“Kwo Naaj Jokwe ilo N̄a, im N̄a ilo Kwe; Kōn Menin Etetal Ippa”
Kallim̧ur eo an Rilo̧mo̧o̧r eo n̄an jokwe ilo kōj ej m̧ool im epād n̄an aolep rikōjparok bujen membōr in Kabun̄ eo An kar kōjepļaaktok.
Rikanaan in etto eo Inok, ekar kōmeļeļeik ilo Kallim̧ur M̧okta, Katak im Bujen Ko, im Bōōr Eo Eļap Wōņāān,1 ekar jipan̄ ilo ejake eo an jikin kweilo̧k an Zaion.
Bwebwenato eo jeje ko rekwojarjar an kūr eo an Inok n̄an jerbal ej kwaļo̧k bwe “eaar ron̄ juon ainikien jān lan̄, ej ba: Inok, nejū m̧aan, kwōn kanaan n̄an armej rein, im ba n̄an er—Ukeļo̧k, … bwe burueer rekar kanooj pen, im lo̧jiln̄ier reron̄iia n̄an ron̄jake, im mejaer rej jab maron̄ lo ettoļo̧k.”2
“Im ke Inok eaar ron̄ naan kein, eaar badikdik make n̄an laļ … im̧aan Irooj, im eaar kōnono im̧aan Irooj, im ba: Etke iaar lo jouj ilo Mejam̧, im n̄aij juon ļaddik wōt, im aolep armej rej dike eō; bwe n̄aij rum̧wij ilo kōnono; ekōjkan n̄aij karejeram̧?”3
Jouj im kile bwe ilo tōre in kūr eo an Inok n̄an jerbal, ekar lukkuun jeļā kōn likjab ko im jon̄an ko an make. Im ij eņo̧ik aolepād wōj ilo juon tōre ak bar juon ilo jerbal eo an ilo Kabun̄ in kar en̄jake ainļo̧k wōt Inok. Bōtaab ij tōmak uwaak eo an Irooj n̄an akweļap in kajjitōk eo an Inok ej kōmeļeļeik im jerbal n̄an kōj wōj kajjojo rainin.
“Im Irooj eaar ba n̄an Inok: Kwōn ilo̧k im kōm̧m̧an āinwōt Iaar jiron̄ eok, im ejjeļo̧k armej enaaj wākare eok. Kwōn kōpeļļo̧k lo̧n̄iūm, im enaaj obrak, im Inaaj lewōj n̄an eok ekkōnono. …
“Lo Aō Jetōb ej pād ioom, kōn menin aolep naan ko am Inaaj kajejjeti; im toļ ko renaaj ko im̧aam, im reba ko renaaj oktak jān aer to̧o̧rļo̧k; im kwo naaj jokwe ilo N̄a, im N̄a ilo kwe; kōn menin etetal Ippa.”4
Āliktata Inok ekar erom juon rikanaan ekajoor im juon kein jerbal ilo pein Anij n̄an kadedeļo̧k juon jerbal eļap, bōtaab ekar jab jino jerbal in karejar eo an ij jekjek jab eo! Ijo ke, maron̄ eo an ilo iien ko ekar ļapļo̧k ilo an kar ekkatak n̄an jokwe ilo im etetal ippān Nejin Anij.
Ij lukkuun jar kōn jipan̄ eo an Jetōb Kwojarjar ilo ad ļōmņak ippān kōn kapilōk eo kar leļo̧k n̄an Inok jān Irooj im ta meļeļe in n̄an kwe im n̄an rainin.
Kwo Naaj Jokwe ilo N̄a
Irooj Jisōs Kraist ej letok n̄an kōj kajjojo kūr eo n̄an jokwe ilo E.5 Bōtaab ekōjkan ad lukkuun in ekkatak im itok n̄an jokwe ilo E?
Naan eo jokwe ej kwaļo̧k pād wōt ak jab m̧akūtkūt im niknik ilo ejjeļo̧k ajeļo̧k. Elder Jeffrey R. Holland ekar kōmeļeļeik bwe “jokwe” ej meļeļe in “‘[n̄an] pād—ak [n̄an] pād n̄an indeeo.’ En̄in ej kūr eo an ennaan eo an gospel eo n̄an … jabdewōt … ilo laļ in. Itok, bōtaab itok in pād wōt. Itok kōn lōke im niknik. Itok n̄an indeeo, n̄an jibadbad eo am̧ im jibadbad eo an aolep epepen ko me rej aikuj ļoor eok.”6 Kōn menin, jej jokwe ilo Kraist ilo ad dim im kijin̄en̄e ilo wujlepļo̧k eo ad n̄an Rilo̧mo̧o̧r eo im jibadbad ko An rekwojarjar, ilo iien ko rem̧m̧an im nana.7
Jej jino jokwe ilo Irooj kōn kōjerbal anemkwoj eo ad ilo mour in n̄an bōk iood make ine eo An8 kōn bujen ko im kain̄i ko an gospel eo kōjepļaaktok. Bujen ekkejel eo ewōr ippād ippān Jemedwōj Ilan̄ im Nejin jerkakpeje emour ej un eo eļap tata an kōļmenļo̧kjeņ, kōjatdikdik, kajoor, aenōm̧m̧an, im lan̄lōn̄ eo indeeo, ej barāinwōt pedped eo epen9 me jej aikuj kalōk ad mour ie.
Jej jokwe ilo E kōn kajjieon̄ wōt n̄an kōkajoorļo̧k kadkad in bujen eo ad kajjojo ippān Jemen im Nejin. N̄an waanjon̄ak, m̧ool in jar n̄an Jemed Indeeo ilo etan Nejin Jitōnbōro ej kam̧wilaļļo̧k im bōbrae bujen ekkejeļ eo ad Ippāer.
Jej jokwe ilo E kōn m̧ool in kwojkwoj ioon naan ko an Kraist. Katak eo an Kraist ej kepaakļo̧k kōj, āinwōt ajri in bujen ro, epakeļo̧k E10 im naaj jiron̄ kōj men ko jej aikuj kōm̧m̧ani.11
Jej jokwe ilo E kōn m̧ool in kōppopo n̄an bōk kuņaad ilo kain̄i eo an kwojkwoj eo, bar etale im kejekļo̧kjeņ kōn bujen kallim̧ur ko ad, im m̧ool in ukweļo̧k. Erreo ilo bōk kwojkwoj eo ej juon kam̧ool n̄an Anij bwe jej m̧ōņōņō in bōk iood make etan Jisōs Kraist im kajjieon̄ n̄an “keememej e iien otemjej”12 ālkin juon tōre in iien ekadu kar aikuji n̄an bōk kuņan ilo kain̄i in ekwojarjar.
Im jej jokwe ilo E kōn jerbal n̄an Anij ilo ad jerbal n̄an ajri ro Nejin im jerbal in karejar n̄an ro jeid im jatid.13
Rilo̧mo̧o̧r eo ekar ba, ““Eļan̄n̄e kom̧ij kōjparok kien ko aō, kom̧ naaj pād ilo aō yokwe; im āinwōt Iar kōjparok kien ko an Jema, im ij pād ilo an yokwe.”14
Ilo tukadu in ikar kōmeļeļeik emen wōt wāween ko jemaron̄ jokwe ippān Rilo̧mo̧o̧r. Im kiiō ij kajjitōk ippād kajjojo āinwōt ro Rikaļoran n̄an kajjitōk, kappukōt, kaļļaļļaļ, im ekkatak kōn kōj make kōn kajoor eo an Jetōb Kwojarjar jekjek ko jet raorōk jemaron̄ kōm̧m̧an bwe Kraist en dilepān mour ko ad ilo aolep men ko me jej kōm̧m̧ani.
Im N̄a ilo Kwe
Kallim̧ur eo an Rilo̧mo̧o̧r eo n̄an ro rikaļoran eļap an aorōk: eļan̄n̄e jej jokwe ilo E, E enaaj jokwe ilo kōj. Bōtaab ilo m̧ool emaron̄ n̄an pidodo n̄an Kraist n̄an an jokwe ilo kwe im n̄a—kajjojo im juon make. Uwaak eo n̄an kajjitōk in ej juon aaet ejjeļo̧k kajjitōk kake.
Ilo Bok in Mormon, jej ekkatak bwe katak eo an Alma im kam̧ool eo n̄an ro rijeram̧ōl me en̄taan ko aer raar kipel er n̄an ettā. Ilo naan in kōmeļeļe eo an, ekar keidi naan eo n̄an juon ine me aikuj kar katōke im kōkkaajiriri, im ekar kōmeļeļeik “naan eo” āinwōt mour, mijen, im pinmuur in karmejete eo an Jisōs Kraist.
Alma ekar ba, “Eļan̄n̄e āindein, wo naaj itok ioomi; ak eļan̄n̄e ejjab āindein, innām kom̧in reilo̧k im jino tōmak ilo Nejin Anij, bwe Enaaj itok n̄an lo̧mo̧o̧ren armej ro An, im bwe Enaaj en̄taan im mej n̄an pinmuur kōn jero̧wiwi ko aer, im bwe Enaaj bar jerkak jān ro remej, eo enaaj kakūrm̧ool jerkakpeje, bwe aolep armej renaaj jutak Im̧aan, n̄an ekajet ilo raan eo āliktata im raan in ekajet, ekkar n̄an jerbal ko aer.”15
Kar letok kōmeļeļe eo an “naan eo” jān Alma, jouj im ļōmņak kōn ekkejeļ eo eim̧we ekar kwaļo̧ke.
“Im kiiō … Ikōņaan bwe kom̧in kab kalbwini naan eo ilo būruōmi, im ke ej jino n̄an juļ em̧ool āindein ņa kōņin kōn tōmak eo ami. Im lo, enaan erom juon wōjke, im jebarļo̧k ilo kom̧ n̄an mour eo ejjeļo̧k jem̧ļo̧kin. Innām Anij en lewōj n̄an kom̧ bwe eddo ko ami ren mera; kōn lan̄lōn̄ an Nejin. Im em̧ool aolep men in kom̧ maron̄ kōm̧m̧an eļan̄n̄e kom̧ kōņaan.”16
Ine eo jej aikuj kajjieon̄ katōke ilo būruōd ej naan eo—em̧ool mour eo, mijen eo, im katak eo an Jisōs Kraist. Im ilo an naan eo najdik kōn tōmak, emaron̄ erom juon wōjke ejbarļo̧k ilo kōj n̄an mour eo ejjeļo̧k jem̧ļo̧kin.17
Ta kar kakōļļe eo an wōjke eo ilo visōn eo an Liai? Wōjke eo maron̄ watōke āinwōt juon ribōk jikin Jisōs Kraist.18
Ro jeiū im jatū jitōnbōro, Naan eo ej ke pād ilo kōj? M̧ool ko an kojpeļ eo an Rilo̧m̧o̧o̧r eo rejeje ke lo tebōļ in kanniōk ko ilo būruōd?19 Jej ke itok n̄an im jidik kōn jidik eromļo̧k āinwōt E? Wōjke in Kraist eo ej ke eddōkļo̧k ilo kōj? Jej ke kajjieon̄ n̄an erom “[men in kōm̧anm̧an ko] ekāāl”20 ilo E?21
Bōlen kōjatdikdik kabwilōn̄lōn̄ in ekar im̧we Alma n̄an kajjitōk: “Kom̧ nan̄in ke ilo jetōb kar ļotak jān Anij? Kom̧ ar bōk ke nememen ilo paotok ko ami? Kom̧ ar bōk ke oktak in ekajoor ilo būruōmi?”22
Jej aikuj aolep iien keememej naan in kōmeļeļe eo an Irooj n̄an Inok: “Kwo naaj jokwe ilo n̄a, im N̄a ilo kom̧23 Im ij kam̧ool kōn kallim̧ur eo an Rilo̧mo̧o̧r eo n̄an jokwe ilo kōj ej m̧ool im epād n̄an aolep rikōjparok bujen membōr in Kabun̄ eo An kar kōjepļaaktok.
Kōn menin etetal Ippa
Rijilōk Paul ekar kapilōk ritōmmak ro me raar bōk Irooj: “Āindein kom̧win etetal ilo e.”24
Etetal ilo im ippān Rilo̧mo̧o̧r eo ej kōmejajaik ruo ļamļam ko raorōk an kaļoor: (1) pokake kien ko an Anij, im (2) keememej im kautiej bujen ko rekwojarjar me rej kakkejel kōj n̄an Jemen im Nejin.
Jon ekar kean̄:
“Im ilo men in je jeļā bwe jej jeļā e, eļan̄n̄e jej kōjparok kein ko An.
“Eo ej ba, I jeļā e, im e jab kōjparok kien ko an, ej ri riab, im m̧ool e jab ilo e.
“A jabdewōt eo ej kōjparok an in naan, ilo e e m̧ool ar koweeppān yokwe Anij ilo e: ilo men in je jeļā bwe jej ilo e.
“Eo e ba kwe ej pād ilo e n̄an etetal, āinwōt aō kar etetal.”25
Jisōs ej jeaļe n̄an kōj kajjojo, “Itok, ļoor eō”26 im “etetal Ippa.”27
Ij kam̧ool bwe ilo ad bun̄ m̧aanļo̧k ilo tōmak ilo etetal ilo ettā in Jetōb eo an Irooj,28 jej jeraam̧m̧an kōn kajoor, tōl, kōjparok, im aenōm̧m̧an.
Naan in Kam̧ool im Kallim̧ur
Alma ej kōmeļeļeik juon jabnejej em̧m̧an jān Irooj n̄an aolep jetōb ko remour:
“Lo, E ej jilkintok juon karuwainene n̄an aolep armej, bwe pein tūriam̧okake rej erļo̧k n̄an er, im ej ba: Kom̧in ukeļo̧k, im Inaaj bōk kom̧.
“… Kom̧in itok n̄an ippa im kom̧ naaj bōk leen wōjke in mour; aaet, kom̧ naaj m̧ōn̄ā im idaak jān pilawā im dān in mour ilo anemkwōj.”29
Ij kōmejajaik lukkuun eitōn aolepān jabnejej eo an Rilo̧mo̧o̧r eo. E ej jan̄nuwade n̄an kōjeraam̧m̧an kōn jouj im meanwōd eo An aolep kajjojo armej me rej mour kiiō, ro raar mour, im ro rejjan̄n de mour ioon laļ in.
Jet membōr in Kabun̄ in rej bōk āinwōt katak eo em̧ool, pedped in katak ko, im naan in kam̧ool ko kar ālijin kean̄ kaki jān jikin kōnono in ilo Im̧ōn Kweilo̧k in im ilo jarlepju ko ijo jokwe ie ipeļaakin laļ in—im aaet elōn̄ ļon̄tak n̄an tōmak m̧ool kein indeeo rej jerbal eļap tata ilo mour ko aer im n̄an jekjek ko aer. Rej lukkuun tōmak im jerbal ilo pokake, bōtaab bujen ekkejel eo aer ippān Jemen im Nejin Ripinmuur ejjan̄in de erom juon m̧ool emour in eoktak ilo mour ko aer.
Ij kallim̧ur bwe kōn kajoor eo an Jetōb Kwojarjar, kom̧ maron̄ jeļā im en̄jake m̧ool ko an gospel eo ikar kajjieon̄ kōmeļeļeik rej n̄an kom̧—n̄an kom̧ kajjojo im ami make.
Ij kam̧ool ilo lan̄lōn̄ bwe Jisōs Kraist ej ad Rilo̧mo̧o̧r im Ripinmuur ej iakwe im emour. Eļan̄n̄e jej jokwe ilo E, E enaaj jokwe ilo kōj.30 Im ilo ad etetal ilo im Ippān jenaaj jeraam̧m̧an n̄an bōk m̧aantak eļap leen. Ij kam̧ool menin ilo āt eo ekwojarjar etan Irooj Jisōs Kraist, amen.