ព្រះវរបិតាសួគ៌ស្គាល់អ្នក
ដោយ ស៊ីស្ទើរ គ្រីស្ទីណា ប៊ី ហ្វ្រានកូ
ទីប្រឹក្សាទីពីរក្នុងគណៈប្រធានអង្គការបឋមសិក្សាទូទៅ
រៀងរាល់ថ្ងៃអាទិត្យនៅក្នុងទីក្រុងតូចមួយនៅក្នុងប្រទេស អាហ្សង់ទីន មានមនុស្សមួយក្រុមជួបជុំគ្នានៅក្រោមដើមឈើ ដើម្បីអានព្រះគម្ពីរ និងរៀនអំពីដំណឹងល្អ ។ មនុស្សមួយចំនួនជាសមាជិកសាសនាចក្រ ។ ប៉ុន្តែពួកគេជាច្រើនពុំទាន់ជ្រមុជទឹកនៅឡើយ ហើយពួកគេពិតជាចង់ជ្រមុជទឹកណាស់ !
ទោះជាយ៉ាងណាក្តី ពួកគេមានបញ្ហា ។ ពួកគេរស់នៅឆ្ងាយដាច់ស្រយាលពីទីក្រុងផ្សេងទៀត ។ គ្មានថ្នាក់ដឹកនាំសាសនាចក្របានទៅជួបពួកគេនៅក្នុងទីក្រុងពួកគេម្តងណាឡើយ ។
បន្ទាប់មក ពួកគេបានឮថា មានអ្នកផ្សព្វផ្សាយសាសនាមួយចំនួននៅក្នុងទីក្រុងដែលនៅចម្ងាយប្រហែលជាបួនម៉ោងពីពួកគេ ។ ពួកគេទាំងអស់គ្នាបានចូលលុយគ្នា ដើម្បីឲ្យបុរសម្នាក់អាចទិញសំបុត្រឡានក្រុងជិះទៅទីក្រុងដែលមានអ្នកផ្សព្វផ្សាយសាសនានោះ ។ នៅពេលគាត់ទៅដល់ទីនោះ គាត់បានរង់ចាំនៅស្ថានីយឡានក្រុង ។ គាត់បានគិតថា វាជាកន្លែងដ៏ល្អបំផុតដើម្បីស្វែងរកអ្នកផ្សព្វផ្សាយសាសនា ។
បន្ទាប់ពីរបីម៉ោងក្រោយមក គាត់បានឃើញយុវជនពីរនាក់ ។ ពួកគេជាអ្នកផ្សព្វផ្សាយសាសនា ! គាត់បានប្រាប់ពួកគេអំពីមនុស្សនៅក្នុងទីក្រុងរបស់គាត់ ។ ដូច្នោះអ្នកផ្សព្វផ្សាយសាសនា និងប្រធានបេសកកម្មបានរៀបផែនការធ្វើដំណើរមួយដើម្បីទៅជួបមនុស្សនៅទីនោះ ។
នៅថ្ងៃដែលប្រធានបេសកកម្ម និងអ្នកផ្សព្វផ្សាយសាសនាមក មនុស្សជាច្រើនបានជួបជុំគ្នាដើម្បីជួបពួកគេ ។ ឥឡូវនេះអស់អ្នកដែលពុំទាន់បានជ្រមុជទឹកអាចទទួលបុណ្យជ្រមុជទឹក ។ បន្ទាប់ពីបង្រៀនមេរៀនដល់ពួកគេរួច ពួកគេបានត្រៀមខ្លួនរួចជាស្រេច !
ទន្លេដែលជិតបំផុតគឺនៅឆ្ងាយណាស់ ដូច្នេះពួកគេបានសប់ទឹកមកពីអណ្តូងស្នប់ ហើយដាក់វាឲ្យពេញអាងហែលទឹកចល័តមួយ ។ វាចំណាយពេលបីម៉ោងដើម្បីដាក់ទឹកពេញអាងនោះ ! មាន ២៧ នាក់ទាំងស្ត្រី បុរស និងក្មេងដែលទទួលបុណ្យជ្រមុជទឹកនៅថ្ងៃនោះ ។ ពួកគេពោរពេញដោយអំណរ !
ព្រះវរបិតាសួគ៌បានដឹងថា មនុស្សទាំងនេះចង់ទទួលបុណ្យជ្រមុជទឹក ហើយទ្រង់បានជួយពួកគេឲ្យរកឃើញអ្នកផ្សព្វផ្សាយសាសនា ។ ព្រះវរបិតាសួគ៌ក៏ស្គាល់អ្នកផងដែរ ។ ទ្រង់ជ្រាបពីកន្លែងដែលអ្នកនៅ និងស្គាល់អ្នក ហើយដឹងពីតម្រូវការអ្នក ។ ទ្រង់ព្រះសណ្ដាប់ ហើយឆ្លើយតបការអធិស្ឋានរបស់អ្នក ។ មិនថាអ្នកមានអារម្មណ៍ឯកោបែបណានោះទេ ទ្រង់គង់នៅទីនោះជានិច្ច ។ អ្នកពុំនៅឯកោឡើយ ។ អ្នកអាចបែរទៅរកទ្រង់ ។