បានបង្រៀនដោយ ព្រះវិញ្ញាណបរិសុទ្ធ
យុវវ័យទាំងនេះបានរៀបចំខ្លួន ដើម្បីទទួលការបង្រៀនដោយព្រះវិញ្ញាណពីមុនសន្និសីទទូទៅ ។ នេះគឺជាអ្វីដែលពួកគេបានរៀនពីសន្និសីទមុនៗ និងអ្វីដែលពួកគេកំពុងធ្វើប្លែកខុសពីមុនដោយសារការណ៍នោះ ។
ការណែនាំដ៏បំផុសគំនិត
រូបភាពផ្ដេកបានមកពី Getty Images
សន្និសីទទូទៅបានបំផុសគំនិតដល់ខ្ញុំ ។ អំឡុងពេលស្តាប់ការណែនាំមកពីថ្នាក់ដឹកនាំរបស់យើងឲ្យបម្រើអ្នកដទៃ ទុកចិត្តលើព្រះគ្រីស្ទ និងតោងឲ្យជាប់ដំបងដែក នោះខ្ញុំទទួលអារម្មណ៍ពីព្រះវិញ្ញាណបរិសុទ្ធថ្លែងទីបន្ទាល់មកខ្ញុំថា ដំណឹងល្អនេះពិត ហើយថាយើងអាចទទួលជីវិតអស់កល្បជានិច្ច តាមរយៈការរក្សាបទបញ្ញត្តិ និងការធ្វើតាមព្រះបន្ទូលព្រះ ។ ខ្ញុំបានដាក់គោលដៅធ្វើការបម្រើកាន់តែច្រើននៅក្នុងសហគមន៍របស់ខ្ញុំ ហើយពង្រឹងទីបន្ទាល់របស់ខ្ញុំតាមរយៈការអធិស្ឋាន និងការសិក្សាព្រះគម្ពីរៀងរាល់ថ្ងៃ ។ ខ្ញុំដឹងថា ខ្ញុំជាបុត្រីរបស់ព្រះវរបិតាសួគ៌ ។ ទ្រង់មានព្រះជន្មរស់ ហើយស្រឡាញ់ខ្ញុំជារៀងរហូត និងជានិច្ច ។
ម៉ាដេលីន ប៊ី អាយុ ១៦ ឆ្នាំ ដេឡាវ៉េ ស.រ.អា.
ចម្លើយចំពោះសំណួរ
ពីមុនសន្និសីទទូទៅខ្ញុំមានសំណួរពីរ ៖ ( ១ ) តើខ្ញុំអាចរក្សាឥរិយាបថល្អ ហើយជួយមិត្តភក្តិរបស់ខ្ញុំ នៅពេលពួកគេធ្វើការសម្រេចចិត្តមិនល្អដោយរបៀបណា ? និង ( ២ ) តើខ្ញុំអាចថ្លែងទីបន្ទាល់អំពីសាសនាចក្រដោយគ្មានការសើចចំអកពីពួកគេដោយរបៀបណា ? អំឡុងសន្និសីទ ព្រះវិញ្ញាណបានថ្លែងទីបន្ទាល់ដល់ខ្ញុំថា ខ្ញុំពុំនៅឯកោទេ ។ ឥឡូវនេះ ខ្ញុំដឹងថា តាមរយៈការសិក្សាព្រះគម្ពីរដោយអស់ពីដួងចិត្តខ្ញុំ នោះខ្ញុំនឹងទទួលចម្លើយចំពោះសំណួររបស់ខ្ញុំអំពីមិត្តភក្តិខ្ញុំ ។ ខ្ញុំដឹងថា ព្រះវរបិតាព្រះសណ្តាប់ការអធិស្ឋានរបស់ខ្ញុំ ហើយខ្ញុំនឹងព្យាយាមធ្វើខ្លួនឲ្យប្រសើរឡើងជារៀងរាល់ថ្ងៃ ។
អ៊ីសាក អ័រ អាយុ ១៣ ឆ្នាំ ទីក្រុងពីឈីនឆា ប្រទេសអេក្ខាទ័រ
រៀបចំខ្លួនរៀន
ខ្ញុំទទួលអារម្មណ៍ពីព្រះវិញ្ញាណយ៉ាងខ្លាំងនៅសន្និសីទទូទៅ ។ ដោយសារខ្ញុំបានចាប់ផ្តើមរៀបចំសំណួរ និងការរៀបចំខ្លួនខ្ញុំខាងវិញ្ញាណសម្រាប់សន្និសីទ នោះវាធ្វើឲ្យមានការផ្លាស់ប្តូរដ៏ធំនៅក្នុងជីវិតរបស់ខ្ញុំ ហើយខ្ញុំអាចរៀនកាន់តែច្រើនតាមរយៈសុន្ទរកថានីមួយៗ ។ ខ្ញុំមានអំណរគុណចំពោះព្យាការី និងពួកសាវក ហើយខ្ញុំដឹងថា ព្រះវរបិតាសួគ៌បញ្ជូនពួកលោកឲ្យមកដឹកនាំ និងណែនាំផ្លូវនៅក្នុងជីវិតរបស់ពួកយើង !
បិន អេច អាយុ ១៧ ឆ្នាំ រដ្ឋខេនធើឃី ស.រ.អា.
បានអញ្ជើញឲ្យរីកចម្រើន
សន្និសីទទូទៅបានពង្រឹងខ្ញុំនូវបំណងប្រាថ្នាដើម្បីដើរតាមមាគ៌ានៃដំណឹងល្អរបស់ព្រះយេស៊ូវគ្រីស្ទ ។ វាជួយខ្ញុំឲ្យដឹង និងយល់ថា នេះគឺជាសាសនាចក្រពិតដែលនាំពន្លឺ និងសុភមង្គលដល់យើង ។ ខ្ញុំទទួលអារម្មណ៍ពីព្រះវិញ្ញាណអញ្ជើញខ្ញុំឲ្យរីកចម្រើនរៀងរាល់ថ្ងៃ ហើយអានព្រះគម្ពីរមរមនដើម្បីទទួលបានទីបន្ទាល់រឹងមាំអំពីដំណឹងល្អ ។ ខ្ញុំជឿថា ព្រះវរបិតាសួគ៌សព្វព្រះទ័យឲ្យខ្ញុំស្តាប់សារលិខិតដ៏បំផុសគំនិតទាំងនេះ ។
វិជិនតេ អេ អាយុ ១៦ ឆ្នាំ ទីក្រុង មេត្រូប៉ូលីតាន រីជិន ប្រទេសឈីលី
ស្វែងរកពន្លឺ
នៅឆ្នាំពីមុនឆ្នាំទៅគឺជាឆ្នាំដ៏លំបាកសម្រាប់ខ្ញុំ ។ ឪពុករបស់ខ្ញុំកំពុងឈឺជំងឺមហារីក ហើយមានពួកភាវរករបានវាយប្រហារទីក្រុងរបស់ខ្ញុំ ។ ខ្ញុំមានការលំបាកនឹងការថប់បារម្ភ ដោយឆ្ងល់ថា តើខ្ញុំអាចទទួលអារម្មណ៍សុខសាន្ត នៅពេលខ្ញុំភ័យខ្លាចសម្រាប់សុវត្ថិភាពខាងវិញ្ញាណ និងខាងសាច់ឈាមរបស់ខ្ញុំដោយរបៀបណា ។ ខ្ញុំបានរៀនមកពីសន្និសីទទូទៅថា យើងអាចរកឃើញភាពសុខសាន្ត នៅពេលយើងរស់នៅដោយមានគុណធម៌ បំពេញដួងចិត្តរបស់យើងដោយសេចក្តីជំនឿ ហើយរក្សាទស្សនវិស័យអស់កល្បជានិច្ច ។ ខ្ញុំត្រូវបានបំផុសគំនិតឲ្យងាកទៅរកព្រះគ្រីស្ទនៅក្នុងគ្រាលំបាក ជំនួសឲ្យការពឹងផ្អែកលើការយល់ដឹងរបស់ខ្ញុំផ្ទាល់ ។ ខ្ញុំដឹងថា ខ្ញុំអាចយកឈ្នះលើឥទ្ធិពលនៃភាពខ្មៅងងឹត តាមរយៈការព្យាយាមស្វែងរកភាពភ្លឺនៃពន្លឺព្រះគ្រីស្ទ ។
អូលីវៀ អេច អាយុ ១៧ ឆ្នាំ ប្រទេសប៊ែលសិក