2023
Uwaak eo Ej Aolep Iien Jisōs Kraist
Māe 2023
6:20

Uwaak eo Ej Aolep Iien Jisōs Kraist

Jān Būreejtōn Russell M. Nelson

Būreejtōn eo an Kabun̄ eo an Jisōs Kraist im Armej ro Rekwojarjar ilo Raan Ko Āliktata

Jekdo̧o̧n ta kajjitōk ko ak būrabļōm ko ewōr ippāmi, uwaak eo ej aolep iien loi ilo mour im katak ko an Jisōs Kraist.

Ro jeiū im jatū jitōnbōro, emōj naajdik kōj ilo jetōb ilo raan kein ruo rej jem̧ļo̧kļo̧k. Al ko kuwaer eo kar al kaki rōweeppān. Ro raar kōnono rej kein jerbal ko n̄an Irooj. Ij jar bwe kom̧ naaj pukōt Jetōb Kwojarjar eo n̄an tōl kom̧ ilo ami ekkatak ilo ami kōļmenļo̧kjeņ kōn m̧ool ko kar katakin jān jikin kōnono in. Rej lukkuun m̧ool kar jilkintok jān lan̄.

Juon wiik jān rainin ej Jabōt in Ijtō. Ej iien kautiej eo aorōk tata an kabun̄ n̄an rikaļoor ro an Jisōs Kraist. Un leplep eo jej keememej e Kūrijm̧ōj ej kōnke kōn Ijtō. Katak eo an Itok, Ļoor Eō an wiik in enaaj im̧we eok n̄an ekkatak deļo̧n̄ in anjo̧ eo an Rilo̧mo̧o̧r eo n̄an Jerusalem, An karreoik tampeļ eo, An en̄taan ilo Jikin Kallib Getsemane, Debwāāl eo An, Jerkakpeje aiboojoj eo An, im waļokļo̧k ko n̄an rikaļoor ro An.1

Lemōņōnō kōn eoon kein rekwojarjar im kappukot jabdewōt wāween n̄an kam̧m̧oolol Jemedwōj Ilan̄ ilo An jilkintok n̄an kōj Nejin E Make Wōt Jitōnbōro.2 Kōn Jisōs Kraist, jemaron̄ ukweļo̧k im meļo̧kļo̧k jerawiwi ko ad. Kōn E, kajjojo iaad naaj jerkakpeje.

Ij barāinwōt kajjitōk ippāmi n̄an ekkatak bar juon alen bwebwenato eo kōn loļo̧k eo an Rilo̧mo̧o̧r n̄an Rinipai ro ilo Amedka, āinwōt kar ļo̧o̧ke ilo 3 Nipai. Ejjab to ālkin loļo̧k jab in, kar ron̄ Ainikien ibwilijin armej ro, ekoba naan in akweļap kein:

“Kom̧in jab ke kiiō ro̧o̧l tok n̄an Eō, im ukeļo̧k jān jero̧wiwi ko ami, im oktak, bwe In maron̄ kōmour kom̧?

“… Lo, pein tūriam̧o eo Aō ej erļo̧kwaj n̄an kom̧, im jabdewōt eo enaaj itok … e Inaaj bōk.”3

Ro jeiū im jatū jitōnbōro, Jisōs Kraist ej lewaj ejja kūr in wōt n̄an kom̧ rainin. Ij akweļap ippāmi n̄an itok n̄an E bwe En maron̄ kemour kom̧! E enaaj kemour kom̧ jān jerawiwi ilo ami ukweļo̧k. E enaaj kemour kom̧ jān būrom̧ōj im mijak. E enaaj kemour kom̧ jān jabdewōt en̄taan iooni lo mour in.

Jekdo̧o̧n ta kajjitōk ko ak jorrāān ko ewōr ami, uwaak eo ej aolep iien loi ilo mour im katak ko an Jisōs Kraist. Katak eļapļo̧k kōn Pinmuur eo An, An iakwe, An tūriam̧ok kake, An katak, im An gospel in kōmour im eddōkļo̧k me em̧ōj an kar jepļaaktok. Oktakļo̧k n̄an E! Ļoor E!

Jisōs Kraist ej un eo jej kalōk tampeļ ko. Kajjojo ej m̧weo ekwojarjar Im̧ōn. Kōm̧m̧ani bujen ko im bōk kain̄i ko remenin aikuj ilo tampeļ eo, barāinwōt pukōt n̄an epaakeļo̧k E ijōņ, naaj kōjeraam̧m̧an mour eo ami ilo wāween ko ejjeļo̧k bar kain kabun̄ jar emaron̄. Kōn un in, jej kōm̧m̧an aolep men ilo kajoor eo ad n̄an kōm̧m̧an bwe kōjeraam̧m̧an ko an tampeļ ren pidodoļo̧k tōpari n̄an membōr ro ad aolepān laļ in. Ranin, ij kam̧m̧oolol n̄an kōjjjeļā kōn karōk ko ad n̄an kalōk juon tampeļ ilo kajjojo jikin rej ellaajrak:

  • Retalhuleu, Guatemala

  • Iquitos, Peru

  • Teresina, Brazil

  • Natal, Brazil

  • Tuguegarao City, Philippines

  • Iloilo, Philippines

  • Jakarta, Indonesia

  • Hamburg, Germany

  • Lethbridge, Alberta, Canada

  • San Jose, California

  • Bakersfield, California

  • Springfield, Missouri

  • Charlotte, North Carolina

  • Winchester, Virginia

  • Harrisburg, Pennsylvania

Ro jeiū im jatū rejitōnbōro, ij kwaļo̧k kam̧ool bwe Jisōs Kraist ej tōl jerbal ko an Kabun̄ eo An. Ij kam̧ool bwe ļoor E ej iaļ eo de in n̄an m̧ōņōņō eo n̄an indeeo. Ijeļā bwe kajoor eo An ej etal ioon armej in rikōjparok bujen ro An, ro me “raar pojak kōn jim̧we im kōn kajoor in Anij ilo aiboojoj eļap.”3 Ij lukkuun kam̧ool, kōn aō iakwe im kōjeraam̧m̧an n̄an kajjojo iaami, ilo etan ekwojarjar Jisōs Kraist, amen.