ស៊ុត ហ្វ៊ុយហ្សីប និងសេចក្តីជំនឿ
អាលវ៉ារូ អាលសៀណូ ទីក្រុងអានតូហ្វាហ្គាស្តា ប្រទេស ឈីលី
រចនារូបភាពដោយ ខារ៉ូលីន វីបប៊ើត
គោលដៅមួយរបស់យើងជាគ្រួសារគឺសន្សំប្រាក់គ្រាប់គ្រាន់ដើម្បីបង់ប្រាក់កក់យកផ្ទះផ្ទាល់ខ្លួនរបស់យើង ។ ប្រសិនបើគ្មានគោលដៅនេះទេ ខ្ញុំប្រហែលជាចំណាយពេលឥតប្រយោជន៍នៅចុងសប្តាហ៍មើលទូរទស្សន៍ ដោយទន្ទឹងចាំមើលឱកាសហិរញ្ញវត្ថុកើតមានចំពោះខ្ញុំ ។
ក្នុងនាមជាអ្នកបើកបរឲ្យក្រុមហ៊ុនជីករ៉ែមួយនៅក្នុងប្រទេសឈីលីភាគខាងជើង ខ្ញុំធ្វើការនៅឆ្ងាយពីផ្ទះរយៈពេលបួនថ្ងៃនៅឯអណ្តូងរ៉ែ ហើយបន្ទាប់មកមានថ្ងៃឈប់សម្រាកបីថ្ងៃ — ថ្ងៃសៅរ៍រហូតដល់ថ្ងៃចន្ទ ។ ដើម្បីបន្ថែមប្រាក់ចំណូល និងប្រាក់សន្សំដើម្បីទិញផ្ទះ យើងបានសម្រេចចិត្តចាប់ផ្តើមលក់ស៊ុត ។ គម្រោងរបស់យើងគឺលក់ស៊ុតឲ្យមិត្តភក្តិ អ្នកជិតខាង និងសមាជិកសាសនាចក្ររបស់យើង ដោយយើងទិញស៊ុតប្រហែលជា ១០០០ ស៊ុតរៀងរាល់សប្តាហ៍មកពីអ្នកលក់ដុំម្នាក់ បន្ទាប់មកទៅដឹកវា ហើយចែកចាយស៊ុតនោះនៅថ្ងៃសៅរ៍ និងថ្ងៃចន្ទ ។
ឡរ៉ាភរិយារបស់ខ្ញុំ និងខ្ញុំបានសម្រេចចិត្តថា យើងនឹងយកកូនពីរនាក់របស់យើងទៅជាមួយយើងពេលចែកចាយ ហើយមានពេលរីករាយជាមួយគ្នា ។ ប៉ុន្តែនៅពេលយើងនៅតាមផ្លូវទៅទិញស៊ុតជាលើកដំបូងរបស់យើង ឡានយើងបានខូច ។ ដោយលេងជាមួយប្រដាប់ខួងខ្មៅដៃដែកដ៏តូចមួយ នោះកូនម្នាក់របស់យើងបានបោះប្រដាប់ខួងនោះ ហើយវាបានធ្លាក់ចំត្រង់កន្លែងដាក់ដែកកេះជក់បារីទទេ ។ ផ្កាភ្លើងបានខ្ទាតឡើងមក ហើយឡានរបស់យើងបានដាច់ភ្លើងទាំងអស់ ធ្វើឲ្យឡានឈប់ងក់ភ្លាមនៅចំកណ្តាលទ្រូងផ្លូវធំមួយ ។ ឡានយើងបានដាច់ហ្វ៊ុយហ្សីប ។
នៅពេលយើងអង្គុយនៅទីនោះដោយធ្វើឲ្យកកស្ទះចររាចរណ៍ ហើយមិនដឹងជាធ្វើដូចម្តេច នោះយើងមានភាពស្មុគស្មាញជាខ្លាំងដែលធ្វើឲ្យយើងមានអារម្មណ៍ចង់យំ ។ ប៉ុន្តែនៅគ្រានោះ ខ្ញុំបានចាំថា ព្រះអម្ចាស់បានសន្យាថា លើកយើងឡើង និងជួយយើង ប្រសិនបើយើងដាក់ទីទុកចិត្តរបស់យើងលើទ្រង់ ។ ភាពស្ងប់សុខបានកើតមានមកលើខ្ញុំ ។ ខ្ញុំបានដឹងថា ខ្ញុំពុំអាចគ្រាន់តែអង្គុយនៅទីនោះ ហើយរអ៊ូរទាំឡើយ ។ យើងមានបញ្ហា ហើយដោយមានជំនួយពីព្រះ នោះយើងអាចដោះស្រាយវាបាន ។
ឡរ៉ា និងខ្ញុំបានបែរមើលមុខគ្នា ហើយនិយាយថា « យើងត្រូវតែបង្ហាញសេចក្តីជំនឿ » ។ យើងបានអធិស្ឋាន ហើយជូតទឹកភ្នែករបស់ពួកយើង ។ បន្ទាប់មក ខ្ញុំចេញទៅក្រៅដើម្បីរុញឡាន ហើយឡរ៉ាកាច់ចង្កូត ។ មនុស្សមួយចំនួនចេញមកពីឡានរបស់ពួកគេហើយជួយរុញឡានខ្ញុំ ។
យើងបានរុញឡានប្រហែលជា ២០០ ម៉ែត្រ ពីមុនយើងអាចរកឃើញកន្លែងសុវត្ថិភាពមួយចេញពីផ្លូវធំនោះដើម្បីចត ។ នៅពេលឡានបានរំកិលទៅកន្លែងឈប់មួយ ខ្ញុំឃើញថា យើងបានចតឡាននៅផ្នែកខាងស្តាំនៅពីមុខហាងឡានស្ទេរ៉េអូ ។
ខ្ញុំបានរកទីតាំងហ្វ៊ុយហ្សីបដែលខូចនោះ ហើយដើរទៅក្នុងហាងរួចសួរថា « តើអ្នកមានលក់អានេះទេ ? »
អ្នកលក់បានតបថា « មាន » ។
ខ្ញុំបានទិញហ្វ៊ុយហ្សីបមួយ ហើយដាក់វានៅកន្លែងវាវិញ ឡានបានឆេះឡើងវិញ ហើយយើងបានចេញដំណើរទៅមុខទៀត ។ អ្នកលក់ស៊ុតនោះនៅជិតកន្លែងដែលយើងទើបតែបើកឡានចេញទៅនោះ ។ យើងបានទិញស៊ុត ហើយដឹកយកទៅឲ្យគេ ។
ពេលយើងមានឧបសគ្គ យើងត្រូវតែចងចាំទូលសូមជំនួយពីព្រះវរបិតាសួគ៌របស់យើង ។ ខ្ញុំដឹងថា ទ្រង់នឹងឆ្លើយតបយើង នៅពេលយើងបន្តឆ្ពោះទៅមុខ ហើយបង្ហាញសេចក្តីជំនឿរបស់យើងលើទ្រង់ ។