របៀប ៥ យ៉ាងដើម្បីរៀនអំពីសន្និសីទទូទៅ

សន្និសីទទូទៅគឺជាឱកាសមួយដ៏អស្ចារ្យដើម្បី ចូលរួមជាមួយសមាជិកសាសនាចក្រទូទាំងពិភពលោក ដើម្បីស្តាប់ថ្នាក់ដឹកនាំ និងទទួលការណែនាំមកពីព្រះអម្ចាស់ ។ ការទស្សនា ការស្តាប់ និងការសិក្សាសារលិខិតសន្និសីទទូទៅនឹងយាងព្រះវិញ្ញាណមកកាន់ជីវិតអ្នក ហើយជួយអ្នកឲ្យស្ថាបនាសេចក្តីជំនឿអ្នក ។ វាជាឱកាសមួយឲ្យអ្នកទទួលបាន និងអនុវត្តតាមវិវរណៈផ្ទាល់ខ្លួន ។

នេះគឺជារបៀបទាំងប្រាំដែលអ្នកអាចរៀនពីសន្និសីទទូទៅ ។

១. កត់ត្រាសំណួររបស់អ្នកពីមុនសន្និសីទទូទៅចាប់ផ្តើម

សូមចំណាយពេលកត់ត្រាសំណួររបស់អ្នកពីមុនសន្និសីទទូទៅចាប់ផ្តើម បន្ទាប់មកយកចិត្តទុកដាក់ចំពោះចម្លើយដែលកើតមានចំពោះអ្នកអំឡុងពេលសន្និសីទ ។ ការអធិស្ឋាន និងសំណួររបស់អ្នកអាចត្រូវបានឆ្លើយតប នៅពេលអ្នកចូលរួម ហើយស្តាប់តាមព្រះវិញ្ញាណ ។

២. ព្យាយាមរៀនអំពីព្រះគ្រីស្ទ

ពួកព្យាការីថ្លែងទីបន្ទាល់ និងបង្រៀនអំពីព្រះអង្គសង្គ្រោះ ( សូមមើល កិច្ចការ ១០:៤៣ ) ។ នៅពេលអ្នកស្តាប់សារលិខិតសន្និសីទ អ្នកអាចគិតអំពីអ្វីដែលអ្នកនិយាយកំពុងបង្រៀនអ្នកអំពីព្រះយេស៊ូវគ្រីស្ទ ។ អ្នកអាចធ្វើបញ្ជីមួយនៅក្នុងសៀវភៅកំណត់ចំណាំរបស់អ្នក ។

៣. រកមើលបាវចនា

បន្ទាប់ពីទស្សនាសន្និសីទទូទៅមួយចំនួនមក អ្នកអាចកត់សម្គាល់ថា អ្នកបានស្តាប់ឮប្រធានបទ ឬបាវចនាដែលលើកឡើងច្រើនជាងម្តង ។ គំរូដែលអ្នកកត់សម្គាល់អាចជារបៀបមួយដែលព្រះវិញ្ញាណជួយអ្នកទទួលស្គាល់អ្វីដែលអ្នកត្រូវរៀន ។

៤. កត់ត្រាទុកអំពីព្រះគម្ពីរមរមន

អ្នកអាចរៀនច្រើនតាមរយៈការផ្តោតចិត្តទុកដាក់ដល់ខគម្ពីរដែលថ្នាក់ដឹកនាំលើកឡើង ជាពិសេសព្រះគម្ពីរមរមន ដែលជា « មូលដ្ឋាននៃសាសនារបស់យើង » ( សូមមើលបុព្វកថាព្រះគម្ពីរមរមន ) ។ មើលថា តើអ្នកអាចតាមដានគ្រប់ពេលដែលពួកគាត់ថ្លែងអំពីវានៅក្នុងសន្និសីទទូទៅដែរឬទេ ។ អ្នកនឹងភ្ញាក់ផ្អើលចំពោះអ្វីដែលអ្នករកឃើញ !

៥. ត្រូវជំរុញចិត្ត និងបំផុសគំនិតឲ្យអនុវត្ត

សូមកត់សារលិខិត និងការដកស្រង់ដែលបំផុសគំនិតអ្នក ឬអញ្ជើញអ្នកឲ្យអនុវត្ត ។ ការណ៍នេះអាចជួយអ្នកឲ្យអនុវត្តអ្វីដែលអ្នករៀន—ហើយជួយអ្នកឲ្យចាំអ្វីដែលជាគំនិតរបស់អ្នក នៅពេលអ្នកត្រូវការការរំឭកលើកក្រោយ !