផ្តើមលោតចុះលោតឡើង ហើយដាស់ដៃគូរបស់ខ្ញុំដោយស្រែកថា « ពិតមែនហើយ ពិតមែនហើយ ! អែលឌើរ ជេក អែលឌើរនិយាយត្រូវហើយ ! ព្រះវរបិតាសួគ៌ និងព្រះយេស៊ូវគ្រីស្ទបានបង្ហាញព្រះកាយដល់យ៉ូសែប ស៊្មីធ ! នេះគឺជាសាសនាចក្ររបស់ព្រះអម្ចាស់ ! »
ការបញ្ចប់ការដាក់កំហិតនេះគឺជាពរជ័យមួយដល់សមាជិកទាំងឡាយទូទាំងទ្វីបអាហ្វ្រិក ។ បព្វជិតភាពបានផ្តល់ពរជ័យដល់ខ្ញុំ និងគ្រួសារខ្ញុំតាមគ្រប់របៀបដែលអាចមាន ។ វាគឺជាកម្លាំងមួយដ៏រឹងមាំចំពោះខ្ញុំដើម្បីមានពរជ័យនៃព្រះវិហារបរិសុទ្ធ ជាពរជ័យនៃការដឹងថា យើងនឹងរស់នៅជាមួយគ្នាជាក្រុមគ្រួសារសម្រាប់ពេលដ៏អស់កល្បជានិច្ច ។
ការទទួលបានបព្វជិតភាពបានផ្តល់ពរជ័យដល់ទ្វីបអាហ្វ្រិក ។ ប្រជាជននៅទីនេះមានចិត្តរីករាយ និងភាពវិជ្ជមានក្នុងជីវិតរួចទៅហើយ ប៉ុន្ដែដំណឹងល្អបានបន្ថែមភាពរីករាយបន្ថែមទៀតដល់ពួកគេ ។ ក្រុមគ្រួសារមានសារៈសំខាន់ណាស់នៅក្នុងទ្វីបអាហ្វ្រិក ។ ដូច្នេះ ព្រះវិហារបរិសុទ្ធត្រូវបានមើលឃើញថាជាពរជ័យដ៏មហិមាមួយ ។ សាសនាចក្រកំពុងរីកចម្រើនយ៉ាងលឿននៅទីនេះ ។
សមាជិកនៅទីនេះស្តាប់តាមព្រះទ័យរបស់ព្រះ ហើយយើងបានទៅ និងធ្វើតាមព្រះទ័យទ្រង់ ។ ការណ៍នេះបានផ្តល់ពរជ័យដល់សមាជិកជាច្រើន ។ នៅគ្រាដែលតំបន់មួយចំនួននៅក្នុងទ្វីបអាហ្វ្រិកមានមនុស្ស ៩០ ភាគរយគ្មានការងារធ្វើ នោះសមាជិករបស់យើងហាក់ដូចជាមានសភាពធម្មតាដោយសារពួកយើងមានភាពខ្លួនទីពឹងខ្លួន ។ បព្វជិតភាព និងការណែនាំមកពីថ្នាក់ដឹកនាំបព្វជិតភាពបានផ្តល់ពរជ័យដល់ពួកយើង ។
ខ្ញុំមានអំណរគុណចំពោះព្រះវរបិតាសួគ៌ និងព្រះយេស៊ូវគ្រីស្ទសម្រាប់ឱកាសដើម្បីកាន់បព្វជិតភាព សម្រាប់ពរជ័យដែលបព្វជិតភាពមាននៅក្នុងជីវិតរបស់ខ្ញុំ និងរបៀបដែលបព្វជិតភាពបានផ្តល់ពរដល់សមាជិកនៅទូទាំងទ្វីបអាហ្វ្រិក ។