លុះត្រាជួបទៀត
ការទ្រទ្រង់គាំទ្ររបស់យើង
ដកស្រង់ចេញពីសុន្ទរកថានៅក្នុងសន្និសីទទូទៅ ខែ តុលា ឆ្នាំ ២០០៥ ។
សេចក្តីណែនាំខាងវិញ្ញាណក្នុងទំហំដ៏ធំមួយអាស្រ័យទៅលើភាពត្រូវគ្នាជាមួយនឹង … ពួកព្យាការី អ្នកមើលឆុត និងអ្នកទទួលវិវរណៈ ។
ខ្ញុំមានបំណងនិយាយអំពីតំណែងដ៏ពិសិដ្ឋនៃថ្នាក់ដឹកនាំបព្វជិតភាពទាំងនោះដែលត្រូវបាន « ហៅ ហើយរើស » ( គ. និង ស. ៥៥:១ ) ដើម្បីដឹកនាំសាសនាចក្រនៅជំនាន់នេះ ។ …
… បងប្អូនរបស់ខ្ញុំ [ នៅក្នុងកូរ៉ុមនៃពួកសាវកដប់ពីរនាក់ ] ដោយគ្មានការដោះសាអ្វីឡើយ គឺជាបុរសល្អ គួរឲ្យគោរព និងគួរឲ្យទុកចិត្ត ។ ខ្ញុំស្គាល់ចិត្តរបស់ពួកលោក ។ ពួកលោកគឺជាអ្នកបម្រើរបស់ព្រះអម្ចាស់ ។ បំណងប្រាថ្នាតែមួយគត់របស់ពួកលោកគឺធ្វើការក្នុងការហៅបម្រើដ៏អស្ចារ្យរបស់ពួកលោក និងស្ថាបនានគរព្រះនៅលើផែនដី ។ បងប្អូនប្រុសរបស់យើងដែលកំពុងបម្រើនៅជំនាន់នេះ និងពេលនេះគឺជាភស្តុតាង ត្រូវបានសាកល្បង និងពិតស្មោះត្រង់ ។ … ដួងចិត្តរបស់ពួកលោកបរិសុទ្ធ បទពិសោធន៍របស់ពួកលោកគឺអស្ចារ្យ គំនិតពួកលោកក៏មោះមុត ហើយប្រាជ្ញាខាងវិញ្ញាណរបស់ពួកលោកក៏ជ្រៅជ្រះ ដែលវាគឺជាការលួងលោមមួយដែលនៅក្នុងវត្តមានរបស់ពួកលោក ។
… [ ពេលខ្ញុំត្រូវបានហៅ ខ្ញុំត្រូវបានទូន្មាន ] ថា រឿងដ៏សំខាន់បំផុតដែលខ្ញុំត្រូវធ្វើនោះគឺ ត្រូវនៅឲ្យចុះសម្រុងជាមួយពួកបងប្អូនប្រុសរបស់ខ្ញុំ ។ … នោះជាអ្វីដែលខ្ញុំចង់ធ្វើដោយអស់ពីដួងចិត្តរបស់ខ្ញុំ ។
… ខ្ញុំអាចនិយាយបានថា សេចក្តីណែនាំខាងវិញ្ញាណក្នុងទំហំដ៏ធំមួយអាស្រ័យទៅលើភាពត្រូវគ្នាជាមួយនឹងប្រធានសាសនាចក្រ គណៈប្រធានទីមួយ និងកូរ៉ុមនៃពួកសាវកដប់ពីរនាក់ — ជាអស់អ្នកដែលត្រូវបានគាំទ្រថា … ជាពួកព្យាការី អ្នកមើលឆុត និងអ្នកទទួលវិវរណៈ ។ ខ្ញុំពុំដឹងអំពីរបៀបដែលយើងអាចសង្ឃឹមថា បានចុះសម្រុងពេញលេញជាមួយនឹងព្រះវិញ្ញាណនៃព្រះអម្ចាស់ឡើយ ប្រសិនបើយើងពុំចុះសម្រុងជាមួយនឹងប្រធានសាសនាចក្រ និងពួកព្យាការី អ្នកមើលឆុត និងអ្នកទទួលវិវរណៈផ្សេងទៀតនោះ ។ …
ការទូន្មានរបស់ខ្ញុំចំពោះសមាជិកសាសនាចក្រគឺឲ្យគាំទ្រដល់ប្រធានសាសនាចក្រ គណៈប្រធានទីមួយ កូរ៉ុមនៃពួកសាវកដប់ពីរនាក់ និងពួកអ្នកមានសិទ្ធិអំណាចទូទៅដទៃទៀតជាមួយនឹងដួងចិត្ត និងព្រលឹងរបស់ពួកគេទាំងមូល ។ ប្រសិនបើយើងធ្វើដូច្នេះ នោះយើងនឹងនៅក្នុងកំពង់ផែដ៏សុវត្ថិភាពមួយ ។
យើងក៏ចាំបាច់ត្រូវគាំទ្រ ហើយជួយដល់ថ្នាក់ដឹកនាំ ក្នុងមូលដ្ឋានរបស់យើង ដោយសារពួកគាត់ « ត្រូវបានហៅ និងជ្រើសរើស » ។ សមាជិកគ្រប់រូបនៃសាសនាចក្រនេះ អាចទទួលបានការប្រឹក្សាមកពីប៊ីស្សព ឬប្រធានសាខា ប្រធានស្ដេក ឬប្រធានបេសកកម្ម និងប្រធានសាសនាចក្រ ព្រមទាំងសហការីរបស់លោក ។ បងប្អូនប្រុសទាំងនេះ ពុំមាននរណាម្នាក់សុំការហៅរបស់គាត់នេះទេ ។ គ្មាននរណាម្នាក់ល្អឥតខ្ចោះនោះទេ ។ ប៉ុន្ដែពួកលោកគឺជាអ្នកបម្រើរបស់ព្រះអម្ចាស់ បានហៅដោយទ្រង់តាមរយៈអ្នកទាំងឡាយដែលមានសិទ្ធិទទួលការបំផុសគំនិត ។ អ្នកទាំងឡាយដែលត្រូវបានហៅ គាំទ្រ និងញែកចេញគឺមានសិទ្ធិទទួលបានការទ្រទ្រង់គាំទ្ររបស់យើង ។