“Ejjeļo̧k Jabdewōt Eaiboojojļo̧k im Tōn̄al Āinwōt kar M̧ōņōņō eo Aō”

Jān Elder Craig C. Christensen

Jān Jiljilimjuonn̄oul eo

Ukweļo̧k kajjojo raan im itok n̄an Jisōs Kraist ej iaļ eo n̄an en̄jake m̧ōņōņō—m̧ōņōņō eo eļapļo̧k jān ad kōļmenļo̧kjen.

Ilo aolepān jerbal in kwaļo̧k eo An ilo laļ in, Rilo̧m̧o̧o̧r ekar kwaļo̧k eļap iakwe n̄an aolep ajri ro nejin Anij—eļaptata ro rekar en̄taan ak kar wōtlo̧k. Ke Pharisee ro rekar kōraate kōn an kar iaio im kejota ippān rijerawiwi ro, Jisōs ekar uwaak ilo an katakin jilu būrabōļ ko me jejeļā kaki.¹ Ilo kajjojo būrabōļ kein, E ekar kalikkar aorōk eo an pukōtļo̧k ro rejōbwābwe im lan̄lōn̄ eo jej en̄jake n̄e rej jepļaaktok. N̄an waanjon̄ak, ilo bwebwenato eo an sip eo ejōbwābwe, E ekar ba, “[Eļap] lan̄lōn̄ i lan̄ kōn juon ri jerọwiwi eo ej ukeļo̧k ippān.”²

Kōņaan eo aō rainin ej n̄an kōkajoorļo̧k ekkeijel eo ikōtaan lan̄lōn̄ im ukweļo̧k—eļaptata, lan̄lōn̄ eo ej itok n̄e jej ukweļo̧k im en̄jake ko an lan̄lōn̄ jej būki ilo ad karuwaineneik ro jet n̄an itok n̄an Kraist im bōk en̄taan in pinmuur eo An ilo mour ko aer.

Kōj Jej Bwe Jen Maron̄ M̧ōņōņō

Ilo jeje ko rekwojarjar, naan in lan̄lōn̄ lukkuun m̧eļeļein eļapļo̧k jān iien m̧ōņōņō ko ekadu kitier ak em̧ool en̄jake ko an lemōņōņō. Lan̄lōn̄ in jekjek in ej juon m̧wil in anij, lo tarlep eo an n̄e jej bar ro̧o̧l im jokwe im̧aan mejān Anij.³ Eļapļo̧k an m̧wilaļ, kōketak, kije, im ukōt mour jān aolep m̧ōņōņō ak kaenōm̧m̧an ko mour in emaron̄ letok.

Kar kōm̧anm̧an kōj n̄an bōk lan̄lōn̄. Ekar baj mejān kajjik eo ad in āinwōt ajri ro nejin Jemedwōj Ilan̄ eo ej iakwe kōj. E ekōņaan kwaļo̧k lan̄lōn̄ eo An ippād. Rikanaan Liai ekar katakin bwe karōk eo an Anij n̄an kajjojo iaad ej bwe kōj “jen maron̄ m̧ōņōņō.”⁴ Kōnke jej mour ilo juon laļ enana, lan̄lōn̄ eo ejjeļo̧k jem̧ļo̧kin emakijkij an āinwōt n̄e jeban tōpare. Aeet ilo lukkuun eoon eo tok juon, Liai ej wōnm̧anļo̧k wōt ilo an kōmeļeļeik bwe “Messaia eo [ekar itok n̄an] … lo̧m̧o̧o̧ren [kōj] jān wōtļo̧k eo.”⁵ Pinmuur eo, kōn im ilo Rilo̧m̧o̧o̧r Jisōs Kraist, ej kōm̧m̧an bwe lan̄lōn̄ en pidodo ad bōke.

Ennaan eo an gospel eo ej juon ennaan in kōjatdikdik, kōn “naan in lan̄lōn̄ eļap”⁶ im wāween ko me aolep remaron̄ en̄jake aenōm̧m̧an im jet iien lan̄lōn̄ ilo mour in im bōk tarlep in lan̄lōn̄ eo ilo mour eo ej itok.⁷

Lan̄lōn̄ in jej kōnnaan kake ej juon mennin letok n̄an eo etiljek, bōtaab ewōr wōņāān. Lan̄lōn̄ in ejjab dik wōņāān ak rejjab bajjōk letok. Ijello̧kin, ej wiaiki “kōn bōtōktōk e aorōk an [Jisōs] Kraist.”⁸ Eļan̄n̄e jekar lukkuun meļeļe aorōk in m̧ool, lan̄lōn̄ in anij, jeban kar aipedped n̄an kaarmejet jabdewōt bwinnin mour in ak kōm̧m̧an jabdewōt oktak remenin aikuj ilo mour n̄an bōke.

Juon kiin̄ eo ekajoor bōtaab ettā ilo Bok in Mormon ekar meļeļe menin. “Ta inaaj kōm̧m̧ane,” ekar ba, “bwe in maron̄ ļotak ilo Anij, im loļo̧k jetōb nana in ekōlibaakļo̧k ilo ānbwinnū, im bōk Jetōb eo An, “bwe in maron̄ obrak kōn lan̄lōn̄ … ? Lo, eba, inaaj juļo̧k aolep m̧weiuk ko aō, aaet, inaaj eļļo̧k jān aelōn̄ in kiin̄ eo aō, bwe in maron̄ bōk lan̄lōn̄ in eļap.”⁹

N̄an uwaake kajjitōk eo an kiin̄ eo, mijinede eo Aron ekar ba, “Eļan̄n̄e kwōj kōņaan men in, … bun̄ badikdik im̧aan Anij … [im] ukeļo̧k jān aolep jero̧wiwi ko am̧.”¹⁰ Ukweļo̧k ej iaļ eo n̄an lan̄lōn̄¹¹ kōnke ej juon ial eo me ej tōlļo̧k n̄an Rilo̧m̧o̧o̧r Jisōs Kraist.¹²

Lan̄lōn̄ ej Itok jān Ukweļo̧k eo Em̧ool

N̄an jet, n̄an ļōmņak kōn ukweļo̧k āinwōt juon iaļ n̄an lan̄lōn̄ ak ippāer ejjab lan̄lōn̄. Ukweļo̧k, ilo jet iien, maron̄ in kōmmetak im pen. Ej aikuj kwaļo̧k m̧ool bwe jet iaan ļōmņak ko im kōm̧m̧an ko ad—em̧ool jet iaan tōm̧ak ko ad—rekar bōd. Ukweļo̧k ej barāinwōt aikuji oktak eo, eo, ilo jet iien, jemaron̄ jab koņ kake. Bōtaab lan̄lōn̄ im kaenōm̧m̧an eo rejjab juon wōt. Jerawiwi—ekoba jerawiwi in jejjej—ej kōm̧m̧an jon̄an ad lan̄lōn̄.

Āinwōt kar ba jān rijeje sam eo, “Bōlen jan̄ enaaj pād wōt ilo bon̄, a lan̄lōn̄ enaaj itok n̄e e jibbon̄.”¹³ Ilo ad ukweļo̧k jān jerawiwi ko ad, jej aikuj kalimjōk lan̄lōn̄ eo eļap me ej itok ālkin. Bon̄ ko remaron̄ aetok, bōtaab jibbon̄ ej itok, im o, ewi jo̧n̄an an aibojooj aenōm̧m̧an im lan̄lōn̄ eo jej en̄jake ilo an Pinmuur eo an Rilo̧m̧oor kanemkwoj kōj jān jerawiwi im en̄taan.

Ejjeļo̧k Jabdewōt Eaiboojojļo̧k im Tōn̄al

Ļōm̧ņak kōn en̄jake ko an Alma ilo Bok in Mormon. Ekar “widbwebwe kōn en̄taan ejjeļo̧k jem̧ļo̧kin,” im jetōb eo an “eaar ikimmaļ” kōnke kōn jerawiwi ko an. Bōtaab ke ej oktakļo̧k n̄an Rilo̧m̧oor n̄an tūriamo kake, ekar “jab bar keememejļo̧k metak ko [an].”¹⁴

“Im o, ta m̧ōņōņō eo,” ekar ba, “im ta meram eo eaiboojoj iaar loe; em̧ool … ejjeļo̧k jabdewōt eaiboojojļo̧k im tōn̄al āinwōt m̧ōņōņō eo aō.”¹⁵

En̄in ej lan̄lōn̄ eo epojak n̄an ro rej itok n̄an Jisōs Kraist kōn ukweļo̧k.¹⁶ Āinwōt an Būreejtōn Russell M. Nelson kar katakin:

“Ukweļo̧k ej kōppeļļo̧k ad deļo̧n̄e kajoor in Pinmuur eo an Jisōs Kraist. …

“N̄e jej kāālet n̄an ukweļo̧k, jej kāālet n̄an oktak! Jej kōtļo̧k an Rilo̧mo̧o̧r ukōt kōj n̄an juon nememe ekāāl in kōj make. Jej kāālet n̄an eddōkļo̧k ilo jetōb im bōk lan̄lōn̄—lan̄lōn̄ eo jān pinmuur ilo E. N̄e jej kāālet n̄an ukweļo̧k, jej kāālet n̄an erom̧ āinwōt Jisōs Kraist!”¹⁷

Ukweļo̧k ej boktok lan̄lōn̄ kōnke ej kōpooj buruōd n̄an bōk kareel eo an Jetōb Kwojarjar. N̄an obrak kōn Jetōb Kwojarjar, meļeļein obrak kōn lan̄lōn̄. Im n̄an obrak kōn lan̄lōn̄ ej meļeļe in n̄an obrak kōn Jetōb Kwojarjar.¹⁸ Lan̄lōn̄ eo ad ej ļapļo̧k ilo ad jerbal aolep raan n̄an bōktok Jetōb n̄an mour ko ad. Āinwōt kar katakin jān rikanaan eo Mormon: “Mekarta raar jitlo̧k im jar emmakijkij, im eaar kanooj kajoorļo̧k ilo [aer] ettā im penļo̧k ilo lōke Kraist, n̄an obrak i burueer kōn m̧ōņōņō im ineem̧m̧an.”¹⁹ Irooj ej kallim̧uri aolep ro rej jerbal n̄an ļoor E, “Inaaj ajejewaj n̄an eok … Jetōb eo Aō, eo enaaj kōmeram am ļōmņak, eo enaaj koobrak am kōn m̧ōņōņō.”²⁰

Lan̄lōn̄ eo kōn Jipan̄ Ro Jet Ukweļo̧k

Ālkin ad en̄jake lan̄lōn̄ eo ej tok jān m̧ool in ukweļo̧k, ebwe ad kōņaan kwaļo̧k lan̄lōn̄ jab eo ippān ro jet. Ilo ad kōm̧m̧ane, ad lan̄lōn̄ ej orļo̧k. Ej lukkuun ta eo ekar waļo̧k n̄an Alma.

“Enin ej aō aiboojoj, ekar ba, “bwe bōlen in maron̄ juon kein jerbal ilo pein Anij n̄an boktok jān armej n̄an ukweļo̧k; im en̄in ej aiboojoj eo aō.

“Im lo, n̄e ij lo elōn̄ iaan ro jeiū im jatū rem̧ool ilo ukeļo̧k, im rej itok n̄an Irooj aer Anij, innām aō ej obrak kōn lan̄lōn̄; innām ij keememej ta Irooj Eaar kōm̧m̧an n̄an eō, aaet, em̧ool bwe Eaar ron̄ aō jar, … aaet, innām ij keememej An pein tūriam̧o kake eo ej erļo̧ke tok [n̄an] eō.”²¹

Jipan̄ ro jet ukweļo̧k ej juon kakōļļe ej make waļo̧k kōn kam̧m̧oolol eo ad n̄an Riļo̧mo̧o̧r, im ej juon unjen lan̄lōn̄ eļap. Irooj ekar kallim̧ur:

“Eļan̄n̄e kwonaaj jerbale aolep raan ko am̧ … bōktok, juon jetōb n̄an Anij, ewi jon̄an ļap in lan̄lōn̄ eo ippam̧ ilo aelōn̄ eo an Jema!

“Im kiiō, eļan̄n̄e amiro m̧ōņōņō enaaj kanooj ļap ippān juon armej eo kom̧ro ar bōktok n̄an Eō … , ewi jon̄an an ļap naaj amiro m̧ōņōņō eļan̄n̄e kom̧ro ej bōktok elōn̄ armej n̄an Eō!”²²

Ewi Jon̄an M̧ōņōņō eo An ilo Armej eo ej Ukweļo̧k

Ij lo an jipan̄ n̄an kajjieon̄ pijaki lan̄lōn̄ eo Rilo̧mo̧o̧r eo ej aikuj kar en̄jake kajjojo iien jej bōk kōjeraam̧m̧an ko an en̄taan in pinmuur eo An ilo mour ko ad.²³ Āinwōt kar kōnono jān Būreejtōn Nelson,²⁴ Rijilōk Paul ilo Leta eo an n̄an Rihibru kar kwaļo̧k ennaan in ejouj: “joḷọk men otemjej … jerọwiwi eo e nan̄in kōpooḷ kōj, … reiḷọk n̄an Jisōs Ri tōl im Ri koweeppān tōmak eo ad; eo kōn lan̄lōn̄ eṃōj likūt e iṃaan en̄taan ilo debwāāl … Ear jijet i anmooṇōn tūroon an Anij.”²⁵ Ilo ad emmakijkij ad kōnnaan kōn metak im en̄taan eo ilo Getsemane im Calvary, akkō jakutkut ad kōnono kōn lan̄lōn̄ eo eļap me Rilo̧mo̧o̧r ej aikuj in kar kōtmene ke E kar ajeļo̧k mour eo An n̄an kōj. Ealikkar, metak eo An im en̄taan eo An raar n̄an kōj, bwe jen maron̄ en̄jake lan̄lōn̄ ilo ad jepļaakļo̧k n̄an Ippān n̄an im̧aan mejān Anij.

Ālkin katakin armej ro ilo Amedka etto, Rilo̧mo̧o̧r ekar kwaļo̧k An iakwe eļap n̄an er im ba:

“Kiiō, lo, aō m̧ōņōņō eļap, em̧ool n̄an dipio, kōn kom̧ … ; aaet, im em̧ool Jema ej m̧ōņōņō, im barāinwōt aolep enjeļ ro rekwōjarjar. …

“… Ilo [kom̧] ewōr [Aō] lan̄lōn̄ edipio.”²⁶

Itok n̄an Kraist im Bōk Lan̄lōn̄ eo An

Ro jeiū im jatū, ij kōjem̧ļo̧k naan kein aō ilo aō kwaļo̧k kam̧ool eo aō make, eo ij watōke juon menin letok kwojarjar. Ij kam̧ool bwe Jisōs Kraist eo ej Rilo̧mo̧o̧r im Ripinmuur eo an laļ. Ijeļā bwe E ej iakwe kōj kajjojo. Mije eo an em̧ake, An “jerbal im [An] aiboojoj,”²⁷ ej n̄an jipan̄ kōj bōk tarlep in lan̄lōn̄ eo ilo E. Ij juon rikam̧ool bwe ukweļo̧k kajjojo raan im itok n̄an Jisōs Kraist ej iaļ eo n̄an en̄jake lan̄lōn̄—lan̄lōn̄ eo eļapļo̧k jān ad kōļmenļo̧kjen.²⁸ En̄in ej unin ad pād ioon laļ in. Unin an kar Anij kōpooj karōk in m̧ōņōņō eo An n̄an kōj. Ilo m̧ool Jisōs Kraist ej “iaļ eo, m̧ool eo, im mour eo”²⁹ im ejjeļo̧k bar “āt eo letok ium̧win lan̄ bwe armij ren maron̄ mour ilo aelōn̄ in Anij.”³⁰ Āindein ij kam̧ool ilo āt eo ekwojarjar etan Jisōs Kraist, amen.

Kakeememej ko

1. Lale Luk 15.

2. Luk 15:7.

3. Lale Sam Ko 16:11.

4. 2 Nipai 2:25.

5. 2 Nipai 2:26.

6. Luk 2:10.

7. Lale Mosaia 3:13–19

8. 1 Piter 1:19.

9. Alma 22:15.

10. Alma 22:16.

11. Ilo iiō ko kiiō repaak, jejjo rikanaan ro im rijilōk ro rekar kōmejajaik lan̄lōn̄ eo kōn ukweļo̧k. Lale, n̄an waanjon̄ak, Russell M. Nelson, “Jemaron̄ Kōm̧m̧an Em̧m̧anļo̧k im Maron̄ Em̧m̧anļo̧k,” Liaona, Māe 2019, 67–69; Dallin H. Oaks, “Erreo kōn Ukweļo̧k,” Liaona, Māe 2019, 91–94; Dale G. Renlund, “Repentance: A Joyful Choice,” Liaona, Nob. 2016, 121–24; D. Todd Christofferson, “The Divine Gift of Repentance,” Liaona, Nob. 2011, 38–41.

12. Būreejtōn Nelson ekar katakin: “Lan̄lōn̄ ej itok jān im kōn [Jisōs Kraist]. E ej unjen aolep m̧ōņōņō. … N̄an Armej ro Rekwojarjar, Jisōs Kraist ej m̧ōņōņō!” (“Lan̄lōn̄ im Mour ilo Jetōb,” Liaona, Nov. 2016, 82).

13. Sam Ko 30:5.

14. Alma 36:12, 19.

15. Alma 36:20–21; bar lale eoon ko 12–19.

16. Lale Alma 27:18.

17. Russell M. Nelson, “Jemaron̄ Kōm̧m̧an Em̧m̧anļo̧k im Maron̄ Em̧m̧anļo̧k,” 67.

18. Lale Jerbal 13:52; Mosaia 4:3.

19. Hilamōn 3:35.

20. Katak im Bujen Ko 11:13.

21. Alma 29:9–10.

22. Katak im Bujen Ko 18:15–16.

23. Lale Katak im Bujen Ko 18:13.

24. Lale Russell M. Nelson, “Lan̄lōn̄ im Mour in Jetōb,” 83.

25. Hibru 12:1–2; kakobaba in katak.

26. 3 Nipai 27:30–31. Jilu iaan rikaļoor Rinipai ro an Rilo̧mo̧o̧r raar kōņaan mour wōt ilo mour in kōn jibadbad eo eļap n̄an bōktok jetōb ko n̄an E. N̄an rijilōk rein retiljek, Jisōs ekar ba, “Im kōn un in kom̧ naaj obrak in lan̄lōn̄; im kom̧ naaj jijet ilo aelōn̄ eo an Jema; aaet, ami lan̄lōn̄ enaaj obrak, em̧ool āinwōt Jema eaar letok n̄an Eō dipiio in lan̄lōn̄; im kom̧ naaj āinwōt em̧ool āinwōt N̄a, im N̄aij āinwōt Jema; im Jema im N̄a kōmij juon” (3 Nipai 28:10).

27. Moses 1:39.

28. “Men ko mej ear jab loi, im lo̧jilin̄ ear jab ron̄jake, im re jan̄in deļo̧n̄ ilo buruon armej, men ko jabdewōt Anij e ar kapojak n̄an ro rej yokwe E” (1 Korint 2:9).

29. Jon 14:6.

30. 2 Nipai 31:21.