សម្រាប់ឌីជីថលប៉ុណ្ណោះ
របៀប ៥ យ៉ាងដែលអ្នកអាចជួយប៊ីស្សពរបស់អ្នកជួយដល់អ្នក
គាត់បានខិតខំអស់ពីសមត្ថភាពរបស់គាត់ហើយ ប៉ុន្តែជួនកាលគាត់ត្រូវការជំនួយ ។
គាត់បានស្វាគមន៍អ្នកជាមួយនឹងការចាប់ដៃដ៏រឹងប៉ឹងគ្រប់ពេលដែលអ្នកជួបគាត់ គាត់អង្គុយនៅកន្លែងដែលបានចាត់តាំងនៅលើវេទិកាអំឡុងការប្រជុំសាក្រាម៉ង់ ហើយគាត់លះបង់ពេលវេលារបស់គាត់យ៉ាងច្រើនដើម្បីបម្រើអ្នក និងព្រះអម្ចាស់ ។
គាត់គឺជាប៊ីស្សពរបស់អ្នក ៖ ថ្នាក់ដឹកនាំបព្វជិតភាពម្នាក់ដែលត្រូវបានហៅដោយព្រះឲ្យគ្រប់គ្រងវួដរបស់អ្នក ។ បញ្ជីកិច្ចការរបស់គាត់នឹងពុំត្រូវបានគូសអស់ទាំងស្រុងឡើយ គាត់ទូន្មានសមាជិកនៅក្នុងការិយាល័យរបស់គាត់ ទោះបីបន្ទាប់ពីគាត់ធ្វើការពេញមួយថ្ងៃក្តី ហើយគាត់បន្តនៅក្នុងសាលាប្រជុំជាច្រើនម៉ោងបន្ទាប់ពីព្រះវិហារចប់ដើម្បីបំពេញកាតព្វកិច្ចរបស់គាត់ ។
មើលទៅប៊ីស្សពរបស់អ្នកហាក់ដូចជាមានថាមពលខ្លាំងក្លា ប៉ុន្តែការដឹកនាំវួដទាំងមូលអាចធ្វើឲ្យគាត់អស់កម្លាំងណាស់ ! គាត់ព្យាយាមខិតខំអស់ពីសមត្ថភាពរបស់គាត់ហើយ ប៉ុន្តែជួនកាលគាត់ត្រូវការជំនួយ ។ នេះគឺជារបៀប ៥ យ៉ាងដែលអ្នកអាចជួយប៊ីស្សពរបស់អ្នកជួយដល់អ្នក ៖
-
អធិស្ឋានសម្រាប់គាត់ ។ ការហៅបម្រើរបស់ប៊ីស្សពអាចសាកល្បងដល់កម្រិតនៃផ្លូវចិត្ត ខាងវិញ្ញាណ និងថាមពលខាងរូបកាយរបស់គាត់ ។ គាត់ត្រូវការកម្លាំងដែលមានតែព្រះប៉ុណ្ណោះទើបអាចប្រទានឲ្យបាន ប៉ុន្តែការណ៍នោះអាចកើតឡើងបាន ដោយសារសេចក្តីជំនឿ និងការអធិស្ឋានរបស់អ្នក ( សូមមើល យ៉ាកុប ៥:១៦ ) ។
-
ចូរមានសេចក្ដីជំនឿនៅក្នុងមុខតំណែង ។ អ្នកបានគាំទ្រគាត់ជាប៊ីស្សពរបស់អ្នក ប៉ុន្តែសេចក្តីជំនឿរបស់អ្នកពុំគ្រាន់តែចាំបាច់នៅលើមនុស្សនោះទេ ប៉ុន្តែនៅក្នុងតំណែង ឬការហៅបម្រើជាប៊ីស្សព និងនៅលើព្រះដែលបានហៅ និងគាំទ្រដល់គាត់ ។ តើអ្នកអាចបង្ហាញសេចក្តីជំនឿរបស់អ្នកយ៉ាងដូចម្ដេច ? សូមមានឆន្ទៈបំពេញការហៅ និងការចាត់តាំងរបស់អ្នក ។ នៅពេលអ្នកជួបជាមួយប៊ីស្សពរបស់អ្នក សូមទៅដោយរៀបចំខ្លួន —អធិស្ឋាន តមអាហារប្រសិនបើចាំបាច់ និងស្លៀកពាក់ឲ្យបានសមរម្យដើម្បីបង្ហាញការគោរពរបស់អ្នកចំពោះព្រះអម្ចាស់ ។ សូមពិចារណាអំពីការទូន្មានរបស់គាត់ដោយយកចិត្តទុកដាក់ ។ គាត់តំណាងឲ្យព្រះអម្ចាស់ ។
-
រៀនស្គាល់គាត់ ។ សូមព្យាយាមរៀនស្គាល់គាត់ ។ សូមសួរគាត់អំពីជីវិត ប្រវត្តិរូប និងបទពិសោធន៍របស់គាត់ ។ សូមឲ្យគាត់ដឹងថា អ្នកថ្លែងអំណរគុណដល់ការបម្រើរបស់គាត់ ហើយថាអ្នកមានសេចក្តីជំនឿលើសមត្ថភាពរបស់គាត់ដើម្បីបំពេញការហៅបម្រើនោះ ។ ( សូមមើល ថែស្សាឡូនីចទី១ ៥:១២–១៣ ) ។
-
សូមកុំពឹងផ្អែកទៅលើគាត់ពេក ។ ប៊ីស្សពរបស់អ្នកចង់ជួយអ្នក ប៉ុន្តែប្រសិនបើអ្នកមានបញ្ហាដែលអាចដោះស្រាយដោយគ្រូបង្រៀនតាមផ្ទះរបស់អ្នក ទីប្រឹក្សាម្នាក់របស់ប៊ីស្សព ឬប្រធានសមាគមសង្គ្រោះ ឬប្រធានកូរ៉ុមអែលឌើរ នោះសូមទៅជួបពួកគេជាមុនសិន ។ ការបម្រើដែលពួកគេមានគឺមានហេតុផលមួយ ! ពួកគេរង់ចាំដើម្បីជួយអ្នក ហើយក៏អនុញ្ញាតឲ្យប៊ីស្សពរបស់អ្នកផ្តោតទៅលើកិច្ចការនានាដែលមានតែគាត់ប៉ុណ្ណោះដែលអាចធ្វើបាន ។
-
សូមទុកឲ្យគាត់ធ្វើជាមនុស្ស ។ ទោះបីជាប៊ីស្សពរបស់អ្នកត្រូវបានបង្កើតឡើងសម្រាប់ការហៅបម្រើរបស់គាត់ក្តី គាត់ពុំល្អឥតខ្ចោះនោះទេ ។ គាត់មានមន្ទិលសង្ស័យលើខ្លួនគាត់ ហើយគាត់ធ្វើខុស ។ ប៉ុន្តែគាត់ពិតជាស្រឡាញ់អ្នក ហើយផ្តល់នូវអ្វីៗទាំងអស់ដែលគាត់មានដល់ការហៅបម្រើរបស់គាត់ ។ សូមបើកដួងចិត្តចំពោះគាត់ ។ ដរាបណាគាត់ស្គាល់អ្នក និងស្ថានភាពរបស់អ្នក នោះគាត់អាចជួយអ្នកបានកាន់តែប្រសើរឡើង ។