Ālkin Raan eo Kein Kemen
Ilo ad bun̄ m̧aanļo̧k kōn tōmak ilo Jisōs Kraist, raan eo kein kemen enaaj baj wōt itok. E enaaj baj wōt itok n̄an jipan̄ kōj.
Āinwōt kar kakeememej kōj jibbon̄in rainin, rainin ej Palm Sunday, kōkaļļeik dreļo̧n̄ļo̧k eo an Rilo̧mo̧o̧r ilo Jerusalem im jinoin wiik eo ekwojarjar me kar tōlļo̧k n̄an Pinmuur eo An, eo ekar koba en̄taan eo An, An kar Drebwāāl, im Jerkakpeje eo An.
Ejjab to m̧okta jān dreļo̧n̄ļo̧k eo An n̄an jikin eo me kar kanaan kake, Jisōs Kraist ekar ļap an boub ilo jerbal in kwaļo̧k naan eo An ke ekar bōk ennaan eo jān ro m̧ōttan rejitōnbōro Meri im Marta ke ļeo jeier Lazerōs ekar nan̄inmej.1
Men̄e ekar kauwōtata nan̄inmej eo an Lazerōs, Irooj “Ej pād wōt ruo raan ijo Ear pād ie. Ālkin iien eo Ej ba n̄an ro rū kaļoran, Jen bar ilo̧k n̄an Judia.”2 M̧okta jān an jinoe iaļ eo n̄an jibadōk m̧weo m̧ōn ro M̧ōttan ilo Bethany, “Jisōs e ba n̄an [rikaļoor ro An] ilo alikkar, Lazerōs e mej.”3
Ke Jisōs ekar itok n̄an Bethany im m̧okta ioon Marta im kiiō Meri—bōlen kōn illu kōn An rūm̧uj—ekar iakiakweiki E im ba, “Irooj, eḷan̄n̄e Kwaar pād ijin, jeiō im jatū ṃaan e jāmin kar mej.”4 Marta ekar ba ilo an inepata, “Ilo iien in e puwaḷ, bwe emān raan ear mej.”5
Raan kein emen rekar ļap aer aorōk n̄an Meri im Marta. Ekkar n̄an jeļā ko an Riju ro, kar tōmak bwe jetōb eo an juon armej eo emej ej pād wōt ilo ānbwin eo ilo jilu raan, leļo̧k kōjatdikdik bwe ej wōr wōt mour. Ijo wōt ke, ilo raan eo kein kemen kōjatdikdik eo ekar jako, bōlen kōnke ānbwin eo enaaj kar jino jorreen im “puwaļ.”6
Meri im Marta rekar pād jekjek eo ejjeļo̧k kōjatdikdik ie. “ke Jisōs ej lo an [Meri] jañ, … Ej limō ilo an im būrom̧ōj, im jan̄,
“Im ba, Ewi ijo kom̧ ar likūt e? Re ba n̄an e, Irooj, kwōn itok im loe.”7
Ej ilo iien in ke Jisōs ekar kepaakļo̧k lōb eo me jej loe juon iaan kabwilōn̄lōn̄ ko ilo iien jerbal in kwaļo̧k Naan eo An ilo mour in. M̧oktata Irooj eaar ba, “Kom̧win joļo̧k ejm̧aan eo.”8 Innem ālkin kam̧m̧oolole Jemen, “ekar lam̧ōj kōn ainikien eļap, Lazerōs, kwōn itok.
Im eo eaar mej ej itok, kūtimi pein im neen kōn nuknuk in mej, im turun mejān lukwōje kōn bwinin mej. Jisōs e ba n̄an er, Kom̧win kōtļo̧k e bwe en ilo̧k.”9
Ejjeļo̧k oktak jān Meri im Marta, ewōr ad iien em̧m̧an n̄an en̄jake aolepen mour wabanban in, em̧ool bar būrom̧ōj10 im m̧ōjņo̧.11 Kajjojo iaad jenaaj ioon metak bōro me ej itok jān mej eo an juon eo ejitōnbōro ippād. Iaļan jibadbad eo ad ilo mour in emaron̄ koba nan̄inmej ko ad make ak nan̄inmej eo ekōmetak an juon eo jej iakwe; būrom̧ōj, im inepata, ak apan̄ ilo ājmour ko jet ilo kōļmenļo̧kijeņ; apan̄ ilo jāān; karmejete; jerawiwi. Im jet iien men kein rej itok ippāņtok en̄jake in ejjeļo̧k kōjatdikdik. Ijjab oktak. Āinwōt kwe, em̧ōj aō en̄jake jako an juon eo ejitōnbōro im apan̄ ko ejjeļo̧k jem̧ļo̧kier jemaron̄ kōtmene ilo mour in. Aō ej iookļo̧ke bwebwenato in kōn Rilo̧mo̧o̧r im ta eo ej katakin n̄a kōn jemjerā eo ad Ippān.
Ilo iien inepata ko ad reļļap, jej, āinwōt Meri im Marta, kappukot Rilo̧mo̧o̧r ak kajjitōk ippān Jemen kōn kōjparok eo An ekwojarjar. Bwebwenato eo kōn Lazerōs ej katakin kōj pedped in katak ko me remaron̄ jerbal n̄an mour ko ad make ilo ad jelm̧ae apan̄ ko ad kajjojo armej.
Ke Rilo̧mo̧or ekar tōprakļo̧k ilo Bethany, ekar ejjeļo̧k kōjatdikdik ke Lazerōs enaaj kar mour—em̧ōj an de emen raan, in an jako. Jet iien ilo iien apan̄ ko ad make, jemaron̄ en̄jake ke Kraist erūm̧wuj n̄an jipan̄ im kōjatdikdik im tōmak ko ad rej pād ilo idajon̄jon̄. Aō kam̧ool im naan in kam̧ool rej bwe ilo ad bun̄ m̧aanļo̧k kōn tōmak ilo Jisōs Kraist, raan eo kein kemen enaaj baj wōt itok. E enaaj baj wōt itok n̄an jipan̄ kōj ak kōrooltok kōjatdikdik ko ad. E ekar kallim̧ur:
“En jab pok būruemi.”4
“I jāmin likūt kom̧ atajinemjen: I naaj iwōj n̄an kom̧.”13
Jet iien jemaron̄ ļōmņak āinwōt n̄e Ejjab itok n̄an kōj m̧ae raan eo kein kemen, ālkin wōt an jako aolep kōjatdikdik. Bōtaab etke eļap an rūm̧uj? Būreejtōn Thomas S. Monson ekar katakin, “Jemedwōj Ilan̄, eo ej letok eļap n̄an lan̄lōn̄ kaki, Ej barāinwōt jeļā bwe jej katak im eddōkļo̧k im kajoorļo̧k ilo ad jelm̧ae im jo̧o̧r jān mellijon̄ ko me jej aikuj eļļā jāni.”14
Em̧ool bar Rikanaan Josep Smith ekar jelm̧aik en̄jake eo eļap āinwōt raan eo kein kemen. Keememej akweļap eo an? “O Anij, kwo pād ia? Im ia eo em̧ nuknuk eo ej kalbubu jikin tilekek eo Am̧?”15 Ilo ad lōke E, jemaron̄ kōtmene juon uwaak āinwōt in: “Nejū m̧aan [ak kōrā], aenōm̧m̧an n̄an jetōb eo am̧; inepata im jorrāān kein am̧ rej n̄an wōt jidik iien.”16
Bar juon ennaan jemaron̄ ekkatak jān bwebwenato in Lazerōs ej ta eddo eo ad ej āinwōt ilo jipan̄ eo ekwojarjar me jej kappukote. Ke Jisōs ekar kepaakļo̧k lōb eo ,E ekar m̧okta ba n̄an ro rekar pād ijo, “Kom̧win joļo̧k ejm̧aan eo.”17 Kōn kajoor eo ewōr ippān Rilo̧mo̧o̧r, ta E eban kar kōm̧akūtļo̧k ilo kabwilōn̄lōn̄ ejm̧aan eo kōn ejjeļo̧k kijejeto? Menin enkar ļap an kabwilōn̄lōn̄ n̄an loe im juon en̄jake ban meļo̧kļo̧k, ak E ekar ba n̄an ro jet, “Kom̧win joļo̧k ejm̧aan eo.”
Kein karuo, Irooj “ej lam̧ōj kōn ainikien eļap, Lazerōs, kwōn itok.”18 Enkar ke jab ļapļo̧k an kabwilōn̄lōn̄ n̄e Irooj enkar Ippān Make likūt Lazerōs ilo dreļo̧n̄ļo̧k eo ilo lōb eo bwe en maron̄ kajju waļo̧k n̄an jarlepju eo n̄e ejm̧aan eo ekar peļļo̧k?
Kein kajilu, ke Lazerōs ekar diwōjļo̧k, ekar m̧ōj “kūtimi pein im neen kōn nuknuk in mej, im turun mejān lukwōje kōn bwinin mej“. Jisōs ej ba n̄an er, Kom̧win kōtļo̧k e bwe en ilo̧k.”19 Ij tōmak Irooj emaron̄ kar kōm̧man bwe Lazerōs en jutak ilo m̧aan lōb eo, erreo kadede im em̧m̧an n̄an kepaake, ippān an m̧ōj limi nuknuk in mej ko an.
Ta unin n̄an kalikkar men kein? Kajjojo iaan men kein jilu ewōr ippāer juon men ejjab oktak—ejjeļo̧k iaer ekar aikuj an jerbal kajoor eo ekwojarjar an Kraist. Ko im rikaļoor ro An remaron̄ kōm̧m̧ani, E ekar katakin er n̄an kōm̧m̧ane. Rikaļoor ro ewōr aer maron̄ n̄an make kōm̧akut ejm̧aan eo; Lazerōs, ālkin wōt kar kōjerkake, ekar wōr ippān maron̄ eo n̄an jutak im kwaļo̧k e make ilo m̧aan lōb eo; im ro rej iakwe Lazerōs remaron̄ kanoojin kar jipan̄ e utikļo̧k nuknuk in mej ko an.
Ijowōt ke, ekar Kraist wōt eo ekar wōr an kajoor im mālim n̄an kōjerakak Lazerōs jān mej. En̄jake eo aō ej bwe Rilo̧mo̧o̧r ej kōtmene kōj n̄an kōm̧m̧ane aolep me jemaron̄e, im E enaaj kōm̧m̧ane ta eo E wōt emaron̄ kōm̧m̧ane.20
Jejeļā bwe “tōmak [ilo Jisōs Kraist] ej juon pedped in katak kōn jerbal”21 im “kabwilōn̄lōn̄ ko rej jab kwaļo̧k tōmak, ak tōmak ekajoor ej waļo̧k jān pokake gospel eo an Jisōs Kraist. Ilo bar jet naan, tōmak ej itok jān mour jim̧we.”22 Ilo ad kajjeon̄ n̄an jerbal jim̧we jān ad kōm̧m̧ani im kōjparok bujen ko rekwojarjar im mour kōn katak ko an Kraist ilo mour ko ad, tōmak eo ad eban wōt bwe n̄an an ineek kōj n̄an raan eo kein kemen, ak kōn jipan̄ eo an Irooj jenaaj bar maron̄ kōm̧m̧akutļo̧k dekā ko rej pinej iaļ eo ad, jutak jān būrom̧ōj, im mijaļļo̧k kōj jān ta eo ej lukwoj kōj. Ilo an Irooj kōtmene kōj n̄an “kōm̧m̧ani aolep men kein ilo ad kajoor,”23 Keememej bwe E enaaj letok jipan̄ eo jej aikuji ilo aolepen men kein ilo ad lōke E.
Ekōjkan ad maron̄ kōm̧makūtlo̧k dekā ko im ekkal ioon ejm̧aan eo An?24 Jemaron̄ depdepļo̧k ilo kapilōk ko an rikanaan ro.
N̄an waanjon̄ak, Oktoba eo ļo̧k, Būreejtōn Russell M. Nelson ekar akweļap ippād n̄an bōk eddo in make naan in kam̧ool ko ad kōn Rilo̧mo̧o̧r im gospel eo An, n̄an jerbali im kajiririik er, n̄an naajdrik er m̧ool eo, im jab kakkuri kōn katak ko reriab an ro rejjab tōmak. Ekar kallim̧uri kajjojo iaad, “Ilo am̧ kōm̧m̧an bwe kōkajoorļo̧k naan in kam̧ool eo am̧ ilo Jisōs Kraist en im̧aantata, lale kabwilōn̄lōn̄ ko renaaj waļo̧k ilo mour eo am̧.”25
Jemaron̄ kōm̧m̧ane menin!
Ekōjkan ad maron̄ jutak im wōnm̧aantak? Jemaron̄ ukweļo̧k ilo lan̄lōn̄ im kāālet n̄an pokake kien ko. Irooj ekar ba, “Eo kien ko Aō ippān, im ej kōjparoki, e in ej iakwe Eō. Im eo ej yokwe Eō Jema enaaj yokwe e im inaaj yokwe e im Inaaj kwaļok Eō n̄an e.”26 Jemaron̄ kajjeon̄ n̄an ukweļo̧k kajjojo raan im m̧ōņōņō ilo ad wōnm̧aanļo̧k kōn juon bōro obrak kōn ikdeelel in iakwe eo n̄an Irooj.
Jemaron̄ kōm̧m̧ane menin!
Ekōjkan ad maron̄, kōn jipan̄ eo an Irooj, mejaļļo̧ke kōj jān aolep men ko rej lukwoj kōj? Jemaron̄ jōke ippād n̄an liāpe kōj make m̧oktata im eļaptata n̄an Jemedwōj Ilan̄ im Eo Nejin, Jisōs Kraist, kōn bujen ko. Elder D. Todd Christofferson ekar katakin: “Ta unjen jipan̄ eo n̄an [ad] kajoor ilo mour in im ilo jetōb, im ekōjkan ad maron̄ bōke? Jipan̄ eo ej Anij. Maron̄ n̄an bōk kajoor in ej itok jān bujen ko ad Ippān. … Ilo kallim̧ur kein rekwojarjar, Anij ej kapen E make n̄an rejtak, karreoik, im kakwojarjar kōj n̄an ukot tok kōn kallim̧ur eo ad n̄an jerbal n̄an E im kōjparok kien ko An.”27 Jemaron̄ kōm̧m̧an im kōjparok bujen ko rekwojarjar.
Jemaron̄ kōm̧m̧ane menin!
Kom̧win joļo̧k ejm̧aan eo. Kwon itok. Kom̧win kōtļo̧k e bwe en ilo̧k.
Kapilōk ko, kien ko, im bujen ko. Jemaron̄ kōm̧m̧ane menin!
Elder Jeffrey R. Holland ekar kallim̧ur, “Jet kōjeraam̧m̧an ko em̧ōkaj aer itok, im jet rejjab itok m̧ae lan̄, bōtaab ro rej kautiej gospel eo an Jisōs Kraist, rej itok.”28
Im āliktata, “Kōn menin, kom̧in m̧ōņōņō, im jab mijak, bwe N̄a Irooj Ij pād ippemi, im inaaj jutak ippemi.”29
En̄in ej kam̧ool eo aō im naan in kam̧ool eo aō, ilo et eo ekwojarjar Etan eo enaaj aolep iien itok, em̧ool Jisōs Kraist, amen.