Jerbal in Karejar
Jen laleļo̧k im kea āinwōt an nej kar Rilo̧mo̧o̧r kōm̧m̧ane, eļaptata n̄an ro rej jeram̧m̧an jān iakwe im kūr n̄an jerbal in karejar n̄an er.
Ro jeiū im jatū, ro mōttam rejitōn bōro, kom̧ij ruwainene n̄an kweilo̧k in eļap!
Ālkin kar kweilo̧k eo eļap ilo Oktoba eo ļo̧k, kom̧ro Sister Gong ekar etetal ilowaan Conference Center eo n̄an ba iakwe im n̄an ron̄jake en̄jake ko ami ilo gospel in.
Membōr ro jān México rekar ba, “Hoy es el tiempo de Mexico.”
Kōm ekar ekkatak bwe Gilly im Mary rej m̧ōttā jān England. Ke Mary ekar kobatok ilo Kabun̄ in, ekar jako jikin jokwe eo an. Gilly ekar karuwaineneik Mary ilo jouj n̄an jokwe ippān. Obrak kōn tōmak, Gilly ej ba, “Ejjeļo̧k aō pere ke Irooj ej ped ippa.” Ilo kweilo̧k eo eļap, Gilly ekar ioon juon iien elan̄lōn̄ ke ekar bar ioon sister mijinede eo ekar katakini 47 iiō ko remootļo̧k.
Jeff im kōrā eo pāleen, Melissa, rekar ped ilo kweilo̧k eo eļap im ej kab jinountata in n̄an em̧m̧aan in. Jeff ekar juon ritijem̧ļo̧k in rikkure ākiiu (ekar juon ribo̧bo) im kiiō ej juon physician anesthesiologist. Ekar ba n̄an eō, “Eļap n̄an aō bwilōn̄, ij wōnm̧aanļo̧k n̄an peptaij kōnke ij en̄jake ke ej wāween eo ejim̧we im m̧ool n̄an mour.”
Moktaļo̧k, Melissa ekar jeorļo̧k an bōd ippān brother eo ej jerbal in karejar n̄an Jeff, “Jeff ejjab kōņaan ‘jōōt mouj’ ilo m̧wiin m̧ōm.” Brother in jerbal in karejar eo ekar ba, “Inaaj pukot juon iaļ.” Kiiō e im Jeff rej m̧ōttāik doon. Ilo iien peptaij eo an Jeff, ikar ioon juon kumi in Armej ro Rekwojarjar ilo Raan Kein Āliktata, ro Jeff im Melissa im leddik eo nejier, Charlotte, reiakwe.
Āinwōt rikaļoor ro an Jisōs Kraist, jej kappukot n̄an jerbal in karejar n̄an ro jet ilo An kar kōnke mour ko rej kōttar n̄an aer oktak.
Ke Peggy ekar ba n̄an eō ke ļāeo pāleen, John ālkin 31 iiō in m̧arre, ekar pojak in peptaij, ikar kajjitōk ta eo ekar kōm̧m̧an oktak.
Peggy ekar ba, “Kom̧ro John ekar ekkatak jān Kallim̧ūr Ekāāl Itok Ļoor Eō, im John ekar kajjitōk kōn katak ko an Kabun̄ in.”
Peggy ekar ba, “Jen kūrtok mijinede ro.”
John ekar ba, “Ejjeļo̧k mijinede—m̧ae eo m̧ōtta emaron̄ itok.” Eļā jān 10 iiō ko, brother in jerbal in karejar eo an John ekar erom̧ juon m̧ōttan eo ej lōke. (Ikar ļōmņak, Ta eo n̄e brother in jerbal in karejar eo an John enkar bōjrak an itok ālkin juon, ruo, ak ratimjuon iiō?)
John ekar ron̄jake. Ekar riiti Bok in Mormon kōn bōro em̧ool. Ke mijinede ro rekar karuwaineneik John n̄an peptaij, ekar ba aaet. Peggy ekar ba, “ikar wotlo̧k jān jeia eo aō im jino jan̄.”
John , “Ikar woktak ilo aō kar epaakeļo̧k Irooj.” Tokālik, John im Peggy rekar liāp ilo tampeļ eo ekwojarjar. Tijem̧ba eo ļo̧k, John ekar mej ilo 92 iiō drettan. Peggy ej ba, “John ekar baj wōt juon armej em̧m̧an, bōtaab ekar oktak ilo juon wāween aiboojoj ālkin an kar peptaij.”
Kom̧ro sister Gong ekar ioon Meb im Jenny ilo video ilo iien ajeeded in COVID eo. (Kōm ekar ioon elōn̄ ripālele im kajjojo armej ro eļap aer em̧m̧an ilo video ilo iien COVID eo, kajjojo kar jar kake er im kwaļo̧k kajjier jān stake būreejtōn eo aer.)
Meb im Jenny rekar ettā ilo aer ba bwe inepata ko ilo mour ko aer rekar kōm̧m̧an menin aer kōļmenļo̧kijeņ eļan̄n̄e m̧arre in tampeļ eo aer maron̄ kejparoke im, eļan̄n̄e aaet, ekōjkan. Rekar tōmak Pinmuur eo an Jisōs Kraist im bujen kallim̧ur ko aer remaron̄ jipan̄ er.
Pijaikļo̧k aō lan̄lōn̄ ke Meb im Jenny rekar bōk pepa in mālim n̄an deļo̧n̄e tampeļ ko rekāāl im bar jepļaak ippān doon n̄an m̧weo im̧ōn Irooj. Tokālik Meb ebaj wōt mej. Ej juon kōjeram̧m̧an Meb im Jenny rekar kōjepļaak bujen jemjerā ko aer ippān Irooj im ippān doon im en̄jake iakwe in jerbal in karejar eo an elōn̄ ipeļaakier.
Aolep jikin ij etal, ij kam̧m̧oolol n̄an ekkatak jān ro rej jerbal in karejar im kea āinwōt an nej kar Rilo̧mo̧o̧r eo ad kōm̧m̧ane.
Ilo Peru, kom̧ro Sister Gong ekar ioon Salvador im ro jein im jatin.1 Salvador im ro jein im jatin rekar riatajinemjen. Ekar raan in ļotak eo an Salvador. Ritōl ro an Kabun̄ in im membōr ro rekar tiljek ilo aer jerbal in karejar n̄an baam̧le in ekar im̧we eō. “Kabun̄ erreo im jab ettoon … ej menin, N̄an loļo̧k ro atajinemjen im kōrā e jako pālier,”2 “rie ro reban, kotak lōn̄ļo̧k pā ko rej allitoto, … kōkajoor bukwe ko rem̧ōjņo̧.”3
Ilo Hong Kong, juon būreejtōn an doulul eo an em̧m̧aan ro ekar karbōb an kwaļo̧k wāween an doulul eo aer kōmakijkij aer kōm̧m̧ane 100-percent in intōrpiu in jerbal in karejar ko. “Kōmij karōke kōn jar kampānien ko bwe aolep ren maron̄ kea kake juon im ren kea kōn er,” ej ba. “Emakijkij am kajjitōk ippān kajjojo kampānien ro kōn ro rej jerbal in karejar n̄an er. Jejjab kadedeļo̧k laajrak ko; jej jerbal in karejar n̄an ro rej jerbal in karejar im rej kea kōn armej ro ad.”
Ilo Kinshasa, Democratic Republic of the Gongo, Būreejtōn Bokolo ej kwaļo̧k wāween an e im baam̧le eo an kar kobatok ilo Kabun̄ in ilo France. Juon raan, ilo an kar riiti kōjeram̧m̧an in petriak eo an, Jetōb ekar im̧we Brother Bokolo n̄an jepļaak ippānļo̧k baam̧le eo an n̄an DR Congo. Brother Bokolo ekar jeļā ke renaaj kar jelm̧aik elōn̄ apan̄ ko eļan̄n̄e renaaj ro̧o̧l. Im kabun̄ eo aer, Kabun̄ eo an Jisōs Kraist im Armej ro Rekwojarjar ilo Raan ko Āliktata, ejjan̄in kar de jutak ilo Kinshasa.
Ak, ilo m̧ool, āinwōt an ro rellōn̄ kar, Bokolo ro rekar ļoor Jetōb an Irooj. Ilo Kinshasa, rekar jerbal in karejar n̄an im kōjeram̧m̧an ro ipeļaakier, anjo̧ jān apan̄ ko, bōk kōjeram̧m̧an ko ilo jetōb im kanniek. Rainin, rej lan̄lōn̄ ilo an wōr juon m̧weo im̧ōn Irooj ilo laļ eo aer.4
Juon membōr ekāāl kar jerbal in karejar n̄ane jān waanjon̄ak ko an juon armej make. Āinwōt juon likao, ekar ba ekar joļo̧k raan ko an ilo parijet in lo̧jet. Juon raan, ekar ba, “ikar loe juon leddik deo ej kōņak juon nuknuk in tutu ekarbōb.” Bwilōn̄, ekar etal im kajjitōk etke juon leddik eddeo emaron̄ ekōņņak nuknuk in tutu karbōb. Ekar juon membōr in Kabun̄ eo an Jisōs Kraist im Armej ro Rekwōjarjar ilo Raan ko Āliktata im ekar kajjitōk kōn mejen ettōn̄dikdik, “Kokņaan ke itok im jar Jabōt?” Ekar ba aaet.
Iiō ko ļo̧k, ilo am̧ kar ippān doon ilo juon kūr, Elder L. Tom Perry ekar kwaļo̧k wāween an kar e im kampānien eo an emakijkij aer kar jerbal in karejar n̄an juon sister eo ekar jokwe ippān make ilo juon jukjuk in ped ejjab em̧m̧an ilo Boston. Ke Elder Perry im kampānien eo an rekar tōprakļo̧k sister eo, ekar kōkm̧anm̧an ilo an kipel er n̄an, “Karūm̧ļo̧ktok pepa in mālim n̄an deļo̧n̄e tampeļ ko ami ium̧win kōjem eo.” Ilo wōt ālkin an loe pepa in mālim n̄an deļo̧n̄e tampeļ ko ej kōpeļļo̧k lock ko wōj im kōpeļļo̧k kōjem eo.5 Em̧ool, ijjab ba kampānien in jerbal in karejar ro rej aikuj pepa in mālim n̄an dreļo̧n̄e tampel ko. Ak ij iakwe ļōmņak eo ilo an ro kautiej bujen ko jerbal in karejar, m̧oko im bōro ko rej peļļo̧k.
Elder Perry ekar barāinwōt letok naan in kapilōk ko. Ekar ba, “Leļo̧k nōm̧ba in jerbal ko rekkar n̄an kampānien ko, jar im kālet, karōke jikin ko reipaake doon ijo awa in em̧akūtkūt ko rej jejjōt kōjerbali.” Ekōn kapilōk, “Ijjinoe ippān ro eļap aer aikuji iien loļo̧k ko. Ekkal jān men kein remaron̄ kanoojin kwaļo̧k karuwainene im em̧m̧an aer uaak n̄an iien loļo̧k ko.” Ekar kajjem̧ļo̧k, “Tiljek emakijkij ej boktok kabwilōn̄lōn̄ ko.”
Jerbal in karejar eutiejļo̧k im ekwojarjarļo̧k6 ej itok n̄e jej jar kōn “iakwe eo erreo an Kraist”7 im ļoor Jetōb. Ej barāinwōt ilo an doulul ko an em̧m̧aan ro im būreejtōnji ko an Doulul eo an Kōrā ro, ium̧win tōl an bisop eo, laleļo̧k kijejeto ko in jerbal in karejar, ekoba karōki kampānien ko an jerbal in karejar. Jouj im leļo̧k n̄an likao im jiron̄ ro nejid iien eo em̧m̧an aikuji n̄an m̧ōttāikier im katakin er jān brother im sister ro retijem̧ļo̧k. Im jouj im kōtļo̧k an epepen in edik ej wallōn̄tak im̧we brother im sister kampānien ko an jerbal in karejar.
Ilo jet jikin ko ilo Kabun̄ in, ewōr juon ad peļļo̧k in kōta ilo jerbal in karejar. Elōn̄ļo̧k ro rej ba rej kōm̧m̧ani jerbal in karejar ko jān ro rej ba rej jerbal in karejar n̄an er. Jejjab kōņaan laajrak ko jej kadedeļo̧ki. Bōtaab ekkā ad aikuji eļapļo̧k jān naan in iakiakwe em̧ool ilo hall eo ak naan eo “Imaron̄ ke jiapn̄?” ilo parking lot eo. Ilo elōn̄ jikin ko, jemaron̄ jipan̄ļo̧k, meļeļe ia eo ro jet reped ie, im kalōk jemjerā ko n̄e ej emakijkij ad loļo̧k membōr ro ilo m̧o̧ko m̧weer. Kūr ko reim̧we rej ukot mour ko. N̄e kūr ko rej jipan̄ kōj kōm̧m̧an im dābij bujen ko rekwojarjar, jej epaakeļo̧k doon im Irooj.
Em̧ōj ba bwe ro rej meļeļe m̧oolin jetōb in jerbal in karejar rej kōm̧m̧an eļapļo̧k jān m̧okta, ilo an ro rejjab meļeļe kōm̧m̧an edik. Jen kōm̧m̧an eļapļo̧k, āinwōt an nej kar Rilo̧mo̧o̧r kōm̧m̧ane. Ilo an al in jar eo ad ba, ej “juon kōjeram̧m̧an in jerbal im iakwe.”8
Ward ko̧o̧njeļ ko, doulul ko an em̧m̧aan ro im Doulul ko an Kōrā ro, jouj im eo̧ron̄ Seperd eo Em̧m̧an im jipan̄ E “pukot ko re jako, … karo̧o̧ltok ko em̧ōj kajeplōklōki, … korake ko em̧ōj kakinejnej, … kakajoor ko rem̧ōjņo̧.”9 Jemaron̄ kam̧ōņōņōik “enjeļ raņ im jaje kajjier”10 ilo ad kōm̧m̧an ruum̧ n̄an aolep ilo m̧ōn kōpped eo An.11
Jerbal in karejar ko reim̧we rej kōjeram̧m̧an baam̧le ko im kajjojo armej ro; ej barāinwōt kōkajoorļo̧k ward im branch ko. Ļōmņak kōn ward ak branch eo am̧ āinwōt juon mejatoto in jukjuk in ped ilo jetōb. Ilo jetōbin waanjon̄ak in wōjke in olive eo ilo Bok in Mormon, Irooj in jikin kallib eo im rijerbal ro an rej boktok leen wōjke ko reaurōk im kōkajoorļo̧k kajjojo wōjke jān aer lukwoj ippān doon aolepen wōjke ko rekajoor im ko rem̧ōjņo̧.12 Irooj in jikin kallib eo im rijerbal ro an rekar ālijliji aer kajjitōk, “Ta em̧m̧anļo̧k imaron̄ kōm̧m̧an?”13 Ippān doon, rekar kōjeram̧m̧an bōro im m̧oko, ward ko im branch ko, kōn jerbal in karejar ko reim̧we im remakijkij.14
Jerbal in karejar—tōl im lale—rej kōm̧m̧an bwe vineyard eo ad en “one body”15—a sacred grove. Kajjojo wōjke ko ilo bukwin wōjke ko ad ej juon wōjke in baam̧le emour. Okar ko im ra ko rej loklok. Jerbal in karejar ej kōjeram̧m̧an epepen ko. N̄e jerbal in jipan̄ ej aikuji, bisop ro remāletlet im doulul ko an em̧m̧aan ro im būreejtōnji ko an Doulul eo an Kōrā ro rej kajjitōk, “Wōn brother im sister ro rej jerbal in karejar?” Ward ko̧o̧njeļ ko im intōrpiu ko an jerbal in karejar rejjab kajjitōk wōt kōn apan̄ ko ak jorrāān ko ak rej barāinwōt kalimjōk kōn mej ko n̄an loe im lan̄lōn̄ ilo tūriam̧o ko rellōn̄ an Irooj ilo mour ko ad ilo ad jerbal in karejar āinwōt An nej kar kōm̧m̧ane.
Rilo̧mo̧o̧r eo ad ej waanjon̄ak eo em̧m̧antata.16 Kōnke E ej em̧m̧an, E emaron̄ etal ilo kōm̧m̧an em̧m̧an.17 E ekar kōjeraam̧m̧an juon im 99. E ej jerbal in karejar ilo nememein armej. Jej erom̧ eļapļo̧k āinwōt Jisōs Kraist n̄e jej kōm̧m̧an “n̄an … juon iaan rein” āinwōt ad nej kar kōm̧m̧an n̄an E,18 n̄e jej iakwe ro ritūrid āinwōt kōj make,19 iakwe doon; āinwōt Aō kar iakwe kom̧,”20 im n̄e “jabdewōt eo iaami e kōņaan bwe en utiej, en ami rijipan̄.”21
Jisōs Kraist ej jerbal in karejar. Enjeļ ro rej jerbal in karejar.22 Rikaļoor ro an Jisōs Kraist “raar katakin im kar jipan̄ doon,”23 “lan̄lōn̄ ippān ro rej lan̄lōn̄, im jan̄ ippān ro rej jan̄,”24 “lale [im] … naajdrik [armej ro] kōn men ko rejdien reweppān,”25 “keememej … rijeram̧ōl im riaikuj, rinan̄inmej im riban,”26 kōm̧m̧an bwe Etan nej jeļā kake kōn jerbal in karejar ko ad.27 Ilo ad jerbal in karejar āinwōt An nej kar, jej lo kabwilōn̄lōn̄ im kōjeram̧m̧an ko An.28 Jej bōk “jerbal em̧m̧anļo̧k.”29
Jemaron̄ m̧ōk ilo kanniek. Ak ilo jerbal in jipan̄ eo An jej “jab m̧ōk ilo kōm̧m̧an em̧m̧an”30 Jej tiljek kōm̧m̧ane ijo koņaad em̧m̧antata, jab ettōr m̧okajļo̧k jān jon̄an ad kajoor,31 bōtaab lōke, āinwōt an Rijilōk Paul katakin “Anij ej yokwe eo e m̧ōņōņō in leļo̧k.”32 N̄an Anij eo ej “oṇaake ine n̄an ri kallib, im pilawā n̄an m̧ōn̄ā, im kalōñḷọk leen ami wānōk;.”33 Ilo bar jet naan, Anij ej kōkm̧anm̧anļo̧k “men otemjej bwe en ļap ami leļo̧k.”34 Eo “eļap an kallib enaaj ļap an m̧adm̧ōd im jeraam̧m̧an.”35
Jekdoon ia eo jeped ie ilo iien Ijtō in, jen laleļo̧k im kea āinwōt an nej kar Rilo̧mo̧o̧r kōm̧m̧ane, eļaptata n̄an ro rej jeram̧m̧an jān iakwe im kūr n̄an jerbal in karejar n̄an er. Ilo kōm̧m̧ane menin, jen epaakeļo̧k Jisōs Kraist im doon, erom̧ eļapļo̧k āinwōt E im rikalo̧o̧r eo an Jisōs Kraist Ej kōņaan bwe kōj kajjojo en erom̧. Ilo āt eo ekwojarjar Etan Jisōs Kraist, amen.