យុវមជ្ឈិមវ័យ
ជំហានទីមួយឆ្ពោះទៅកាន់ ការប្រែចិត្ត
អ្នកនិពន្ធរស់នៅទីក្រុងអូអេសប្រទេសហៃទី ។
ខ្ញុំទទួលអារម្មណ៍ថាភាពងងឹតគ្របដណ្តប់លើជីវិតខ្ញុំ ។ បន្ទាប់មក ខ្ញុំបានដឹងថា ខ្ញុំត្រូវនិយាយជាមួយប៊ីស្សពរបស់ខ្ញុំ ។
រចនារូបភាពដោយ យ៉ូស្វេ ដេននីស
ខ្ញុំចាំពីការកំណត់ថ្ងៃបុណ្យជ្រមុជទឹករបស់ខ្ញុំជាមួយពួកអ្នកផ្សព្វផ្សាយសាសនា ។ ពួកគេបានសួរខ្ញុំថា តើខ្ញុំត្រៀមខ្លួនរួចរាល់ដើម្បីចុះសេចក្តីសញ្ញាជាមួយព្រះវរបិតាសួគ៌ដែរឬទេ ។ ដោយពុំបានគិតអំពីវា និងដោយមានចិត្តពោរពេញដោយអំណរ នោះខ្ញុំបាននិយាយថា « ត្រៀមរួចរាល់ហើយ ! » ខ្ញុំចង់ទទួលអំណាយពិសេសពីព្រះវរបិតាដែលពោរពេញដោយក្តីស្រឡាញ់របស់ខ្ញុំប្រទានដល់ខ្ញុំ ហើយខ្ញុំបានដឹងថា ខ្ញុំនឹងពុំរីករាយឡើយប្រសិនបើគ្មានព្រះអង្គសង្គ្រោះក្នុងជីវិតខ្ញុំនោះ ។ ប៉ុន្តែខ្ញុំមានអារម្មណ៍ពុំប្រាកដប្រជាអំពីអនាគតថានឹងកើតឡើងយ៉ាងណាចំពោះខ្ញុំឡើយ ។
ទីបំផុត ថ្ងៃដ៏ធំនោះបានកើតឡើង ។ ខ្ញុំពុំអាចបំភ្លេចវាបានឡើយ ហើយខ្ញុំពិតជារីករាយណាស់ ។
ថ្ងៃដ៏អាប់អួរ
បន្ទាប់ពីបុណ្យជ្រមុជទឹក និងពិធីបញ្ជាក់របស់ខ្ញុំមក ហាក់ដូចជាមានភាពអាប់អួរកើតឡើងចំពោះខ្ញុំ ។ ខ្ញុំកំពុងដោះស្រាយបញ្ហាជាមួយគ្រួសារខ្ញុំ ហើយខ្ញុំកំពុងពុះពារគោរពតាមក្រឹត្យវិន័យទាំងអស់របស់ព្រះ ។ ខ្ញុំពុំដឹងថាត្រូវធ្វើអ្វីឡើយ ហើយខ្ញុំចង់ចុះចាញ់នូវអ្វីៗគ្រប់យ៉ាង ។ វាហាក់ដូចជាគ្មាននរណាម្នាក់យល់ចិត្តខ្ញុំឡើយ ។
ខ្ញុំចូលចិត្តអានព្រះគម្ពីរមរមនជានិច្ច ប៉ុន្តែអំឡុងគ្រានោះ ខ្ញុំបានទុកវាមួយអន្លើរ ។ ថ្ងៃមួយ ពេលខ្ញុំនៅផ្ទះតែឯង ខ្ញុំមានអារម្មណ៍ដ៏ផ្អែមល្ហែមមកពីការបំផុសគំនិតពីព្រះវិញ្ញាណដល់ខ្ញុំឲ្យអានព្រះគម្ពីរមរមន ។ ខ្ញុំបានអធិស្ឋានជាមុន ដោយចង់ស្វែងរកចម្លើយដែលអាចនាំនូវភាពសុខសាន្តចំពោះការរងទុក្ខរបស់ខ្ញុំ ។ ខ្ញុំបានបើកទៅអាលម៉ាជំពូក ៥ តែម្ដង ។ ខទី ២៧ ចែងថា ៖ « តើអ្នករាល់គ្នាបានដើរ ដោយកាន់ខ្លួនអ្នកថា ជាគ្មានទោសនៅចំពោះព្រះឬ ? តើអ្នករាល់គ្នាអាចនិយាយនៅក្នុងចិត្តអ្នក បើសិនជាអ្នករាល់គ្នាត្រូវបានហៅឲ្យទៅស្លាប់នៅក្នុងពេលនេះថា តើអ្នករាល់គ្នាបានបន្ទាបខ្លួនគ្រប់គ្រាន់ហើយឬនៅ ? តើសម្លៀកបំពាក់របស់អ្នកត្រូវបានជម្រះ ហើយត្រូវបានធ្វើឲ្យស តាមរយៈព្រះលោហិតនៃព្រះគ្រីស្ទ ដែលទ្រង់នឹងយាងមកសង្គ្រោះរាស្ត្ររបស់ទ្រង់ពីអំពើបាបទាំងឡាយរបស់គេហើយឬ ? »
ទីបំផុត ខ្ញុំរំជួលដួងចិត្តនឹងពាក្យទាំងនោះ ។ ខ្ញុំដឹងថា ខ្ញុំត្រូវប្រែចិត្ត ដូច្នេះខ្ញុំបានណាត់ជួបជាមួយប៊ីស្សពរបស់ខ្ញុំ ។ ខ្ញុំមានការភ័យខ្លាចណាស់ ប៉ុន្តែខ្ញុំបានបង្ខំខ្លួនឯងដើម្បីទៅជួបជាមួយគាត់ ។
ការយល់ដឹងអំពីការសន្យារបស់ព្រះ
ពេលខ្ញុំទៅដល់ការិយាល័យរបស់ប៊ីស្សព ខ្ញុំមានអារម្មណ៍ថា មានកំហុសដែលខ្ញុំចង់ចេញទៅវិញដោយពុំបាច់ជួបគាត់ ។ ប៉ុន្តែខ្ញុំបានអធិស្ឋានទូលសូមភាពក្លាហានដើម្បីនិយាយនូវអ្វីដែលខ្ញុំត្រូវនិយាយ ។ ប៊ីស្សពបានស្វាគមន៍ខ្ញុំឲ្យចូលការិយាល័យរបស់គាត់ បន្ទាប់មក គាត់បានអធិស្ឋានដើម្បីទទួលបានជំនួយពីព្រះ ។ គាត់បាននិយាយមកកាន់ខ្ញុំ ដូចខ្ញុំជាកូនរបស់គាត់ ហើយបង្ហាញសេចក្តីស្រឡាញ់របស់គាត់ចំពោះខ្ញុំតាមរយៈពាក្យសម្តីរបស់គាត់ ។ គាត់បានផ្តល់ការទូន្មានដល់ខ្ញុំ ហើយសុំឲ្យខ្ញុំធ្វើនូវរឿងចាំបាច់នានាដើម្បីទទួលបានការអភ័យទោសពីព្រះ ហើយបន្ទាប់មកត្រឡប់មកជួបគាត់ទៀត ។
ខ្ញុំរីករាយយ៉ាងខ្លាំងសម្រាប់ឱកាសនេះ ។ ខ្ញុំបានធ្វើតាមការទូន្មានរបស់គាត់ ហើយទីបំផុតខ្ញុំបានយល់អំពីការសន្យារបស់ព្រះអំពីការអភ័យទោសដល់អាលម៉ា ៖ « បើសិនជាគេទទួលសារភាពនូវអំពើបាបទាំងឡាយរបស់ខ្លួនចំពោះអ្នក និងចំពោះយើង ហើយប្រែចិត្តដោយស្មោះអស់ពីចិត្ត អ្នកនោះហើយដែលអ្នកត្រូវអត់ទោសឲ្យ ហើយយើងក៏នឹងអត់ទោសឲ្យគេដែរ » ( ម៉ូសាយ ២៦:២៩ ) ។ បន្ទាប់ពីការប្រែចិត្តដ៏ស្មោះត្រង់ នោះខ្ញុំបានដឹងថា ព្រះបានអភ័យទោសឲ្យខ្ញុំ ។ ទីបំផុតខ្ញុំអាចទទួលអារម្មណ៍នៃសេចក្តីស្រឡាញ់របស់ព្រះវរបិតាសួគ៌ក្នុងចិត្តរបស់ខ្ញុំ ហើយភាពអាប់អួរនោះត្រូវបានលើកស្ទួយ ។ ខ្ញុំរីករាយ ហើយមានមោទនភាពចំពោះខ្លួនឯង ។
ប៊ីស្សពនៅទីនោះដើម្បីជួយជានិច្ច
ប៊ីស្សពគឺជាអ្នកតំណាងឲ្យព្រះអម្ចាស់សម្រាប់សមាជិកវួដ ។ សូមដឹងថា គាត់នៅទីនោះដើម្បីជួយអ្នកស្វែងរកសុភមង្គលដ៏ពិតដែលព្រះបានត្រៀមទុកសម្រាប់អ្នក ។ សូមទុកចិត្តគាត់ ។ ប្រសិនបើអ្នកមានបញ្ហា ឬត្រូវប្រែចិត្ត សូមទៅជួបគាត់ ។ គាត់នឹងជួយអ្នក ។
ខ្ញុំដឹងថា ជួនកាលវាពុំមែនជារឿងងាយស្រួលដើម្បីទៅជួបគាត់ឡើយ ។ ប៉ុន្តែ ប្រធាន ឡូរែនសូ ស្នូ ( ១៨១៤–១៩០១ ) បានពន្យល់អំពីផែនការអស់កល្បជានិច្ចរបស់ព្រះវរបិតាសួគ៌របស់យើង ៖ « ខ្ញុំហ៊ាននិយាយថានៅក្នុងពិភពវិញ្ញាណ [ ជីវិតមុនឆាកជីវិតនេះ ] នៅពេលយើងត្រូវបានស្នើសុំឲ្យ…ឆ្លងកាត់បទពិសោធន៍ដែលយើងកំពុងទទួលឥឡូវនេះ វាពុំរីករាយ និងទទួលយកបានទាំងអស់នោះទេ ។ … ប៉ុន្តែគ្មានការសង្ស័យឡើយដែលយើងបានឃើញ និងយល់យ៉ាងច្បាស់នៅទីនោះថា នេះជាបទពិសោធន៍ចាំបាច់មួយ ដើម្បីសម្រេចបាននូវភាពតម្កើងឡើង និងសិរីល្អរបស់យើង » ។ លោកបានបន្តថ្លែងទៀតថា « យើងមានឆន្ទៈអនុលោមតាមព្រះទ័យរបស់ព្រះ ហើយនោះជាហេតុដែលយើងនៅទីនេះ » ( Teachings of Presidents of the Church: Lorenzo Snow [ ឆ្នាំ ២០១២ ] ទំព័រ ១១០ ) ។
ការប្រែចិត្តគឺជាផ្នែកនៃការអនុលោមតាមព្រះទ័យរបស់ព្រះ ។ ដូច្នេះជាជាងការភ័យខ្លាចនឹងប៊ីស្សព សូមធ្វើជាមិត្តភក្តិនឹងគាត់វិញ ។ ព្រះបានជ្រើសរើសគាត់ ហើយគាត់អាចជួយអ្នកឲ្យប្រែចិត្ត និងព្យាបាលព្រលឹងអ្នកតាមរយៈការមករកព្រះយេស៊ូវគ្រីស្ទ ។ ព្រះអម្ចាស់សព្វព្រះទ័យជួយយើង ប៉ុន្តែយើងត្រូវតែធ្វើជំហានទីមួយឆ្ពោះទៅកាន់ការប្រែចិត្តសិន ។ តាមរបៀបនេះយើងអាចឃើញឃើញការសន្យានៅក្នុង អេសាយ ១:១៨ ត្រូវបានបំពេញ ៖ « ទោះបើអំពើបាបរបស់អ្នករាល់គ្នាខ្មៅកខ្វក់យ៉ាងណាក្តីក៏វាប្រែសដូចសំឡីវិញដែរ » ។ ដោយហេតុនោះហើយ ប៊ីស្សពនៅទីនោះដើម្បីជួយ ។
ខ្ញុំសូមថ្លែងទីបន្ទាល់ថា ព្រះមានព្រះជន្មរស់ ហើយថាព្រះយេស៊ូវគ្រីស្ទគឺជាព្រះអង្គសង្គ្រោះរបស់យើង ! ពួកទ្រង់ស្រឡាញ់យើងខ្លាំងណាស់ ។