Savali a Taitai o le Eria
Faamalolosia o o Tatou Aiga i Aso e Gata Ai
I le saunoaga amata a Peresitene Russell M. Nelson i le Konafesi Aoao ia Oketopa 2018 sa ia faapea ai:
“O le faamoemoega lava o le Ekalesia ua leva ona i ai o le fesoasoani lea i tagata uma ia faateleina lo latou faatuatua i lo tatou Alii o Iesu Keriso ma i Lana Togiola, ina ia fesoasoani ai ia i latou i le osia ma le tausia o a latou feagaiga ma le Atua, ma ia faamalosia ai ma faamauina o latou aiga. I lenei lalolagi faigata i nei aso, ua le faigofie ai lenei mea. Ua faateteleina e le fili ana osofaiga i le faatuatua ma o tatou luga ma o tatou aiga i se saoasaoa matua uigaese. Ina ia sao mai ai faaleagaga, tatou te manaomiaina ni fuafuaga e faatoilalo ai le fili ma ni fuafuaga mamao. Ona o lenei mea, ua matou mananao ai nei ia faatulaga ni fetuunaiga faalefaalapotopotoga ia o le a faamalosia atili ai o tatou tagata ma o latou aiga”.1
A o ou mafaufau loloto i lenei malelega faaperofeta ofoofogia, faatasi ai ma le tele o manatu na ou mauaina, “e faape’i foliga o le faamalosia atili o o tatou tagata ma o latou aiga?”
I le Alema 50:1–4, ua faamalamalama mai ai e Kapeteni Moronae le auala na ia fausia ai olo e puipuia ai lona nuu mai le nofopologa faaletino. Faamolemole ia gauai patino atu i maufaasino e pei o le, “eli i luga faupuega eleele, laau tetele, pa laau maamaai ma olo”.
I le agaga o le fautuaga a Nifae ia, “faatatauina tusitusiga paia uma ia te i matou, ina ia avea ma o matou manuia ma aoaoga”.2 Ou te talitonu o puipuiga ma auala a Kapeteni Moronae ia aloese mai le nofopologa faaletino i le 72 T.L.M. ua malamalama i ai a o tatou tagai e faamalosia o tatou lava aiga ma auaiga i nei aso e gata ai.
E pei o Kapeteni Moronae, o le sa le taofia le faia o sauniuniga e puipuia ai lona nuu mai o latou fili (sa Amalekia), e faapena foi Peresitene Nelson i o tatou aso o loo faaauau pea ona saili atu i faaaliga mai le Alii e puipuia ai i tatou mai lo tatou fili (o Satani). O le eliina o “faupuega eleele” e puipuia ai le aai o se galuega faaletino. E mafai ona e vaai faalemafaufau i le tele o itula o galuega mamafatu faaletino semanu e galulue ai le nuu o Moronae e fai ai mea sa latou faia. Sa faia uma e aunoa ma le fesoasoani a masini eli palapala faaonapo nei ia ua tatou mauaina i nei aso. O ‘faupuega eleele’ ia e manaomia ona tatou eliina ina ia mafai ai ona faamalosia o tatou aiga i aso nei e manaomia ai se galuega faaleagaga. O le a manaomia ai le faatuatua ma galuega, lotomaualalo, usiusitai, alofa, lotogatasi, filiga, tuuto atu, tatalo ma le alofa mama e ta’ua na o ni nai uiga paia FaaKeriso.
Ou te fiafia i le tala faatusa e mafai ona tatou utuvai mai ai i le puipuiga sa faatuina e Kapeteni Moronae mo lona nuu e tausia ai i latou mai le pa’u’u atu i le nofopologa faaletino. E ono mafaufauina e se tasi le fausiaina o se fausaga e faamatalaina; o le faavae e manaomia ina ia “mautu”. E tatau foi ia i tatou ona i ai se faavae mautu ina ia mafai ai ona faamalosia o tatou aiga ma auaiga ma tausia i tatou ia saogalemu mai le nofopologa faaleagaga. Sa faamanatu mai e Nifae ma Liae ia i tatou foliga e tatau ona foliga ai lo tatou faavae ina ua la toe ta’u maia ia i tatou upu a lo la tama o Helamana, “Ma o lenei, ou atalii e, ia manatua, ia manatua o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae. …”3
A mautu loa lo tatou faavae (ua atinae i luga o Keriso, le Alo o le Atua) ua mafai loa ona fausia ma le talitonuga maumaututu lo tatou puipuiga. O a mea o fai ma faatusa o “laau tetele”, “pa laau maamaai” ma olo i le puipuiga a Kapeteni Moronae i nei aso e gata ai? I se isi faaaogaaga o le faatatauga o tusitusiga paia ia i tatou lava:
Laau Tetele: e mafai ona faatusa i a tatou uarota ma siteki. Tatou te faitau, “Aua e ao ina fateleina Siona i le matagofie ma i le paia; o ona tuaoi e ao ina faalauteleina; o ona siteki e ao ina faamalolosia; ioe, e moni Ou te fai atu ia te outou, e ao ina tulai Siona ma ofu i ona ofu matagofie”.4 Ua faamanuiaina i tatou i le i ai o se “malutaga mai le afa” ma se nofoaga e fesoasoani ai i le puipuiga o o tatou aiga.
Ua saunoa mai Peresitene Nelson, “I le avea ai ma tagata o le Au Paia o Aso e Gata Ai, ua tatou masani lava i le manatu o le ‘lotu’ o se mea e tupu i totonu o o tatou falesa, ma e lagolagoina e mea o loo tutupu i le aiga. Ua tatou manaomia se fetuunaiga i lenei mamanu. O le taimi lenei mo se Ekalesia e-faatotonugalemu-i-le-aiga, ma lagolagoina e mea o loo tutupu i totonu o o tatou fale o paranesi, uarota, ma siteki”.5
Pa Laau Maamaai: e mafai ona faatusa i o tatou aiga. O le Mataupu Faavae ma Feagaiga ua uunaia ai i tatou ia “Faatulaga tatau outou lava; ia saunia mea manaomia uma; ma faatu se fale, o se fale tatalo lea, o se fale o le anapogi, o se fale o le faatuatua, o se fale o le aoaoga, o se fale o le mamalu, o se fale maopoopo, o se fale o le Atua”.6 E faape’i foliga o o tatou fale?
O Olo o loo Vaavaaia o tatou Siteki ma Aiga: O nei olo e mafai ona faatusa i malumalu a lo tatou Atua. Afai e ao ona tatou sosola ese mai tu’iga a Satani ma ana ‘au (aloese mai le nofopologa faaleagaga) e manaomia ona avea le malumalu ma o tatou olo i le puipuiga o loo tatou tauivi ia faatu. Sa saunoa ai Peresitene Nelson i le auala lenei, “O le manaomia ona tatou i ai soo i le malumalu e le aunoa ua matuā sili ona manaomia i le taimi nei. Ou te aioi atu ia te outou ia tagai ma le agaga tatalo pe faapefea ona faaalu lou taimi. Ia saofagā lou taimi i lou lumanai ma i lou aiga. Afai e te latalata i se malumalu, ou te uunaia oe ia saili se auala e fai ai sou taimi faatulagaina ma le Alii—ia i ai i totonu o Lona maota paia—ona tausia lea o lena taimi faatulagaina ma le sa’olele atoatoa ma le olioli. Ou te folafola atu ia te outou o le a aumai e le Alii ni vavega ua Ia silafia tou te manaomiaina a o outou faia ni osigataulaga e auauna atu ma tapuai atu i totonu o Ona malumalu”.7
Tau ina ia faamanuia i tatou e le Alii a o tatou tauivi e faamalosia o tatou aiga i nei aso e gata ai.