Jisōs Kraist Ej Unjen Mour
Jemaron̄ leiaia ippān Rilo̧mo̧o̧r n̄an leļo̧k unjen mour ilo anbwin im jetōb n̄an ro rej aikuji—im ilo iien wōt kapukōt ad make unjen mour.
Kōn tōmak ilo Jisōs Kraist im kōjatdikdik kōn ta ko raar ron̄ kōn menin bwilōn̄ ko An, rikau ro an em̧m̧aan in me ewōr an nan̄inmej in akā raar bōkļo̧k n̄an ippān Jisōs. Raar pukōt kilen aer bōkļo̧k e n̄an ijo—raar kōpeļļo̧k raan m̧weo im lelaļļo̧k em̧m̧aan eo, ilo kinien, ilo ijo Jesōs ej kwaļo̧k naan ie. Ke Jisōs “ej lo aer tōmak, E ba [ñan leo e akā], … e jako jero̧wiwi ko am.”1 Innām “Kwōn jerkak, im bōk kiniōṃ, im ilọk ñan ṃweo iṃōṃ.”2 Im iien eo wōt ak ļeo e akā eaar jerkak im bōk kinen im ro̧o̧l ñan m̧weo im̧ōn, “im wūjtake Anij.”3
Ta eo jej jeļā eļapļo̧k kōn rikau ro m̧ōttan ļeo eaar akā? Jej jeļā bwe Rilo̧mo̧o̧r eo eaar kile aer tōmak. Im kōn aer kar loe im ron̄ kōn Rilo̧mo̧o̧r eo im raar bar kam̧ool kōn menin bwilōn̄ ko An, raar “bwilōn̄” im “raar wūjtake Anij.”4
Jisōs Kraist eaar letok kōjatdikdik n̄an kōmour— unjen mour ilo ānbwin jen metak im jorrāān ko rej waļo̧k jen nan̄inmej ko emakijkij aer waļo̧k. Juōn wāween eo elap, Rilo̧mo̧o̧r eaar bar letok unjen mour ilo jetōb n̄an karreoik em̧m̧aan eo jen jerawiwi.
Im ro m̧ōttan—ilo aer kajjieon̄ kōjparok juon eo ej pād ilo aikuj, raar lo unjen mour; raar lo Jisōs Kraist.
Ij kam̧ool bwe Jisōs Kraist ej unjen mour. Kōn Pinmuur eo an Jisōs Kraist, jemaron̄ lo unjen kōmour jen eddodo im jorrāān ko an jerawiwi im jipan̄ jen m̧ōjņo ko ad.
Im kōnke jej iakwe Anij im jaar kallim̧ur n̄an jerbal n̄an E, jemaron̄ juon wōt ippān Rilo̧mo̧o̧r n̄an jipan̄ leļo̧k unjen mour ilo kanniōk im jetōb n̄an ro rej pād ilo aikuj—ilo jekjek in jej lo ad make mour ilo Jisōs Kraist.5
Rikannaan eo ad ejitenbōro, Būreejtōn Russell M. Nelson, eaar karuwaineneik kōj n̄an anjo̧ ioon laļ n̄an lo kakkije.6 Eaar kwaļo̧k “m̧ool in kakkije” āinwōt “jokne im aenōm̧m̧an.” Būreejtōn Nelson eaar ba, “Kōn Rilo̧mo̧o̧r eo, kōn Pinmuur eo An, kar kōtlok kōj jān mōjno, likjab ko, im jerawiwi, im kōnke Eaar eñjake aolep metak, inepata, im eddodo ko kwomaroñ kar būki, innām ilo am ukwelok im kappukot jipañ eo An, kwomaroñ anjo̧ ioon ajiwiwi ko an mour in.”7 En̄in ej unjen mour eo Jisōs Kraist ej letok n̄an kōj!
Kajjojo iaad jej ineek juon backpack. Emaron̄ in juon iep ej peļan ioon bōram̧ ak juon pāāk ak juon nine in nuknk likūti ioon aeram̧. Baj jen ad ļōmņak, jen ba backpack.
Backpack in ej men eo jej ineek eddodo ko an mour in. Eddodo ko ad rej āinwōt dekā ko ilowaan backpack eo. Lukkuun m̧ool, ewōr wōt jilu kain:
-
Dekā ko kōm̧m̧an jen kōj make kōnke jerawiwi
-
Dekā ko ilo backpack eo ad rej kāālet ko ad rejjab jim̧we, m̧wiļ ko ad, im ad jab jouj n̄an ro jet.
-
Im dekā ko jej ineeki kōnke jej mour ilo juon wāween eo erub. Ekitbuuj dekā in nan̄inmej, metak, nan̄inmej ko ekkā aer waļo̧k, būrom̧ōj, inepata, ajimakeke, im jorrāān ko an mejjatoto ko.
Ij m̧ōņōņō in kwaļo̧k ke eddodo ko ad ilo mour in, dekā kein ilo backpack in jej ineeke, ejjab aikuj in eddo.
Jisōs Kraist emaron̄ kōmeraiki eddo kein ad.
Jisōs Kraist emaron̄ kotak eddo kein ad.
Jisōs Kraist ej kepooj juon iaļ n̄an kōmour kōj jen jerawiwi eļap.
Jisōs Kraist ej ad unjen mour.
Eaar ba:
“Kom̧win itok ñan Ippa, kom̧ otemjej rej jerbal im ban, im Inaj kakkijeik kom [eo n̄an, unjen mour im aenōm̧m̧an].
‟Kom̧win bōk Aō ine im likūte i aerami, katak Ippa, bwe Ij ineem̧m̧an im ettā būruō: im kom̧ naaj lo ami kakkije.
“Bwe Aō ine ej em̧m̧an, im men eo Ij ineke e mera.”8
Ine ne ej em̧m̧an im eddo ko rej mera eļan̄n̄e jenaaj pād ilo ine in ippān Rilo̧mo̧o̧r eo, jej leļo̧k eddo kein ad n̄an E, bwe jej kōtļo̧k An ineek eddo ko ad. Meļeļein deļo̧n̄e juon bujen jemdo̧o̧n ippān Anij n̄an kōjparoke bujen eo, me Būreejtōn Nelson ekar kōmeļeļeiki “ekōmman bwe aolep men kin mour in ren pidodo.” Eaar ba, “Ak juon wōt ippān Rilo̧mo̧o̧r ej meļeļe bōk An kajoor im kajoor in pinmuur.”9
Etke jej m̧akoko in aje dekkā kein ad? Etke juōn ripijja eo emōk ej makoko in etal jen jikin pijja eo ak ewōr juōn emaron̄ binej tarrin n̄an an kejemlok ikkure in? Etke ij wōnm̧aanļo̧k wōt ilo jerbal eo aō imake n̄e Rikōmour eo epojak in pād wōt ippa?
Būrejtōn Nelson ekar katakin, “Jisōs Kraist … ej jutak kōn pā ko reppeļļo̧k, kōjatdikdik im m̧ōņōņō n̄an kōmour, jeorļo̧k bōd, karreo, kōkajoorļo̧k, karreo, im kokwojarjare kōj.”10
Im etke jej akwelap in kotak make dekā ko ad?
Ej n̄an kajjitōkin kōj make n̄an kōj kajjojo bwe jen ļōmņak kaki.
Baj n̄a, iļak lale armej rej juwa. “Imaron̄ e menin,” n̄aij ba. “Jab inebata; bwe inaj kamōj e.” Ej ririab eo ej kōņaan ņooj eō jān Anij, n̄an oktakļo̧k jān E, n̄an make kōm̧m̧ane.
Ro jeiū im jatū iban makeļo̧k iaaō, im ijjab aikuj, im iban. Kelet in n̄an etetal ippān Rilo̧mo̧o̧r in aō, Jisōs Kraist, kōn bujen ko ikar kōmmane ippān Anij, “I maroñ in kōṃṃan men otemjej ilo Kraist eo ej kakajoor eō.”11
Ro rej kōjparok bujen eo rej jeraam̧m̧an kōn unjen mour an Rilo̧mo̧o̧r.
Ļōmņak kōn waanjon̄ak in ilo Bok in Mormon: Armej ro an Alma kar en̄taan kōn “jerbal ko ioer, im … rilale aer jerbal.”12 Jab mālim n̄an kwalok ainikier ilo jar, ak raar “lutōkleplep burueer ñan [Anij]; im eaar jeļā lōmņak ko an burueer.”13
Im “ainikien Irooj eaar itok ñan er ilo eñtaan ko aer, im ba: Kom̧in kotak bōrami im kom̧in ineem̧m̧an, bwe I jeļā kōn bujen eo kom̧ ar kōmmane n̄an Eō; im Inaaj bujen ippā armej ro Aō im kōtļo̧k er jen kōm̧akoko.
“Im Inaaj barāinwōt kōmeraik eddo ko kar likūt ioon aerami, bwe em̧ool kom̧ make kom̧in jab en̄jaki ioon ālkimi.”14
Im eddo ko aer “raar kōm̧m̧an bwe ren mera,” im “Irooj Eaar kōkajoorļo̧k er bwe ren maron̄ kotak eddo ko aer ilo ejjeļo̧k pen, im raar ajeļo̧k er ilo itok limo im kōn ineem̧m̧an n̄an aolep ankilaan Irooj.”15
Ro ri kōjparok bujen ko rej bōk unjen mour in ilo wāween ineem̧m̧an, kōlapļo̧k kijenmej im lem̧ōņōņō, n̄an kōmeraiki eddo ko bwe ren en̄jake aer mera, im aer bōkļo̧ki.16
Kiiō jen bar ro̧o̧lļo̧k n̄an backpack eo.
Ukweļo̧k, kōn Pinmuur eo an Jisōs Kraist, ej ta eo ej kōmour kōj jen dekā in jerawiwi ko reddo. Kōn menin letok in, tūriam̧o eo an Anij ej kōmour kōj jen eddodo in im jorrāāņ ko reļļap an kien.17
Pinmuur eo an Jisōs Kraist ej kōm̧m̧an bwe jān maron̄ bōk kajoor in joļo̧k bōd, eo ej kōtlok ad joļo̧k eddo kein jej kotaki kōn an jab jim̧we an ro jet kōm̧m̧an n̄an kōj.18
Kōn menin elmen an Rilo̧mo̧o̧r eo kōmour kōj jen eddodo ko an mour in kōn ānbwin kanniōk in ej iokļo̧k būrom̧ōj im metak?
Emakijkij, An kōm̧m̧ane kain unjen mour in ilo kōj! Āinwōt bujen membōr ro ilo Kabun̄ in An, jej kallim̧ur “n̄an jan̄ ippān ro rej jan̄” im “kaenōmman ro rej pād ilo aikuj in aenōmman.”19 Kōnke jej “itok ilo wōrwōr an Anij” im n̄an “kur kom̧ armej ro An,” komij “m̧ōņōņō n̄an ineek eddo ko an ro jet, bwe ren maron̄ mera.”20
Kōjeraam̧m̧an in bujen eo ad ej jemdo̧o̧n ippān Jisōs Kraist n̄an letok unjen mour, jim̧or ilo kanniōk im jetōb, n̄an aolep ro nejin Anij. Kōj eo ej kōm̧m̧an iaļ n̄an An letok unjen mour.21
Im kōn menin, āinwōt ro m̧ōttan ļeo e akā, jej “rie ro reban, kotak lōn̄ļo̧k pā ko rej allitoto, im kōkajoor bukwe ko rem̧ōjņo̧.”22 Jej “bōk … eddo ko an doon, im āindein kom̧win kajejjet kien Kraist.”23 Im ad kōm̧m̧ane, jej oktak im jeļā wōn E, erom̧ āinwōt E, im jej lo unjen mour eo An.24
Ta in unjen mour?
Ej kōm̧akūt ak kōmeram metak eo, inepata, ak eddodo, ak kajoor n̄an niknik. Ej kōnono kōn armej eo ej bōk jikin armej eo juon. Ej mālim eo n̄an kajim̧we juōn bōd.25 Naan in Anglo-French eo ej itok jen kajin etto in French, naan eo ej relever, ak “n̄an jerkak,” im jen kajin Latin relevare, ak “bar jerkak.”26
Ro jeiū im jatū, Jisōs Kraist Ej unjen mour. Ij kam̧ool bwe emōj An bar jerkak ilo raan eo kein kajilu im, bwe em̧ōj kakūrm̧ool iakwe im Pinmuur eo ejjeļo̧k jem̧ļo̧kin, jutak im erļo̧ke pein, letok n̄an kōj bwe jen maron̄ in bar jerkak, im lo̧mo̧o̧ren kōj, im bwe jen wanlōn̄ļo̧k im erom̧ āinwōt E. Im unjen mour in ej letok n̄an kōj ejjeļo̧kkjemļo̧kin.
Āinwōt kōrā ro me enjeļ eo eaar loļo̧k er ilo jibbōn̄ in Ijtō eo, ikōnaan bar “mōkaj aō etal” im kōn “lem̧ōņōņō elap” ñan boktok naan eo ke emōj An jerkak.27 Ilo etan ad Rilo̧mo̧o̧r, Jisōs Kraist, amen.