Katak ko an Jisōs Kraist
Kar letok n̄an kōj jeje ko rekwojarjar n̄an tōl mour ko ad. Ennaan eo aō rainin ej kobain naan ko an Rilo̧mo̧o̧r me ikar kāāleti kōn—ta eo Eaar ba.
Kemij tōmak ilo Kraist. Āinwōt membōr ro ilo Kabun̄ eo an Jisōs Kraist im Armej ro Rekwojarjar ilo Raan Ko Āliktata, jej kabun̄jar n̄an E im ļoor katak ko An ilo jeje ko rekwojarjar.
M̧okta jen Wōtļo̧k eo, Jemedwōj Ilan̄ ekar kōnnaan n̄an Adam im Iv. Ālkin wōt, Jemād eaar kwaļo̧k kadkadin Nejin Emake Wōt, Jisōs Kraist, āinwōt ad Rilo̧mo̧o̧r im Ripinmuur im letok n̄an kōj kean̄ n̄an “ron̄jake E.”1 Jān tōl in jej lo bwe rekoot in jeje ko rekwojarjar kōn naan ko kōnono jān “Anij” ak “Irooj” enan̄in aolepeer rej naan ko an Jeova, ad Irooj jerkakpeje, Jisōs Kraist.2
Kar letok n̄an kōj jeje ko rekwojarjar n̄an tōl mour ko ad. Nipai ej karuweinene kajjojo iaad n̄an ‘kwōjkwōj ioon naan ko an Kraist; bwe lo, naan ko an Kraist renaaj jiron̄ kom̧ aolep men ko kom̧ij aikuj kōm̧m̧an.”3 Aolep jeje ko rekwojarjar kar je kōn jerbal in kwaļo̧k naan eo an Jisōs ioon laļin me Ekar kōm̧m̧ane. Ennaan eo aō rainin ej kobain naan ko an Rilo̧mo̧o̧r me ikar kāāleti kōn—ta eo Eaar ba. Naan kein kar je ilo Kallim̧ur Ekāāl (ekoba kakkobaba ko reim̧we an Josep Smith) im ilo Bok in Mormon. Enan̄in aolepen naan ko ikar kāāleti rej juon wōt ilo naan ko me Rilo̧mo̧o̧r eaar kōnono kaki.
“E m̧ool, e em̧ool, Ij ba n̄an eok, eļan̄n̄e armej e jab ļotak jān dān im Jetōb, e jab maron̄ deļo̧n̄ ilo aelōn̄ in Anij.”4
“Em̧ōņōņō ro aolep … rej kwōle im maro kōn wānōk, bwe renaaj obrak kōn Jetōb Kwōjarjar5
“E m̧ōņōņō ro ri kōllaajrak, bwe naaj ņa etaer ro nejin Anij.”6
“Koṃ ar ron̄ bwe ar ba, ‘Kwōn jab ļōn̄:
“A Ij ba n̄an koṃ, jabdewōt eo ej kallimjek kōrā im mejkaiie em̧ōj an ļōn̄ ippān ilo būruon.”7
“Koṃ ar ron̄ bwe ar ba, Kwōn yokwe ri turum̧, im kūtōtōkake ri kōjdate eok.
“A Ij ba ñan koṃ, koṃwin yokwe ro ri kōjdate koṃ, im jar kōn ro rej matōrtōr koṃ;
“Bwe koṃwin ro nejin Jememwōj i lañ; bwe Ej kotak aḷ ioon ro re nana im ioon ro reṃṃan, im kowōt ioon ro rū wānōk im ioon ro re jab wānōk.”8
“Bwe eļan̄n̄e kom̧ij jeorļo̧k bōd ko an armej, barāinwōt Jememwōj ilan̄ E naaj jeorḷọk bōd ko ami:
“A eļan̄n̄e kom̧ jab jeorļo̧k bōd ko an armej, barāinwōt Jememwōj e jāmin jeorļo̧k bōd ko ami.”9
“Eļan̄n̄e kom̧ an laļ, laļ enaaj kar yokwe men eo an; a bwe kom̧ jab an laļ, a Iar kāālōt kom̧ jān laļ, kōn men in laļ ej kōjdate kom̧.”10
“Kōn menin, jab kappukot men ko an laļ in a kom̧in kappukot m̧okta n̄an kalōk aelōn̄ in Anij, im n̄an kajutak kwōjarjar eo An, im aolep men kein otemjeļo̧k naaj koorļo̧k n̄an kom̧.”11
“Innām men otemjej jabdewōt koṃij kōṇaan bwe armej ren kōṃanṃan ñan koṃ, en āindein ami kōṃanṃan ñan er, bwe men in kien im ri kanaan ro.”12
“Koṃwin kōjparok koṃ jān ri kanaan riab, ro rej itok ñan ippemi kōn wāween sip, a ilo būrueir āinwōt wolf ko re lāj.
“Koṃ naaj jeḷā kajjier kōn leir. Armej rej ḷotḷot grep jān kālōklōk ko, ak fig jān mar nana ke?
“Āindein wōjke eṃṃan otemjej rej jebar im eṃṃan leir, a wōjke e nana e jebar im e nana leen.”13
“Jab otemjej rej ba ñan Eō, Irooj, Irooj, re naaj deḷọñtok ilo aelōn̄ in lan̄, a eo ej kōm̧anm̧an ankilaan Jema ej pād i lan̄.”14
‟Koṃwin itok ñan Ippa, koṃ otemjej rej jerbal im ban, im Inaaj kakkijeik koṃ.
‟Koṃwin bōk Aō ine im likūte i aerami, im katak Ippa, bwe Ij ineeṃṃan im ettā būruō, im koṃ naaj lo an ami kakkije.
“Bwe Aō ine ej eṃṃan, im men eo Ij ineke e mera.”15
“Eļan̄n̄e jabdewōt armej e kōṇaan ḷoor Eō, en make kaarmejjete, im bōk debwāāl eo an, im ḷoor Eō.
“Bwe jabdewōt eo e kōṇaan lọmọọren mour eo an, mour enaaj jako jān e; im jabdewōt eo mour enaaj jako jān e kōn N̄a, enaaj lo e.”16
“Kōn menin, kaarmejete laļ in, im lo̧mo̧o̧ren ami, bwe ta kokjān n̄an juon armej, eļan̄n̄e enaaj bōk aolepān laļ, im joļo̧k an make?? Ak ta eo juon armej enaaj leļo̧k bwe en oktan an?”17
“Eļan̄n̄e jabdewōt armej e kōņaan kōm̧anm̧an ankilaan, e naaj jeļā kōn naan in katak eo, eļan̄n̄e e jān Anij, ak Ij kōnono kōn N̄a wōt.”18
“Im Ij ba ñan koṃ, kajjitōk, im naaj lewōj n̄an koṃ; kappukot, im koṃ naaj loe; kaļļaļļaḷ, im enaaj peḷḷọk n̄an koṃ.
“Bwe ro otemjej rej kajjitōk rej bōk; im eo ej pukot, ej loe; im eo ej kaḷḷaḷḷaḷ enaaj peḷḷọk n̄an e.”19
“Im bar jet Aō sip, re jab jān oror in; eṃṃan barāinwōt In ān̄intok er, im renaaj ron̄ ainikiō; im renaaj juon wōt bwij, im juon seperd.”20
“Jisōs e ba n̄an e, “N̄a jerkakpeje eo im mour eo. Eo ej lōke Eō, men̄e e mej, enaaj bar mour.
“Im jabdewōt eo ej mour im lōke Eō, e jāmin mej indeeo.”21
“[Kien eo eḷap ilo kien ko ej] kwōn yokwe Irooj am̧ Anij kōn aolepen būruom̧ im kōn aolepen am̧, im kōn am̧ ļōmņak otemjej.
“En̄in ej kien eo eļap im m̧oktata.
“Im eo kein ka ruo āinwōt in, Kwōn yokwe ri turum̧ im āinwōt kwe.
“Kien otemjej im ri kanaan rej ekkejel ilo kien kein ruo.”22
“Eo kien ko Aō ippān, im ej kōjparoki, e in eo ej yokwe Eō. Im eo ej yokwe Eō Jema enaaj yokwe e, im I naaj yokwe e, im I naaj kwaḷọk Eō n̄an e.”23
“Aenōṃṃan Ij likūt ṇa ippemi, Aō aenōṃṃan Ij lewōj n̄an koṃ. N̄a Ij lewōj n̄an koṃ, jab āinwōt an laḷ lewōj. En jab pok būruemi, im en jab lōļn̄o̧n̄.”24
““En̄in ej kien eo Aō, bwe kom̧win yokwe doon, āinwōt Iar yokwe kom̧.”25
“Koṃwin lale peiū im neō, bwe N̄a make: koṃwin likūt peimi ioō im lo; bwe jetōb ejjeḷọk kanniōkin im diin, āinwōt koṃij lo Ippa.”26
“Innām koṃwin ilọk, im kōṃṃan ri aelōn̄ ko otemjej bwe ren ri kaḷora, im peptaij er ilo etan Jema im Nejin im Jetōb Kwōjarjar:
“Im katakin er bwe ren pokake naan ko otemjej I ar jiron̄ koṃ. Im lo, Ij pād ippemi iien otemjej, n̄an jeṃḷọkōn laḷ.”27
Ālkin jerbal eo An ilo Āneen kallim̧ur, Eaar waļo̧kļo̧k n̄an ro rōwānōk ilo āneen Amedka. Errein jet iaan naan ko Eaar kōnono ijeņ:
“Lo, N̄a Jisōs Kraist eo Nejin Anij. Iaar kōm̧anm̧an lan̄ ko im laļ, im men otemjeļo̧k ilo er. Iaar pād ippān Jema jān jinoin. N̄a ij ilo Jema, im Jema ilo N̄a, im ilo n̄a Jema eaar kaiboojoj e etan.”28
N̄aij meram im mour an laļ. N̄a Alpa im Omega, jinoin im jem̧ļo̧k in.
“Im kom̧ naaj jab ajetok n̄an Eō kōto̧o̧rļo̧k bōtōktōk; aaet, katok ko ami im katok kijeek ko ami naaj kōjjem̧ļo̧k i, bwe Iban bōk ejjeļo̧k iaan katok ko ami im katok kijeek ko ami.
“Im kom̧ naaj ajetok āinwōt juon katok n̄an Eō bōro e rup im jetōb ettā. Im jabdewōt eo ej itok n̄an Eō kōn juon bōro e rup im jetōb ettā, e Inaaj peptaiji kōn kijeek im kōn Jetōb Kwojarjar. …
“Lo, Iaar itok n̄an laļ n̄an bōktok lo̧mo̧o̧r n̄an laļ, n̄an lo̧mo̧o̧ren laļ jān jero̧wiwi.”29
“Im Ij bar ba n̄an kom̧, kom̧ij aikuj ukeļo̧k, im peptaij ilo Eta, im erom āinwōt juon ajri edik, ak ilo ejjeļo̧k wāween kom̧ ban jolōt e aelōn̄ in Anij.”30
““Kōn menin I kōņaan bwe kom̧in weeppān āinwōt N̄a, ak Jemāmi eo ej pād ilo lan̄ e weeppān ”31
Em̧ool, em̧ool, Ij ba n̄an kom̧, kom̧ aikuj ekkōl im jar iien otemjej, bwe kom̧in jab po ilo kapo an devil, im naaj tōlļo̧k kom̧ rikōm̧akoko n̄an e.”32
“Kōn menin, kom̧ aikuj iien otemjej jar n̄an Jema ilo Eta.”33
“Kōn menin, jabdewōt men kom̧ naaj kōm̧m̧an, kom̧ naaj kōm̧m̧an io Eta; kōn menin kom̧ naaj ņa eta kabun̄ eo ilo Eta.”34
“Lo Iaar lewōj n̄an kom̧ gospeļ eo Aō, im en̄in ej gospel eo Iaar lewōj n̄an kom̧—bwe Iaar itok n̄an laļ in n̄an kōm̧anm̧an ankilaan Jema, kōnke Jema eaar jilkintok Eō.
“Im Jema eaar jilkintok Eō bwe In maron̄ toto ioon debāāl; im ālkin kar kotak Eō ioon debāāl, bwe In maron̄ kan̄ōltok armej otemjej n̄an eō … n̄an ekajet kōn jerbal ko aer, eļan̄n̄e rem̧m̧an ak eļan̄n̄e renana.”35
“Kiiō en̄in ej kien eo: Kom̧in ukeļo̧k, kom̧ aolep jeban ko an laļ, im itok n̄an Eō im peptaij ilo Eta, bwe kom̧in maron̄ kokwōjarjar jān bōke Jetōb Kwōjarjar, bwe kom̧in maron̄ jutak ilo ejjeļo̧k libbijinjin im̧aō ilo raan eo āliktata.”36
Kemij tōmak ilo Kraist. In kōjem̧ļo̧ke kōn ta eo Eaar ba elmen ad aikuj jeļā im ļoor katak ko An.
“Ak Ri Kaaenōm̧m̧an, E Jetōb Kwojarjar, Eo Jema enaaj jilkintok ilo Eta, Enaaj katakin kom̧ men otemjej, im kakememej men otemjej n̄an kom̧, men ko Iar ba n̄an kom̧.”37
Ij kwaļo̧k aō naan in kam̧ool kōn m̧ool kein ilo etan Jisōs Kraist, amen.